بصراحة مع قلم بلا حبر

[مِسكُ الشَهادة]

تنويه ... أسئلة هذة الحلقة كانت منذ فترة سابقة أي قبل أي تطورات في المنتدى بشكل واسع ... فربما الأسئلة تتناول قضايا إنتهت ع أرض الواقع وإنتهت في المنتدى ولكن الأخ سيد تأخر في الإجابة لظروف خاصة به نسأل الله أن تكون للخير ... لذا نؤكد أن هذة الحلقة هي حلقة سابقة من حيث الطرح والأسئلة والزمن واليوم نتشرف بعرضها للجميع فقط هذا للتنويه ... ندعو الجميع لقراءة الفاتحة على أرواح إخوتنا الشهداء في سوريا ...والدعاء لهم بالرحمة والنصر ونهديهم نغمة هذا الموضوع ... ........... .......... .............

مضت ْ سفينتنا بعيدا ً ... ساقتنا إلى عُمق ِ المحيط في وسط ِ الأجواء الهادئة ... والشمس ُ الساطعة والتي تلمع ُ أشعتها في وسط ِ قطرات ِ الماء الدافق حولنا ... حلقتنا لهذا اليوم من برنامج بصراحة ... حلقة نعتز بها ونعتبرها نادرة لأنها تكون اللقاء الأول ما بيني وما بين الضيف في برنامج خاص بي ونسأل الله أن لا يكون اللقاء الأخير ... ضيفنا عضو مميز وراقي إختلفنا معه كثيرا ً وسنبقى نختلف ... طالما أن إختلافنا أمر طبيعي جمعنا وطن ٌ ودين وعروبة ... أفكارنا بعيدة جدا ً ولكنها تصب لنفس الهدف ألأ وهو مصلحة مصر ونهضتها ورفعتها دوما ً رحبوا معنا بضيف ِ حلقتنا لهذا اليوم الأخ :_ ( قلــم بلا حبـــر ) أهلا ً وسهلا ً بك أخي ننتقل بكم لمضمون الحوار

