ح ـصريــآ :: مسآبقة وح ــكآية مع SiLver Spectra

[♥..pure]

السلآم عليكم ورحمـة الله وبــركــآته :/ هلا ومرحبــآ بيكم يـ اعضاء و زوار بنــآت مصر .// صبــآحكم / مسـآئكم فــل مساء أمس الموافق 7/1/2012 >> تم تنزيــل مسابقة مســآبقة آلة الزمن من قبل SiLver Spectra >> دكتـور طارق بمناسبه المسابقه الجديدهـ قولت نستغل الفرصه ونعمل لقاء حصــري مع [ صـآحب موسوعه مسابقات بنــآت مصر ] من زمان وأنــآ نفسي أروق وأجمع كل مسابقاته ونقعد نفتكرهم سوا :biggrin: اكيد الكل مشتاق انه يعرف ازاي طارق بيجيب افكار المسابقات دي وازاي يقدر يطلعها بالشكل المنظم دا >> حــآوي دا ولا ايه !! طبعا كل فترهـ بينزل واحدهـ وكدا مش هنخلص بأهـ هتبــقآ الحلقه عبارهـ عن استعراض مفصل لـ المسابقات اللي نزلها من اول ما دخل :// محدش يزهق الكلام مشوق جدا بصراحه >< بـــ ر بـــ >>

[♥..pure]

