يوم اتمنى عدم تكرارة ولكن ( عجبى )

[morshooo]

بسم الله الرحمن الرحيم

النهاردة حصل موقف غريب جدا معايا طبعا اليوم لسه فى اوله اصلا :biggrin:

لكن الى هقولكم عليه دا حصل من حوالى 3 ساعات بالظبط .

تعالو اقولكم حصل ايه النهاردة والى اتمنى انه ميحصلش تانى

معايا او معاكم .

النهاردة الاحد المفروض يوم اجازتى بس عشان دخول العيد فقولنا

هننزل النهاردة الشغل وبالصدفه كمان امبارح بليل جالى اتصال ان لازم

اروح شركه الدعايه الصبح الساعه 9.30 عشان فى اعلان جديد

فلازم نشوف هنعمل فيه ايه يعنى بدال ما اكون قاعد فى بيتنا يوم اجزتى

اتلغت الاجازة وكمان هنزل شغلى من الساعه 9.00 الصبح بدال ما

بنزل فى الطبيعى الساعه 10.30 :biggrin:

المهم وانا فى الطريق كنت بالظبط خارج من مدينه العبور ورايح على موقف العاشر

فى الطريق بيبقى فى التجنيد ومناطق عسكريه وقبليهم سوق العبور طبعا

الطريق معروف يعنى .

ودائما قبل موقف العشر الطريق بيبقى واقف بسبب كوبرى بيتعمل جديد

النهاردة ولاول مرة الطريق ميبقاش واقف بسبب الكوبرى بس كان واقف

بسبب حادثه عربيه خبطت راجل عندة بتاع 40 سنه طبعا انا فضلت حوالى

نص ساعه لحد اما وصلت للمكان الى فيه الحادثه بينى وبينكم ركنت وقولت انزل

اشوف فى ايه لان كالعادة الناس واقفين وبيتفرجو على الراجل وهو مرمى قدامهم

انا قولت الناس خايفه يشيلوة فى اى عربيه يمكن خايفين من الدم والا حاجا

لاحسن يبهدلهم العربيات بس طبعا اغلبيه الى واقفين ناس مش معاهم عربيات

وكان راكن عربيه واحدة بس فقولتلهم يا جماعه طيب شيلوة واخدة معايا

فلقيتهم كلهم بيقولو ( لالالالا ) فقولت ايه طيب يعنى الراجل يموت

فواحد قالى لو دخلته عربيتك وروحت اى مستشفى هيتجاب رجلك

انا استغربت بصراحه فقالو احنا اتصلنا بالاسعاف وزمانها جايه

قولت لنفسى اسعاف ايه دا انا بقالى مش اقل من نص ساعه لحد اما

وصلتله هنا اومال الاسعاف قدامها اد ايه عشان توصل والطريق خلاص

على مدى بصرك العربيات واقفه يعنى فيها ساعات عشان توصل فقولت اتصل

بواحد زميلى هو ظابط شرطه فقولتله الامر كذا كذا والراجل ممكن يموت والا حاجا

فبقوله اخدة فى العربيه فرد قالى

( اوعى تدخله عربيتك سيبه لحد اما الاسعاف تيجى خالى بالك انتا الى هتشيل الليله يا معلم )

طبعا استغربت اكتر وقولت ياخبر ابيض الواحد رخيص اوى كدة وسهل انه يموت حتى لو

ممكن يكون فى وقت انه يتلحق فى اى مستشفى .

وصل بينا الحال اننا نقف نتفرج على واحد عربيه شايلاة وتقريبا بيفرفر ومش قادر حتى

يقول كلمه ( أأأأأة ) .

وصل بينا الحال برضو ان الواحد لو حب يعمل خير زى ما قالى صحبى كدا ( يشيل الليله )

طبعا بعد ما حصل كدا بصراحه قولت خلاص الواقفه مالهاش لزمه اروح على شغلى احسن .

وفى انتظار غدا خبر انتقاله لرحمه الله فى صفحات الحوادث .

ملحوظه : كالعادة الى خبط الراجل خد بعضه ومشى حتى مهنش عليه يشوف حصل ايه مش يمكن كان هو لحقه .

