الدنيا اتغيرت ولا ايه****** متعرفوني

[شاعر واسير الحب]

الدنيا اتغيرت ولا ايه****** متعرفوني

زمان.. ودلوقتي

تعالوا نشوف ايه اللي حصل هل صحيح الدنيا اتغيرت

تغيرت للاحسن ولا الي الاوحش °°°° تغيرت علي مبادئ واسس سليمة ولا اتغيرت الي تقليد وتغريب وتغير اخلاق

تعالي نشوف ونقارن بين زماااااااااااااااااااااااان والوقت الحاضر
في حالات بسيطة
.................................................
1- خروج الولد وموعد رجوعه البيت





زمان: كان ممنوع التأخير
ولو اتأخر يبقى لسبب قهري مع ابداء الاسباب والاعتذار الفوري

دلوقتي: تلاقي الولد داخل
الساعة 1 صباحاً, باباه يقوله كويس انك متأخرتش النهاردة!!,
يرد الولد: تأخير ايه يا
مان أنا طالع اغير هدومي ونازل تاني, انا وكام واحد من اصحابي عندنا ماتش كده على الماشي..
خش انت نام ومتقلقش وانا مش هتأخر.. الاب نام وصحي ونزل يصلي الفجر وهو راجع يلاقي
ابنه عند بتاع الفول بياكل: ايه يابني انت لسه مروحتش؟
يرد الولد: اهلااااا بالكبير
اوى معلش بأه الماتش سخن اصله ولسه خلصان ولا ايه يا جماعة؟؟
كله يهز راسه بالموافقة
وبؤه مليان اكل,, يكمل الولد بعدين لقينا عصافير بطننا (بتطير) قلنا نسدها بأه

*******
2-- البنت لما حد يسألها.. إنتى مخطوبة؟


زمان : - لسه ربنا مأذنش,
وعينها فى الأرض ووشها يحمر


دلوقتي: - لأ ليه عندك عريس؟
إيدي على كتفك.. ناس معندهاش نظر

*******
الولد داخل على باباه ياخد مصروف الاسبوع

زمان : ممكن يقول لمامته
هى تقول لباباه انه عايز المصروف لانه محرج انه يطلب كده من باباه وخايف منه


دلوقتى: - إيه يا مان
احنا النهاردة كام فى الشهر؟
انت مش هتأبّجني ولا إيه حكايتك بالظبط؟
يالا اختصر عشان
معنديش وقت وصاحبي بيرنلي عشان انزل.. ايه يا عم مش سامعني يعني؟ عايز الفلووووس...المونييييي


*******


3-- دخول الاب البيت وحضورة

زمان : يسمعوا بس صوت
باباهم من بعيد كله يقوم مرعوب واللى فى ايده حاجة يسيبها ويستقبلوا باباهم على الباب
ولو معاه حاجة يشيلوها عنه


دلوقتى: الولد قاعد قدام
الكمبيوتر او بيتفرج على ماتش كورة، البنت بتتكلم فى التليفون.. مش فاضيين يعملوا ايه!!..
الاب على الباب بيخبط.. مع العلم ان الاب ليه خبطة مميزة يعني عارفين انه اللى على الباب..
الاب خبط مرة واتنين ويرن الجرس..
فين وفين البنت اخدت بالها ان فى حد بيخبط:
انت يابني متسيب اللي في ايدك ده وتروح تفتح لبابا,
يرد الاخ: نعم هاخد اوامر منك اظن؟؟؟
ما تقومي انتى ياختي بدل الرغي اللى مالوش لازمة,
ترد: نعم؟؟على الاقل انا بتكلم فى
التليفون اقول ايه لصاحبتي يعني؟؟
انما انت مبتعملش حاجة ماتقوم انت ولا انت لازم تمارس
دور راجل البيت وخلاص؟؟..
يرد: ماتعدلي كلامك معايا انا اخوكي والولد هنا وكلامي لازم
يتسمع..
ترد على العموم بابا معاه مفتاح وتلاقيه شوية وهيفتح بيه ولا الحوجة ليك يا
اخويا
ايه رأيكم في الادب والاخلاق ؟؟؟
*******

