زكرياتي مع المنتدي | الحلقه الثانيه | مع الاميره رودي

[აα∂ Ԑγεა]

زكرياتي مع المنتدي | الحلقه الثانيه | مع الاميره رودي

السلام عليكم ورحمه الله وبركاته

اهلا وسهلا بيكم في الحلقه التانيه
من برنامج ذكرياتي مع المنتدي



فكره البرنامج للي مشافش اول حلقه

هنستضيف عضو من الاعضاء البارزين في المنتدي
وأسأله عن ذكرياته مع المنتدي
بدأيته تألقه طلوعه لحد المرحله اللي وصلها دلوقت
عرف مين عجبه مين اتخانق مع مين
وكل حاجه في ذكرياته في الفتره اللي قضاها




المره دي معانا ضيفه
مميزه جداا رائعه في ارائها وناضجه في تفكيرها
لازم تعجبك طريقتها واسلوبها
حتي لو مش بتعرفها
من المميزين جداا في المنتدي
ومشرفه قسم صفحات مكشوفه

معايا ومعاكم
-- الاميره رودي --





اهلا وسهلا بيكي
وبشكرك علي قبول الدعوه

انا اللى بشكرك على استضافتى وبشكرك اكتر على المقدمه الجميله دي ،، يارب أكون بستحقها


ونبدا الاسئله





الاول اسمك ( تكتفي برودي عادي )

تمام نكتفى بـ رودي


بدأ استخدامك للانترنت امتي ؟

2007


اشتركتي في كام منتدي قبل كده ؟

اشتركت فى منتدين منهم واحد كنت مراقبه فيه



عرفتي منتدي بنات مصر ازاي ؟

من عضو اسمه كلمات


تاريخ اشتراكك بالظبط ؟

كان يوم 15 - 10- 2011



ولو غيرت اسمك قبل كده ايه اول اسم اشتركت بيه ؟

لا الاسم زى ماهو من اول يوم تسجيل ماتغيرش






احساسك كان ايه اول ما اشتركتي جديد ؟

أكيد كنت حسه انى غريبه مش عارفه حاجه ولا عارفه حد
بس الحقيقه كان الاستقبال جميل حسيت باهتمام ورد على موضوعاتى ويمكن ده من أجمل مميزات المنتدى وقتها



وهل لقيتي قبول ومكان ليكي في المنتدي بسرعه ؟ ولا اخد وقت دا ؟

انا متعوده انى لما أشترك فى منتدى مش بعمل موضوع فى قسم الترحيب وبسيب الناس تعرفنى من خلال موضوعاتى وردودى
صحيح أخدت شويه وقت عما بدأت اتعرف بس انا بفضّل كده


في اول ايامك كنتي مفكره انك هتكملي لحد دا ؟

بصراحه ان يوم ماسجلت ف المنتدى حسيت انى مش هطول لآنى فى البدايه حسيت ان كل اللى هنا أصدقاء مع بعض وانا ماليش مكان بس قولت استنى واشوف


مين الاعضاء اللي لفتوا انتباهك وانتي عضوه جديده ؟

كتير من المبدعين بس اغلبهم من رواد الاقسام الادبيه
لآنى أول مادخلت مكنتش بتنقل منه



ايه اكتر قسم اهتميت بيه في بدايتك ؟

كان قسم الابداعات



وايه اللي مكانش في اهتمامك لكن حبتيه في المنتدي هنا ؟

القسم الوحيد اللى مكنش فى اهتمامى هو اللى بقيت مشرفه عليه دالوقتى
مكنتش بحاول حتى أدخل القسم ده ومكنتش حابه افتح لنفسي صفحه فيه بس لما خدت اشراف هناك وبدأت أدخل فى تفاصيل القسم اكتر ووجودى مع صفحات اعضاء مبدعين بجد حسيت انه من أكتر الاقسام اهميه ف المنتدى وكفايه انه المتنفس الخاص للعضو




ايه اول موضوع عملتيه في المنتدي ؟ (بعيدا عن اي ترحيب )

