3-سبتها / سبته . . . بس بجد تعبان و مش عارف اعمل ايه ؟؟؟)

[*بنت عائشة*]

السلام عليكم ورحمة الله وبركاته

ونكمل موضوعنا ودة الجزء الثالث منه

انا لاحظت شباب كتير بيقول انا الحمد لله سبت الشخص اللي كنت
مصاحباه / مصاحبها بس لسه بحبه / بحبها




بصوا يا جماعه انا عارفة ان الموضوع بجد صعب و فى مشقه فى ان الأنسان يتخلص من الشخص اللى بيحبه .... و ده لأنه اتعود انه لما يصحى يرنلها و ترنلوا و لما يخرج من البيت لازم يرن و لو دخل ينام يكلمها او تكلمه



و الكلام ده كله .... بس و الله لو عرفنا ان الخير هو فى ترك الشخص اللى احنا بجد حبيناه ... هنعمل كده

و بعدين يا اخى و يا اختى لازم يكون عندنا ثقه فى وعد الله لينا




يا جماعه احنا لما وثقنا فى الدنيا عمرنا ست قرات




و لما وثقنا فى فى ان رصيد البنوك هو المستقبل و الآمان خلينا همنا كله هو ان يكون لينا رصيد فى البنك




و لما وثقنا فى الدكتور ...بقينا نشوف الأب اللى بيدى للدكتور الفلوس و يفضل يدعيلوا و مش بعيد يساعدوا على الرغم ان الدكتور ده هو اللى هيفتح بطن ابنه و هيقطع فى لحمه




بس لأننا وثقنا فى الدكتور ... مديناش لنفسنا فرصه ان احنا نشك لمجرد لحظه فى قدراته ... و سلمنا نفسنا للدكتور لأننا استشعرنا الأمان و الطمائنينه تجاهه

ليه يا جماعه مش قادرين نثق فى وعد الله لينا ... ليه مش قادرين ندى نفسنا فرصه نحب ربنا بجد ... ليه خلينا رضى الناس و السعى وراء شهواتنا هو الهم الكبر و سيبنا محبه الله



والله يا جماعه قرآت آيه هزت كيانى كله ... و رددت فى نفسى لو يعلم هذه الأيه كل شاب و فتاه ... و الله لعلموا ان السعاده الحقيقيه فى طاعه الله و البعد عن ما يغضبه سبحانه و تعالى

و الأيه دى فى سوره ابراهيم ... و هى قول الله تعالى



(وقال الشيطان لما قضي الامر ان الله وعدكم وعدالحق ووعدتكم فاخلفتكم وما كان لي عليكم من سلطان الا ان دعوتكم فاستجبتم لي فلاتلوموني ولوموا انفسكم ما انا بمصرخكم وما انتم بمصرخي اني كفرت بما اشركتمون من قبل ان الظالمين لهم عذاب اليم)


انا بس يا جماعه عاوزة أقف وقفه صغيره جدا معاكم مع الأيه دى



اول حاجه ... (و قال الشيطان ) ...



يعنى مش الداعيه الفلانى ... يعنى مش ماما ... يعنى مش صحبتى



( لما قضي الامر )



يعنى خلاص يا جماعه انتهى الأمر ... مبقاش فى كلمه يارب .. مبقاش فى توبه .... مبقاش فى حد هيقول للتانى كده حرام و كده حلال



(ان الله وعدكم وعد الحق)


هنا بقى يا جماعه عاوزين نركز شويتين فى المعنى



وعدكم الله وعد الحق :


للأسف يا جماعه احنا فقدنا الثقه فى وعود الله لينا و صدقنا وعد الشيطان



وعدنا الله جل و علا و قال



(من يتق الله يجعل له مخرجا) .... و سيبنا وعد ربنا سبحانه وتعالى ... و خفنا نسيب اللى احنا بنحبهم علشان مش واثقين ان ربنا سبحانه و تعالى هيجعل لينا مخرج



و الشيطان قال لنا



(مفيش جواز من غير صحوبيه) ...



