حوار مع قلم مش محترم

[نهر النيل]

صباح / مساء الورود على الجميع
قبل ما ابدء حواري مع قلمي الغير محترم
احب انوه وأأكد
أنا هنا مش بقصد سخريه
ولا بقصد هجوم
ولا حتى نقد
الفكره كلها
حوار بيني وبين قلمي البارد
حبيت اكتبوا بشكل جديد وخفيف
الحوار
حوار مع قلمي

طول الليل عمالين نبرق لبعض ونبص لبعض وبقينا حتى مستغربين بعض وكأننا مولودين فوق روس بعض
وبقيت أنا وقلمي في حالة غضب وتوهان وبرجله
القلم : ما تهمد يا عم انت عمال تبص لي ليه ؟
أنا : يا سيدي أنا جيت جنبك مالك ؟
القلم : متدهول ومنيل على عيني ومخنوق وحاسس إني حبري بيجف
أنا : طب وإيه يعني ما يجف ما هو دا طبيعي
القلم : طبيعي إيه يا حضرة هيجف خوف ورعب من أحوال متوقعها
أنا : انت يا قلم تتوقع أحوال .. حلوه أوي دي طيب
القلم : ايوه يا سيدي انت فاكرني إيه يعني ما هو أنا نتاج الفكر البشري وترجمه له
أنا : آه قت لي والترجمه دي بأي لغه يا قلم افندي
القلم : انت عاجبك حال البلد ؟
أنا : بقولك إيه الله لا يسيئك مش ناقصين هب نلاقي واحد إخواني طلع من الجدار وقام علينا الحد عشان بنفكر بصوت عالى ومسموع ويعكشوني أنا وإنت ونروح في أبو نكله وأخو نكله وأم نكله كمان
القلم : انت جبان ومرتبك وخايف وعمال تعملي فيها ع الفاضي امشي امشي كتك عشرين خيبه
أنا : دا مش جبن إنما تقدر تقول حرص وبطل وقاحه بتكشيرتك الممله دي كتك القرف في لونك الباهت
القلم : طب وبعدين يا سي حريص منتظرين إيه بقا ؟
بكره يلغوا اللانشون ويقولوا منكر .. ويمنعوا الشيبسي ويقولوا بدعه .. ويقطعوا سلوك النت ويقولوا مضيعه للوقت .. ويلغوا خروج الأنثى للعمل ويقولوا ممنوع الاختلاط .. ويمنعوا الكوره نهائي ويقولوا دي مفسده
وهب تلاقي الدش اتمنع .. والتليفزيون .. والموبيل .. ويمكن كمان مترو الأنفاق
ولو تطاولت وتجرأت وسألت واحد شيخ من أسيادنا
( ويجعل كلامي خفيف عليهم يارب ) الاخوانيين ليه بتعملوا كده ؟
هب يا معلم تلاقي روحك في العمبوكه ويقيموا عليك الحد رجما بالنبال ويمكن بالشوم والنبابيت والمطاوي القرن غزال ..
أنا : نهارك الوانوا غوامق ياد يا قلم ووقعتك أسود من قرون الخروب وشكلك مصمم تودينا طره
دا انت انهبلت ونفوخك طق وشكل حبر مخك بقى بالوظه وحمضانه كمان
ازاي تفكر كده في الناس الطيبين دول ؟
انت غشيم .. دول ناس بركه .. وفيهم شيئ لله ومبروكين
دا من ضمن معجزاتهم يا قلم يا عبيط انت بيفكروا يحرروا القدس بالناقه والجمل والسيف .
كل القوه والفكر القوي دا وهتسخر
اتلم يا قلم أحسن أمسكك أفضي حبرك وأطلع روحك من الأنبوبه كتك الهم والغم كده
القلم : والنبي انت غبي ولا فاهم حاجه يا ابني بكره تلاقي مصر دي كلها خيام تاني ونرجع لعصور القبائل
والمدرسه ممنوع للبنت ومسموح بيها للولد ويمنعوا كل ما هو أنثوي في الحياه
والولد ممكن يتجوز بنت عندها 6 سنين وانت طالع عادي الجواز ستره ونص الدين ومسموح للولد بس في شرقنا الميمون يعمل كل شيئ وأي شيئ دون حساب ودون عقاب وانت بكره تقول قلم كلاموا صح انما بعد ما تكون خربت ياعم الحاج
وهو احنا هنعرف حاجه زي أسيادنا ( ويجعل كلامنا خفيف عليهم يارب الإخوان )
دستور يا مباركين !
أنا : تصدق انك قلم متمرد وعنجهي وقليل الأدب ووقعتك مهببه ومنيله بستين مليون نيله
إيه ياد يا قلم ياد انت إيه عقلك طار أوي كده
يا غشيم افهم الإخوان دول ناس بركه بيمشوا الحياه على طريقة قانون ( مدد وخد راحتك )
وعندهم كمان قانون ( خلي البساط احمدي )
وكمان في قانون ( الضرورات تبيح المحظورات )
