رخـــــــــــامــه رخــــــــــــامـــه ........................

[الروح أرق من الندى]

الســــــــــــــــــــــــلام عــلــــــيــكــــــــــــــــــم

االنهارده قرأت الاسئله دي وبجد عجبتني حبيت اجبها وتشوفــوهــــــــا

ياريت مش تقولوا عليا رخــمـــــــــــــــــه واللي عنده ضغط والا سكر

اوعي يدخل

انا قولت مليش دعـــــــــــــــــــــــــــــــــــــوه

*هى الكهربا لما بتقطع بتروح فين !


*لو فى شجرة وقعت ع الارض فى الغابه هل بقيه الشجر بيضحكوا عليها !


*ليه فى شارع مراد حاطين يافطه مكتوب عليها (ابتسم فانت فى الجيزه )
هل الجيزه حاجه تضحك !


*لما تطلب ساندوتش من مطعم مثلا وتحب تضيف عليه اى اضافه بيزودوا
سعر الساندوتش،


طب ليه لما تحب تشيل حاجه من محتويات الساندوتش سعرة مبيقلش!!


*ليه بيقولوا الحب اعمى ، ومع ذلك كل اغانى الحب عن العيون يعنى مثلا
(سحر العيون ، وعد العيون ، نور عينى ،وعينك وحشانى )!!


طيب لو كان الحب اعمى ..ليه واكلين دماغنا بالحب من اول نظرة!!!


* لو إسمك (ماجد) وطلعت طيّار، هتفضل مستحمل قد ايه الناس وهيا بتندهلك
(كابتن ماجد )!!


* الأخرس بيكلم نفسه إزاى؟


* ليه بيقولوا على الشخص اللى نايم بعمق إنه نايم زى البيبيهات؟، مع إن البيبيهات أصلا بيصحوا كل نص ساعة!


* ليه البنات بتفتح بقها وهيا بتحط (ماسكرا) ؟


* إزاي لما اسأل عن مقر النادي الأهلي فين، الاقي الإجابة.. النادى الأهلى في الزمالك؟!



* ليه الشامبو بيبقى بالخوخ الطبيعى بينما عصير الخوخ بيبقى معمول بنكهة الخوخ؟



* ليه اللي سايق عربية ومشغل الكاسيت أو الراديو.. أول ما يدخل شارع ضلمة يروح موطى الصوت فوراً؟!



* ليه الناس بتقول لأي حد في الشارع "يا باشمهندس"، ما عدا المهندس فعلاً.. بيقولوا له "يا دكتور"؟!


* ليه بيقولوا في الأخبار، مصرع 9 في فلسطين، ومصرع 50 في بغداد، ومصرع 85 في زلزال، ومصرع 112 في سقوط طائرة؟! طيب ما يقولوا على طول مصرع 250 واحد في نشرة أخبار التاسعة!



* ليه لمّا الواحد يكون واقف مستنى الأسانسير بعد ما داس على الزرار اللي بيستدعى الأسانسير وبقى منور وباين إنه منوّر، ييجي واحد تاني بعد ثواني يبص لك ويبص للزرار المنور ويروح دايس على الزرار تاني؟!



* لما تيجي تتصل بواحد.. ليه الأرقام اللي بترد غلط.. ما بتكونش مشغولة؟!



* لو كانت الأرض كرة – زى ما بيقولوا – طيب الماتش هيبدأ إمتى؟!


* إذا كان – زى ما بيقولوا – الدنيا مسرح كبير، طيب أنا بامثّل ولاّ باتفرج؟! وإذا كنت من المتفرجين، طيب هم المتفرجين بيقعدوا فين؟!



* ليه بيكلبشوا العربية اللي واقفة صف تاني وقافله الشارع.. مع إن الشارع بعد الكلبشة بيفضل مقفول برضه؟!



* لو الصاعقة نزلت على حد بيموت متكهرب فورا، طيب لمّا الصاعقة بتضرب البحر، ليه السمك اللى فى البحر مابيموتش متكهرب؟



* لمّا الواحد بيعلّى صوت الكاسيت، هل ده بيسحب كهرباء أكتر؟



* لو البوليس وهو رايح يقبض على حد شاف فى السكة جريمة بتحصل ، بيمنعها ولاّ بيركز فى المهمة اللى طالع علشانها؟



* هل الحيوانات بتعطس؟


* طيب هل حصل فعلا فى يوم من الايام أن فيه واحد (ضرب عصفورين بحجر)؟



* ليه لما يكون الواحد جوه عربية والعربية داخلة هتعدى من نفق؟؟ تلاقى الواحد يوطى رأسه كإنه هو شخصياً اللي هيعدى من النفق مش العربية؟!