4-- نزول المرأة للعمل

زمان : كانت المراة
بتسعى من اجل حريتها واثبات ذاتها وكيانها ووجودها وكانت تتمنى النزول للعمل


دلوقتي : - هوا قاسم امين..
هو اللى بهدلنا.. هو اللى نزلنا الشغل وخلانا نتبهدل.. انا ايه اللى يخليني انزل واتبهدل
فى المواصلات كده,, مش لو كنا قاعدين فى بيوتنا كان يبقى اكرم لنا؟؟


*******


5-- ولد حب يتعرف على بنت


زمان : الولد لو راح
يكلم بنت.. بعد ما تطلع عينه.. يحمر وشها.. ولو ردت عليه يبقى كلمة وخلاص وغالباً بتكون
بتصده وبتمشي خايفة لا يكون اخوها معدي ويشوفها ويزعقلها


دلوقتي: الولد راح يكلم
بنت ردت عليه تقوله: لخّص عايز ايه من الأخر يعني؟؟ يعدي عليها اخوها ومعاه صاحبته
يعملها باي من بعيد وهى ترد عليه ويمشي.. يمكن افتكر اللى واقف معاها ده عمود نور..
طبعا الولد واقف مندهش المهم يجي يتكلم تاني ترد عليه تقوله على فكرة انا مرتبطة وصاحبي..
يعني حتى مش خطيبها.. هيعدي عليا دلوقتي وعلى فكرة بيغير عليا موووت


*******


6-- نزول الولد لشراء احتياجات البيت

زمان: كانت البنت المفروض
متنزلش كتير والولد فى غياب الاب راجل البيت يعني يشتري كل احتياجات والدته دون تذمر


دلوقتي: الام يطلع عينها
من التحايل على الولد ينزل يجيب حاجة من البقال اللي جنبهم.. حتى يرد: ماتخلي فلانة
تنزل ماهي قاعدة ما بتعملش حاجة..
الام تقوله: يابني اختك المفروض ماتنزلش كتير ديه
مهما كانت بنت والوقت متاخر..
يرد: بنت يعني ايه؟؟ العو هياكلها مثلا؟ ولا الاشكيف
مستنيها؟
دي بنتك تخوف بلد..
تقول الأم: يابني انت المفروض راجل البيت..
يرد: وانتوا
خليتوا فيها راجل مش طالبتم بالمساواة؟
يالا اشربوا عشان تبقوا تقولوا الراجل زى الست..
هى فى حاجات وحاجات لأ يعني؟؟
حاجة غريبة اوي

هل الدنيا اتغيرت ولا انا مش هنا ولا اللي اتعلمنا نسناة وبقي في خبر كان
ولا العقول اختلفت والفكر والاخلاق ذهبت مع الرياح بلا رجعه؟؟؟

محتاج نعرف رأيكم
في فيما قولنا وطبعا انتم عندكم حكاوي اكتر
دلونا قبل العقل ما يطير

[دمعه حائره]

عندك حق فى كل كلمه قولتها شاعر
الدنيا اتقلبت مش بس اتغيرت
الصغير بقى هوا الكبير والعكس
بس احنا اللى عملنا فى نفسنا كده
طريقة التربيه اللى احنا اتربينا عليها
ماكنتش عجبانا وكنا حسين بالظلم
فغيرناها فى اولادنا واحنا اللى دلعناهم
وصلوه لكده ولو فى ولد مؤدب قدام ابوه
بيبقى خوف وقهر ومن وراه بيبقى
اخر بوظان الجيل الايام دى مش
عارفين نتعامل معاهم ازاى
تصاحبهم ويقلوا ادبهم معاك
ما أنت صاحبهم بقى
ولا تشخط وتنطرويخافوا منك
ومن وراك ينحرفوا ونقول
ما هوا ابوهم اللى عقدهم
وكل ده سببه انفتاحنا على الغرب
وطبعا على عادة الشعوب العربيه
تاخد من الغرب اسوأما فيه وتنسى اى
حاجه حلوه عندهم
ماقدرش اقول غير ان كل واحد يحاول
يربى ولاده زى ماهوا اتربى
على احترام الكبير اهم شىء
شكرا اخى شاعر المهام الصعبه

