الجنيه بخمسة دولار.. ونص

[dr.mishmisha]

السلام عليكم ورحمة الله وبركاته


الجنيه بخمسة دولار.. ونص







منذ فترة ظهرت مشكلة كبيرة في العملة الصعبة خصوصا بعد انهيار الجنيه أمام الدولار بالضربة القاضية, فاجتمعت هيئة الحشاشين الحكومية لمناقشة القضية .. و كان ما يلي ........

********

- ايه اللي حصل للجنيه ده؟.. دي عمرها ماحصلت
- فعلا الجنيه دلوقتي بقي يساوي خمسة و تلاتين قرش بالكتير
- يا جماعة الجنيه محسود و معمول له عمل على رجل جمل وعشان يتفك و يرتاح لازم يتقطع من تمساح.. شيللاه يا اسيادنا
- طب و الحل يا جماعة؟
- لازم نبخّر وزارة المالية

********

قام عضو و قال:

- يا جماعة دي ناس مؤمنة, كاتبين على ضهر الدولار "نحن نثق بالله" أما احنا حاطين صور أصنام و العياذ بالله , البلد دي مش هاتشوف خير أبدا
- يا عم انت اهدا, دي مش أصنام و بعدين ماحنا حاطين من قدام على كل العملات صور جوامع و مآذن و كلها تقوى و ايمان.. شفت الجامع اللي على العشرة جنيه , حاجة تفرح و الله
- لازم اولا نعمل كونصلتو للجنيه , الجنيه كَش و صغر و بقى شبه النص جنيه و الدولار كبير و ورقته أكبر من كف الأيد
- يبقى نكبر حجم الجنيه عشان يبقى قد الدولار بالضبط, و ساعتها يبقي ماحدش أحسن من حد
- كمان الجنيه لونه أصفر و هزيل زي ما يكون عنده السل , أما الدولار لونه أخضر مزهزه و الخير باين عليه
- خلاص , يبقى نغيّر لون الجنيه و نخلّيه أخضر عشان الخير يعم و عندنا المطابع و الحبر و الورق, مافيش مشكلة.


********

قام رئيس الحشاشين و قال:

- حيث كده بقي ماتيجي نختصر و نطبع دولارات بدل الجنيهات, و اهي أكسب .
- فكرة ممتازة يافندم , ساعتها الدولار يكتر و ما يلاقيش حد يشتريه و سعره ينزل الأرض .
- و الجنيه يغلا و يبقى بخمسة دولار و نص
- و تيجي تصرف جنيهات من البنك الموظف مايرضاش , و يقول لك الجنيه دا عملة صعبة .. ممكن تصرف بالدولار .
- طيب و التضخم ؟؟
- التضخم دا هايبقي هناك في أمريكا ( ربنا يهدها ) تفضل تتضخم تتضخم لحد ما تفرقع ان شاء الله
- و ممكن ساعتها نعمل صفقة مع بوش على طريقة الأفلام العربي
- إزاي؟
- هو ييجي بشنطة البضاعة و واحد مننا يروح بشنطة الدولارات اياها , و في محطة مترو محمد نجيب جنب شباك التذاكر يتم تبادل الشنط و يروح على بلده بالدولارات المضروبة .
- و نقوم فاقعينه مهموز و نبلّغ عنه يقوم يتقفش في المطار و يتحبس و نخلص بقي من وش أمه النحس ده و من أذاه .
- و الله فكرة


********

و تم الاتفاق علي أن تطبع الحكومة شوية دولارات تفك بيهم زنقتها.. و بعد أن طبعت كمية تجريبية جئنا بخبير عالمي في التزييف و التزوير ليبدي ملاحظاته على الدولار المصري ... فقال :

إن ما تحقق على أرض مصر هو إنجاز غير مسبوق تاريخيا , و الدولار المصنوع محليا متقن للغاية و ممكن يغش أي هاو و لكن هناك عدة ملاحظات بسيطة يجب مراعاتها في الطبعة الثانية و ذلك للوصول بالانتاج المصري من الدولار إلى الكمال

أولاً: لا يوجد عملة قيمتها تسعة دولار
ثانياً: الدولار الأمريكي لا يحمل صورة روبي بالزي الفرعوني
ثالثاً: لا يوجد دولار مكتوب عليه: البنك المركزي المصري

غير هذا لايوجد فرق بين الدولار الأمريكي و الدولار المصري و ربنا يوفق بلدنا للخير دائما

********

و بالفعل أخذت الحكومة برأي الخبير و يتم الآن تلافي الأخطاء الصغيرة السابق ذكرها
و حين يتم طبع الدولارات الجديدة ( و هذا بيني و بينكم ) يمكننا الإبلاغ عن الحكومة بتهمة إصدار عملات مزيفة, و بكده نرتاح من الحكومة لمدة عشرين سنة بالميت.. قولوا آمييييين


تحياااااااااااااااااتي