أهلا بيكـ يـ طارق معانــآ النهاردهـ الاسئله محتاجه اجابات و الجمل محتاجه تعليق :d آه و أنا سرعتك في تنزيل الاستضافة قبل ما المسابقة الأخيرة تبرد و معلش لو هطول و هرغي دا تاريخي المسابقاتي هحطلكم شوية صور مع الردود عشان تشوفوا الماضي ,يمكن يعجبكم لو الرغي مش عجبكم = ايه حكـآيتكـ مع المسابقاتـ وازاي جاتلكـ فكرهـ انكـ تنزل لغز والاعضاء تقوم بـ حله !! نبدألك من و أنا صغير و لا من المنتدى ؟ شوفي أنا من و أنا صغير كنت بحلم ابقى كبير ) لا بس كنت متعود دايما أبتكر لعب و الغاز مع صحابي , كل أجازة افكر هنلعب ايه مختلف , ماكنتش أحب ألعب لعب عادي كدا و خلاص , لأ أحب اليوم يبدا بخطة و بلعبة جديده و بعدين لما نخلصها نلعب الألعاب التقليدية لحاد ما اليوم يخلص فكانت الافكار دي في الغالب بيكون فيها تحضير و ورق و قصقصة و شغل كبير كدا , افتكر اني كنت برجع من المدرسة في اخر الاسبوع ما برحمش نفسي شغل عشان الحق اخلص الرسم او العدة بسرعة , كنت حتى بدوخ من الاجهاد , و اخلص من هنا و انزل عدل بالعدة للعيال الي بيكونوا مستنييني و تخلص اجازة اخر الأسبوع و تخش في الدراسة و ابدا أفكر هنلعب ايه في الأجازة الي جايه , لأن طبعا بنكون محرومين من النزول ايام الدراسة فتقدري تقولي ان العملية شكلت فيه خيال قابل للتنفيذ (ملغزاتي قديم ) في واحد مكن يكون عنده خيال , بس بيجي يوظفه بيوظفه غلط أو بيتوظف بشكل غير مفهوم , و أعتقد دا شفناه قبل كدا في مسابقة صاحبها حب يعملها بلغز و كان حلها مايخطرش على بال حد و غير منطقي (فانتازي) فهنا بقى وجود الموهبة الي تقدر توظف الخيال كويس مهم أما بدايتي في المنتدى فنخليها مع السؤال التاني =كلمنــآ عن بداية أفكاركـ مع المسابقات الاوليه ليكـ .. طبعا أنا بدايتي زي بداية أي شخص , حتى ماكنتش بكتب مواضيع , كنت بنقل مواضيع ترفيهية , حتى لو كتبت كانت بتبقى هزار بداية الكتابة الجادة كانت في قسم الاقلام جربت أكتب و أنزل افكار مختلفة و لاقيتها عجبت ناس كتير من هنا بدا الخيال يشطح معايا شوية , و فرحت اني قدرت أوظفه بشكل بيخلي عرض الموضوع مختلف عن أي موضوع تاني و كمان فرحت اني حسيت اني رجعت مواهب الطفولة الي اندفنت مع الكبر لأن خلاص ماعتش ينفع تلعب في الشارع زي الأول فدي كانت البداية الي نقلتني على المسابقات بعد كدا , لأن الخيال في المواضيع مهما كان مش هتقدر تشطح بيه أو تبتكر حاجة جديدة , فحسيت ان الأداء اقدر أطوره أكثر مع المسابقات خصوصا ان المسابقات بيكون فيها مشاركة من الأعضاء الي بيحاولوا يحلوا و بيندمجوا معاها أكتر و بتقدر تنسج الخيال بالشكل الي انت عايزه حسب شكل المسابقة = نرجع بـالذاكرهـ لورا شوييتن ونبدأ المشوار من الاول اول مسابقه نزلتها كانت كسر الشفرهـ وفتح الخزنه .. منين جاتلكـ الشفرة ! مذاكراني كويس انتي دي فعلا أول مسابقة ليه بعد تلت ايام بس من حصولي على اللون الأحمر كان قسم المسابقات وقتها حديث الولادة يمكن بقاله 3 شهور بس و كان فيه مسابقتين بس بتوع هدى الله , اثث بيتك على مزاجك , بتجيب عضوين و كل عضو يجيب صور بيت و الأعضاء تصوت و التانية كانت المسابقة الكبرى و كانت عبارة عن اسئلة عامة بتتسال لفريقين لمدة 4 ايام كل يوم الساعة 8 تقريبا و كلو كوبي و بيست من جوجل , الي كان بيحضر ال4 ايام كان بيفوز ,, تقريبا كانت مسابقة حضور و كان في زنزانة بنات مصر كان ماسكها (عراقي ) ان عضو يتسجن في قسم , و ممنوع يرد برا موضوع السجن غير لما يخرج , كنا بنتسجن و بنخرج نرد عادي , كان موضوع فاني مش أكتر ((تصدقي ممكن نعملها بس نسجن بجد هههه)) فجتلي فكرة المسابقة بتاعت فك الشفرة , و دي فكرتها جايبها من ألعابي الطفولية , كنا بنعمل لغات سهمية و لغات رمزية و ليها أبجدية و وظفتها في المنتدى كلو بالفوتوشوب عملت ابجدية برموز و كان العضو وظيفته انه يقرا موضوع المسابقة كان فيه قصة بسيطه لشخص زار المنتدى و خبى صناديق في مواضيع هو زارها و وظيفتك انك تقرأ و تعرف المواضيع الي زارها ,, راح يشرب اناناس فتخش مثلا قسم المشروبات تشوف موضوع اناناس و تلاقيه جواه صندوق و الصندوق فيه ورقة يوديك لصندوق تاني , و اللغة بتترجم من ابجدية اديتها لضياء ,الي بيعرف المراقب الي لمحت ليه في الموضوع بيبعتله رسالة و بيقدر يفك شفرة الصور الي كانت في الصناديق و بيبعت الحل في النهاية هي كفكرة البحث جوا المواضيع فهي مش جديده لأن أول من عملها في المنتدى كانت مشرفة النقاش زمان عضوة اسمها كراميلا , كانت بتعمل مسابقة في قسم النقاش و تخبي صورة مطلوبة في موضوع معين و تلمح لاسم العضو دا و وظيفتك تدور على الصورة جوا كل مواضيع العضو لحاد ما تجيبها , طبعا البحث دلوقتي اصعب بكتير من زمان لان المنتدى ماكنش بقاله سنة ,, دلوقتي باقيت محتاج معجزة عشان تدور و مش هتلاقي المهم ان الجديد في مسابقتي هو