هات ايدك ..... هاتي ايدك .....

[*بنت عائشة*]

حاسة إن الدنيا بقت سودا في وشك ؟؟؟

خلاص الحياة بالنسبة لك مبقتش تفرق كتير عن الموت ؟؟؟

زهقتي من نفسك ونفسك تتغيري بس مش قادرة ؟؟؟

عملت كل الذنوب والمعاصي ومش قادر تبطلها ؟؟؟

حياتك كلها غلط × غلط ومش قادرة تعملي الصح أبدا ؟؟؟

حاولت تقرب من ربنا ولكن كل مرة بتبتعد وترجع أسوأ من الأول ؟؟؟

وصل بيكي التفكير إنك تفكري في الإنتحار ؟؟؟

لو ده إحساسكم ..

يبقى لازم تكملوا الموضوع ..




وأول حاجة هقولهالك ..

إوعى تيأس ..

إوعى تيأس يا حبيب قلبي ..

إوعي تيأسي يا أختي ..

الأمل موجود طول ما انت قلبك بينبض ..

الامل موجود طول ما لسه فيكي نفس ..

هتقول :

أمل ؟؟؟؟؟!

أمل مين يا عم انت ؟؟؟؟!

انت جاي من أنهي كوكب بالظبط ؟!!

ما تفوق يا حبيبي انت وبطل اللي بتشربه ده وتعيش الواقع اللي إحنا عايشينه !!!

أمل دي كانت زماااااااااااااااااااااااااااااااااااااااان !!

وانقرضت خلاص وما عادشي لها وجود !!!!

وإنتي هتقولي :

شوف يا أخ انت يا بتاع الأمل ؛

أنا حاولت أتغير بعدد شعر راسي ..!!

وكنت بقول زيك كده ان فيه أمل وعمر والكلام الفاضي ده ..

ولكن اتضح ان الامل ده وهم وان مستحيل الواحد يتغير في الزمن ده !!

وبقيت بهرب من ذنب للتاني ومن معصية للتانية ..

وخلاص العملية مبقتش فارقة مع الواحد كتير ..

يومين وبنقضيهم في الدنيا وبكرة ربنا يشوينا في جهنم وناخد اللي فيه النصيب !


هقولكم :

يآآآآآآآآآآآآآآآآآآآآآه ..!

للدرجة دي اليأس إتمكن من قلوبكم ؟؟؟؟!!

مين قالكم إن الأمل معدش ليه وجود ؟؟؟؟؟؟؟؟؟؟

الأمل موجود ودوافعه كتييييييييير أووووووي ..

ولكن الشيطان عمال يدفن أي أثر للأمل في حياتك علشان متحسش إنه موجود ؛ إما بالنسيان أو بتضخيم عوامل اليأس في حياتك ؛ فتشوفها قدامك زي الجبال اللي مش ممكن تتزحزح من مكانها أبداااااااااااا !!

وفي نفس الوقت بيلغي كل عوامل الأمل من حياتك ويصغرها ويحقرها في نظرك ويحسسك إنها محتاجة قرون علشان تتحق ؛ ده لو اتحقت أصلا !!!!

أو يقنعك بطريقة أو بأخرى أنك ملكش حول ولا قوة وإنك عمرك مش هتقدر تتغير لإن عوامل التغيير مش بإيدك ، إنما بإيد الحكومة أو الأهل أو الجيران أو واحد لسه ما اتولدش ويمكن مش هيتولد !!!!

المهم يقنعك إن مفيش حاجة بإيدك تقدر تعملها وبالتالي تقعد زي الباشا متعملش أي حاجة وتفضل زي ما انت !!

وبالتالي يزيد اليأس والفشل والتعب والإنتكاس والبعد عن الله أكتر وأكتر !!!





يا حبيب قلبي لازم تتيقن إن الأمل في الله موجود ولا ينقطع أبداااااااااااااا ..

اسمع ربنا وهو بيقول :

(وَلَا تَيْأَسُوا مِنْ رَوْحِ اللَّهِ إِنَّهُ لَا يَيْأَسُ مِنْ رَوْحِ اللَّهِ إِلَّا الْقَوْمُ الْكَافِرُونَ)

إوعى تسمع .. إوعى تسمع للشيطان والنفس ، إوعى يتسرب لقلبك ذرة يأس !

