مشآهده من آرض الواقع ~

[{ سكَـرٍـرٍـرٍهـ،ـ ..~]

-------------------------------------------------------------------------
شفنا ايه ...

شفنا شباب مروحش بيته من 10 أيام ...

شفنا أهالي - أهالينا - رجالة و ستات و شباب وصلوا لحوالي 2 مليون ...

شفت المسعفين و طمنوني ان خلاص مفيش حالات حرجة في التحرير ... و ان القتلي اتنقلوا من هناك الحمد لله ....

شفت شباب مضمد و مغطى بالشاش وبيحلف انه مش هيمشي اللا لما يتحاسب المسئولين عن المجزرة ...
-----------------------------------------------------

شفت عمار الشريعي و هو بيهتف ضد مبارك ...

شفت شباب زيي كتير لا مع ولا ضد بس مش قادر يصدق ولا قادر ينام لحد ما يتحاسب المسئول عن المذبحة ...

----------------------------------------------------------------

شفت 2 مليون انسان أغلبهم من الطبقة المتوسطة ... يعني شبهنا كده مش زي اللي بيجو علي التليفزيون ... بيوزعوا ميه و أكل علي بعض ...

و بيسألوا " صحيح هو فين وجبة كنتاكي و ال 100 جنيه اللي بيقولوا اننا قبضناها " :] :]

كنتاكي قافل يا كفرة !!! الناس بتاكل سندوتشات فول و كشري و قرص لحد ما معدتها نشفت

--------------------------------------------------------------------------------------------

شفت لجان شعبيية في غاية التظام و اتفتشت ييجي 30 مرة و الكل بيعتذر و الكل بيقدر

-----------------------------------------------------------------------------------------------



اتفعصت وسط شوية ناس و فورا لقيتهم بيوسعوا و يعتذروا !!! .... النهاردة و يوم التلات عرفت ان شعبنا محترم و بيخاف علي بعض .... 2 مليون انسان في ميدان واح ده كتير فعلا بس والله العظيم محصلش ولا حادثة تحرش واحدة .... الشباب لما كانوا بيشوفوا الدنيا زحمة كانوا بيمسكوا ايدين بعض و يعملوا درع بشري حوالين البنات !!!

---------------------------------------------------------------------------------------------------
لقيت الناس ماشية تلم الزبالة من الشارع !!!

------------------------------------------------------------------------------------------

شفت الناس بتصلي و تركع و تسجد مع بعض .... و بتدعي مع بعض ... و بتبكي مع بعض .....

------------------------------------------------------------------------------------------
شفت واحد داير في الميدان اتجنن يا ولداه !! شفته برده يوم التلات .... قاعد يكلم نفسه و ناس وهميين حواليه !!و يدعي على مبارك !! والناس مش عارفين يعملوله ايه !!!

أكتر من مواطن مصري .. ناس كبيرة في السن ... ماشيين مذهولين .... مش مصدقين ان عمرهم ضاع في حكم ظالم مستبد ...

------------------------------------------------------------------------------------------

كنا كل شوية يقولولنا البلطجية جايين من عند ميدان طلعت حرب .. كل واحد يحاوط عللي جنبه ... و الشباب تتملكه النخوة و يقول على رقابنا حد يدخل الميدان .. ثم يعلو صوت الحكما ء مهدئين الجميع ...

------------------------------------------------------------------------------------------
اتكلمت مع واحدة بقالها 10 أيام هناك و كانت موجودة يوم المجزرة
قالتلي انها كانت تنام ساعة وسط الناس و تصحي مخضوضة وتبص حواليها تتأكد ان اللي نايمين حواليها موجوديت .. و تحمد ربنا انهم لسه عايشين ...
قالتلي انها كانت بتسعف المصابين من المتظاهرين و البلطجية على حد سواء ... وطبعا البلطجية كانوا مستغربين ... سألت واحد منهم : " انتم بتعملوا كده ليه ؟؟ " قام قاللها : " مانتم قابضين 100 جنيه و واخدين وجبة كنتاكي !!! "

قالتلوا: " أمال انت واخد ايه ؟؟ "

قالها : " انا واخد 200 جنيه و فرخة " !!!!

يا شعب مصر المغوار !!

يا شباب النت و الfacebook

فيه ناس مننا ماتت عشان شوية جهله واخدين 200 جنيه و فرخة ....
و لسه شفيق "ميعرفش "

------------------------------------------------------------------------------------------

شفت رجال الأزهر و هم بيهتفوا مع المتظاهرين !!

شفت عدد من الاخوان ....

" و الله العظيم أنا لفيت الميدان مرتين أدور علي الأخوان "المسيطرين علي الميدان

و علي الأحزاب المسيطرة و المتناحرة ...
و علي القلة المندسة ..

و علي الأجندات الخاصة ..

الناس كانت كلها علي بعض ... أغنياء و فقراء .. جهلة و مثقفين ... فاهمين و مش فاهمين ... ناس مش شبه بعض شكلا ... و مش عارفين بعض ... بس واقفين بيحكوا مع بعض بود غريب .. قلبهم علي بعض زي ماكان أهالينا يحكولنا عن أيام زمان لما كان أهل الشارع يتجمع عند بيت حد منهم ... يحكوا و يتسامروا ... لما مكنش حد ينام اللا لما يتأكد ان جاره متعشى و شبعان ....

شفت مصر يا بشر !! مصر كما يجب أن تكون !!
انا صحيح ما كتبتش الكلام ده بنفسى ... بس والله العظيم هى دى الحقيقه لأنى شفتها بعينى

تحيآتـىىَ ~

[بنت الجنوب]

السلام عليكم ورحمة الله وبركاته


كلام جميل بس الحياة مش ميدان التحرير
فى فتنة فى البلد ومع وجدود الفتنة يجب تذكر وصية رسول الله صلى الله عليه وسلم

(( الزم بيتك، واملك عليك لسانك، وخذ بما تعرف، ودع عنك ما تنكر، وعليك بأمر خاصة نفسك، ودع عنك أمر العامة))

انتم عرضتم مطالبكم وتحقق منها 80 % تقريبا واصرركم على تنفيذ كل المطالب دون حوار ده منتهى الديكتاتورية وعكس اى ديموقراطية بتنادو بيها

ارجوكم كفاية نقول احنا وانتم ده اللبعض عاوز يوصل الشعب ليه
مقدروش يضربوا الوحده بين المسلمين والمسيحين مش عاوزينهم يضربونا من ناحية تانية ويحولو الامر لحرب اهلية

ارجوكم كفاية كده
امن مصر اهم من اى شئ

ولك كل الشكر والاحترام على الموضوع

[مقدرش انساك]

مرسى على طرح المميز

تحيا مصر فوق الفسادوالفاسدين

[امير الظل]

انا سعودي زعلان من الشعب المصري [ هذا جزاء ابوكم حسني مبارك الذي حقن دمائكم اول ما اصبح ريس كم كان عدد سكان مصر [والان كم] عدددددددددددددددددددددددددكم ياشباب اتقو الله

هؤلا اصحاب دنيا انا متأكد أن ما في قلوبهم دين -- شهداء ايش مافية شهداءالشهيد الي يموت دفاع عن دينه ووطنه اذا كان مسلم -- اما من خرج على ابوه غلطان وبنشوف مصر كيف بعد حسني