اني عملت رموز و ترجمة بالأبجدية و كانت عجبت الناس , و كنت بساعد الناس جامد أوي لدرجة ان ماكنش فاضل غير اني احلها كانت أول مره بقى و مش متعودين عالنظام = لاحظت ان اولى مسابقاتكـ كانت بوليسيه زي مثلا مسابقه الشرطه والـ teams اللي عملتها ؟!! اه المسابقة دي كانت حلوة , بس كانت متعبة جدا و يمكن دي المسابقة الوحيدة الي عملتها بفرق و مجموعات عبارة عن 4 فرق شرطة , و كل فريق بيحط عربية شرطة التيم بتاعه ,, كان في اخضر و اسود و ازرق و احمر ,, كان شكلهم حلو بصراحة في التواقيع ,, كلو بينور في توقيعه ههههه و كل يوم حد يشوفهم بينوروا و يقولي عايز انضم بس ماكنش ينفع خلاص العدد مكتمل و كان في قسم بباسورد عامله ليهم كل فريق له موضوع بيحط فيه المخالفات و اكتر فريق يجمع مخالفات بياخد اعلى نقط كنت بعد احسب بقى كام مخالفة غير اني بدخل و احذف المخالفة و الي كان يجبلك مخالفات من سنة و اكتر كانت متعبة في المراجعة كل يوم و حتى كانت المفروض تتنظم كل فترة بس انا اضطريت اقصر مدتها لأن كمان حصلت خروقات بين المجموعات ,الي كان بيسرق مخالفات غيره الي مبلغ عنها و بيحطها في موضوع مجموعته و الي كان بيستقصد حد و عدت على خير و كانت الجوائز تقريبا 600 مشاركة لنور كمال و كانت بتعتبر اكبر جايزة تم منحها في المنتدى وقتها كانت حاجة كبيرة أوي لأن وقتها الي بيبقى عنده 6 الاف مشاركة بتلاقيه مرتب من العشرة الاوائل مش زي دلوقتي 24 الف و ارقام فلكية كدا افتكر ايام ابو ادهم كانت هدايا المسابقات 25 مشاركة و في 15 مشاركة ههههههههه كانت الهدية الكبيرة اوي بتاعت المسابقة الكبرى هي 50 مشاركة ,,تاخدها و ترقص من الفرحة ) مع الوقت بقى و الزمن حصل تضخم ,,زي الاقتصاد بالظبط ,,و الاسعار زادت = وفـجآهـ اكتشفت عشق طارق لـ الفلكـ وعالم الفضاء .. عملت مسابقه الرياضه الفلكيه !! ايه نظــآم الفلكـ والفيــزياء معاكـ !! لا كان في قبلها على فكرة الي هي تقريبا كانت مسابقة حساب زاوية دايرة كنت بحب هندسة الدوائر و كدا و لحاد دلوقتي فاكر قوانينها لاني كنت فاهمها مش حافظها , كان المدرس في الحصة يرسم المسألة و هو بيرسمها بكون حليتها ,,تقريبا الوحيد الي كنت برفع ايدي ههههههه و بجبله خمسين طريقة للحل لما يجيلنا موجه بقى كان بيسيبني للاخر ,,مايصدق حد تاني يجاوب ,,كنت بدايق لان عبال ما يجي دوري بتبقالي طريقة حل بايخه كدا , الطرق الحلوة كلها اتقالت اما مسابقة الرياضة الفلكية فدي اكتشفتها و أنا قاعد مع نفسي و عندي 15 سنة ,, لاقيتني لواحدي بحسبها ,,احنا عندنا الكورة الارضية اليوم فيها ب24 ساعة و في عندك 360 خط طول بيقسموها ,,يبقى بين كل خط و التاني كام دقيقة ؟ الي هو بيسموه فرق التوقيت وظفت الفكرة في مسابقة و بحثت كمان عن بعد كل خط و التاني بالكيلوميترات عند خط الاسواء و لعبت بقى بفرق التوقيت و بعدد الخطوط و بالمسافة بين نقطيتن عالارض و عملت منها مسألة أما لو بتسألي عن الفلك عامة و الفيزيا فأنا بعشقهم الأولى بعشقها عشانها بتحسسني بمدى اعجاز البني ادم لما الواحد بيشوف حجم الكون , بتجيلي كدا حالة سكون و بحس اني مش مع نفسي أما الفيزيا فدي بحبها عشانها كلها تفكير و دماغ , بيبقى فيها حفظ و فهم مع بعض , مش حفظ بس و لا حساب بس زي الرياضة = فـآكر مين اللي فــآز فـ المسابقه دي ! وأخد اينشتاينه المنتدى !! آه البت نور كانت فرحانه باللقب اوي و احنا كنا بنضحك عليها كل ما بنشوفها الانيشتاينه جت اهي هههههه = كان انقلاب فـ عالم المسابقات >> ظهر شكل جديد ليكـ << الذكاء >> واستكشاف الاذكياء !! بصي مش دي الي عملت انقلاب ,,مجرد مسابقة حساب ,بس حسابها حلو ,, أنا بشوف مسابقات في منتديات تانية مسائل معقدة جدا و مافيش بقى شرح قوانين انت الي تبقى عارفها و ناس بتحلها ,,الي هما غاويين مخمخة على غير مسابقاتي انا بحطلكم القوانين و بتكون المسائل سهلة كمان, مع ان كتير بتكون قوانين متألفه بس بحطها عشان اديكم مفاتيح الحل , انت وظيفتك تحسب صح بس لكن انقلاب انقلاب ,,هقولك لما يجي سؤالها قبل السؤال الي جاي في مسابقة فاتتك (مراقب الجريمة) دي كانت أول مسابقة صبر ,, انك تعمل صورة بالفوتوشوب و تزود التوقيت بتاعها و يكون مطلوب منك تراقبها لحاد ما تشوف الحرامي أو اللص الفكرة دي جت من موضوع قديم لعضو كان اسمه (نزف الزكريات) كان مراقب و بقى اداري لمدة اسبوع تقريبا بس ,,كان مره حط موضوع فيه صورة و بيقول انها صورة عجيبه و سبحان الله بتغير نفسها بعد مدة و لا أحد يعرف سرها ,,حسسوني انها سحر و شعوذة و هي العملية كلها انها صورة متحركة و توقيت التغيير بتاعها كبير فقولت اوظف السحر دا في مسابقة و بعدين كان في بعدها امتحان قدرات بنات مصر عملت اسئلة عن تاريخ المنتدى و صح و غلط و اختر الاجابة و كدا و قاعدت اصحح في الورق دي ورقة ضياء (فضايح بقى هههه)