[أبن اسكندريه]

أكيد أتغيرت لاكن للأسف
للأسوء
شكرا ع التوبيك الرائع
تحياتي للجميع

[فيروزه]

	والله توبيك راااااااااااائع بجد وع فكره ضحكتني والله علشان انت حكيت حاجات بتحصل بجد مش عارفه انا بقا فين العيب في الاهالي الي تقريبا شخصيتهم ضاعت وبقا مفيش كلمه بتتسمع نهائي ولا البنات والشباب الي بقول صحبهم دووول ليهم تاثير عليهم اكتررر من تاثير الام والاب مش عارفه ؟؟؟ بس الانفتاح يخووووف بجد يعني انك ما بقتش تخاااف من حد دي مصيبه بحد ذاتهااا هرجع واقولك البعد عن ربنــــــــا هو الي عمل فيناااا كل الحااااجات دي مش عارفه اقول ولا ازيد اي كلمه ربنا يهدي الجميع يااااااااارب تسلم ع الموضوع الرااااائع تقبل مروري

[~®§§][][ سيد دندنة ][][§§®~]

تعرف العيب فينا احنا ومش فى الدنيا

ولا يوم السبت جه قبل الحد علشان نقول الدنيا اتغيرت

الدنيا هيه هيه وهتفضل هيه هيه

الناس اللى اتغيرت وتعميم والغيام ملئ عيونهم

حتى الحقد ملئ قلوبهم

تعالى زاى مانت بتقول كده

هات شاب او بنت زاى بتوع زمان هتلقى بس قليل جدااااا

هتلقى فى الريف وبردو نسبه بسيطه جداااااا

ياريت بجد الناس مش تعلق شمعيت الفشل والفساد

على الحياه

والله فعلا الدنيا مش اتغيرت الناس اللى اتغيرت

وجدااااااااا كمان

اشكرك بجد على الموضوع القيم ده

[ĶǎnDO̳̿uChǎ ツ]

طبعا الدنيا اتغيرت كتير,وكل حاجة تقريبا اتغيرت وتطورت بشكل كبير و ملحوظ,الناس الاخلاق والشخصيات و كل حاجة,دلوقتي مبقاش في اي حد تقدر انك تثق فية خالص والناس الكويسن بقو دلوقتي نادرين اوي,والحجات الي كانت زمان عيب دلوقتي بيسموها حرية و ترفية,والانسان المحترم دلوقتي بقى اسمو مغلق ومتعقد.

اعجبني موضوعك في غاية الروعة و المقارنة كانت متميزة
تقبل مروري
لك خالص تحياتي

ن
و
د
ي

[حياتي ذكريات]

السلام عليكم

الدنيا اكيد اتغيرت والكل ملاحظ كده
دايما لما بنعمل حاجه نلاقي اهالينا يقوللنا لما كنا قدكو كنا بنعمل
كذا وكذا وكذا ..
فبحس فعلا ان زمان كان فيه انضباط اكتر
يعني الاول كانو بيسهرو لغاية الساعه 9 دي اقصى حاجه عندهم
الا يوم الاجازات بالكتير الساعه 12 وما حدش بيزيد عن كده
دولوقتي مين اللي ينام الساعه 9 !!
ممكن نصحى في الوقت ده لكن ننام ما حدش بيعملها الا قليل
غير ان بقى فيه احترام اقل للاب والام الوقار قل كتير في نفوس الشباب
زمان كان الاب بيبقى كلمته مسموعه وليه هيبة وما حدش يقدر
يعارضه او يقله كلمة حاليا الصوت بيرتفع عليه وعادي جدا عن البعض !!
الحال فعلا اتغير كتير عن الاول وبنسمع الكلمة دي كتير اوي من جدودنا
ربنا يهدي الجميع