(لوسبتاها هتتجوز غيرك ... و انت لو سبتيه هينساكى و هيشوف غيرك) ...

(يا بنتنى انت هتعقدى نفسك ليه ما البنات معظمهم كده .. و انت يا بنى تقوى و ايه و بتاعت ايه عيش حياتك و كلم فلانه و علانه و لما يجى وقت الجواز يبقى يحلها ربنا ) ...



(يا بنى سيبك من الناس اللى عماله تقول سيبها علشان تكون ليك ومن نصيبك دى ناس فاهمه الدنيا غلط ) ..



(يا بنتى متعى نفسك و خليك معاه و لو سابك هتلاقى ميت واحد غيره ... .)


... و غيره ....... و غيره ...... و غيره



و رغم كل ده وثقنا فى وعد الشيطان لينا ... و نسينا ان الشيطان نفسه هو اللى قال فى القرآن


(ووعدتكم فاخلفتكم)



و عدتكم انكم هتتجوزا بعض و انا كنت عارف ان كل مكالمه كانت بتبعدوا عن بعض


وعدتكم انكم هتيعشوا فى سعاده و انا كنت عارف انكم هتعيشوا فى ضنك .


وعدتكم انكم هتكونوا متسامحين مع بعض و كل حاجه بينكم هتتحل و لكن منسيتش ان اخلى حياتكم شقاء و انكم تتخانقوا مع بعض بعد الجواز و خليت اتفه المشاكل سبب فى تعاستكم .



و عدتكم ان السعاده فى مكالمه تليفون و خليتكوا تنسوا ربنا السميع العليم





و النهارده (يوم القيامه أقصد) انا جاى اقولكم الكلام ده .. بس بعد ما خلاص زى ماكنتوا معايا فى الدنيا مطيعين و بتسمعوا كلامى ... فأنا جى احسركم و اعرفكم انى من الأول كنت بضحك عليكم وبلعب بمشاعركم ... )





ايوا كنت مخليك فاكر نفسك صح و انت بتكلمها و بتتعرف عليها بحجه انك بتدرس اخلقها



و انتى كنت مخليكى مبسوطه اوى وانت كل يوم بترخصى نفسك علشان واحد انا اقنعتك
انه هيكون ليكى و انه بيحبك .. لكن انا نسيت اقولك انك كل مكالمه كنت بتكلميه فيها كنتى بترخصى فى قلبه اكتر و اكتر ... و نسيت اقولك انه من كتر ما حس انك سهله و مش قادره تمنعى نفسك عنه .. كنتى انت اول واحده بره حسابته يوم ما فكر يرتبط بجد و يتجوز واحده هى فى يوم من الأيام هتكون زوجته وأم أولاده ... لكن بس حبيت اتفرج عليكم و افرح فيكم وانتوا بتغضبوا ربنا .. وانتوا عمالين بتكذبوا كلامه و وعوده ... بس خلاص انا عملت اللى انا عاوزه و قدرت العب بمشاعركم و قدرت اعذبكم و افرق بينكم ...



(وما كان لي عليكم من سلطان الا ان دعوتكم فاستجبتم لي)




و على فكره انا مضربتكمش على ايديكم .. انا مضربتكش على ايدك لما رفعت سماعه التليفون و كلمتها ... و انا مضربتكيش على ايديك لما خرجتى معاه و كلمتيه ...

انا بس شاورتلكم و ضحكت عليكم وقولتلكم ان طريق السعاده من هنا و انتو بصراحه مكدبتوش خبر .. و جريت تكلمها و جريتى تكلميه و رخصتى نفسك لواحد هو مخافش عليكى اصلا من عذاب ربنا و لكن رغبتوا فى انه يرضى شهوته منك كانت اقوى من خوفه عليكى ... و آخرتها يا مسكينه خسرتى كل حاجه ... لا انت طولتيه ولا قدرتى تعيشى حياتك مبسوطه مع غيره

(فلا تلوموني ولوموا انفسكم)




محدش يلومنى .. لوموا انفسكم ... مش سمعتوا شريط الشيخ الفلانى وعرفته ان العلاقات بالطريقه دى حرام ... مش قريتوا الموضوع الفلانى و عرفته انكم كده مش صح وانكم بتخسروا بعض مش بتقربوا من بعض ...

