الثــقه بالله

[Mo chahin]

قرر راجل من هواه تسلق الجبال انه يتسلق اعلي واخطر جبل في العالم

وبعد ما هيأ نفسه واستعد للمهمه الصعبه دي بدأ يتسلق الجبل ومعاه كل اللي محتاجاه عشان يحقق حلمه

عدت الساعات بسرعه اووي ومن غير ما يحس الليل ليل عليه وكان وصل تقريبا لنص المسافه

وكانت العوده اصعب بكتير من انه يكمل رحلته، فماكنش عنده حل غير انه يكمل طريقه اللي مابقاش شايفه بسبب عتمه الليل والبرد الشديد.

وبعد ساعات وقبل وصوله لقمه الجبل، اختل توازنه ووقع من اعلي قمه الجبل بعد ما كان علي بعد لحظات من تحقيق انجازه الكبير

وفضل شريط حياته يعدي قدام عينه بسرعه وهو عمال يخبط في الصخور اثناء وقوعه.

وهو بيقع اتمسك الرجل بالحبل اللي كان رابطه في وسطه من بدايه الرحله ولحسن حظه كان خطاف الحبل متثبت بقوه في صخره من الصخور.

الرجل لقي نفسه بيتمرجح في الهوا .. مافيش حاجه تحيه غير فضاء مالوش حدود وايديه غرقانه دم وماسك في الحبل بكل ما تبقي له من عزيمه واصرار.

وفي وسط الليل وقسوته، خد الرجل نفس عميق زي اللي ما يكون روحه رجعتله تاني، وهو ماسك الحبل بيدور علي اي امل في النجاه.

صرخ باعلي صوته : يااااااااااارب يااااارب انقذني.

رد عليه صوت من جوه عقله وقاله : عايز ايه من ربك ؟!

رد الرجل بلهفه : انقذني يارب.

رد الصوت وقاله : انت فعلا مؤمن بربنا وانه قادر ينقذك ؟!

رد الرجل : اكيييييد انا اؤمن بربنا ومين غيرك يارب قادر ينقذني ؟!

وكان الرد : لو كده، يبقي سيب الحبل اللي انت ماسكه.

وبعد لحظه من التردد فضل الرجل ماسك الحبل وزاد تعلقه بيه اكتر واكتر

تاني يوم، فريق الانقاذ لقي جثه الرجل علي ارتفاع متر واحد بس من سطح الارض ماسك الحبل بايده والبرد جمده لحد ما مات.

مات من البرد علي ارتفاع متر واحد بس من الارض !!!







وانت بقي ؟! سبت الحبل ؟! ولا لسه فاكر ان الحبل هو اللي هاينقذك ؟!

لو انت وسط مشاكلك وآلامك اتكلت علي حكمتك وذكاءك ومش آمنت ان ربنا قادر يدبرلك امورك ويعينك ويرزقك،

فتأكد ان فاضلك كتير اووي عشان تتعلم معني الايمان.

ولو كنت فاكر ان فلوسك ومنصبك واسرتك تغنيك عن ربنا، فده اشد واضل.

عليه بالثقه بربنا وصدق الايمان به والتوكل عليه، بمعني انك تيق في ربنا وفي اللي عند ربنا لانه اعظم وابقي من اللي عندك في دنيتك،

وتفوض امرك لربنا وانت واثق انه هايدبرلك امورك احسن تدبير.







القصه دي لفتت انتباهي لحاجه مهمه

اننا ممكن واحنا ماشيين في طريق تحقيق احلامنا ننسي حقوق ربنا علينا،

وبريق الطموح ممكن يغمي عيوننا ويخلينا مع الوقت مانشوفش غير ايدينا اللي بتعمل ورجلينا اللي بتمشي ومخنا اللي بيفكر،

وينسينا اليد العليا اللي هي السبب في ده كله اصلا .. ويخلينا مانفتكرش ربنا غير وقت الازمه والشده والحاجه.

الانسان اللي ماتعودش يثق في ربنا وفي اوامره عمر يقينه ما هايكون صادق.