ولقيت في موسوعتهم قانون ( البلد اللي تلاقي ريسها ولا مؤاخذه عجل حش وادي له )
دا انت قلم اهبل على آخرك كتك خيبه جاهل وعامل لي فيلسوف وانت أخرك صفر
القلم : بغضب أنا بردوا اللي أهبل يا مصنع الهبل انت بكره تاخد على قفاك وتلاقي كل شيء حواليك ممنوع ونرجع زي زمان ناكل الزيت بالدقيق ونركب الناقه ونعيش تاني حرب الغبراء والبسوس
أنا : انت قلم حقودي ومتمرد وعمال تهجص وتقول خزعبلات هبله شبهك وولا عارف معنى كلامك الخفنشري الحنكوري دا أصلا
القلم : أنا اللي أهبل بردوا أنا
أنا : اللي انتخبتهم لمجلس شعب ( خشنفري )
ولما فشلوا خلعتوهم والمصيبه رجعتوا جبتوا رئيس منهم
أنا : تصدق انك قلم نمرود وعايز الحرق ما دا طبيعي لازم نجرب والباب مفتوح لآيتها حد أهلا وسهلا ومرحبا ييجي مجلس شعب سني سلفي كلوا شغال والعجله دايره والكفاح دوار ايه المشكله يعني لما يارب اجعل كلامي خفيف عليهم إخواننا وحبايبنا ( الإخوان ) يستولوا على كل حاجه هو حرام ليهم ولا هو حرام ليهم اشمعنى بئا التفرقه دي ؟
طب ما الحزن الوطني كام مبلط ومعشش في البلد لقرب 30 سنه وماسك كل شيئ حتى سلوك الكهربا
القلم : انت أصلا باين عليك جاهل وأهبل وتبع نظام الحمبلايظ
أنا : نظام مين يا خويا انت ؟
القلم نظام الحمبلايظ
أنا : ودا إيه ده كمان
القلم : مش بقولك جاهل وعمال ترغي وصدعتني كتك داهيه
أنا : تصدق انك قلم منحط ووضيع ومعدوم الوفاء وهكسر عضمك وأفرمك وأولع فيك بقى عمال ترغي ومصدع أهلي وتتلامض وساكت والمصيبه عمال تلوح وتلمح بتخيلات حنجوريه فى الطرف الشنكوريه ولا فاهم منك أيتها حاجه وآخرة المتمه عايز تغلط في الناس الطيبين الإخوان يا أخي اتقي الله .. اتقي الله يا أخي
القلم : يا ابني بص أنا قرفت منك وصدعتني ودوختني وخليت حبري نشف وطلعت روحي وياك في حوار خفنشري منكشح
أنا : إيه ياد انت اللغه العبيطه دي ما تتكلم زي الخلق أحسن أكسرك قلت
القلم : كتك خيبه ولا تعرف تموت كتكوت حتى آه صحيح إنت عارف المصنع الجديد بتاع راجل كبير وكبره كده ومبسوط تبع الإخوان ( مصنع الكتاكيت المتلجه )
أنا : كتاكيت ! ومتلجه .. أقسم بالله انت قلم مجنون وإبن مجانين هو في مصنع كتاكيت متلجه أصلا
القلم : وهو في شعب في العالم يا بني آدم يا غبي غبي ايه يا اللي احتكرت الغباء يعمل اللي انت عملتوا ده ؟
أنا : الهي يحرق دمك يا شيخ روح أنا لازم أجيب شاكوش وأفضل أرن عليك لغاية ما أخليك حطام هي وصلت يا قليل الأدب إنت للسب والقذف كمان وعلى عينك يا تاجر كده يا بجاحتك
القلم : سب وقذف إيه يا محتكر الغباء أول مره أشوف بلد بكاملها تعمل ثوره عشان تحقق عدل وعداله وبالآخر النتيجه حزب وطني تاني بس بشكل مختلف !
أنا : حزب وطني !يه يا أبو جهل يا مصنع الجهل بحالوا بقى عايز تقارن ناس طيبين وبيصلوا الوقت بوقتوا وفيهم شيئ لله وعشان كده مكتسحين إنتخابات مصر كلها وجاي انت يا سي قلم تتريق وتلسن عليهم وإنت كده بتاخد ذنوب وهما بياخدوا حسنات ..
القلم : حسنات ! ههههههههههههه حسنات ولا اشتغالات وتهيؤات ومتاهات يا حنجوري ملولح في الشنكوري المستمد من الغربله الفسفسيه الهجصاريه
أنا : ربنا يولع فيك روح يا قلم الغبره انت إحنا شكلنا كده هنروح في داهيه أنا وإنت ولو سمعنا واحد سني أو سلفي أو إخواني ( ربنا يارب يجعل كلامنا خفيف عليهم ) مش بعيد يتهمونا بالتكفير !
القلم : الله أكبر .. هي وصلت للتكفير كمان لااااااااا انا مش هفضل أكلم مواطن مجنون زيك
وللحديث بقيه إن كان في العمر بقيه مع قلمي ( الغير محترم )