إوعى !!!

مهما عملت من الذنوب والمعاصي .. إوعى تيأس أبداً..

حتى لو سرقت وقتلت وزنيت وشربت مخدرات وعملت اللي محدش عمله،

إوعى تيأس يا حبيب قلبي ..

إوعي تيأسي يا أختي ..

باب التوبة مفتوح وربنا رحمته فوق ما يتصور أي بشر..إسمع ربك بينادي عليك ويقولك :

(قُلْ يَا عِبَادِيَ الَّذِينَ أَسْرَفُوا عَلَى أَنْفُسِهِمْ لَا تَقْنَطُوا مِنْ رَحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ)

شوفت ربنا بيقول إيه :

(إِنَّ اللَّهَ يَغْفِرُ الذُّنُوبَ جَمِيعًا)

يعني لو عملت كل الذنوب ، بس توبت ورجعت لربنا ؛ ربنا هيغفرهالك.. ده ربنا هو الغفور الرحيم ..

بس إنت إرجع وقول يارب اغفر لي ..

بس إنتي تعالي وقولي يارب اغفر لي ..

وتأكدوا مليون % إنكم مجرد ما هتحاولوا تهربوا من المعاصي وتقربوا من ربنا ..

هتلاقوا الرحمن الرحيم بيقولكم :

( وَهُوَ الَّذِي يَقْبَلُ التَّوْبَةَ عَنْ عِبَادِهِ وَيَعْفُو عَنِ السَّيِّئَاتِ وَيَعْلَمُ مَا تَفْعَلُونَ)




هتلاقوا الملك الكريم بيقولكم في الحديث القدسي :

(من جاء بالحسنة فله عشر أمثالها وأزيد ، ومن جاء بالسيئة فجزاء سيئة مثلها أو أغفر ، ومن تقرب مني شبراً تقربت منه ذراعاً ، ومن تقرب مني ذراعاً تقربت منه باعاً ، ومن أتاني يمشي أتيته هرولة)


وفي حديث تاني ، قال الله :

( يا ابن آدم إنك ما دعوتني ورجوتني غفرت لك على ما كان منك ولا أبالي! يا ابن آدم لو بلغت ذنوبك عنان السماء ثم استغفرتني غفرت لك ولا أبالي ، يا ابن آدم لو أنك أتيتني بقراب الأرض خطايا ثم لقيتني لا تشرك بي شيئا لأتيتك بقرابها مغفرة)


يآآآآآآآآآآآآآآآآآآآآآآآآآآآآآآآه ..

شوفتوا رحمة أكتر من كده ؟؟

إوعوا تيأس أبداً ..

إنت ممكن تكون عملت ذنووووب عظيييييمة !

إنتي ممكن تكوني عملتي مصاااااااااااااااااايب ملهاش عدد !!

بس الذنب الأعظم إنكم تفتكروا إنكم لو تبتم ورجعتم إن ربنا مش هيغفرلكم !!!

ده إنتم لو رجعلتم مش هيغفرلكم وبس ؛ ده سيئاتكم كلها هتتبدل لحسنات !!


قال الله تعالى :

( إِلَّا مَنْ تَابَ وَآمَنَ وَعَمِلَ عَمَلًا صَالِحًا فَأُولَئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُورًا رَحِيمًا )

يعني يا حبيب قلبي سجلاتك السودا وملفاتك كلها هتتمحي .. ويتحط بدلها أطهر وأحسن سجلات ....

يعني ذنوب سنيييييييييييين فاتت يا أختي كلها هتتبدل وتتغير لحسنات !!

مستنيين إيه بقى ؟؟؟!!

ربنا بيقول :

{وَاللَّهُ يُرِيدُ أَنْ يَتُوبَ عَلَيْكُمْ}

إزاي تقولوا إنه مش هيقبلكم ؟

إيه سوء الظن بالله ده؟!

أحسن الظن بالله يا حبيب قلبي ..

أحسني الظن بالله يا أختي ..