الحبل في القصه مجرد رمز للاسباب اللي برغم اهميتها وحاجتنا ليها الا انها محتاجه معاها ايمان وتقوي ويقين صادق،

والا مش هاتقدر تنقذك، وهاتلاقي نفسك في طريق الهلاك بعد ما كان بينك وبين طريق النجاه خظوه او اتنين.

[فيروزه]

اولا موضوووع اكتر من رائــــــــــــــــع بجد

	ثانيا معاك حق فعلا ان النــــــــاس بقت مفكره انها بذكاءهااا وقدرتهاا تقدر تعمل اي حاجه من غير ما تعتمد علي حد وبتستغني عن الكــــــل وعن ربنا والعيـــــــــاذ بالله مش هقووول غير ربنا يهدي الجميـــــع اللهم اميـــــــن وتسلمـ ايديك ع الموضوع الرائــــــــــــع

[Mo chahin]

اشكرك جدا يا فيروزة على تواجدك الطيب ,

ويريت كلنا نتعلم من القصه ان لا بد ان تكون ثقتك بالله بلا نهايه ولابعد الحدود ,,

تحياتى لمرورك الكريم ,,

[رووكه]

تسلم ايديك بجد موضوع صعب وشاق وسهل فهمه فى نفس الوقت

لازم تكون ثقتنا فى الله دائما بالخير لانه قال

(انا عند حسن ظن عبدى بى )

مين من بعده هيسمعنا ويرحمنا وينجينا من اللى بنوصله للاسف باردتنا

وعمر الفلوس مكانت هى المنقذ لينا هى اغلبيه الوقت بتكون نقمه على الانسان

وعمر ربنا مخالفنا فى رزقه ولا فى طلب طلبه مننا

والانسان هو اللى بيبعد ويختار الحبل ويعلق عليه كل عواقبه اللى بيقع فيها وينسى

ربنه اللى قادر وغير ميقدر

يارب ميبعدنا عنه ويجعله قريب وسميع الدعاء لينا يارب

تسلم ايديك ويجعله فى ميزانك لانك بتصحى عقولنا وتقربنا من رب كريم

ربنا يوفقك يارب بكل الخير

[ملاك الجنة]

فعلا الناس دلوقتي بقوا معندهمش ثقة في ربنا
و انا منهم ( ربنا يغفرلي بقا )
بس انا لما بثق في ربنا بثق لدرجة اني ممكن اموت نفسي
و العكس لو مش واثقة هعمل ذي الراجل ده
بس ياريت الناس تثق فيه اكتر
عمر ما حكمتهم و لا زكائهم هيقدر يعدي قدرة ربنا



موضوع رااااااائع يا ميرو

[احلى عيوون]

الثقة بالله هي : أن لا تسعى في طمع، ولا تتكلم في طمع، ولا ترجو دون الله سواه، ولا تخاف دون الله سواه، ولا تخشى من شيء سواه، ولا يحرك من جوارحك شيئاً دون الله؛ يعني في طاعته واجتناب معصيته
وقال بعض السلف: صفة الأولياء ثلاثة: الثقة بالله في كل شيء والفقر إليه في كل شيء والرجوع إليه من كل شيء.
كل شئ بامر الله لو اراد شئ حيكون
جزاك الله خير عالتوبيك الرائع
تحياتي
نانا

[حياتي ذكريات]

السلام عليكم
الثقة بالله حاجه مهمة جدا لازم يتصف بيها الانسان ولازم يتمسك بيها في كل امر بيعمله
يثق بالله انه هينقذه لو هو في مصيبه .. يثق بالله انه هيوفقه في حياته الشخصية .. يثق بالله انه يرزقه من حيث لا يحتسب
وغيرها من الامور الكتيرة ..
ساعات الانسان لما يكون في مشكلة بيلجأ للناس ويطلب منهم الحل
مع انه يمكن لو دعى ربنا في صلاته وشكاله مش هينساه اكيد
واحيانا لما مثلا نكون عايزين حاجه وحصلتلنا عكسها بنتذمر وبنشكي
وبعدين نعرف انها في مصلحتنا وان ربنا عارف الخير فين لينا
فلازم نثق دايما في ربنا في جميع امور حياتنا
تسلم على الموضوع الجميل والقصة معبرة جدا وحلوة
شكرا ليك .. تحياتي