أنا نمت في المحكمة

[تيمور]

أنا نمت في المحكمة
اه و الله نمت في المحكمة
نمت في المحكمة لأني مكنتش نمت قبلها بستة و تلاتين ساعة
نمت في المحكمة لأن القاضي ظالم
نمت في المحكمة لأن مقدم امن الدولة الله يجحمه كداب
نمت في المحكمة لأن المسرحية مملة اوي
نمت في المحكمة لأني مكنتش عاوز اشوف الشرطة العسكرية
نمت في المحكمة لأني مكنتش عاوز اسمع قرار التأجيل كمان مرة
نمت في المحكمة بعد اما شفت عمو عبدالرحمن سعودي نايم
نمت في المحكمة بعد اما شفت الباشمهندس أيمن نايم
نمت في المحكمة لما لقيت اخوان معرفتش الاحظ هم مين نايمين
نمت في المحكمة عشان اعاند القاضي اللي طرد مخبر من قاعة المحكمة عشان كان نايم
و كمان نمت في المحكمة و انا كلي أمل اني اصحي ألاقي اخواننا خدوا إفراج و شاهد الزور خد حبس مع الشغل
أنا نمت في المحكمة ساعتين .. و صحيت في المحكمة ست ساعات
صحيت في المحكمة عشان فضول صحفي
صحيت في المحكمة عشان اكون مع سعد الشاطر و عمر عز الدين و عاصم المرسي و حسن الشاطر و عمر أبو العلا و عبدالله الشرقاوي
صحيت في المحكمة عشان ابص في وش دكتور ضياء و هو في القفص
صحيت في المحكمة عشان افضل اكلم عاصم محمود المرسي
صحيت في المحكمة عشان اضحك و انا بتفرج على المسرحية السخيفة
صحيت في المحكمة لأني كنت منتظر كلمة المهندس خيرت
صحيت في المحكمة عشان ادعي مع استاذ امير بسام
صحيت في المحكمة عشان اشوف فصل من فصول الظلم لأني عارف ان الظلم هيروح قريب اوي
صحيت في المحكمة عشان اتفرج على قفا عاطف الحسيني اللي عارف انه هيتهان و هيتعزل و هيتمنى الموت مش هيلاقيه و بيننا الأيام
صحيت كمان عشان احكي و اقول انا شفت المهزلة و فصولها الرابع و الخامس و السادس
صحيت في المحكمة لأني اخدت ايميل مهدي براي و بروس نستور و قلت لهم اني هبعت لهم تقرير مفصل عن اللي هيحصل جوه و في الاخر اعتذرت للشيخ مهدي
صحيت في المحكمة عشان احكي لولادي اني كنت مع المهندس خيرت في قاعة واحده في وقت مفيش لينا نصير غير ربنا
صحيت في المحكمة عشان اشوف بسمة الأطفال .. عائشة مالك و سلمان أيمن و الولد الشقي اللي معرفوش و عاصم المرسي و أروى علاء فرحات و أحمد ضياء ابن عمها و كل الأطفال اللي كانوا هناك
صحيت في المحكمة عشان اخرج اقول لبتاع رويترز على اللي حصل .. و مقلتلوش
صحيت في المحكمة و انا بتمنى انام .. عشان احس بنشوة الانتصار على نفسي
بس