[♥..pure]

= ومن الذكاء لـ الصبر :/ نزلت مسابقتين متتاليين (( SUSPECTS & الثانيه المفقودهـ & مسابقة word missing )) وكانت الاعتماد الاول والاخير عـالصبــر عشان نعرف الحل ؟! SUSPECTS هي مراقب الجريمة التانية بس على تطور شوية ,,الفكرة كانت عجبتني و حبيت اعملها تاني (الثانية المفقودة) قوة ملاحظة و صبر ,,عداد ساعة بيمر بسرعة و مطلوب انك تعرف الثانية الي مش هتظهر اما (الكلمة المفقودة) فدي كانت اول مسابقة سمعية اغنية بتشتغل و كلماتها سريعة و مطلوب تعرف الكلمة الي مش هتظهر و هو بيقولها دي صورة للمسابقة و دي لمسابقة الثانية المفقودة المستوى الثاني أما دي فكانت لمسابقة الكلمة المفقودة http://www.swfcabin.com/open/1268298718 = جاتلكـ الثقه منين أن العضو يقعد ويستنى او يعد الثواني يعني وانا ايه اللي جابرني ههههههههه ؟! الثقة من المعجبين الي زادوا ,,معجبي مسابقات مش اعجاب شخصي و كمان الي يجبرك انك عايز تطلع الاول عليهم ,,و في مغريات جوائزية و عامة اي مسابقة الغرض منها هو التسلية مافيش احلى من نشوة الانتصار لما تحل المسابقة بجد احساس فوق الفظيع ,,لا تقولي حب و لا بتاع هههههه زي لما تلعب جيمز و تخلصها , انت ايه الي جابرك تلعب و تتعب نفسك و تعيد و تخسر ,,هي التسلية انت بعد ما بتخلص اللعبة بتكتشف ان المتعة كانت في صعوبتها و في محاولاتك الي كنت بتخسر فيها و بتضايق أوي انا للاسف نادر لما بجرب شعور حل مسابقة يمكن في مسابقة عكاشة بتاعت الوريث و الشركة بس انتي بقى بقالك سنة بتقولي هتعملي مسابقة و مش عملتي حاجة = وعلى غير التوقعات نالت اعجاب الكثيرين وفيه ناس كتير اشتركو فـ المسابقه ؟! كان ايه شعوركـ !! مش فاكر ) بس مش اول مسابقة و يتشرك فيها ناس ,(عندي تبلد خلاص ) = ونيجي لـ أفكــآر آخرى >> الملاحظه بـ مسابقه الاختلافاتـ وكان نوع جديد من مسابقاتكـ .// دي مسابقة نمطية بس طبعا الناس بتحب الاختلافات كنت حاطت فيها تقريبا 30 اختلاف في صورتين كبار جدا على راي ماتركس قالي انت جايب الكورة الارضية كلها الحلو فيها هو التحدي ,,أنا مش قولت الصورتين فيهم كام اختلاف و سبت كل واحد يطلع الي يقدر عليه فكان في تباين في الحلول و دا كان احسن حاجه فيها و دي صورة الاختلافات http://i.imgur.com/uMwPy.gif = واستكمالاً لـ الحساب وتشغيل المخ >> نزلت مسابقه الميزان التجاري .:: أعتقد الميزان كان قبل الاختلافات مش فاكر بس الميزان التجاري فكرته كانت عندي و انا بعمل الفاتورة ,,نفس الفكرة بس القصة و المعطيات مختلفة و الطريقة غير شوية = مع التطور الطبيعي لـ مسابقاتكـ :: عملت مسابقه تعتمد عـ الذكاء و الحساب و قوه الملاحظه و الصبر بردو :d أزاي جاتلكـ فكرهـ مسابقه كسر باسورد العضو >> الحروف اللي عملتها من وحي خيالكـ ولا مقتبسها !! دي كانت اعادة لفكرة اول مسابقة عملتها ,,الي هو انك تعمل رموز و لغة غريبة بس الجديد هو اني أول مره اعمل ملف مضغوط مرفق له باسورد بتجرب عليه و طبعا كمان القصة كانت افضل من اول مسابقة يعني تقدري تقولي تطوير للأداء بتاعها دي صورة من صور المسابقة وبعد سلسله طويله من المسابقات >> ومع ازدياد عاشقي مسابقات سيلفر .. نزلت مسابقه بنات مصر الكبرى 1 <> كلمنها عنها شويه !! جاتلكـ فكرتها ازاى :/ وازاي عملت المجموعه المتنوعه دي من المسابقات هي الفكرة فجأة ضربت في دماغي اني أعمل مجموعة مسابقات مع بعض ,,وقتها كانت حمى المسابقات نازله عليه و كل اسبوع او اسبوعين بالكتير مسابقة جديدة فحبيت تكون دي الضربة القاضية و كنت من بعدها مفكر اني خلاص مش هنزل مسابقات تاني لأني حطيت فيها افكار كتير ,,قولت خلاص ايه الي لسه فاضل و مش عملته بالرغم من ان المسابقة الكبرى الأولى كانت متواضعة جدا بالنسبة للتانية و التالة في الافكار ,,ماكنتش لسه استعملت الفلاشات و في منها مسابقات كانت عبيطة زي الصراصير بس ماحدش قفلها زي التانية و التالتة دي صورة النتيجة http://i.imgur.com/aUucS.gif =وفعلا حصل اقبال مهول عـ المسابقه وتم اشتراكـ ولكن تم حصول محمد عكاشه عالمركز الاول و فارما عالمركز التاني و ماجيكال روز وسيرين عالمركز التالت ايه تعليقكـ !! كانت فعلا بداية ظهور محمد عكاشة فجأة لاقينا عضو جديد و طالع المركز الأول و مجموعة كان 86 تقريبا ,,و كان اعلى حاجة اما فارما فكان ليها تاريخ مع المسابقات الي قبل كدا بس ماكنش كتير يمكن مسابقتين تلاته الي حليتيهم قبلها و سيرين و ماجيكال روز اعتقد كانت بدايتهم مع مسابقاتي مش متذكر أوي =بعدها عملت مسابقه لذيذهـ خفيفه تحقق رغبه الجميع بانهم [ بيعرفوا يحلوا مسابقات طارق ] وهي مسابقه بيت الرعب :d على ما اتذكر انها ظهرت على غير توقعاتكـ :: يعني طلعت اسهل مما كنت تتوقع .. تعليقكـ ؟! هههههههه اه لاقيت المنتدى كله حلها و الله بفكر اعملها تاني بس لازم ازود جرعة الصعوبة شوية كانت عبارة عن ابواب بتدوس على كل باب و بينقلك لصورة الغرفة و كل غرفة من جوا فيها رقم و لغز مكتوب في الموضوع عن تسلسل باسورد ملف مضغوط حسب ترتيب الغرف الي بيزورها و بيوصف في كل شكل غرفة بس كانت سهلة و يمكن 25 واحد حلها و اضطريت اقلل تقريبا من قيمة الجايزة و الغي الرمزية الكبيرة بس عامة عادي مش خضة و لا حاجة بالعكس ,,العضو لما بيعرف يحل المسابقة بيكون مستمتع جدا , و دا اصلا الهدف من المسابقة هي متعة العضو = واستكمالاً لأنجــآزات طارق واستكشاف الاذكياء نزلت مسابقه الذكاء الخارق 1 :: وكانت مستويات >> اعتمدت عـ الحجم والسعه ؟! منين جبت الفكرهـ وازاي صممت تصميماتها الخرافيه بـ العبقريه دي ! دي مسابقة الصيف افتكر اني وريتك الفكرة جاتلي منين كان في منتدى تاني لاقيت حد حاطت لغز بسيط ل5 حنفيات و قالك كل حنفية بتنزل كام و سعة الخزان و طلب المدة الي فيها الخزان هيتملي أنا بقى أخدت الفكرة و طورت عليها و عملت مستويات و وسعتها و خليته ينقط و يسرب و خزان يودي لخزان و كدا بس عجبتني فعلا فكرتها