شكرا ليك على الموضوع شاعر
خالص تقديري

[عاشقة الهدوء]

السلام عليكم ورحمة الله وبركاته

اه والله بجد عندك حق ياشاعر الزمن فعلا اتغير وعمروا ما هيرجع

قول الزمان ارجع يازمان كان فعلا زمن جميل كله خجل واحترام

بمعنى احترام للكبير والصغير امال حالنا دلوقتى للاسف جيل مؤسف جيل كسلان

يل كل همه ازاى يلبس ويحط جل ويمشى يتمنظر بشكله وحاله بس فقط لا غير انا منكرش

ان فيه أولاد كتير بتتحمل المسئوليه وعلى درايه وتعقل واتزان بحال الدنيا وتعاملهم باحترام

بس الاكتر والاغلبيه جيل فظيع فعلا لا تعليق عليه واكيد اساس ده كله رقابة الاهل على اولادهم

والتمسك بالدين وبعدين برضه الانفتاح الى احنا فيه يعمل اكتر من كده ياشاعر الا بقه

الى محافظ على دينه لان الى ماسك على دينه فى هذا الزمن ماسك على جمر من نار الا من

رحم ربه تسلم ياشاعر على موضوعك المميز تقبل مرورى أختك

[شاعر واسير الحب]

اقتباسالمشاركة الأصلية كتبت بواسطة دمعه حائرهعندك حق فى كل كلمه قولتها شاعر
الدنيا اتقلبت مش بس اتغيرت
الصغير بقى هوا الكبير والعكس
بس احنا اللى عملنا فى نفسنا كده
طريقة التربيه اللى احنا اتربينا عليها
ماكنتش عجبانا وكنا حسين بالظلم
فغيرناها فى اولادنا واحنا اللى دلعناهم
وصلوه لكده ولو فى ولد مؤدب قدام ابوه
بيبقى خوف وقهر ومن وراه بيبقى
اخر بوظان الجيل الايام دى مش
عارفين نتعامل معاهم ازاى
تصاحبهم ويقلوا ادبهم معاك
ما أنت صاحبهم بقى
ولا تشخط وتنطرويخافوا منك
ومن وراك ينحرفوا ونقول
ما هوا ابوهم اللى عقدهم
وكل ده سببه انفتاحنا على الغرب
وطبعا على عادة الشعوب العربيه
تاخد من الغرب اسوأما فيه وتنسى اى
حاجه حلوه عندهم
ماقدرش اقول غير ان كل واحد يحاول
يربى ولاده زى ماهوا اتربى
على احترام الكبير اهم شىء
شكرا اخى شاعر المهام الصعبه
اشكرك علي مرورك

نورتي الصفحة
والله كلامك حكم وموعظة رد جميل واعتراف شديد الهجة للاباء والامهات نعم لدلع والانفتاح الغربي اللي دمر الشباب
وقلة القراءة في الدين والمعرفة والتلقيد الملعون
بس فين ايام زمااااااااان الطالب كان بيخاف من المدرس في الشارع مش من ابوة وامه جيل ربنا يهديهم
لك تحياتي

[شاعر واسير الحب]

اقتباسالمشاركة الأصلية كتبت بواسطة أبن اسكندريه
أكيد أتغيرت لاكن للأسف
للأسوء
شكرا ع التوبيك الرائع
تحياتي للجميع


اشكرك علي مرورك

نورتي الصفحة
لا المفروض للاحسن الدنيا تغير للاحسن لكن احنا بنحب نغيرها للاسوا بتعاملتنا باسلوبنا
لك تحياتي