قال الله في الحديث القدسي :

(أنا عند ظن عبدي بي فليظن بي ما شاء)

والنبي أمرنا بحسن الظن بالله فقال :

(لا يموتن أحدكم إلا وهو يحسن الظن بربه)

وبعدين هو ربنا مش هيقبلكم ليييييييييييه ؟؟؟؟

ده ربنا بيقول :

{ مَا يَفْعَلُ اللَّهُ بِعَذَابِكُمْ إِنْ شَكَرْتُمْ وَآمَنْتُمْ وَكَانَ اللَّهُ شَاكِرًا عَلِيمًا }

ولو ربنا مش هيقبلك كان ليه جعلك مسلم ؟؟

ليه مطلعتش نصراني أو يهودي أو مجوسي بتعبد النار أو بتعبد البقر ؟؟

ربنا أنعم عليك وجعلك مسلم ، وكمان مسلم بيدور على طريقه وبيدور على التوبة ..

ليييييييه سوء الظن ده بالله ؟؟؟؟؟؟؟؟

مين اللي وقف على باب الكريم وطرده ..؟؟!!!

مين اللي لجأ اليه واستعان بيه وضيعه؟!

ميييييين ؟؟!!

ده ربنا أكرم مما نتصور وأرحم بينا من أي حد!

ده ربنا بيفرح بيك وبتوبتك ورجعوك إليه ..

ده ربنا فاتحلك باب التوبة 24 ساعة وبيقول في الحديث القدسي :






أنا جاي انهارده أمدلك ايدي واقولك هات إيدك ..

مش نفسك تفضفض لحد وتحكيله همومك ..؟؟؟

احنا هنا كلنا إخوانك يا حبيب قلبي ..

والبنات هنا كلهم أخواتك يا أختي ..

ونفسنا تسجلوا معانا في أحلى حياة وتمدولنا ايديكم علشان ناخد بإيد بعض للجنة بإذن الله ..


هتسألي وتقولي :
هي الناس دي تاعبة نفسها معايا ومع غيري لييييه ؟

هقولك علشان إنتوا أخواننا وأخواتنا.. أيوه أخواننا وأخواتنا..

وخايفين عليكم وبنحب ليكم الخير زي ما بنحبه لنفسنا بالظبط ..

ده حتى إيمان العبد مش بيكتمل غير لما يحب أخوه ويخاف عليه زي نفسه ..

قال رسول الله :
(لا يؤمن أحدكم حتى يحب لأخيه ما يحب لنفسه)

وكلنا في مركب واحدة .. ولازم ناخد بإيد بعض..
ناخد بإيد بعض في الدنيا ، علشان في الآخرة نتقابل مع حبيبنا ونشرب من إيديه ونبقى معاه في الجنة ..

هتقول :
بس أنا ماستحقش إني اكون عضو في المنتدى ده !!
او اكون وسطكم أو اكون أخ لناس زيكم !!!
انتو ناس طاهرة وعالم محترمة وبلاش توجعوا قلبكم مع العالم اللي زيي !!!

هقولك : مين قال كده يا حبيب قلبي ؟؟
كلنا اصحاب ذنوب ومعاصي ومفيش حد فينا معصوم .. كلنا بنغلط وبنتوب ..
وإنت بإذن الله بعد التوبة سيئاتك كلها بإذن الله هتتبدل حسنات وممكن تكون اطهر وأحسن مننا 100 مرة..
وملكش دعوة بالدوشة ووجع القلب ..
احنا يا سيدي عالم غاويين وجع قلب .. بس انت سجل وادوشنا واوجع قلبنا براحتك ..
وإن شاء الله هتتغير وتبقى احسن واحد في الدنيا ..
بس خلي عندك أمل ويقين في الله عز وجل ..






الصحابة كانوا بيقولوا إن سيدنا عمر بن الخطاب مستحيل هيدخل الاسلام ..

مستحييييييييييييييييل ده يحصل !!

لدرجة إنهم كانوا بيقولوا :

(لو أسلم حمار الخطاب ، ما أسلم عمر !!!)

يعني فيه امل ان الحمار ممكن يسلم إنما عمر لأ !!!

تخيل فقدان الامل وصل لمرحلة ايه ؟؟؟

ولكن زي ما قولتلك الأمل في الله موجود ولا ينقطع ..

وعُمر أسلم .. وبقى سيدنا عمر بن الخطاب .. الفاروق ..

أمير المؤمنين وثاني الخلفاء الراشدين ..