و فكرت أعيدها الصيف الي فات بس حسيت انها هتتكرر تاني و هتبيخ فعملت مستويات بس بفكرة الاثقال الموزونه دي صورة للمسابقة المستوى الرابع فــآز بالمركز الاول [ بعد التصفيات ] .. محمد عكاشه & فــآرما توقعت ان حد يجيب المستوى السابع بالرغم من صعوبته اللي عملتها !! اه توقعت لانك حليتوا كل الي قبله و هو ماكنش يفرق عنهم غير ان المسألة أطول ما شاء الله عليكم يعني عايزين شوية قر كدا البت في ايام مفترجة = المنطق !! تحولت مسابقاتكـ الى المنطق .. وليست تعتمدت عالذكاء او الحساب ولكن فقط التركيز والمنطق زي (( CV المرحوم و شوارع المرور ؟! تعليقكـ !! مسابقة CV المجهول كانت منطق و أعتقد انها كانت مميزة لأنك من خلال قصة بتوصف وزن الشخص و اسمه و سنة و ساكن في اي دور و كدا فكرتها جت من اول مسابقة في المسابقة الكبرى الاولى بتاعت سكان في عمارة من 13 دور و بحط قصة بقى انه طلع لجاره الي فوق و بعدين لجاره الي تحت و هكذا بيعد يتنقل في العمارة و في الاخر بطلب منك تعرفني هو اصلا ساكن في الدور الكام ؟ انت بقى من خلال تحليلك و تتبعك للاحداث بتقدر تكتشف هو ساكن في الدور الكام اما شوارع المرور فدي اعتقد كان فيها حساب شوارع و اشارات بتقفل و بتفتح و قوانين في السير و مطلوب انك تعرف اقصر طريق بس ماكنش عليها اقبال قوي = ورجعنــآ تاني لـ الفضاء ومستوياته .. امتزاج الفضاء بـ الحساب .. بـ المنطق والتركيز >> قدرهـ هايله بجد تعليقكـ الفضاء كانت 5 مسابقات و كلها حساب بصي الحساب هنا مش بيكون له شعبية أوي ,يعني بتلاقي دايما الي غاويين حساب ناس معينة بتتعد عالصوابع بس المسابقة مشي حالها و كانت فكرتها حلوة = ومرهـ اخرى وبعد عام تقريبـآ نزلت مسابقه بنات مصر الكبرى 2 .. بأفكــآر جديدهـ وشغل واحتــراف أجدد :: تعليقكـ ؟! هي دي بقى المسابقة الي عملت نقلة نوعية في مسابقاتي بداية توظيفي للفلاشات بالرغم من ان البداية كانت متواضعة شوية ,بس المسابقة الكبرى التانية حبيتها جدا , يمكن أكتر من التالته عملت فيها أول موبايل و رسائل و قصة حب فيها و باقي المسابقات كان فيها جزئيات كتيره ممكن مسابقة كوشيرو دي اكتر حاجه عجبتني فيها ,,مع انها ممكن تكون ارخم مسابقة عند الأغلبية بس فعلا كان مبذول فيها مجهود كبير و هي الي نقلت مسابقاتي لمستوى اعلى باستخدام الفلاشات = وفعلا لقيت اقبال كبير عليها وصل لـ 145 عضو ولكن .. حصل محمد عكاشه عالمركز الاول وفـآرما وميدو عالمركز التاني و دكتور نور وعاشق الهندسه عالمركز التالت و سيرين عالمركز الرابع ورونا التوتا عالمركز الخامس :: ايه تعليقكـ عالاسماء دي ؟! هما دايما الناس الي بتفوز في كل مسابقة عكاشة و انتي و نور مهما اغير في المسابقة بيحلوها ,,تقريبا فاكين شفرة دماغي تقدري تقولي فاهمين بفكر ازاي و عايز ايه مجرد ما بيشوفوا المسابقة من بصة واحدة بيقدر يحط توقعات صح انا عايز ايه و ايه المطلوب و دا ممكن الي بيفتقده ناس كتير ,,على طول تلاقيه تاه في النص و مش عارف هو عايز ايه و تلاقي دماغه قفلت مع ان المسابقة انا بعملها بشكل منطقي , و دايما بتخيل نفسي انا الي بحل و أنا بعمل المسابقة بيكون في افكار كتير و صيغ كتيره ,,بحاول بقدر الامكان أخليها سهلة و فيها سنة صغيره صعبة ,,لكن مش بزود الصعوبة عشان ما تبقاش مستحيلة الحل و يمكن أصعب حاجة هو انك تزرع فيها المنطق بحيث توزن بين اللغز و الصعوبة و طريقة الحل و التوقع = ومع براعتكـ بـ تصميم الفلاش والتلاعب بيه :: صممت مجموعه من المسابقات اللي بتعتمد عـالفلاش والفوتو واحترافه :/ (( SKULL & منظمه القناع الاسود )) الفكرهـ جات ازاي .؟! اتعلمت الفلاش ومنها جاتلك ازاي تستخدمه انكـ تعمل خزنه وكتاب وموبيل وكدا ؟! مسابقة القناع الاسود دي اتصممت و أجلت عرضها لمدة شهر تقريبا عشان كانت المسابقة الكبرى مش لحقت تعد و بعد ما انهيت نتيجة المسابقة الكبرى التانية كنت خلاص قررت انزل القناع الاسود حصلت الثورة و بعدها النت اتفصل فاتجألت كمان اسبوعين ,,و دي تعتبر المسابقة الوحيدة الي كنت مخلص تصميمها و صابر عليها لأن في الغالب أول ما بخلص بنزل قصة التصميم بدأت بعد ما عملت المسابقة الكبرى 2 بالتحديد اول مسابقة الي هي ( احمد بنات) الي كان فيها موبايل لاقيت كان في تعليقات بتقول يعني ايه خزنة ,,لاني كنت حاطت ملف مضغوط في المرفقات و بقول مطلوب منك انك تعرف الباسورد بتاع الملف المضغوط عشان تفك الصورة الي جواه فلما لاقيت تعليقات بتطلب استفسار خزنة فين بالظبط و ايه الملف دا جه في بالي سؤال : صحيح ليه ما اعملش خزنة بجد مش مجرد ملف مضفوط بباسورد لأ أعمل محاكاة للخزنة دورت على ملف فلاشي يكون لتصميم خزنة جاهزة و أعدل عليه مش لاقيت كان عندي استعداد اصمم خزنة بس العقبة هنا هو ازاي هقدر اخلق تعقيدها لما جاتلي فكرة التنقل بين المشاهد صممتها على طول طبعا بتاخد وقت كبير غير ان التصميم بيكون معقد جدا انت بتعمل مشاهد و مشاهد بتنقلك على مشاهد و هكذا و كل دا بيظهر ليك في النهاية على شكل محاكاة انت مجرد بتدوس على ارقام بيقولك غلط او صح لكن التصميم نفسه معقد جدا ,,تصميم شبكي صعب اني اوصفه كدا ,, بس بصراحة حسيت اني مخترع لما ابتكرته مش غرور ,, بس فرحان و مازلت فرحان بفكرة صنع الخزنة بطريقة شبكية ,,حتى عرضتها على متخصصين مره عشان كان حصل و حد حل مسابقة SKULL بطريقة غير شرعية بالتنقل بين المشاهد و قالولي تصميمك متقن جدا و عجبهم و ادوني كود يلغي استعمال القوائم من فوق و بالمناسبة مسابقة SKULL هي المسابقة الوحيدة الي ماحدش عرف يحلها و الي حلوها حلوها بشكل غير شرعي و دا شيء ضايقني أكيد , لأن دا معناها ان في خلل في توظيف خيالك مع انها كانت سهلة العملية كلها انك بتعزف بالزراير مقطوعة المقدمة و بتكون هي الباسورد و كتير عرفوا ان حلها بالعزف بس مش عرفوا يعزفوا ممكن لان نغمة المقدمة رناتها ماكانتش واضحة أوي لأني كنت حاسس انها هتكون مكشوفة زيادة عن اللزوم