يلا بقه كل واحد يلوم نفسه من الحسره و الندم على انه خلى علاقته بيها باب من ابواب جهنم .. و يلا لومى نفسك بعد ما رخصتى نفسك ونكستى الدين و خذلتى نبيك





(ما انا بمصرخكم وما انتم بمصرخي)




و خلاص بقينا فى الهوا سوا ... لا انا هعرف انجيكم من النار و العذاب ولا انتوا هتقدروا تنجونى ... خلاص بعد ايه جايين تتكلموا و تتوبوا .. ما كانت الدنيا عندكم مفتوحه لكم تتوبوا فيها و كنتوا تقدروا تسيبوا بعض ربنا كان هيجمعكم فى الحلال ...





لكن انا قدرت امتعكم ببعض متعه فانيه و للحظات معدوده و قدرت بعدها احرق قلبكم على بعض ..





قدرت احرق قلبك عليها و انت بتسمع خبر ارتبطها بواحد تانى غيرك





قدرت أحرق قلبك عليها لما عرفت انها ارتبطت بفلان من بعدك

آآآآآآآآآآآآآآآآآآآآآآآآآآآه من ده عذاب ..... بوظنا معنى الحب ... بعد ما ادينا الشيطان فرصه يلعب بمشاعرنا




ليه يا جماعه نوصل للمرحله دى ... و الله يا جماعه ماتخافوا



متخفش يا اخى والله لو سبتها النهارده هتجيلك و ساعتها هتحس بجد بغلاوتها و قيمتها فى قلبك و هتحافظ عليها



و انت يا اختى متخافيش هيجيلك و الله هيجيلك


و أرجوكى بلاش ترخصى نفسك .. انت غاليه اوى و انت علشانك النبى اتعذب و علشانك الرسول حارب اليهود لما واحد بس فكر انه يتعرض لمسمله .



أرجوكى حافظى على نفسك و غلى نفسك



و الموضوع بسيط جدا يا جماعه

بالله عليكى يا اختى لو فى النهارده جوهره على جبل عالى و حاول شاب ان يقتنص هذه الجوهره ... و حاول مره و وقع .. و حاول التانيه و وقع تانى و اتجرح ... و وقع التالته و أصيب بجراح وهو مازال مصر على ان يصل للهذه الجوهره



وفى آخر المحاولات وصل بعد مشقه وعناء ... بالله عليكى ساعتها هيقدر يفرط فيها!!!



ساعتها هيجيلوا قلب انه يديها لغيره



....






بالظبط نفس الكلام .. النهارده انتى لما تمنعى نفسك عن الشاب اللى بجد نفسك تربتطى بيه ... صدقينى هتغلى جدا فى نظره .. كل يوم ربنا سبحانه وتعالى هيزيدك رفعه و قيمه فى قلبه ... و ان شاء الله لما يجمع الله بينكم



و الله ما هيجيله قلب يزعلك و هيحافظ عليكى و هيحطك جوا عينيه



لأنك بجد غاليه ... غاليه جدا







و تعالوا معايا نبص على الصوره التانيه





لو هى هى نفس الجوهره .. بس المره دى مش على قمه جبل



لأ



دى مرميه .. و عليها تراب و كل اللى رايح واللى جاى



عمال يشوط فيها ..لحد ما واحد لاقها و أخدها



بالله عليكى هتكون غاليه عنده .. زى الشاب اللى تعب و بذل قصارى جهده علشان يوصل للجوهره الغاليه!!!