علشان كده بقولك اوعى تيأس ابداااااااااااااااااا..



ومهما غلطت أو عملت ذنوب ومعاصي قوم واتوضا وصلي ركعتين توبة وتاكد إن ربنا هيقبل توبتك ..

هات قلبك .... هات ايدك .. وهتلاقينا معاك ..

هاتي قلبك .... هاتي إيدك .. وهتلاقينا معاكي ..

هنكون جنبكم .. ومش هنسيبكم أبداً بإذن الله ..

مستنيينكم بإذن الله تسجلوا وتتواصلوا معانا

في قسم

التواصل الإيماني ,


نحبكم في الله ..

منقول من موقع احلي حياة في طاعة الله

[زهره الشتاء]

قال الله تعالي بكتابه العزيز : بسم الله الرحمن الرحيم (( قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لَا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ )) صدق الله العظيم يا الله نداء عَذب .. نداء ندىّ نداء رخىّ يملأ القلوب أمنا واطمئنانا ورجاءً في الرحيم الكريم اللطيف جل جلاله إن وقعت و زلت قدمك فأنت بشر فأصغ سمعك وأحضر قلبك لهذا النداء العلوى الجليل واسعد واسجد لربك شكراً أن نَسَبَكَ الله لتكون عبداًَ له (قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ) يا له من شرف !!! أن ينسب الله الذين أسرفوا على أنفسهم بالمعاصى والذنوب وجعلهم عباداً لعلام الغيوب جل جلاله من أنا ؟ ومن أنت ؟ على المعصية ننسب عباداً لله ؟ ما طردنا الله من هذه الصلة ؟ لا والله لأنه خالقنا لأنه هو الذي يعلم ضعفنا ويعلم فقرنا ويعلم عجزنا ويعلم جهلنا .. ويعلم ذلنا فإن ذلت قوتُك ووقعت في كبيرة من الكبائر أو في معصية من المعاصى . فهيا.. إياك أن يخذلك الشيطان وأن يصرفك عن قرع باب الرحيم الرحمن لاتتردد ف رجوعك وتوبتك لربك العظيم اللهم لاتخرجنا من هذه الدنيا حتى ترضى عنا يالله كم حالنا مؤسف..دُنيا فانيه مهماكانت مكانتنا فيها لن نخرج منها سوى بكفن ابيض وعملنا سواء كان صالح اوطالح.. هنيئاَ لمن اعد العده وتزود ليوم المعاد.. كلمااااات مؤثرهـ ورائعه جداااا جدااا جميله مميزهـ كعاادتكـ حبيبتي دمتي وداام إبدااعك اعجآبى + تقييمى لك تقبلي مروري دمتي في حفظ الله ورعايته..!

[البرنس رامى]

اشكرك اختى بنت عائشة على روعة انتقائك

وبارك الله فيكى

كلمات بالفعل تستحق التقييم

بارك الله فى كاتبها وناقلها

وبالفعل لازم ولابد نترك اليأس ونتفائل

[*بنت عائشة*]

جزاكي الله خيرا زهرة الشتاء علي اضافتك الجميلة
ربنا يكرمك ياقمر يارب

[مشتاقه للجنه]

جزاك الله خير يا بنت عائشه

موضوع قيم ومعلومات مفيده

أفادك الله غاليتى

[ندوشه 2011]

بارك الله فيكى وجزاكر خير اللهم اغفر لى زنوبى وللمسلمين جميعا

[غزاوية وافتخر]

مابعرف بصراحه شو اعلق
بعد قراه هالسطور
اللي معناها كبير كبير
وياريت كلنا نفهم معناها ةنعيش بالمعني
وبهيك انشالله بيكون الامل موجود والحياه الحلوه كمان موجوده
بشكرك علي طرحك المميز حبيبتي

[*بنت عائشة*]

جزاكم الله خيرا حبيباتي علي ردودكم

[Sєяєєη●•ʚɞ]

موضوع مميز
نورتى المنتدى من تانى ياحبيبتى
الف مبروووك تقييم 5نجوم
موضوعك هينزل فى استفتاء المواضيع المميزة
وفى انتظارمزيدك
..

[توحد ارواح]

التوبيك رائع وبه معنى جميل
ولكنه مغلق للاطلاع فقط لانه قديم