[♥..pure]

= تجديد وبراعه طــآرق والموسيقى >> تمتاز بـ اذن موسيقيه عاليه :d كنت بتحط مسابقه تعتمد عالموسيقى فـي كل مسابقه كبرى بتعملها ::: وعملت مسابقه مستقله لها [ مسابقه نوع الموسيقى ] كلمنــآ عن حبكـ ليها ورحلتكـ معاهــآ .,, قبل ما أكلمك بس في مسابقة مهمة نسيتيها في الصيف عملت 3 مسابقات بدأت بأول مسابقة و هي قوة الملاحظة أو اختلافات الفيديو المسابقة دي حبيتها لأنها مميزة و أخدت مجهود في المونتاج و التصميم عامة و الثري دي و بعدين كانت مسابقة الأذن الموسيقية دي كانت في بالي من زمان و كنت مكسل بس في تنفيذها لأني كنت محتاج مقاطع موسيقية مميزة , يكون واضح فيها نوع الموسيقى تجنبا للخبطة أنا بحب الموسيقى اصلا جدا الودن تحب تسمع و تحب تميز الاصوات ما ينفعش الغي الاصوات بأي حجة ,,زي ما ما ينفعش تقنعني ان الرز بس هو الي حلو لو ضفت عليه خضار و شكلت في الاكلة اكيد هيبقى احلى نفس الوضع للموسيقى ,, انت لو سمعت جيتار لواحده هتلاقيه ممل لكن لما تمزج كذا اله مع بعض تلاقي الاغنية حلوة و غنية بالاصوات = وطبعا لازم لما تعمل جزء 1 من مسابقه يبقا ليها جزء تاني :d مسابقه الذكاء الخارق 2 :: بردو فيها حرفه غريبه مع الارقام ولكن كانت اوزان وكتله .,, جبت الفكرهـ منين وازاي عملت التصميم والاوزان ؟! دي مسابقة اتعملت مع تاني يوم في رمضان تقريبا و فكرتها كانت مشتقة من المسابقة الكبرى 2 كان في مسابقة من ضمن العشر مسابقات فيها اثقال موزونة و بتحسب انت بالقوانين الي بديهالك حبيت اطورها و قبلها كنت حابب اعمل الذكاء الخارق 2 بفكرة جديده ,,كنت هعملها تروس بس حسيتها مش حلوة و ممتعة خصوصا اني عايز اعمل مستويات كتير الاثقال الموزونه قدرت العب بقوانين كتير و عملت 9 مستويات التصميم عادي فوتوشوب لصور المستويات بس كان متعب اكيد سلاسل و اثقال و عصاية و ممكن يحصل خطا في التصميم او خطا حسابي الحل بيكون سهل لكن ابتكار المسألة بيكون صعب و افتكر اني عدلت في مستوى مرتين بعد طرحهم نتيجة وجود خطأ = اشتركـ فيها 13 عضو .. المسابقه فعلا جبــآرهـ هههههههه وحصل عالمركز الاول الوجه الجديد الأزهـ شمعتى المضيئة ـر والمركز التاني ماتركس و الماجيك و فارما وخارج عن القانون والتالت on my body تعليقكـ عالاسماء ؟! أنا كنت متوقع عامة ان المشتركين شوية لأنها بتعتمد على الحساب البحت و قولتلك شعبية الحساب قليلة بالمقارنة بالمجالات التانية تعليقي على الاسماء ,, اكتشفنا منها العضو الجديد اون ماي بادي هههههه ,,أنا عرفت انه عوكش من أول ما حلها بالنسبة للماجيك فهو من الناس الي بتفكر كويس و بتحب مسابقاتي أما ماتركس ففجأة بقى شاطر مش عارف ازاي هههههه حاسس ان في ناس في الشغل بتحلله المسابقة الأزهر شمعتي المضيئة دي عجبني حلها و الوحيدة الي حلت ال9 مستويات كلهم صح = وطبعــآ نكمل الكبــريــآت ههههه ومسابقه بنات مصر الكبرى 3 واحترافيه جديدهـ مع المسابقات ؟! كلمنا شويه كتــآر عنها المسابقة دي جت خطف عالسريع ماكنش عندي فكرة جديده ليها بس جاتلي طاقة اني انظم التالته و لما حطيت دماغي فيها جبت افكار مسابقاتها , و دي بتكون اصعب حاجه في المسابقة الكبرى انك تجيب 10 افكار مختلفة و توزع عليهم درجات نوعا ما عجبتني باستثناء مسابقة الاسفلت , مجال الحساب كان المفروض يكون افضل من كدا , بس اهي تجربة يعني الاولى عجبتني بتاعت العملية السرية و ان كان حلها بيعتمد على الاطلاع اكثر من التحليل و صوت مين فكرتها عجبتني برضو و في العمارات مع انها كانت صعبة و ممكن تتحل بطرق غير شرعية و في الساعة الحيوانية اما العفاريت ففكرتها كانت موجوده في المسابقة التانية و كفكرة عامة اصلها هو مسابقة مراقب الجريمة , بس طورناها و ركبنالها منظار و عملنا ساعة و وقت و كدا و بتاعت الرسم برضو عملت تباين بين الاعضاء = اشتركـ فيها 51 عضو >> الرقم بيقل ليه متعرفش وحصل عالمركز الاول محمد عكاشه للمرهـ التالته :: والمركز التاني فــآرمــآ للمرهـ التالته بردو :: والمركز التالت بيوتي سول والمركز الرابع الماجيكـ ومحمد علاء والمركز الخامس ماتركس .,, ايه تعليقكـ عالاسماء دي بردو :d ما قولنا الاسماء قلت عشان ماعملتش مجموعة العضو ينضم اليها لان المرات الي فاتت كان كتير بينضموا مش بيحلوا و لا مسابقة مجرد انه بينضم عشان يخش و يبص عالقسم فكان التصحيح بيتعبني جدا اعد ادور على اسم من ضمن 150 اسم عشان اديله درجة السؤال و الباقي عليه اكسات بس ما انكرش ان السبب كمان هو في انخفاض الزوار و تواجد الاعضاء عن الاول و دا له اسباب كتير أعتقد ذكرتها قبل كدا لكن اجمالا الاقبال مقبول و ان كانت الطموحات كانت عايزه اكتر من كدا بس المهم ان الحمد لله مسابقاتنا بتميز المنتدى عن اي منتدى تاني ممكن تلاحظي ان أنا مش بعمل مسابقات تفاعلية و احسن كاتب و كدا ,, لأن الحاجات دي الحمد لله قايم بيها ناس كتير أنا بعتمد على المسابقات الي بتكون زي الجيمز كدا ,,تحس ان مالهاش علاقة بالمنتدى أكلمك بقى عن الاسماء مش هحتاج أتكلم بس نضيف عليهم علاء علاء من الناس المحترمة هنا في المنتدى , و من محبي مسابقاتي برضو , هو ممكن متسرع شوية بس من الناس التوب الي بتحل كويس , و بيجيبها بسرعة دايما مش بيعد يفكر كتير و دي ميزة تحسبله و ان كانت بتضره احيانا في سرعة الحل - مع تصفح المسابقات >> معدل تنزيل المسابقات بيقل ؟! أفكــآر بتخلص ولا الدنيا والدراسه بتلهي ولا ايه يـ طارق ؟! دي صورة لفولدرات عندي ,,كل موضوع و كل مسابقة بحط صوره فيها عشان احفظها الصورة http://i.imgur.com/cc9cM.png أكيد طبعا مش هقدر اكرر افكار مسابقات قديمة , بس مع الوقت هتلاقي افكار جديده أو طريقة عرض مختلفة و دايما لما بتيجي على بالي فكرة بنفذها على طول غير المسابقات هتلاقي افكار تنظيمية زي الانتخابات كدا ,,دي بتاخد وقت و مجهود و الحمد لله اهو منزلين مسابقة جديدة أعتقد انه باين و ظاهر المجهود الي بذل فيها