* ليه لما باكون في البيت واتصل بالسوبر ماركت (اسمه سوبرماركت ريشه) وأقول (آلو.. سوبرماركت ريشه؟!) يرد على يقول لي (إن شاء الله)؟! يعني (إن شاء الله سوبرماركت ريشه؟!) ولاّ (إن شاء الله مش سوبرماركت ريشه؟!).



* ليه لما تسأل واحد على العنوان وتقول له "شارع كذا فين؟!" يرد عليك بسؤال "هما قالوالك فين؟!". طيب ما هما لو كانوا قالوا لي ماكنتش سألتك، ثم هما مين اللي قالوا لي؟!



* ليه الناس في الشارع بتستخدم أدوات نداء لتوقيف أي شخص، أدوات نداء مالهاش أصل في اللغة و ينفع تنادي بيها على أحد في المطلق زى. بسست، والنبى يا، ويا كابتن، وباقولك وخُد يا، وأيوه يا، وليه أدوات النداء دي بتوقف الشخص المقصود بالذات؟!



* بيقولوا (لكل قاعدة استثناء)..طيب ايه الأستثناء بتاع القاعدة دى؟


* ليه لما حد يحب يدى معلومة بيبدأ الجملة بكلمة (بيقولك)، (بيقولك العربيات رخصت)!


* ليه فيه ناس لما تعدى عليها وتقول (سلامو عليكوا) ما تسمعش منهم غير صوت بيقول "وع.. س س.. هه"؟!



* ليه المذيعة دايما بتتمنى لنا وقت ممتع مع الفيلم العربي اللي بيتذاع للمرة الألفين.. وهى عارفة كده كويس؟!



* طيب ليه المذيعة بتقول أعزائي أفراد الأسرة.. وهى ما تعرفش حد فينا؟!


* ليه الشخص اللي يسألك "الساعة كام" لازم يرفع لك دراعه الشمال ويشاور على مكان الساعة بصباعه "لو سمحت الساعة كام"..



* اللى مايقدرش يتكلم اخرس، واللى مايقدرش يشوف اعمى، طيب اللى مايقدرش يشم أيه؟



* طيب ليه اللي يسألني عن الساعة لازم يحلفني "الساعة كام والنبي؟!".



* ليه لما تقول لواحد حاجة ومايسمعهاش كويس تلاقيه هو اللي علاّ صوته فجأة (بتقول ايه؟!).



* ليه الكتابة على التي شيرت لازم تكون بالإنجليزي، ليه ماحدش بيكتب على التي شيرت بتاعته بالعربي.. مثلاً "اللي ذاكر ذاكر خلاص".



* التوأم الملتصق لما بيدخل السينما ، بيقطعوا تذكرة واحده ولا تذكرتين؟



* لمّا البوليس بيهجم على شقة ويكسّر الباب، مين المسئول إنه يصلّح الباب ده؟


عندكم اجـــــــــــــــــابه



انتـــــــــــــــظروا رخــــــــامه اكــــــــــــــــتر .............. قـــــــــــريبا :sml39::sml39:

[عادل طه]

هههههههههههههههه
فعلا رخااااااااااااامه وستين رخااااااااااامه
بس رخامه دمها خفيف بجد
تسلمى يا قمر

[برنسس ساره]

ههههههههههههههه
والله رخمه اوى
ههههههههههه
تسلم ايدك يا قمر

[الروح أرق من الندى]

اقتباس المشاركة الأصلية كتبت بواسطة عادل طه هههههههههههههههه فعلا رخااااااااااااامه وستين رخااااااااااامه بس رخامه دمها خفيف بجد تسلمى يا قمر

ميرسي ياعادل علي مرورك

نورتني

[الروح أرق من الندى]

اقتباس المشاركة الأصلية كتبت بواسطة برنسس ساره ههههههههههههههه والله رخمه اوى ههههههههههه تسلم ايدك يا قمر

هههههههههههه مااااشي ياقمر

تسلمي لمرورك نورتيني

[الروح أرق من الندى]

ايه بقي ده فين الردود

يعني انا مكلفه نفسي وقاعده ارخم عليكوا وانتو مش عاوزين تدخلووا:690::690:

:vb39::vb39::vb39:

علشان تستريحووووووووووووووا