و ساعتها يا أختى عمرك ما هتكونى غاليه عنده .. يو ما هيحصل مشكله بينكم و لو تافهه .. اول كلمه


هيقولهالك ..




أيه انتى نسيتى نفسك و لا ايه ؟؟



يا بنتى متنسيش ان انتى اللى كنتى بتكلمينى و يتجرى ورايا



وبعدين بقولك ايه مش عاوز وجع دماغ مش عجباك العيشه معايا شوفى غيرى و انا عادى مستعد اتجوز من بكره



و غيره من الكلام الجارح المهين .. و ده كله لأنك رخصتك



نفسك ليه من الأول



............



و قدرت اخليكى تموتى من الحسره و انتى شايفاه فى ايد فلانه اللى يوم ما فكر يرتبط بواحده بجد تكون مراته كانت هى .. مش انتى


شوفتوا يا جماعه اد ايه الموضوع مش سهل





مش سهل ابدا انك تمشيها غلط من الأول و تقول انا بدور على السعاده


مش سهل ابدأ انك تقول انا عاوز ارضى ربنا و انت كل يوم بتعصيه


...........





يلا يا شباب ... بالله عليكم .. نسيب بعض علشان بجد نكون لبعض

و يلا يا رجاله بجد نكون رجاله و نبقى صحاب بجد ... مشاكلنا احنا اللى نحلها مع بعض .. بلاش بنت تعرف مشاكلك .. يلا ناخد بأيد بعض للجنه و نساعد بعض فى ان احنا نحب ربنا قبل اى حد ... لأن حب ربنا هيجيب لنا كل خير




و يلا يا بنات ... انت أرق من انك تجرحى حياءك .. انت واحده كلك حنان ..


كلك رقه .. كلك طيبه .. كلك مشاعر بجد جميله ... بلاش تدمرى حاجه بجد حلوه فيكى و هى مشاعرك و احاسيسك و تفرطى فيها فى طريق يغضب ربنا


و قوليها بأعلى صوتك(قلبى ملك ربى و حبى لله أشد)





... النهارده يا جماعه كل واحد يجعلها لله و يكلم الأنسانه المرتبط بيها


و يقولها
(أنا و الله لأنك خايف عليكى و نفسى ارتبط بيكى فأنا لازم اسيبك و صدقينى انا مش هرتبط بحد الا بيكى .. و صدقينى لو فيا خير ليكى هكون ليكى و ان شاء معادنا يوم ما هقدر اتقدملك ... سلام )





و انت قوليلوا




(أنا ليك بأذن الله .. بس أرجوك انا اخدت قرار و هو ان احنا لازم نسيب بعض علشان ربنا يبارك فى علاقتنا و يجعل آخرها الأرتباط .. و صدقنى انا ان شاء الله مش هرتبط بحد غيرك .. و هستناك .. بس انت شد حيلك فى دراستك علشان اكون فخوره و انا بتكلم عنك مع عيلتى و صدقنى طالما أحنا خلينا رضا ربنا قبل رضا نفسنا فصدقنى ربنا هيتولى أمرنا و مش هيفرقنا .. أرجوك ساعدنى و انا مستنيه يوم ما هتيجى تخبط على باب بتنا و تتقدملى ... سلام )





و من هنا ان شاء الله تكون البدايه فى الرجوع الى الله سبحانه و تعالى ... و بجد نقولها بأعلى صوتنا (بنحبك) يارب .... بحبك ... بحبك ... بحبك...........يارب

سلااااااااااااااااااااام ....