باقي الاسئله بأهـ ودي خاصه بالمسابقه الجديدهـ = ما مفهوم العبقريه من وجهه نظر سيلفر ؟! وهل انت شايف نفسكـ عبقري !! و لا حاجة بس حابب احمس الأعضاء بصي أنا بؤمن ان العبقرية مالهاش شكل محدد لأن هي دي ميزيتها , انها بتديك شكل مختلف و أسلوب مختلف لكن لو شخص له نفس سلوك و تصرفات و افكار شخص تاني , فهو كدا هيكون عبقري ازاي أو ايه الجديد الي هو ضافه ؟ , مش بقلل منه ممكن يكون دارس و مذاكر كويس بس لو كنتي بتتكلمي عن العبقرية فهي عندي حسب منظوري انك تكون مختلف و ناجح باختلافك = ايه هو هدف طارق من مسابقاته ؟! >> سؤال غبي بس خطر فـي بالي مجرد متعة , أنا شخصيا بتستمتع بالتصميم و العرض و العضو بيستمتع من الحل ,لو قدر يحلها أو كان عنده شغف الحل زي الهدف من طرحك لموضوع زي الهدف من طرحك للمسابقات بيكون لخلق روح تحدي و تسلية بين الاعضاء زي فكرة انك بتتفرج على مسلسل او بتلعب كورة كلو تسلية في تسلية ,,الانسان بيحب يسلي وقته و أعتقد التسلية هي سر سعادته , اي كائن حي سعادته بتكون في السلية بدرجة كبيرة , لو عندك قطة بتربيها في البيت ,شوفيها لما تلعب و تسلي نفسها هتحس انها سعيدة جدا أنا افتكر زمان لما كنت مدمن بلايستيشن كنت ببقى سعيد و مندمج مع الالعاب و مبسوط جدا ممكن ابقى مبسوط اني هصحى بكرا الصبح عشان هكمل لعبة الغاز معينة مثلا = كان في لقب قبل كدا اعلنته فـ مسابقه ما :: وهو فاكك شفرة دماغ سيلفر بس محدش خدهـ .. تفتكر أن في حد بقى فاهم طارق لدرجه انه عرف هو عاوز ايه علطول !! أيوه دي كانت مسابقة SKULL الي ماحدش حلها بس زي ما قولت قبل كدا ان في ناس دايما بتحل مسابقاتي بنجاح زي عكاشة و نور و فارما و ساعات سما بس باقيت بتنفض بس التلاته دول اعلى حاجه تاريخيا مع مسابقاتي بعدهم يجي علاء و الماجيك و رونا التوته و سيرين و ماتركس و ميدو عاشق الهندسة و تيمو و في اسماء تانية اكيد بس دا الي جه في بالي و في ناس بتنجح في حل مسابقة واحده و بتختفي بعدها و في طبعا النجمة المتالقة و الصاعدة بيوتي سول ,,هنشوف هتعمل ايه مع المسابقة الجديده ليها مستقبل تدخل معاكم في قايمة اعلى تلاته هتبقوا اعلى 4 , دا لو حلتها :biggrin: = هتعمل ايه لو :/ 1. محدش حل مسابقه اله الزمن خالص !! ما اعتقدش ان ماحدش هيقدر يحلها دي ما تحصلش الا في حالة كانت خيوط حل المسابقة صعبة جدا لكن الي ملحوظ من كلامي مع البعض انهم وصلوا لخطوط حل كتير و واضح ان في ناس شبه حلتها , انا مش بتابع بالعضوية بتاعت المسابقات و مش بفتح اشوف الحلول غير يوم التصحيح بس لو السؤال مبني على الفرض ان ماحدش حلها فدا يعتبر عيب في صنع اللغز ,,انك كدا صنعت لغز غير مفهوم فلازم تعيد حساباتك تاني 2. 100 عضو حلها !! دا برضو يعتبر خلل لأن الهدف هو تمييز العضو الي هيحل مش ان الكل يحل ,,لما تكون السنبة عالية كدا معناها ان المسابقة سهلة جدا 1+1 أو حد حلها و سرب الاجابات لعدد كبير من الاعضاء و دا بيبان في طريقة شرحهم للحل 3 . المنتدى اتهكر وضاعت كل مواضيع الاعضاء وضاعت المسابقات !! >> انا لو منكـ اتشل هههههههه ههههههههه اه طبعا بتكون حاجة صعبة و دلوقتي أنا فعلا بفكر أأرشف مواضيعي كلها على جهازي انا عندي الصور تقريبا اغلبها بس الموضوع كتنسيق و عرض و كتابة بفكر اسيفهم عشان لو حصل اي طارئ ,,هيثم مات مثلا بعد الشر:biggrin: - فـ آلة الزمن لاحظت ان تقريبـآ 75 % من الشغل كان احتراف فوتو وفلاش يعني يوتيوب .. فلاش السيكرت وفلاش الآله واللي بيجمع زراير بور و شفرهـ المخطوطه !! ازاي قدرت توصل لـ خيال المسابقه بـ احترافكـ للفلاش ؟! [ هات كواليس المسابقه ] :: تصدقي مش هقدر اقول فعلا اساس الفكرة لأنه بيشكل عنصر مهم فيها لو قولته يبقى كدا حليت اصعب لغز بس بعيدا عن الفكرة الاساسية الي صحتني من النوم عايز اعمل المسابقة , فكرت في طريقة لعرضها و بحثت عن برامج لعمل الكتاب و عجبني البرنامج جدا و بحثت عن برنامج PDF و ظبط مع برنامج الكتاب و كمان طبعا الفوتوشوب و في مونتاج الي عمل الفيديو ادوبي افتر افيكت و سوني فيجا و في الفلاش الي هو السويش ماكس و في طبعا برنامج لتصوير سطح المكتب موسوعة برامج مستخدمة المهم انك تقدر توظف الخيال صح و قبلها تعرف امكانياتك ,, ماينفعش تشطح في دماغي فكرة خيالية و اصمم عليها افكار مسابقتي و بعدين آجي أنفذ معرفش!! يبقى انت لما تتصور لازم تتعرف على امكانياتك ,,و تبحث عشان تطورها و في الاخر تحط الشكل النهائي حسب قدراتك الي توصلت اليها بحيث تصيغ لغز منطقي في النهاية دا جزء بسيط من كواليس المسابقة http://i.imgur.com/voNNn.png دي مجموعة صور من مخلفات التصاميم http://i.imgur.com/7hGdx.png دي صورة لتصميم الفلاش 19 مشهد و كل مشهد بيكون فيه زراير يتتنقل فيهم حسب الزرار الي بتدوس عليه مشاهد بتوديك للWRONG PASS و مشاهد للTRUE PASS و آحر حاجة دا جزء من التصميم الفوتوشوبي http://i.imgur.com/DGnvb.png طبعا طبقات بالهبل بس الصورة مش هتجيبهم و كفاية كدا لحسن تحلوها :biggrin:

