[عاشق المستحيل557]

أنا مبسوط أوى وعاوز كل المنتدى يدخل يباركلى

أنا أتخلصت من العقدة اللى عندى وعند كل الناس

((( عقد ماباليد حيلة )))

ودلوقتى خلاص أنا بقول لأ براحتى ومن غير خوف

أنهاردة صحيت من النوم على صوت عمال الكهرباء بيكسروا فى الأسفلت

طلعت البلكونه لقيت كل الناس زعلانه على الأسفلت اللى لسه معمول

وكله بيقول (( ماباليد حيلة ))

قمت واخد نفس عميق وبأعلى صوت قلت (( لأ ))


وبعد كده نزلت أجيب عيش علشان أفطر وفى المخبز

لقيت طابور طويل عريض والناس هاتموت بعض علشان العيش

مع أن الرغيف بقا النص ومايتاكلش بس الناس هاتعمل أيه؟؟

وكله بيقول (( ما باليد حيلة ))

قمت واخد نفس عميق وبأعلى صوت قلت ((لأ ))


المهم قلت مش مشكلة أعتبر نفسى صايم أنهاردة

ولما حبيت أركب مواصلات لقيت الناس محشورة فى الميكروباص

وعلى الباب متشعلق يجى 4 ركاب والسواق بيقول الأجرة غليت

طبعا كل الناس قالوا (( ما باليد حيلة ))

وانا زى مانتو عارفين أخدت النفس العميق وقلت (( لا ))


رحت الكلية لاقيت الدكتور متأخر عن ميعاد المحاضرة ساعتين

ولما دخلت المحاضرة مش عارف ليه حسين أن النوم كبس عليا

ولقيت نفسى مش فاهم أى حاجة خالص منه زى مايكون قاصد مايفهمناش

والطلاب ياعينى كلهم قاطعين النفس ومحدش فاهم حاجة خالص

وكله خايف يقوم يسأل طبعا علشان اللى بيقوم الدكتور بيضحك الدفعة كلها عليه

ومش بعيد بعد كده يسحب الكارنية أو يلغيله الأمتحان

وكله بيقول (( ما باليد حيلة ))

أنا بقا ناويها من الصبح رحت واخد النفس العميق وقولت (( لأ ))


أخدت السى فى بتاعى ورحت أقدم على وظيفة فى الحكومة

طبعا هناك قابلت تقريبا نص شباب البلد وكلهم على سنجة عشرة

ولما سألت عن المرتب لقيته 100 جنية بالتمام والكمال

والناس طبعا هاتتجنن يعنى بعد تعب الدراسة دا كله يكون مرتبنا 100 جنية بس؟؟

بس كلهم بيقولوا (( ما باليد حيلة ))

وطبعا أنتو عارفين النفس العميق بتاعى وبأعلى صوت قلت (( لأ ))


المهم فضلت ماشى فى الشارع وفى كل حته أخد نفس عميق وأقول ( لأ )

لحد مانفسى أتقطع ولقيت نفسى ولا باكل ولا بشرب ولا بتعلم ولا بعمل أى حاجة

وبعد كده صحيت على رنة موبايلى قلت الو لقيت صحابى بيقولولى

صباح الخير يامحمد أحنا قاعدين بنلعب طاولة على القهوة هاتيجى ولا لأ؟؟

قمت قلتلهم طبعا هاجى ومش هاقول لأ هو أنا ناقص قطعة نفس؟؟

بس سؤالى ليكم هنا

هو أنا نفسى أتقطع علشان قلت لأ ولا علشان أنا لوحدى اللى قلت لأ ؟؟

ياريت تجاوبونى بسرعة

هو أحنا كلنا ليه مش بنقول لأ مع بعض؟؟

تحياتى