[طمطم]

هى فكرة حلوة رغم اعتراضى ع كذا حاجة كده
بس حوار جميل وانا استمتعت بيه
مجهود رائع ,,
تسلم ايدك
ف انتظار بقية الحوار .
احتـــــــرامى

[Lost Pearl]

:biggrin:

خلاص اللي حصل حصل و ان شاء الله يبقوا اد المسئولية

بلاش بقي نفكر ف هيعملوا ايه

احنا هنشوف قريب اهو

تسلم ع الحوار يا نهر

[أجمل سعوديه]

أتمنــــى لكـ من القلب .. إبداعـــاً يصل بكـ إلى النجـــوم ..

سطرت لنا أجمل الكلمات

بذلك الحوار الشيق الذي يأخذنا

إلى أعماق البحار دون خوف

بل بلذة غريبة ورائعة

دمت لنا ودام قلمك

[نقاء القلب]

حوار رااائع نهر ^^

بس طالما الشعب رشح الاخوان ,,

نعطيهم فرصتهم يثبتوا نفسهم الاول ..

ومانحكمش عليهم الا ف النهايه ))

يسلمووو نهر

[morshooo]

تصدق قلمك دا فى الاخر هيطلع بيفهم

هههههههههههههههههه

فى ناس كتير قلقانة من الاخوان

وانا منهم بس انا مع الشرعية ومع الحرية

وطالما الشعب اختار يبقى خلاص مع انى شاكك فى الانتخابات الاخيرة

خاصة فى اخر يومين من ساعت ما البرادعى قعد مع طنطاوى

عموما احنا كلنا لازم نقف بجانب الرئيس ( محمد مرسى ) لانة اصبح

رمز للدولة واتمنى انة مايمشيش ورا جماعه الاخوان ويبقى همة الاول والاخير

مصلحة البلد .

ملحوظة : انا عايز اسئل سؤال بسيط لية قبل الوصول للرئاسة كان كل كلام ( د . مرسى )

القصاص للشهداء وامبارح قال لاهالى الشهداء الجميع هياخد حقة ولكن بالقانون :biggrin:

[نورا ❤]

فكرة جميلة
حوار لذيذ ي احمد ..
تسلم ايدك
وباذن الله مصر هتبئا احلي بس هصبر :d
تحياتي

[PrinCesS Gege]

سلمت يمنآكـ على مآحملتهـ لنآ

موضوع عآلي بذوقهـ ,, رفيع بشآنهـ

يــ ع ـطيكـ الــ ع ـآآفيه ـعلى مآطرحت لنآآ ,,

وربنا يستر وميكونش كلام القلم صحيح

ف انتظار باقى الحوار

تقبل مرورى

[نهر النيل]

اقتباس المشاركة الأصلية كتبت بواسطة طمطم هى فكرة حلوة رغم اعتراضى ع كذا حاجة كده بس حوار جميل وانا استمتعت بيه مجهود رائع ,, تسلم ايدك ف انتظار بقية الحوار . احتـــــــرامى

ميرسي كتير طمطم
ع المرور المميز
والاضافه المعبره
احترامي

[نهر النيل]

اقتباس المشاركة الأصلية كتبت بواسطة lost pearl :biggrin: خلاص اللي حصل حصل و ان شاء الله يبقوا اد المسئولية بلاش بقي نفكر ف هيعملوا ايه احنا هنشوف قريب اهو تسلم ع الحوار يا نهر

صح كلامك لوست
وربنا يوفقهم ويقدروا يصلحوا امور كتيره غلط
وميرسي لمرورك الجميل لوست
احترامي