[fankosha]

لا اله الا الله
يعنى الواحد عشان يعمل خير
هو الى يتحمل المسئولية
ماهو ده الغلط وكل الناس بتخاف
تاخد اى حد عامل حادثة عشان
هيتهموه انه هو الى عمل كدا
يعنى الراجل يموت واحنا بنتفرج عليه

بس مش متخيلة الظابط كمان هو الى بيقلك كداازاى
ان شاء الله يكون الراجل كويس ولحقوة
يارب الحال يبقى احلى من كدا

[ĶǎnDO̳̿uChǎ ツ]

لا حول و لا قوه الا بالله

يااااااااااااااهـ

للدرجادي الناس بقت وحشه ...

و الله يـ احمد اتأثرت اوووي بالموقف

يعني الناس شايفه الراجل بيموت قدامهم .. و محدش عارف يعمله حاجه

عارفين

مصر محتاجه اعاده تصنيع .. و الشعب محتاج تغير كامل لـ نفسيته من جوا

لازم بعد الثوره كل دا يتغير

لازم يكون فيه ناس عارفين يعني ايه رحمه

ازاي الشرطه نفسها تبقى كدا !!!!!!!.....؟؟؟؟؟؟؟؟ بجد ازااااااي

لما تبقى شرطه البلد .. الي هي مفروض الامان و الحمايه بتاعتنا كدا .. الشعب يعمل ايه

بس و الله ربنا ما بيسيب حق حد ابدا

و كـــــــل مــــصــــري مـــات على ارضها بالقسوه و الظلم .. هياخد حقه

[خارج عن القانون]

هذه هى الحياة وهذا هو القانون
مع خالص تحياتى لك وللقانون
ويجب ذكر الشاعر الكبير هشام الجخ بكلامه الرائع حين قال
"لما جلادك على ولادك بيبطش"
ولا عزاء للثورة

[واد حبيب]

لا اله الا الله
هيه مصر كل علطول وعمر اهلي ما هيتغيرو مهما حصل

ربنا يهدي الجميع يارب وتكون الانسان في مصر غالي اكتر من كده

تسلم يا بتاع الدعايه والاعلان

الحبيب

[الرحــاال المٌتَمرد]

اقتباس المشاركة الأصلية كتبت بواسطة on my body هذه هى الحياة وهذا هو القانون مع خالص تحياتى لك وللقانون ويجب ذكر الشاعر الكبير هشام الجخ بكلامه الرائع حين قال "لما جلادك على ولادك بيبطش" ولا عزاء للثورة

والله كنت هقول نفس الكلمتين ..
بنفس النص .. سبحان الله ...

ولا عزاء للثوره

[тoкα..♥]

كـآنو فيلم بيتمثل وآلله
زي بآلظبط 1000 مبروك
لآ تعليق فعلآ
ربنـآ يرحمو لو كآن مآت ويشفيه لو عـآيش !!

[countess]

الله يشفيه لو عايش وان شاء يكون لسه عايش

~~~~~

[دمعه حائره]

لاحولا ولاقوة الا بالله
طبعا موقف محزن ومخزى بس الناس مالهاش ذنب
ده القانون اللى عمل فيهم كده والمواقف دى اتعرضت فى الافلام كتير
وده اللى خلا الناس تخاف تنقذ اى حد
ربنا يشفيه ويسترها معاك ومعانا كلنا
ويارب مايتكرر الموقف ده تانى

[بنت المختار]

يا ساتر يا ساتر
لا حول ولا قوة الا بالله
يعني اذا بدك تعمل خير بتلاقي شر فأحسنلك تخليك فحالك
معقول الحالة هاي يعني!
وضع مؤسف بجد
وين ضمير الراجل الي خبطو ومشي ،يعني خبطو فهمنا ممكن يكون عفوا
بس يتركو يموت ولا يسأل،!
وكمان الي هيساعدو هيدفع الثمن ويشيل الليلة فالأحسن يتفرج بس
يا ساتر...ربنا يصلح الاحوال