[مشتاقه للجنه]

رغم طول الحوار اللى أنه ممتع جدااا

صافى وطارق

شكراا على الحوار الممتع

تحيااتى

[S n i p e R]

توووووووووووووووووووحفة

واللهي عشرة على عشرة

والله يخربيت المسابقة اللى قلبت دماغنا دي

والنبي يا طارق ملاقيش معاك مخطوطة

p:

أسئلة جامدة جدا ي فوفة

واجوبة اجمد جدا يا طروق

بالتوفيق للجميع

[خارج عن القانون]

بجد تسلم ايدك يا رفيف على البرنامج ده

رجعنى لايام زماااان

اقتباس في واحد مكن يكون عنده خيال , بس بيجي يوظفه بيوظفه غلط أو بيتوظف بشكل غير مفهوم , و أعتقد دا شفناه قبل كدا في مسابقة صاحبها حب يعملها بلغز و كان حلها مايخطرش على بال حد و غير منطقي (فانتازي)

ايوه ايوه همس الجراح وواحده تانيه كانت باعته المسابقة لينا ع الخاص مش فاكر اسمها

اقتباس ممكن مسابقة كوشيرو دي اكتر حاجه عجبتني فيها ,,مع انها ممكن تكون ارخم مسابقة عند الأغلبية

فعلا رخمه قوى يا طارق واسالنى انا

التسع مسابقات حلتهم فى اسبوع وكاشيرو لوحدها حلتها فى 3 اسابيع

اقتباس و في العمارات مع انها كانت صعبة و ممكن تتحل بطرق غير شرعية

هى فعلا اتحلت بطرق غير شرعية وخصوصا المستوى الثانى

اقتباس = ايه هو هدف طارق من مسابقاته ؟! >> سؤال غبي بس خطر فـي بالي :d مجرد متعة , أنا شخصيا بتستمتع بالتصميم و العرض و العضو بيستمتع من الحل

انا عكسكك فى النقطة ديه انا متعتى فى الحل اكبر بكتير من متعتى فى تصميم المساابقات

وعشان كده انا عندى مسابقة بقالها 5 شهور ومعنديش متعة انى اخلصها

وفى الاخر ربنا يخليك لينا ويطول فى عمرك وتنزل مسابقات كمان وكمان

[SiLver Spectra]

ايه يا بت التنسيق دا!!
و أنا الي قولت اسيبها بقى و هتظبط الأداء في العرض
و تاعب نفسي و كنت مديلك صور في الاجابات و لا صورة موجودة
حتى اسمايلاتي مش موجوده :biggrin:
و حد بعتلي يقولي عيني زغللت من خلفية الموضوع و الخط الأحمر
عامة أنا عدلت و ضفت الصور
و الخط الأحمر بقى أزرق و الخلفية خليتها سادة
لأن الحوار طويل و عايز حاجه تريح العين

لكن اجمالا كتر خيرك على المجهود خصوصا ان عندك امتحانات

[♥..pure]

اقتباس المشاركة الأصلية كتبت بواسطة SiLver Spectra ايه يا بت التنسيق دا!! و أنا الي قولت اسيبها بقى و هتظبط الأداء في العرض و تاعب نفسي و كنت مديلك صور في الاجابات و لا صورة موجودة حتى اسمايلاتي مش موجوده :biggrin: و حد بعتلي يقولي عيني زغللت من خلفية الموضوع و الخط الأحمر عامة أنا عدلت و ضفت الصور و الخط الأحر بقى أزرق و الخلفية خليتها سادة لأن الحوار طويل و عايز حاجه تريح العين لكن اجمالا كتر خيرك على المجهود خصوصا ان عندك امتحانات

ههههههههههه
يـ بني والله حصل عرقله معي :762:
ويدوبكـ نزلته وقومت فوراً )
حتى مستنتش اشوف ايه النهايه
حصل خير ومع ان اللون الأحمر احلى علفكرهـ :d
بس يلا ادعولي فـ الامتحانـــآت بأهـ :/
سلامـــآت

[طمطم]

حوار جامد جدا وفعلا طارق مسابقاته كلها جامدة بجد ربنا يوفقه
وموضوع رووووووعة