[*بنت عائشة*]

ودي مشاركة واحدة من البنات علي موقع ما

السلام عليكم ورحمة الله وبركاته

بارك الله فيكي علي هذا الموضوع القيم

بجد كل كلمة قلتيها تحرك القلب

وكل كلمة صادقة

انا في اول سنتين في الجامعه مكنش حد يقدر يتكلم معايا خااااااااااالص من الشباب وكنت رافضة مبدا الكلام اساسا لاي ولد حتي اللي معايا في نفس القسم

بعد شوية لقيت ناس محترمة.... الشيطان بقا قاللي يبنتي دول ناس محترمة وبعدين خدي فيهم ثواب واديهم اسطوانات عليها دروس او كتيبات

وفعلا اتصاحبنا... والاكتر من كده ان واحد فيهم(الصراحة محترم) بدات احس ناحيته احساس الحب وهو كان بيعاملني بطريقة غريبه.. وتطورت للارتباط
بس سبحان ربي مكنتش مرتاحة ... مع اه كويس ومحترم جداااااااا بس كنت حسة اني عملة عملة كبيرة وعملة مهببه وخصوصا اني كنت مشية ع مبدا معين وبعدين خرجت عن اطار المبدا

بدات اقول قعدات لا ...طب مكالمات لا
بصراحة اتخنقت... كنت بين نارين...كنت بحبه واحب اتكلم معاه

بس بحب ربنا اكتر وحسة اني بخون ربنا بكلامي مع الشاب دة ومش بس ربنا دة كمان اهلي

المهم كافحت عشان اسيبه قلتله لو لينا نصيب سوا هنتجمع وعهد مني استناك

حاولنا وحاولنا كتيييييييييير مقدرناش

عشان مكناش صادقين النيه

لكن جه عليا وقت خلاااااااااااااااااااااااص بكاء ليل نهار خوف من الله زعل من نفسي انهياااااااااااااااااار وكان دايما يقولي انتي محبكاها اوي يبنتي متبقيش متزمته كده احنا مش بنعمل حاجة غلط

قلت لنفسي لاااااااااااااااااااااا خليكي قوية سيبي الشاب سيبي الحب كفاية عليكي ربنا

وسيبته ولبست النقاب

هو طبعا اتضايق جدااااااااااااا
بس عادي اتشغلت انا بالله وبحال قلبي مع الله
ونسيت الحب دة بس منستش العهد اللي بيننا اني استناه

وتمر الايام والشهور واعرف انه ارتبط هههههههههههههههههههههههههههه
ال ايه هو خلاص افتكر بقا اني نسيته

الصراحة قعدت افكر كده

قلت يسلااااااام مع انه كويس لكن مش دة فتي احلامي

نفسي برضة في شاب ملتزم اكتر مني

وقلت اللي ساب حاجة عشان ربنا ليها حلين
الاول ان ربنا يجبهالك في الحلال لو خير ليكي
التاين ان ربنا يبعدك عنها لو شر ليكي

والحمد لله رببنا بعده عني

وانا اتغديت بيه قبل ميتعشي بيااااااااااا هههههههه

ربنا يغفرلي ويصفح عني و يهديني

ولعلمكو انا مبسوطة جدا اني سبته
لاني اخترت ربنا وفضلته عليه

والحمد لله رب العالمين

والموضوع مش صعب كله باذن الله وبالنية الصادقة هيبقي تمام

[sεηυσяιтα ησOση]

يسلمووو ايدك يا قمر على المواضيع الحلوة دى

[*بنت عائشة*]

تسلميلي يااارب

[ELgeneral gEmY]

بجد كلامك كله صح
تحساتى وودى لك

[Lαzєzα]

قلبى ملك ربى و حبى لله أشد

بجد مفيش كلام يتقال ع جمال التوبيك ده
عجبنى جدا
طبعا كلامك كله صح
ومش عندى تعليق عليه
تسلم ايدك ى سكره
وربنا يرحمنا ى رب

[حب مهزوز]

بجد كلامك صح ميه في الميه
شكرا موضوع جميل

[بنوتة ميدو]

بجد موضوع حلو اوى
تسلم ايدك عليه

[سما الروح]

[dr.yoyo]

توبيكـ حلو ,
أعجبنـى جدآ ,
تسلم ايديكـ ع التوبيكـ ,

رآئـع ومفيـد ,