لا انا مش بعمل موضوعات ترحيب
أول موضوع عملته كان فى القسم العام
وكان بعنوان صوره تستفز قلوب المسلمين
http://forums.banatmisr.com/msryat281443/


كان ايه شعورك وانتي بتعمليه ؟

انا كنت حزينه من مضمونه لكن أكيد كنت سعيده انى بضيف موضوع قيم زى ده للمنتدى



ومين اول حد رد عليكي فيه ؟

أخى ألكريم مبدع الحرف صدى الحرمان



ياتري فرقع ولا ؟ وحستي بايه وقتها ؟

لا الموضوع كان مهم ومستفز بسبب اهانه ديننا
فأكيد لقى اهتمام


اول رساله زائر ياتري فاكره من مين ؟

لا انا مش فاكره من مين
بس فاكره انه كان رابط موضوع عشان ارد عليه


اول رساله خاصه وصلتلك كانت من مين ؟

من عضو اتحذر كان اسمه نقوش على صفحات الورد
كان اكتر عضو بيبعت رسايل خاصه لكل الناس


اول حد ضافك في قائمه الاصدقاء ؟

افتكر انها lady Rozitta




كان شعورك ايه في الفتره دي ؟

كنت حبه المنتدى لانه مختلف كتير عن اللى كنت فيه
لـ أحسن طبعا


وايه احسن فتره بالنسبالك قضيتيها في المنتدي ؟

مفيش فتره معينه


اول خناقه مع مين من الاعضاء ؟

لا خناقه ايه انا مش بتخانق مع حد الحمد لله
وعلى أد ماأقدر بكون فى حالى


وكان السبب ايه ؟

مفيش


واتحلت ازاي ؟

ماتحلتش لحد دلوقتى





كنتي حاطه في بالك انك تبقي مشرفه في المنتدي ؟

لآ عمرى ماتخيلت انى هاخد منصب فيه
ولا عمرى فكرت فى كده أو اهتميت بالموضوع
كل اللى اهتميت بيه هو تفاعلى بشكل ايجابي واثبات وجودى فقط والحمد لله حصل


وليه القسم دا بالذات ؟

انا ماختارتش قسمى هو اللى اختارنى واتعرض عليا من الاداره فوافقت وقولت اجرب حظى فيه والحمد لله انا شايفاه من اجمل الاقسام ف المنتدى


اول حاجه بتعمليها اول ما تفتحي المنتدي ؟

بدخل على صفحات مكشوفه اشوف ايه الجديد ولو فيه صفحات جديده تحت المراقبه بوافق عليها بعد ماابحث عنها




هل فكرتي ترحلي من المنتدي قبل كده ؟ وبسبب ايه ؟

اه فى وقت من الاوقات فكرت اسيب المنتدى
بسلآنى كنت هسافر بره مصر وكنت هضطر مادخلش لفتره طويله
بس االسفر اتأجل شويه ..


ايه اكتر حاجه مش حاباها في المنتدي بصراحه من غير مجامله ؟

اكتر حاجه مش حباها ف المنتدى وبدون مجامله هى: { االمجامله }


رساله تحب توجهها لحد زعلان منه ؟

لوحد زعلان منى أتمنى يسامحنى لآنى حقيقي مش بحب أكون سبب فى زعل لحد



تقييمك لسنه كامله قضيتيها في بنات مصر بحلوها ومرها ؟

لو بقييم نفسي فمش هقدر أكون منصفه فى التقييم أنتو تقدرو تقيمونى أكتر
لكن لو بقيم المنتدى على مدار السنه فهو من اجمل المنتديات بجد وفيه حاجه تحس انها مختلفه ومش بتديك فرصه تبعد


وايه الصداقات اللي اتكونت و بتفخري بيها ؟

انا مكونتش صداقات مع حد ،،
بتبقى معرفه سطحيه من خلال الردود لكن مايمنعش ان فيه ناس بقدرهم وبحترمهم جداا وبحس انهم اخواتى

رساله تقولها لكل اعضاء المنتدي ؟

أقولهم أدو للمنتدى على أد ماتقدرو لآنه يستحق
وأقولهم المنتدى ده جميل أوى ومش هيتعوض محدش يحاول يسيبه لآنه مش هيلآقي فى أى مكان االروح اللى بنلآقيها هنا ..



