الحلوة دي قامت تفطر مالقتش رغيف
والديك ينوح كوكوكوكو باردون يا نظيف
وحكومة عايقة وذكية وميه الميه
وقعده طريه تحت التكييف
صبح الصباح فتاح ياعليم
والبيت مافيهش ولا مليم
لا صحة نافعة ولا تعليم فـ الزمن الزيف
يا مصر يامه أنا فـ عرضك
حرست طولك مع عرضك
والعصبة دي سرقت أرضك
ألطف يا لطيف
يا مصر يامه الله يسامحك
ملامحي ماعادتش ملامحك
النيل فـ أرضك وفين قمحك
جاوب ياخفيف
لما المسائل قوي ماعت
والأرض بالمتر أتباعت
والناس فـ أرض النيل جاعت
في الشتاء والصيف
طول عمري شقيان وبعافر
طب ما أنتي عارفه الجوع كافر
أنا ح أركب البحر وأسافر
أصاد لي رغيف
ولو غرقت أبقي هاتيني
وفي قلب حضنك ضميني
وبطلي عياط وواريني
وبدون مصاريف
القمح بيجي لنا إعانه
واللقمه متعاصة إهانه
الشله تلهف إلا أنا
أنا اصلي عفيف
والحلوة دي قامت تفطر
مالقتش رغيف
بقلمي