[Şα3Đ..♥]

بسم الله الرحمن الرحيم








جملتين بنسمعهم كتير قوي واحنا ماشين من شخص متعرفوش او من صاحبك او حتى انت اللي بتقولها

( وانا مالي / هي جات عليا )



طيب لحد امتى هتقول وانا مالى؟؟

فى شغلك وشايف زميلك بيرتشى ليه متنصحوش ؟




لما تكون فى بيتك وشايف جارك بيتكلم على دى ودى
ليه ماتقولوش ان بعض الظن اثم؟؟


لما تكون فى الشارع وشايف ولد ماشى يعاكس فى بنات الناس
ليه متوقفوش عند حده ؟؟؟


لما بتدخل اى مكان مش نضيف ليه مش بتنضفه
ده انت اللى هتقعد فيه؟؟


لما تكون فى المسجد وتلاقى حد بيصلى غلط
ليه متوجهوش للصح؟؟؟


لما تلاقى واحده ماشيه فى الشارع لابسه لبس غير محتشم
وحاطه علبه ميك اب على وشها وصوتها عاااااااالى
وضحكتها عاليه
ليه متوقفهاش وتنصحها؟؟


لما تلاقى واحد مريض محتاج منك مساعده ليه مش
بتمد ايدك بيها؟؟


لما تلاقى شاب بيضيع ليه متحاولش
تاخده معاك فى الطريق الصح؟؟



لما تشوف السرقه بعنيك
ليه مبتتكلمش؟؟


لما تشوف حد مظلوم
ليه مش بتنصره؟؟


لما تشوف حد محتاج
ليه مش بتديه؟؟





دى شويه نماذج من مجتمعنا
ناس عايشه كده وخلاص
مش عارفين هما عايشين ليه وبيعملوا ايه


بيقتصر دورهم داخل بيوتهم وبس
والخوف ان شويه بشويه
دورهم داخل بيوتهم كمان يتنسى


الاب يشوف ابنه مخنوق ومتضايق
ميفكرش يسأله مالك


الام تشوف بنتها قافله عليها اوضتها
وقاعده لوحدها متقولهاش مالك


الاخ بقى بيدخل البيت زائر
ميعرفش اخواته مالهم ولافيهم ايه





تفتكروا الوضع ده هيستمر لامتى؟؟
هنفضل لحد امتى سلبيين
هنفضل نقول وانا مالى



انتا عندك الجرأه تتكلم
غيرك لاء


ليه منبقاش من جوانا مقتنعين
ان ادام بقول الحق ميهمنيش حد
ليه منخليش ده العادى بتاعنا


نشوف غلط جرى عليه نصلحه مش نقدم رجل ونأخر رجل



سألت سؤال على جوجل امتى هنبطل سلبيه؟؟


واحد رد عليا قالى احنا مش بنتحرك الا فى اخر وقت


وشكلنا كده مستنيين اخر وقت...





سألت سؤال تانى لما يتشوف الغلط بتصلحي ولا بتقول وانا مالى؟؟


جالى رد قال بتحرج حد يكسفنى


ورد قال لو اعرف الشخص ممكن اقوله


ورد قال مبقدرش اسكت من غير مااتكلم
بس الامر مبيسلمش من التعليقات السخيفه


انا عن نفسى بشجع اخر رد



طيب عاوز اسألكم انتم سؤال
ونبعد عن المثاليه فى الردود


لو واحد جه قالك لبسك ضيق جدا وياريت تحاولى توسعيه رد فعلك وبصراحه هيكون ايه؟؟


هتتضايقى


هتحرجيها


هتقولي وانتا مالك


هتبصله من فوق لتحت


هتقوليله حاضر ان شاء الله

وودن من طين والتانيه من عجين


ولا هتفكرى فى كلامه وتاخديه بعين الاعتبار؟؟




وايه رايكم فى كلامى
ياترى السلبيه دى سببها
ان مفيش روح حب واخاء وتقبل للاخر فى مجتمعنا؟؟


ولا احنا خلاص ادمنا اننا نكون سلبيين؟؟