واقع حزين وخيالات فكريه

[نجمة النجوم]

كان يا مكان كان في بيت كبييييييييييير بيضمنا كلنا
بيت خيره علينا كلنا بيت بنفرح لما ندافع عنه ونفديه بروحنا ودمنا
بيت لما نبرد يدفينا بيت في الغربة نفتكره في كل وقت عايش فينا
ولينا وبينا
ياااااااااه شوفوا ازاي معقول كل دا ملكنا واحنا مش حاسين
معقول كل دا بينا واحنا من داركين
اااااه على الدنيا الدوارة الي خلت العبد سيد والسيد عبد
يااااااه على النفوس لما تمرض والقلوب لما تجحد
وما تلاقي لها دواء غير الضمير الحي !
البيت الكبير أحجاره بتنادي وتقول يا أولادي
أهون عليكم أنا لما أتسرق وأتباع لما أندهس وانهان
وأنتم مغيبين تايهين في بحر الدنيا الغريقة ,
لهياكم المعيشة والفلوس والسلطة المرهِقة
عايشين عشانكم مش عشاني مع أني بعيش ليكم وعشانكم
يااااه على الأنانية وعلى غدر البشر بيا
دا لو كان حجر كان نطق, نطق بكلمة حق
وموّت الخوف جواه وشهد شهادة حق في القضية ,
يا سادة دي قضية بلد من يومها مطحونة
غزو وإستعمار خارجي وفي الداخل مقهورة
آست فساد الحكم وذاقت هوان الظلم لـ ليالي طويلة باتت مذعورة .
قلنا أهي قامت ثورة وخلاص هتتعدِّل وحالنا هيتبدِّل
وهنبقى فوق الكل والعيشة هتبقى فُل
بكرم ربنا وبكل أيد عايزة ترجع مجدنا
وبدم كل شهيد سالت على أرضنا
وبكل كلمة حق ثارت عشان حقنا
لكن وألف آآآآآه من لكن الجو كان مشحون
ايد تبني وعشرين تخرب ايد تدّي وعشرة بتاخد
وبدون حساب وبدون جواب
على سؤال تعبنا من سنين
ليه أحنا دايما مظلومين؟
وفي عز اوقات الاحتياج نلاقي ايادينا متكتفين
بأحبال من هموم وعلى قفانا مختوبين
بختم النسر المعتمد وكنا بنقول آمين
على اي حاجة كنا مغصوبين ماحنا متكتفين !
طيب وبعدين
عملنا ثورة لفينا بيها العالم
وعملنا انتخابات البرلمان وقلنا أهلا بالتغيير
أتاريه طبخة جديدة طبخها الإخوان وبقينا محتاسين
بين الفلول والإخوان وكدب المسيسين
آآآآآآآآه يا بلد يا سرك متنقِّل بين الوحوش
يراهنوا عليكي في المسابقات وأنتي الضحية
في المزادات
أقصد يراهنوا عليكي في المزادات
وأنتي الضحيه
يلفوا بيكي وانت بين الحياة والموت هزيلة منسية
وأنا أحترت فيكي وبقيت خلاص تايهة
بين الواقع الحزين وخيالات فكرية.
تمت



من قلمي / نجمة النجوم

[عمرو الجورى]

المبدعة نجمة النجوم
بعيدا عن المضمون كانت خاطرتك جميلة
تقبلي مروري

[نجمة النجوم]

اقتباس المشاركة الأصلية كتبت بواسطة عمو الجوري المبدعة نجمة النجوم بعيدا عن المضمون كانت خاطرتك جميلة تقبلي مروري

ميرسي كتير لمرورك الحلو
ميرسي خالص

[رووكه]

صرخات ام الدنيا لازالت تتردد

تريد التحرر والاستقامه

من جديد فانتى من فسر حالها

قبل وبعد الثوره فنسال الله


ان يصلح حالها ويعطى لنا خيرها

ويكفينا شر اخوانها

اللهم آآآمين

قمرى ابدعتى وتالقتى

تحياتى وتقديرى وتقيمى لطرحك

[نجمة النجوم]

اقتباس المشاركة الأصلية كتبت بواسطة روكه2 صرخات ام الدنيا لازالت تتردد تريد التحرر والاستقامه من جديد فانتى من فسر حالها قبل وبعد الثوره فنسال الله ان يصلح حالها ويعطى لنا خيرها ويكفينا شر اخوانها اللهم آآآمين قمرى ابدعتى وتالقتى تحياتى وتقديرى وتقيمى لطرحك

امين يارب
ميرسي جدا جدا
سعيده كتير بتشجيعك