بس كده
بشكرك علي قبول الدعوه
والاجابه علي الاسئله
متشكر جدا لحضرتك


انا اللى بشكرك أخى سعدت جدا بالاجابات على اسئلتك
ورجعتنى بالذاكره سنه فاتت
برنامجك جميل ومجهودك مميز من اول يوم
الف شكرا لدعوتى واتمنالك التوفيق دايما



بشكر ضيفتي مره تانيه
واتمني الحلقه والبرنامج يعجبوكم

[احمد برهان]

تسلم يا اخي الحبيب الغالي...

علي هذه الاستضافة الرائعة..

لاخت كريمة غالية علي قلوبنا جميعا..

و بجد اسئلة مميزة اتقنت ادارة الحوار ..

من خلالها و اجوبة اكثر من رائعة من اختنا رودي..

وفقك الله و دام تميزك و عطاءك و جهدك...

و نري منك كل جديد و جميل...

و مع عضو اخر جميل و اسئلة متميزة...

بارك الله فيك و اكرمك و هداك للخير..

و دمت بحفظ الرحمن

[ساحر الأحزان]

حوار جميل منك مع الاميرة رودى

صاحبة التواجد الطيب

والحضور الجميل

اسئلة منوعة لحلقة قيمة

تحياتى لكم

[Lost Pearl]

منورة الاستضافة يا رودي

فعلا من الشخصيات العاقلة الهادية ف المنتدي

ترتاح اما تشوفهم كدة

تسلم يا محمود ع الحهد ,, ف انتظار الحلقة الجاية ان شاء الله

تقييمي

[❀ ЯeRōŎō ❀]

ايه الحـــــــــــــــــــــــــــــوار الجامد اووووووووووووووي ده بقي

ياروووووووودي ياسكر انتي باجاباتك الحلو انتي بجد سكرايا خالص

بس نـــــــــــــــــــــايس حوار بقي اوي

[۩۩ elMagic ۩۩]

حلقه جميله جداامع شخصيه جميله زى رودى
بجد انتى من الناس الى فرضت أحترامها هنـا
ماشاء الله عضوه قمة فى الاخلاق والاحترام
وشغاله فى صمت
اكييد منورانا اختــى هنــا
وان شاء الله تبقى معاانا دايما
الله ينور يا برنس
تسلم للمجهود المميز
تقييمى للموضوع

[عاشقة الهدوء]

استضاافه هاايله أخى للآخت الغااليه والراائعه الآميره روودى

أمتعتينا ياقلبى باأجاباتك وعرفتينا أكتر على معلومات منذ دخول تسجيلك للمنتدى وزكرياتك معاه

نورتى ياحببتى أتمنالك السعاده دوما بيننا وربنا مايحرمنا من وجودك داائما اللهم أمين

ومووفق دااائما أخى فى بااقى حلقااتك ربنا يحفظك وأجمل تقييم

[الأميرة رودي]

بجد بشكرك جدا يامحمود
مجهود رائع منك وتواجد طيب فى كل اركان المنتدى
سعدت باستضافتك وكلآمك الجميل
وبشكر كل اخواتى الموجودين وان شاء الله لى عوده بالرد على كل اسم

[ياسمينااا]

حوار جميل جدا مع رودي
وزكريات جميله لعضوه مميزه
منوره يا حبيبتي
واجاباتك جميله جدا يا قلبي
معاكي حق الواحد فعلا مش يقدر يسيب المنتدي
لما كنت هسافر كنت زعلانه اوي اني هسيب المنتدي
ولما السفر اتاجل فرحت اني هفضل موجوده فيه
تسلم يا ساد ايز
مجهود مميز منك
بانتظار الضيف القادم ان شاء الله
تحياتي

[الحان الورد]

،

حلقة جميلة جداً
رودي من الشخصيات الجميلة هنا .. ربنا يزيدهـا
تسلم ع المجهود يا محمـود ..