س : كالمعتاد لمن لا يعرفك من أنت بإيجاز ؟ السيد غريب الحسينى 30 سنه وشهر و 8 ايام ـــــــــــــــــــــــ ــــــــــــــــــــــ ـــــــــــــــــــــ س_ كلنا مصريين وننتمي لمصر أولا ً وأخيرا ًَ...ولكن إن أردنا تصنيف قلم بلا حبر ع فكر أو تيار معين فما ذلك الفكر وما الذي شدك اليه ؟ احيانا بوصف بانى من التيار المحافظ , , واحيان تانيه بوصف انى متشدد ,, وساعات ببقى متحرر ,, واخيرا بقيت زنديق بس فى النهايه ,,, انا محاولتش اوصف نفسى ,, هو مجرد حريه مديها لفكرى ساعات بيتوافق مع التيار دا وساعات بيتوافق مع التيار دا , , وممكن يختلف مع الكل ,,, بس اللى متأكد منه انى ضد التبعيه تحت اى مسمى حتى لو كانت فى شكل انتهاج فكر لتيار معين ـــــــــــــــــــــــ ــــــــــــــــــــــ ـــــــــــــــــــــ س_ما رأيك الشخصي بكل من :_ 1 الإخون المسلمين اتفقت معاهم واختلفت ,, وده بيتوقف على افعالهم , , اللى للآسف كتير منها متناقض ,, , بس من وجهة نظرى ان فى فارق كبير بين اخوان مسلمين حسن البنا واخوان مسلمين الهضيبى واخوان مسلمين مهدى عاكف واخوان مسلمين بديع ,, , وللآسف بذكر اسماء أشخاص لان فى الغالب التبعيه هى سمه رئيسيه فى الجماعه مهما ادعى البعض منها بديمقراطية اتخاذ القرار ـــــــــــــــــــــــ ــــــــــــــــــــــ ـــــــــــــــــــــ 2_ السلفيين منهج ضد الفطره فى حالة تشدده ,, اى شئ بيتسم بالجمود فمأله الى الفناء ,, علشان كدا من عظمة الاسلام انه دين معاصر لكل الازمنه ,, فازاى نوقف الاجتهاد فيه على مرحله تاريخيه مهما كان الاسماء اللى كانت فيها ,, لانهم نفسهم اجتهدوا , , والدين الاسلامى مفيهوش عصمه لبشر ,, علشان نعصم السلف الصالح من الخطأ او النسيان ,,, اما المحبين للسلف ولا ينكروا الاجتهاد المعاصر فدول ليهم كل تقدير ـــــــــــــــــــــــ ــــــــــــــــــــــ ـــــــــــــــــــــ 3_ التيار الليبرالي ا سيئ تفسيره ونسبته لبعض مدعيه ,,, انما بالاساس لو تتبعنا مبادئ الليبراليه حنلاقى ان الاسلام بيحتوى عليها ,,, ولما بلاقى حد بينكرها فى وجود الاسلام فبالتبعيه بينكر جزء أصيل من تراثنا الدينى ,,, وكونها بتحمل شعار فصل الدين عن الدوله فدا مش معناه نشر الكفر او اصطلاح قوانين ضد الشريعه ,, انما مينفعشى يكون برنامجى الانتخابى قائم على التأمين الصحى وزيادة نسبة النمو ورفع معدلات التصدير وتوطين التكنولوجيا الحديثه فى مصر وفى حدود الشريعه ولا اتجاوز عنها ,, والاقى حد تانى نازل برنامج بيقول ,, من معى فهو مع الله ومن ضدى فهو ضد الشريعه ,,, فدا المقصود بفصل الدين عن الدوله ـــــــــــــــــــــــ ــــــــــــــــــــــ ـــــــــــــــــــــ 4_ الرئيس السابق محمد حسني مبارك انسان له ما له وعليه الكثير ,,,, ـــــــــــــــــــــــ ــــــــــــــــــــــ ـــــــــــــــــــــ 5_ الرئيس محمد مرسي لما تم انتخابه قلت ان ربنا كرم الاخوان المسلمين بيه , , اولا لانه صوره بتمثل تيار الحمائم فى الجماعه بعكس تيار الصقور اللى بيقوده خيرت الشاطر ,, تانى حاجه ان المصريين عاطفيين ومحمد مرسى بنشأته البسيطه قدر يتواصل مع فئات بسيطه من الشعب ويجذبها للعمل السياسى ,, ويزيل عن وجه الاخوان الكثير من الندبات السيئه التى خلفها تاريخ امتلئ بالاغتيالات والصفقات السياسيه البذيئه ـــــــــــــــــــــــ ــــــــــــــــــــــ ـــــــــــــــــــــ 6_ الإعلام المصري الاعلام على نوعين ,, رسمى ,, وده المملوك للشعب وللاسف خريطته وتوجهه بعد الثوره مكنتشى على قدر الامال المعقوده عليه , , فبعد مساندته للمجلس العسكرى أصبح مساندا للاخوان المسلمين تحت قيادة الوزير الاخوانى ,,, وده كان مطلب رئيسى للثوره (( تطهير الاعلام )) وتقريبا التليفزيون والصحف القوميه اللى تم تعيين رؤساء تحريرها عن طريق مجلس الشورى ذو الاغلبيه الاخوانيه ماشيين بالمثل اللى بيقول (( اللى يتجوز امى اقوله يا عمى )) واعلام خاص ,,, ودا فى الغالب بيكون موجه ودا واضح من انقسام واضح بين القنوات الليبراليه والقنوات الدينيه ,, مع ملاحظة ان معايير الحياديه فى القنوات الليبراليه اكبر بكثير من مثيلاتها فى القنوات الدينيه اللى بيعتبر معايير الحياديه عندها (( صفر )) ـــــــــــــــــــــــ ــــــــــــــــــــــ ـــــــــــــــــــــ 7_ الفن المصري كان ولايزال مرأه المجتمع المصرى مع الآخذ فى الاعتبار ان بعض الاسفاف لا يعنى بالضروره محو الفكره ,,, الفن اصبح صناعه وفوق انه صناعه فهو اداه من ادوات بسط النفوذ السياسى وبيسموه الاستعمار الناعم ,,, ودا تحسه اكتر لما تكون موجود فى اى دوله عربيه وبتلاقى قد ايه الفن المصرى واصل حتى للاطفال الصغيره وبيقدر يشكل جواهم افكار نابعه من مصر ,, يكفى ان واحد باكستانى بهزر معاه فرفعتله حاجبى لقيته بيقولى (( عادل امام )) ـــــــــــــــــــــــ ــــــــــــــــــــــ ـــــــــــــــــــــ 8_ حمدين صباحي قيمه وطنيه سواء اختلفت او اتفقت معه , , التاريخ مش بينكتب فى سطر او فى يوم التاريخ بيتكتب علشان يعبر عن مجمل مواقف ,, ومظنش ان حد يقدر ينكر دور صباحى فى المعارضه للانظمه السابقه فى مصر ,,, ـــــــــــــــــــــــ ــــــــــــــــــــــ ـــــــــــــــــــــ 9_ عمرو موسى هاجمته بعد الثوره لما اتقدم للترشيح ,, مع العلم انى عارف قيمته كرجل سياسى من الطراز الاول ,, لكن تطلعى وتطلع جيلى للتجديد خلانا نكون رافضين لمجرد التفكير فيما سبق حتى لو كان اللى بيمثله شخصيه عمرى ما اختلفت مع حد على انه انسان وطنى ,,, لكن قيمته كسياسى محنك ظهرت اكتر بعد الانتخابات ,,, ـــــــــــــــــــــــ ــــــــــــــــــــــ ـــــــــــــــــــــ 10_محمد البرادعي للى ميعرفوش يا جماعه ده مش عالم ذره ,, ولا اتسبب فى ضرب العراق ولا عايز مصر تبقى مليطه ,,, هو راجل لما بشوفه بييجى على بالى (( غاندى )) يمكن لتحرر افكارهم من قيود التبعيه بشكل لافت ,, احتمال ,, يمكن لشفافيتهم فى طرح افكارهم حتى لو اختلفت مع تيار سائد فى المجتمع ,, احتمال برده ,, يمكن لحسهم الوطنى وابتكارهم لاساليب سلميه لمقاومة الاستبداد ,,, دا اكيد ـــــــــــــــــــــــ ــــــــــــــــــــــ ـــــــــــــــــــــ س :- من خلال متابعة مواضيعك نسرد ىبعض الأسئلة نود منك التوضيح عليها :_ 1 أنت من أشد الناقمين ع التيار الإسلامي هل هذا نابع من خلاف فكري أو سياسي ؟ ,,,, ليه اعتبرت انى ناقم مش احتمال انهم يكونوا فعلا فى مكان يستحق النقد مش النقمه ,,, مش مسألة انى فرد وهم جماعات يبقى هم صح وانا غلط ,, لانى ممكن اديك مثال انت نفسك حتأكد انى صح بالرغم من كونى فرد وهم غلط بالرغم من انهم جماعات ,, يعنى بالله عليك ,, فى كل مواضيعى اللى كتبتها خصوصا الدينى منها ياترى مين صح انا والا الخوارج , , انا والا الشيعه ,, فكلمة (( ناقم )) على الاقل بتعنى لى انهم صح ومكتسحين وانا غلط ومهزوم , , بالرغم من انى شايف ان العكس صحيح !!!!! الحاجه التانيه مكنشى ينفع اصلا تستخدم كلمة ناقم وتتبعها بان فى خلاف سياسى او فكرى , ,, لان الكلمه معناها اكبر من مجرد خلاف فى الرأى ,, حتى القرأن لما استخدمها كانت واضحة الدلاله ان النقمه بتكون لشئ جلل وشئ عظيم شوف الايه ((وما نقموا منهم إلا أن يؤمنوا بالله العزيز الحميد الذي له ملك السماوات والأرض )) ,,, وانا والحمد لله بؤمن بالله العزيز الحميد الذى له ملك السماوات والارض ,,, يبقى مش كون انى بنتقدهم يبقى توصل اختلافى معاهم لمرحلة انى ناقم عليهم ,, وعلى فكره كمعلومه الشيعه بيقولوا علينا ناقمين عليهم لانهم اهتدوا للصواب واحنا لا ,, البهائيين بيقولوا اننا ناقمين عليهم لانهم على صواب واحنا على خطا حتى اللى بيعبد النار مفكر ان العالم كله ناقم عليه لانه صح والعالم كله غلط ,, , مفضلشى الا الملحد اللى مبيعترفشى اساسا بوجود اله بيدعى برده ان المتدينين من كل الاديان فى العالم ناقمين عليه لانه اتحرر من قيود الاستعباد ,,, فلو انت شايف انى ناقم عليهم فدى فى النهايه مجرد وجهة نظر بتتشابه مع كل وجهات النظر اللى انا ذكرتها ليك إنما الأعمال ُ بالنيات ومقصدنا من كلمة ناقم هي مُعارض بشدة وليس أي شيء آخر ...هذا للتنويه فقط ـــــــــــــــــــــــ ــــــــــــــــــــــ ـــــــــــــــــــــ 2من الواضح أنك ضد الإعلان ادستوري فهل لو هذا الدستور صدر من رئيس آخر غير مرسي بعد الثورة ستكون ردة فعلك بنفس الشكل ؟ يعنى لو السؤال صادر فى موقف كوميدى بجد حقبله ,,, انما انك تكون بتتكلم بجد وبتطلب منى اجابه فدا بجد محتاج مراجعه منك ,,, هو انت مفكر انى لما دعمت مرسى فى الجوله الثانيه ولما كتبت هنا اكتر من موضوع بشيد ببعض قراراته كنت بتخيل ان فى يوم من الايام الاقى حد بيسألنى سؤالك دا ,,, مش محتاج اقولك ان المبادئ مش بتتجزأ ,,, ونفس الاسباب اللى خلتنى اقف قدام شفيق علشان بحلم بثوره عشتها ,, هى نفس الاسباب اللى خلتنى اقف لواحد فكر ان كرسى الحكم المصرى لسه زى زمان فدا يا خالد مش سؤال ومينفعشى يكون سؤال لان لو سالته لاى حد طبيعى انه حيقولك ايوه طبعا ,,, انما دا انتقاد شخصى منك دخلته فى صيغة استفهام فخرج السؤال بالشكل الباهت دا ـــــــــــــــــــــــ ــــــــــــــــــــــ ـــــــــــــــــــــ 3ما موقفك من حرق مقرات جماعة الإخوان والحرية والعدالة ع مستوى الجمهورية ؟ شوفت كلمة (( المبادئ مش بتتجزأ )) اللى قلتها فى الاجابه اللى فاتت , ,, لو قارنت بين تصريحات الاخوان عن حرق مقار الحزب الوطنى وعن حرق مقراتهم ,, حتلاقى فى اختلاف كبير لان المبادئ عندهم بتتجزأ ,,, و طبعا ردك السريع حيكون ايه اللى جاب حزب فاسد لجماعة الاخوان المشاركه فى الثوره ,, حقولك ان الاسباب اللى خلت الشعب (( وخلى بالك من الشعب لانى مش عايز اتهم الاخوان )) اللى خلت الشعب يخرج ويحرق مقرات الحزب الوطنى ,, هى نفس الاسباب اللى دفعت بعض فئات الشعب لحرق مقرات الاخوان ,,, دول كانوا واكلين السطله فى بطنهم ,, ودول نزلوا اعلان دستورى بيقول احنا السلطه نفسها ,, فالاخ اينشتاين بيقولك ,, مينفعشى تعمل نفس الخطوات وتستنى نتيجه مختلفه ,,, فالشعب زى ما يكون بيقول ضمنيا مش عايزين حزب وطنى تانى ,,, مع انى كنت ولازلت ضد حاجه اسمها العنف فى التعبير عن الرأى ,, وضد حصار المؤسسات (( بالمناسبه هى المحكمه الدستوريه اتفك اسرها والا لسه ؟؟ )) ـــــــــــــــــــــــ ــــــــــــــــــــــ ـــــــــــــــــــــ 4هل أنت مع إسقاط النظام الحاالي في مصر ولماذا ؟ دا اسمه لعب عيال ,,, مفيش حاجه اسمها رئيس منتخب يتم اسقاطه ,, الا فى حاله واحده واكيد انت عارفها ,, وتقريبا هو اتراجع عنها ـــــــــــــــــــــــ ــــــــــــــــــــــ ـــــــــــــــــــــ 5هل تتوقع قيام ثورة جديدة في مصر أم أنها أزمة وستزول ؟ شوف بيعز عليا قوى انى الاقى التاريخ بيحكى عن ان كل الثورات بتقلب بعد كدا لاقتتال داخلى وبعدين يقعدوا ويفهموا ان مفيش دوله محترمه بيحكمها فصيل واحد , ونحاول نمشى فى نفس المسار ,, ليه لازم نمشى فى نفس الطريق اللى مشيه غيرنا ,, ليه مبناخدشى من التاريخ عبره ونقصر على نفسنا المشوار ,, وكدا كدا ان اجلا ا م عاجلا حيحصل توافق والبلد حتقوم نهضتها بمشاركة الكل مش بفصيل او بتيار لوحده ـــــــــــــــــــــــ ــــــــــــــــــــــ ـــــــــــــــــــــ 6هل أنت مع حظر الجماعة وعودتهم للسجون مرة أخرى ؟ يا اخى ازاى وانا اللى كنت بطالب بخروجهم وانهم فصيل وطنى مع ان الكثير من مواقفهم بتشوش على كلامى دا ,, لكن فى النهايه استحاله انى اوجه كلامى بالعماله او بالخيانه او بانعدام الوطنيه لحوالى 5.5 مليون مواطن ادوا اصواتهم لمرسى فى الجوله الاولى ,, ياترى هم عندهم استعداد يبادلونا نفس الرؤيه ويبطلوا اتهامنا بالعماله او بالخيانه او بانعدام الوطنيه ؟؟؟؟ ـــــــــــــــــــــــ ــــــــــــــــــــــ ـــــــــــــــــــــ 7هل تتمنى سقوط التيار الإسلامي في أي إنتخابات مصرية قااادمة ؟ مش سقوط ,,, انا عايز اشوف برنامجه , ,, الشريعه مش ملكهم لوحدهم ,,, نافسنى بافكارك انت ,, انت بتقول انك مؤيد للشريعه ,, خلاص طلع من الشرع برنامجك لعلاج الفقر والاميه والنمو الاقتصادى والتأمين الصحى والسياسه الخارجيه واطرحه على الناس وانا اطرح مشروعى وبرنامجى على الناس ونسيب ليهم حرية الاختيار ,, مش جايز انت استنبطت مشروعك من الشريعه بفهم خاطئ ,, يعنى اللى خلى الامام الشافعى يراجع نفسه فى مذهبه يخليهم يعرفوا انهم ممكن يخطؤوا وهم بيستنبطوا برنامجهم من الشريعه , , حتى ابن تيميه نفسه تراجع فى مواضع كثيره ,, يبقى بلاش الاقى برنامج سياسى مغلف باسم الشريعه وبينسب صحته للشريعه , , لانى واثق فى صحة احكام الشريعه وواثق فى الحلول الاسلاميه لكل مشاكل الحياه , , لكن اللى مش واثق فيه هو طريقة فهمهم هم للشريعه !!!!! ـــــــــــــــــــــــ ــــــــــــــــــــــ ـــــــــــــــــــــ 8هل تتوقع أن معظم المشايخ والدعاة في مصر يتخذون من الدين ستارا ً ولا تصل رسالتهم للقلوب والعقول بتاتا ً لنفور الناس منهم برأيك ؟ لو عندك من يرفض منصبا زى الشافعى او زى الشعراوى صدقنى حتلاقى القلوب بتروح ليه ,, انما للاسف مش شايف غير ماراثون خلف الكراسى ,,, ـــــــــــــــــــــــ ــــــــــــــــــــــ ـــــــــــــــــــــ 9_بكل تأكيد أنت ممن يحترم القانون ككل المصريين فلماذا برأيك علينا أن نحترم القانون البشري الزائل وأن لا نلتزم بالقانون الألهي الدائم ف شؤون حياتنا من تطبيق لمناهج الشريعة تدريجيا ً في البلاد ؟ الكلام دا انت جبته منين , , يعنى هل مثلا لقيت قانون بيحلل الزنا , , والا بيتيح للمرأه تعدد الازواج ,, واللى سمح بزواج الشواز ,,, القوانين المصريه بتستمد صحتها من الشريعه ,,, وان كان فى اختلاف فى العقوبه فدا مبنى على اجتهاد مساير للعصر الحالى ,, يعنى واحد بيسألنى بيقولى وفيها لما السارق يتقطع ايده ؟؟؟ ,,, قلتله دلوقتى وفى ظل التقدم التكنولوجى اللى احنا فيه الامر اختلط ,, زمان كان الحرامى ممكن يتتبعوا اثره فى الرمل ,, النهاردا ممكن تسرق او تقتل وتلبسها فى حد تانى وتطوع كل الادله بحيث انه يلبسها ,, طيب لو فرضنا ان واحد برئ اتحط ولبس فى حكاية السرقه دى والحرامى استخدم وسائل تكنولوجيه عاليه بحيث ان التانى يا عينى لبس الجريمه وقطعنا ايده ,, وبعد فتره اتضح انه برئ ياترى حنكون مرتاحين الضمير واحنا حارمين اسره من عائلها , ,, عارف ان فى ناس حتقول ان ربنا كتبله كدا ,, , حقولك ان رنا ارحم من كدا بكتير ودينا اعطف وارق على الانسان من كدا بكتير اقرا الحديث كدا (( أخرج البخارى أن النبى -صلى الله عليه وسلم- قال لماعز: «لعلك قبلت أو غمزت أو نظرت» ، وفى رواية للدارقطنى: «ويحك ارجع فاستغفر الله وتب إليه». قال فرجع ثم عاد. فقال له مثل ذلك حتى إذا كانت الرابعة قال له: «أبك جنون؟» فأُخبر أنه ليس بمجنون. فقال: «أشرب خمرا؟» فقام رجل فاستنكهه فلم يجد منه ريح خمر. وفى رواية لأبى داود والترمذى أن ماعزاً لما رُجم فوجد مس الحجارة جزع فخرج يشتد فلاحقه بعض الناس فقتلوه، فذُكر ذلك لرسول الله -صلى الله عليه وسلم- فقال: «هلا تركتموه لعله أن يتوب فيتوب الله عليه». )) ,,, فلما نكون فى عصر زى اللى احنا فيه ويكون فى شيوخ اجلاء اجتهدوا واقروا ان الحدود ما هى الا عقووبه للزجر فقط لا غير ,, مش حدود للتشفى والانتقام ,, ولما نلاقى ان فى الالفيه الثالثه اكتر حاجه ممكن يزجر منها الانسان هى تقييد حريته ,, يبقى الحكمه من الحد موجوده اللى هى الزجر ,,, يعنى السجن مش بدعه ,,, انما العقوبه مرنه ودا اللى خلى سيدنا عمر ابن الخطاب اوقف حد السرقه فى عام الرماده لما خاف انه يختلط عليه السارق من الجائع ,,, يبقى النهارده ليه متاخدشى بالاجتهاد ,,, مصر مكنتشى فاسقه وفجأه حنردها للدين ,, تقدر تقول ان فى ناس كانت فى كهف ونسيوا ان فى حاجه اسمها اجتهاد وخارجين مصرين نبدأ من اول وجديد ,, مع العلم ان اللى بيتمسكوا بتطبيقه هو فى الاخير اجتهاد وليس نص صريح فى القرأن او السنه فى الغالب الاعم منه ,,, ـــــــــــــــــــــــ ــــــــــــــــــــــ ـــــــــــــــــــــ 10 نشاهد في بعض مواضيعك او ردودك بعض النقد الذي يصل لحد التجريح والشتائم يما تنتقد ألا تعتقد أنه لا بد للحاج المسلم أن يكون أكثر هدوء ً من غيره في أقواله وأفعاله وإن إختلف في الرأي مع الآخرين ع أساس علمنا مسبقا ً بأنك زرت بيت الله والحبيب المصطفى ص الله ع وسلم ؟ دا انا لو صدقت الكلام اللى بيتقال على القنوات الدينيه ان الاسلام اباح لينا السب والشتم كنت حتحاكمنى بقى يا خالد ,,, انا اكبر كلمه قلتها فى المنتدى هنا كانت (( انت اهبل ؟؟؟ )) ودى كانت بمناسبة ان احد الاعضاء دخل وكتب موضوع وقال اللى حيختلف معايا ميردش وحذرته واغلقت الموضوع , ورجع تانى فى احد ردوده عاد نفس الكلام وكمان كتب موضوع فيه نفس الصيغه ,, ومع ذلك انا مقولتش انى صح بدليل ان احد مشرفى قسم قلم الاعضاء لما كلمنى عن النقطه دى قلتله بصراحه انا اضايقت لما كتبت دا بس فى النهايه انا بشر ووارد جدا اخرج عن شعورى ,,, وياريت لو بس مشايخ التيار الاسلامى يكونوا فى نفس الحدود اللى انا خرجت فيها بعيد عن التكفير والاتهام بالخيانه والعماله والالحاد والنجاسه واخيرا بقوا بيدخلوا فى اعراض الناس ,, انا كل اللى قلته (( انت اهبل )) وبعترف انى اضايقت لما قلتها ,, انما هم بيقولوا كل دا وبيجيبوا يا اخى ادله من القرأن والسنه على كلامهم تخيل , ,, على فكره صحيح اغلبهم برده حجوا بيت الله ـــــــــــــــــــــــ ــــــــــــــــــــــ ـــــــــــــــــــــ 11 كنت أول من بادر لحملة التعايش التي إنتشرت في المنتدى للتقارب ونشر الود والمحبة بيننا خصوصا ً بعد طرحك لموضوع القسم المسيحي فهل نرتقب حملة تعايش أخرى لقلم بلا حبر في مواضيع قادمة لترسيخ المحبة بشكل أعمق ؟ حملة التعايش كان اساسها اختلاف عقائدى , ,, انما عمرك سمعت عن حملة تعايش بين الجمهوريين والديمقراطيين فى امريكا او بين الليكود وكاديما فى اسرائيل ,,, اللى انا بكتب عنه هو خلاف سياسى بحت ,, البعض من الطرف الاخر بيحاول يخليه بشتى السبل خلاف عقائدى انه يتهمنا بالكفر او باننا ضد شرع الله ,, بش مش دى الحقيقه ,, انا بختلف معاك سياسيا لو انت فهمت دا ان اختلافى معاك انت مش مع الشريعه صدقنى مش حنحتاج لا لحملة تعايش ولا غيره ,, لانك ساعتها حتعرف ان انا على نفس دينك واننا انتماؤنا واحد ومصيرنا واحد ودينا واحد بس افكارنا لتحقيق نهضة بلدنا مختلفه ,,, ايه بقى التعايش اللى محتاجينه وقتها ,, احنا محتاجين حملة محو اميه سياسيه علشان نعرف الناس انى لما اقول انى برفض الدستور دا مش معناه انى برفض شرع الله ,,, ولما بقول نعم للدستور مش معناها انى بنصر دين الله ,,, هى دى الحمله اللى بجد محتاجينها واللى للاسف مشفتش اى موضوع او رد اتكتب عنها من الاخوه الموجودين فى المنتدى من تيار الاسلام السياسى ـــــــــــــــــــــــ ــــــــــــــــــــــ ـــــــــــــــــــــ 12لو عرض عليك إستضافة أو مناظرة ع قناة مصر 25 فما ردك ع ذلك ؟ وايه اللى حيخلينى ارفض (( هل هى رجس من عمل الشيطان يا خالد )) ,, ههه ربما بدعة يا أخ سيد بجد أضحكتني هنا ـــــــــــــــــــــــ ــــــــــــــــــــــ ـــــــــــــــــــــ 13 _ متى تتحد أهدافنا وأفكارنا من أجل مصر برأيك ؟ اهدافنا متفقه ولازم تتأكدا من دا , , مفيناش حد مش وطنى ومفيناش حد مبيحبش مصر ومفيناش حد مش عايز نهضه لمصر ,,, فكونك بتسأل عن اتحاد الهدف دا معناه انك بتشكك مسبقا فى ان البعض معندهمشى نفس الهدف ودا تصور اعذرنى خاطئ ,, فالجميع مصريون ووطنيون وعايزين مصلحة البلد لكن الجميع بيختلف فى الفكره او اسلوب التطبيق مش اكتر ,, ودا مش لازم يكون فيه اتحاد لان الاختلاف والتنوع سنه كونيه ونجاحنا فى تحقيق الهدف مع اختلاف افكارنا دا شئ طبيعى بس الاول نعترف ان الجميع ليه نفس الهدف ونخرج بره دايرة (( انا وطنى والاخرون عملاء )) ـــــــــــــــــــــــ ــــــــــــــــــــــ ـــــــــــــــــــــ 14 كلمات ترددها كثيرا ً ف مواضيعك ( البعض ... ضعاف النفوس والعقول . ..الحقد ...الكراهية ... فلماذا لا نر ى كلمات تستبشر بالخير والامل والسرور ؟ (( كثيرا فى مواضيعى )) ؟؟؟؟ ,, دا واضح انك متابعتش مواضيعى اصلا ,,, انا حجيبلك نماذج لايام عدت على مصر واصابنا كلنا اليأس والاحباط وكنت بخرج واكتب فيها عن التفاؤل وان لسه فى امل ,, بس خلينى ابدأ بمثال حى على دعوتى للحب http://forums.banatmisr.com/msryat371695/ وده موضوع عن الايمان بالديمقراطيه فى كونها المخرج الاساسى لاى اشكال ممكن نقع فيه http://forums.banatmisr.com/msryat370639/ والموضوع دا بعد نتيجة الجوله الاولى وحصول شفيق على المركز الثانى والانهيار واليأس اللى دب فى قلوبنا جميعا http://forums.banatmisr.com/msryat355894/ والموضوع دا كتبته لما كنت بحاول الاقى صيغه مناسبه لجذب التصويت لصالح الاخوان بالرغم من اختلافى معاهم http://forums.banatmisr.com/msryat356936/ ودا كتبته لما نتائج الاستطلاعات كانت بتميل لنجاح شفيق واستحوازه على الاغلبيه http://forums.banatmisr.com/msryat360209/ فالكلمات اللى انت شفت انى برددها كثيرا للآسف شفتها حسب ميولك السياسيه انما لو راعيت الانصاف حتلاقى ان اغلب الانصاف مش معناه انى اكتب اللى يعجبك بس ,, لانى ممكن اكتب ضدك ,, وواجب عليك تحترم رأيى فى الحالتين سواء كان معاك او كان ضدك ـــــــــــــــــــــــ ــــــــــــــــــــــ ـــــــــــــــــــــ 15 إنتقصت من صاروخ القسام ونتائج حرب غزة ألا تعتقد أن العدوان ع غزة متواصل سواء كان هناك مقاومة أم لا واليهود عرفوا بالمكر والغدر مع الأنبياء فكيف معنا ولا نصير لأهل غزة سوى الله فلماذا لا ندعمهم نفسيا ً ع الأقل وهذا أضعف الإيمان ؟ دعمى لمصر بييجى فى المقام الاول , وبعد منه بييجى دعمى لاى شعوب تانيه بحسب علاقاتى بيها من حيث الدين او القوميه او حتى المشاركه فى نفس الهموم والاحلام ,, ولما كتبت عن حرب غزه كتبت انطلاقا من الدور اللى لعبته مصر لايقاف الحرب ضد غزه ,, وانا معاه بس قبل كل دا لازم ومن حقى كمواطن مصرى اعرف انا دفعت ايه لايقاف مثل تلك الحرب ,,, يعنى لو فرضنا جدلا ان اتعرض عليك يا خالد انه يتم توطين الفلسطينيين فى سيناء علشان يتم حل المشكله الفلسطينيه مع احتفاظهم بغزه ,, هل حتوافق ؟؟ ,, اؤكدلك لا ,, ليه ؟؟؟ ,, لانك فى المقام الاول مصرى وبتخاف على تراب البلد دى ,, ودعمك للاخوه فى فلسطين مش محتاج انى اتنازل عن الامن القومى المصرى ,, لان قوة مصر هى قوه للعالم العربى والاسلامى ,, ولازم نحافظ عليها بدون تنازلات تمس بامنها القومى ولا استراتيجيتها الخارجيه المستقله ,, والا يبقى بنعالج مشكله صغيره بمشكله اكبر ,,, ـــــــــــــــــــــــ ــــــــــــــــــــــ ـــــــــــــــــــــ 16 موضوعك تنازلت عن ايه يا مرسي هل تعتقد وبكل صراحة ان محمد مرسي خائن وعميل للغرب واسرائيل ؟ اللى بيطالب الناس انها تتوقف عن اتهام الغير بالخيانه والعماله ,, مستحيل يصدر منه اتهام زى دا ,,, ومش معنى انى اوجهلك النقد على عمل معين يبقى دا معناه انى بتهمك بالخيانه ,,, لو حد يقدر يثبت ليا ان مرسى معصوم من الخطا فانا اؤكد ليك انى حتوقف عن نقده ,, مرسى رئيس دوله ,, وانا احد مواطنى الدوله دى ,,, ومن حقى اعرف وافهم ايه اللى بيحصل ,,, ومن حقى اقول رأيى حتى لو لم يتم الآخذ بيه ,, اما حكاية انه عميل وخائن فيا عم فى حالة تم انتخاب رئيس من التيار المدنى فى الانتخابات القادمه فانا حستنى منك انك تهريه انتقاد وعمرى ما حقولك انك كدا مخونه او بتتهمه بالعماله ـــــــــــــــــــــــ ــــــــــــــــــــــ ـــــــــــــــــــــ 17ما رأيك بمحاكمة مبارك وأعوانه ؟ بتفكرنى بشاهد مشافشى حاجه ـــــــــــــــــــــــ ــــــــــــــــــــــ ـــــــــــــــــــــ 18 هل تعرضت لملاحقة أو إعتقال في عهد مبارك ؟ لا ,, وملايين زيى لم يتعرضوا لملاحقه او اعتقال ,, ودا مش معناه انهم مش وطنيين او انهم مكنوش بيتكلموا ,, او معارضتهم كانت على النت بس ,, لان الايام اثبتت والتاريخ كمان اثبت ان شرارة الثورة جت من الفئه اللى لم يتم ملاحقتها ولم يتم اعتقالها وكانت قاعده بتعارض على النت (( تخيل )) ـــــــــــــــــــــــ ــــــــــــــــــــــ ـــــــــــــــــــــ 19 _ ما رأيك بالثورة السورية المجيدة ؟ قلبت على حرب اهليه للآسف , , وفى الحروب الاهليه اوعى تفكر ان فى حد بيكون صادق ـــــــــــــــــــــــ ــــــــــــــــــــــ ـــــــــــــــــــــ 20_ هناك من يقول أن المذهب الشيعي يتوغل في مصر فهل أنت مع حرية ذلك أم أنك مع مقاومته وإن كنت مع فهل تقبل بممارسة الطقوس الشيعية من لطم ونواح في وسط المدن المصرية كما كربلاء اليوم ؟ لو سألتك هو انت ممكن تجبرنى على اعتناق مذهب معين حتقول ايه ؟؟؟ , ,, اهو اجابتى زى اجابتك بالظبط ,, المنع دا كان وسيلة القرون الوسطى , , انما فى عصر الستالايت والنت المنع دا وسيلة الفاشل الجاهل ,,, لو حاسس ان موقفك قوى حتقدر تواجه اى فكر مختلف معاك , , ولو حجتك الاميه فى مصر فللآسف البعض بيستغلها بترويج الشعارات الدينيه وبيستغللها لحصد اغلبيه فى البرلمانات وفى الاستفتاءات , , ولما بنقوله انت بتستغل جهل الناس ليه , , بيقولك المصريين اعلى من النخبه والمصريين مينفعشى تتهمهم كدا ,, فالمصريين اللى بتتكلم عنهم كدا وان محدش يقدر يغير قراراهم السياسى اللى جاب التيارات المتشدده الى سدة الحكم , , ليه رجعت تقول انهم اميين ومش حيقدروا يواجهوا التوغل الشيعى ,, اللى يخلي قناعتهم السياسيه ثابته للتيار الاسلامى فى الانتخابات ,, يخلى ايمانهم بمذهب اهل السنه والجماعه اثبت من كدا بكتير ,, يبقى مفيش مبرر لقلقك وخوفك ,,, ـــــــــــــــــــــــ ــــــــــــــــــــــ ـــــــــــــــــــــ 21 قضية التحرش هناك من ينادي بوضع عقوبة مشددة ع هؤلاء لردعهم كالسجن 3 سنوات ما رأيك ؟ مفيش اسهل من العقاب , , بس ياترى هو دا الحل ,, المفروض ان التحرش مشكله قائمه واى مشكله ليه مسبباتها ,, لازم ندرس الاسباب ونحاول نلاقى ليها حلول بحيث اننا نقضى عليها ,, وبعد كدا نبدأ فى عقاب الخارجين ـــــــــــــــــــــــ ــــــــــــــــــــــ ـــــــــــــــــــــ 22 ما رأيك بالإستفتاء الذي طرحه الرئيس بالأمس ع الإعلان الدستوري ؟ كويس انى جاوبت متأخر علشان تعرف ان احيانا بنتعلق باى حاجه علشان نبرر لنفسنا صحة موقفنا ,, واديك شفت فى النهايه ان التيارات الاسلاميه نفسها اعترفت بان الاعلان الدستورى اللى انت شخصيا دافعت عنه كان فيه كثيرا من العوار وهدم دولة القانون وتعدى سافر على الدستور ـــــــــــــــــــــــ ــــــــــــــــــــــ ـــــــــــــــــــــ 23 لا هم من الإخوان ولا من المسلمين عبارة قالها الشهيد البنا يرددها شباب الإخوان كثيرا ً لانها توحي لنفي قاطع من قبل البنا لانخراط الجماعة في اي اعمال عسكرية او اغتيالات في تلك الفترة التي كانت مليئة بالقلاقل والتي غلب عليها الثأرات الفردية والعائلية لمن تعرض من ابناءهم للسجن فما ردك ع هذا الأمر الذي تضعه عنوانا ً لمواضيعك ؟ التاريخ مالوش روايه واحده ,, يعنى لو رجعت لاى موقف تاريخى حلاقى روايات كتير وكل طائفه او جماعه بتاخد بالروايه اللى فى صالحها ,, بس الروايه الموثقه ان الجمله اتقالت بعد اعتداء الجناح العسكرى على مكتب النائب العام فى وقتها بدون علم حسن البنا ,, او هكذا قال ـــــــــــــــــــــــ ــــــــــــــــــــــ ـــــــــــــــــــــ 24 لم أرى مواضيع لك تتعرض للظلم والاضطهاد السياسي والجسدي الذي لحق بالجماعة ع مدى الفترات السابقة ومنها ما وصل لحد الإعدام ومنهم من مات تحت التعذيب فهل هذا يعني تحيزك لفئة بعينها أم أنك تعرضت لذلك بحيادية سابقا ً ؟ الجماعه فى النهايه فصيل ليه هدف فى الوصول للسلطه وبيدفع تمن دا وهو من جواه عارف ليه بيتعمل معاه كدا ,, انا لما بكتب عن الاضطهاد بكتب عن غالبية الشعب المصرى اللى للاسف سقط فى بركة الفقر ومالوش اى ذنب ولا عمره دور على سلطه ولا حتى فكر فيها ,, دا فعلا اللى يستحق منى الرثاء ,, وده ميقللشى من بعض الافعال اللى وقعت ضد الاخوان واللى محالفنيش الحظ انك تكون معايا وانا بقول انهم جماعه وطنيه وليهم فى مصر زى ما لاى حد ,, بس ياترى بعد ما وصلوا لهدفهم الحقيقى فى اععتلاء الكرسى زى ما كان مخطط ليهم وتقريبا هم دلوقتى فى خطة التمكين ,, ياترى حيفتكروا السواد الاعظم من الشعب المصرى اللى كان مضطهد زيهم بس الفرق انهم تم اضطهاده بدون سبب ـــــــــــــــــــــــ ــــــــــــــــــــــ ـــــــــــــــــــــ 25 عندما قرر التيار الاسلامي وضع مليونية ف التحرير الكل اعترض وهاجم فلماذا اراد هؤلاء انفسهم للرئيس مرسي ان يحضر للتحرير ويلقي خطابه مع ان هناك خطر ع حياته كما هي حجة الخطر من الاقتتال لو قامت المليونية ف التحرير مع علمنا انه رئيس لكل المصريين ولكن من كان ف التحرير يتظاهرون ضده ومنهم من نادى باسقاطه ايضا كيف تفسر ذلك؟ ولما راحوا ليه عند الاتحاديه ,, مطلعشى ليهم ليه ؟؟؟ ,, وياترى حكاية الخوف على حياته مكنتشى موجوده لما فتح سترة البدله وقال انا مبخافشى ,,, اللى عايز يعمل حاجه يا خالد بيعملها ,, ومرسى لو عايز يكون رئيس لكل المصريين حيعمل دا ,, بس للآسف مفيش اى دلالات على انه نازى يعمل دا ,, لان الانقسام زى ما كان فى صالح مبارك حيكون فى صالح مرسى ,, وافتكر ان مبارك كان بيخوف المسيحيين من المسلميين وكان بيخوف المدنيين من الاسلاميين وكان بيخوفهم كلهم من اسرائيل ,, وكان عامل انقسامات فى الشارع المصرى اهلته لانه يحكم 30 سنه ,, فلو مرسى كمل بنفس الطريقه حيتحقق ليه تواجد فى السلطه ,, بس تواجد مؤقت ـــــــــــــــــــــــ ــــــــــــــــــــــ ـــــــــــــــــــــ 26 يسقط يسقط حكم المرشد عبارات سمعناها كثيرا ...فما رأيك بالمرشد العام للجماعة ؟ لما شفته طالع بيتكلم فى السياسه عرفت ان فى شيزوفرينيا فى الجماعه ,, المفروض انهم بيقولوا انها جماعه دعويه وان حزب الحريه والعداله هو الزراع السياسيه فازاى الاقى مرشد الجماعه الدعويه طالع بيتكلم فى السياسه ,, عارف انه مواطن ومن حقه يتكلم ,, بس الصفه اللى بيحملها بتنفى عنه الخوض فى المعارك السياسيه ,, والا يبقى جمعية الشبان المسلمين تتكلم وجمعيات تنمية المجتمع تتكلم ,,, واضح اننا قدام جماعه لحد دلوقتى بتنكر حقيقتها وبتحاول تصدر لينا مفاهيم هى اساسا بتعمل حاجات تناقضها ـــــــــــــــــــــــ ــــــــــــــــــــــ ـــــــــــــــــــــ 27 _ لماذا قمت بحذف وإغلاق موضوع لي بعنوان ( إلى فضيلة المرشد ) والذي لا يوجد في مضمونه أي تحيز للجماعة ولا يحتوي رسالة كما تقول كل ما في الأمر هو توضيح لخطوات ايجابية قادمة لوحدة العالم الإسلامي ؟ المنتدى للشأن العام سواء كان سياسى او اقتصادى او تجاى او اى حاجه ,, المهم يكون عام , , يعنى هو لو واحد كان عضو فى جمعية رساله حسيبه يبعت رساله لعمرو خالد ,, الموضوع اصلا مالوش اى محل من الاعراب يا خالد ,, احنا هنا عاملين المنتدى والاقسام دى علشان نتبادل الاراء فى الشأن العام وخصوصا قلم الاعضاء ,, فمينفعشى ان كل واحد يبعت لرئيس حزبه رساله ـــــــــــــــــــــــ ــــــــــــــــــــــ ـــــــــــــــــــــ ,,, 28 أنت تؤمن في الديمقراطية وتطالب بها . .. أليس من الأفضل أن تخبرني ع الأقل بأن هذا الموضوع لا يليق بالقسم وأنك ستقوم بحذفه مع أنه أكرر لا يوجد فيه ما يسيء .. .فلماذا مارست القمع الفكري في القسم وحذفته دون مراجعة أم أن القسم لعرض أفكار معينة أرى فيها أشد إساءة وتعدي من موضوعي ومنها مواضيع ليك والكل يشاهد ويقارن ؟ توضيح صغير بس ,,, انا محذفتش الموضوع ,,, انا اغلقت النقاش فيه (( دا لو كان اساسا في مجال للنقاش )) وبينت ليك الاسباب اللى خلتنى اغلقته ,, يبقى سؤالك دا ممكن اعتبره اتهام بحاجات محصلتشى وكمان بدون ادله ,, وعموما دا كان ردى عليك فى الموضوع قسم بقلم الاعضاء منبر لتعبير الاعضاء عن ارءهم الفكريه وليس منبرا لعرض توجهات حزب او جماعه بينتمى لها احد الاعضاء رسالتك ممكن تبعتها لمرشدك باحدى الطرق الاتيه 1- بالبريد العادى على عنوان , , محافظة القاهره - المقطم - المقر الرئيسى للاخوان المسلمين - بديع مرشد الاخوان 2- من خلال موقع اخوان اونلاين على الرابط إخوان أون لاين - الموقع الرسمي لجماعة الإخوان المسلمين 3- من خلال ال sms على رقم تليفون 0112621490 4- من خلال حساب مرشدك على الفيس بوك ... https://www.facebook.com/Moh.Bade3?ref=ts&fref=ts فى وسائل تانيه ,,, سبت ليك الحريه انك تستخدمها او تتخلى عنها فى توجيه رسالتك لمرشدك انما اخر وسيله ممكن تتخيل انك توجه من خلالها رساله لمرشدك ,,, هى قسم بقيم الاعضاء فى منتدى بنات مصر القسم مش ايميل لارسال الرسائل , , القسم لعرض الافكار ومناقشتها واحب اقولك حاجه يارب متحاولوش تمسحوها من تاريخ مصر الجاى لو انتم بتدوروا على نصرة سوريا وميانمار وغيرها على اساس انكم اخوان مسلمين فاحنا كمصريين بمسلمين ومسيحين قهرنا التتار ونقذنا العالم من تحطيم حضارته وهزمنا الصليبين وقضينا على فكرة المتاجره بالدين لتحقيق نفوذ وسلطات لرجال الدين وانتصرنا على اليهود وحققنا عزه ومجد للعرب لازالوا بيفتخروا بيها لانها النقطه المضيئه الوحيده للعرب فى وجه اسرائيل وكل دا عملناه واحنا مصريين , , مصريين وبس ,,, مكنشى حد من العساكر اللى ماتت فى سينا معاه كرت والا منضم لاى تنظيم علشان يجاهد فى سبيل الله وينصر بلده وامته فى وش اليهود احنا كدا المصريين ,, وحنفضل ان شاء الله ،،،،،،،،،،،،،،،،،،،،،،،،،،،،،،،،،،،،،،،،،،،،،،،،،، ،،،،،،،، وعايز اقولك حاجه يا خالد ,, انا عارف اهمية المرشد عندك قد ايه , ,, انما عندى وعند ناس تانيه فى المنتدى هو مجرد مواطن مصرى ,,, ـــــــــــــــــــــــ ــــــــــــــــــــــ ـــــــــــــــــــــ 29 تعرف نفسي ايه يا أخ سيد .. . إننا نتحمل بعض ونتعامل بهدوء وعقلانية أكثر وميصحش تنوه في موضوعك ( الكائن الإخواني ) عبارات لأعضاء الإخوان أو غيرهم تجرح النفس كما هو في بعض ردودك كعبارة الفأر ...أو حد يتجسس علينا مما يوحي لامر محزن ... إنتا ليه بتحب تجرح كثير هل لأن من يعارضك لا يرد ويلتزم بالهدوء أم أنك تتعمد ذلك ...فما لا ترضاه لنفسك لماذا لا ترضاه للآخرين ؟ ,,, لو حضرتك معارض فاتفضل اطرح وجهة نظرك ومظنش انى جيت فى موضوع وقلت اللى حيختلف معايا ميردش زى ما عمل اخوك والعضو احمد الخزرجى ,,, انا انتقادى بيكون مبنى على افعال وقحه بيقوم بيها البعض من الاخوان ,, كونك من الاخوان فدا مش مبرر انك تتهمنى انى بتحامل لانى مزكرتكشى بالاسم الا لو كنت بتمشى بالتفسير المحرف للحديث النبوى (( انصر اخاك ظالما او مظلوما ) ) ,, انا بهاجم اخوانك اللى نزلوا ميدان التحرير وكسروا المنصه بتاعت التيار الشعبى ,, انا بهاجم اخوانك اللى انقضوا على خيام المعتصمين قدام الاتحاديه وواحد منهم كان بيقول (( جبنه نستو يا معفنيين )) انا بنتقد اخوانك اللى الكاميرات صورتهم وهم بيضربوا خرطوش وشايلين سلاح وواخدين رهاين وبيقولوا عليهم بلطجيه واتضح فى الاخر انهم مهندسين وسياسيين والنيابه افرجت عنهم بعد ما رئيسك مرسى قال انهم اعترفوا ,,, انا بنتقد اخوانك اللى بيستغلوا سطوتهم فى بيع الوهم للبسطاء من الناس عن طريق وعود زى التعيين فى المصالح الحكوميه او الاعفاء من الخدمه العسكريه او استخراج تصاريح مبانى ,, , انا بنتقد اخوانك فى مكتب الارشاد اللى من سبقوهم فى نفس المكتب ايام عبد الناصر لاقوا ويلات من سياسة عبد الناصر الاقصائيه فهم هم نفسهم بيبعثوا من جديد بنفس سياسة الاقصاء ,, واللى كنت بتعيط منه امبارح ,, النهارده بقيت بتستخدمه ,,, انا بنتقد اخوانك اللى مصرين يصدروا للبسطاء انهم المتحدثين باسم الله وما سواهم كافر او فاسق او زنديق او عميل او خائن , ,, انا بنتقد اخوانك اللى مع كل مشكله بيعلنوا الجهاد وعن استعدادهم للاستشهاد وكأننا أصبحنا يهود نستحق الذبح ,, فى حين ان الجهاد والاستشهاد مش فى مصر دا فى القدس ,,, ياترى انت كمان مش بتنتقد النوعيات دي؟ ـــــــــــــــــــــــ ــــــــــــــــــــــ ـــــــــــــــــــــ 30 _ إعلم إننا مختلفين سياسيا ً وفكريا ً جدا ً وهذا طبيعي ولكن علينا أن نبحث عن نقاط التقارب لا الخلاف ...بناء ً ع ذلك سؤالي :_ هل تعتقد أننا هنا باقون للابد ...بالطبع لا كما هو حالنا في الدنيا فلماذا لا نجنب أنفسنا الحقد والكراهية والتي لا تولد من فراغ ويعلم الله مدى حبي للجميع هنا ومن أختلف معهم ومن أتفق فما ردك ؟ ومين قالك اننا بنضطهد حد ,, , احنا ضد سياسة الاقصاء , , افهمها بالله عليك يا خالد ,, لما كان مبارك حاطط الاخوان فى السجون كنا ضده ورفضنا سياسة الاقصاء ,, فازاى بعد ما اخرجك من السجون نتيجة ثوره اطلق الشباب شرارتها الاولى ترجع تقصيهم وتتهمهم بالكفر والعماله والخيانه وبعدين تساوى بينهم وبين الاخوان فى التقارب ,,, احنا اساسا مببعدناش ,, بدليل ان لما الثوره كانت حتضيع على ايد شفيق تقاربنا وعصرنا على نفسنا ليمونه وايدنا مرسى ,, ايه التقارب اللى عمله الاخوان بعد كدا كرد على الخطوه دى ,, اقولك انا التقارب اللى عملوه , ,, نزلوا اعتدوا على المتظاهرين فى جمعة الحساب ورئيسهم اصدر اعلان ديكتاتورى فى وجه المعارضين ليه ,, وهددوا بحرب اهليه بدايتها من التحرير وللاسف نفذوا جزء منها قدام الاتحاديه ,, مش بقول ان مفيش رد فعل من الطرف الاخر ,, لا فى وبنكره وبقول بعلو صوتى انا ضده ,, بس على الاقل انت كشخص بالله عليك يا اخى اعترف ان الاخوان لما بتتقارب بتفهم التقارب دا غلط وبتقلبه لمعركه او غزوه ـــــــــــــــــــــــ ــــــــــــــــــــــ ـــــــــــــــــــــ 31 _ هل تعتقد أن الإدارة حيادية في تعاملها مع كل الأفكار أم أن هناك تحيز لفكر معين من وجهة نظرك ؟ اى اداره بتلتزم بالحياديه الايجابيه مش السلبيه ,,, يعنى لو فرضنا مثلا ان حد جاى بيقول اللعنه على الجميع ويلا نعمل حرب اهليه هل هنا حيكون فى حياديه ,, او يا سيدى لو حد شيعى جه وكتب عن المذهب بتاعه ياترى انت نفسك حتطالبنا بالحياديه ,,, حنروح بعيد ليه ,, فاكر فكرة القسم المسيحى اغلبية اعضاء المنتدى محبوش ان المنتدى يكون حيادى بين ديانات المصريين اللى محدش ينكر انها الاسلام والمسيحيه وفضلوا الانحياز لدين واحد على حساب التانى فالحياديه مش معناها انى اسيبك تقول كل اللى انت عاوزه بدون رقابه ,,او انى اكون سلبى تجاه التطرف او التشدد ـــــــــــــــــــــــ ــــــــــــــــــــــ ـــــــــــــــــــــ 32_ كلمة أخيرة للأعضاء ؟ كل سنه وانتم طيبين بمناسبة السنه الميلاديه الجديده ,, واوعى حد يقولكم ان الاحتفال بيها حرام ,, لانك كمسلم مأمور بالايمان بكل الانبياء وثابت علميا وتاريخيا ان فى اليوم دا كان ميلاد السيد المسيح عيسى ابن مريم عليه السلام ودى مناسبه فى حد ذاتها تستحق منا الاحتفال ,,, ولو مش حتحتفل يبقى متصدقشى ان غيرك بيرتكب حرام ـــــــــــــــــــــــ ــــــــــــــــــــــ ـــــــــــــــــــــ 33_ آخر سؤال وهو عبارة عن دعابة ... متى سنراك عضوا في جماعة الإخوان أم أن الأمر مستحيل ههههه ؟ نكرر سؤالنا للدعابة لو لقيتك قادر تنتقد الاخوان علنى كدا ,, ساعتها ححس ان الجماعه دى بتحترم الرأى والرأى الآخر ومش حيضرنى ولا حيضر غيرى انه ينضم ليها ,,, انما صدقنى هم اساسا مش حيقبلونى , , لانهم مش عايزين وجع دماغ ,, هم عايزين السمع والطاعه ,, وانا سمعى وطاعتى لله وبعدين مش لما تبقى جماعه الاول , دا لحد دلوقتى مش معروف ليها توصيف قانونى يا عم , , يعنى انت دلوقتى منتمى لجماعه غير قانونيه ههههههههههه (( اجابتنا للدعابه )) إذا نقد الإخوان حيخليك إخوان طيب إسمع الجماعة دي جماعة مصالح هههههه برضو دعابة ... بستناك في المقطم بقى ـــــــــــــــــــــــ ــــــــــــــــــــــ ـــــــــــــــــــــ أشكرك يا أخ سيد من كل قلبي لحضورك وتشريفك حلقتنا والحمد لله أنك عبرت عن وجهة نظرك التي أختلف معها دوما ً بكل حيادية وتقبل ... جزاكـ االله كل الخير خالد ـــــــــــــــــــــــ ــــــــــــــــــــــ ـــــــــــــــــــــ

[واد حبيب]

ايه يا عم كله دي حلقه بقالي ساعه و4 دقايق بشوف فيها
حلوه اوي الحلقه يا خالد
اجابه سيد كلها تمام
بس انا عوز كله يعمل لصلح مصر مش يعمل لصلح جماعات او احزاب
تقبلو تحياتي
الحبيب

[المستبده]

اروع حوار شهدته

بصراحه انا متفقه مع اخي قلم بلا حبر فيما كل ماقاله

اعجبتني صراحته وقوه ااججاباته على الحوار

تبين ثقافته العاليه

ارفع لك قبعتي اخي وبكل اعتزاز اقول بارك الله فيك

اخي خالد

دائمما رائع في اختياراتك

لكم مني كل الود والاحترام

[احساسى صحيح]

الحوار كان جيداََ جدا
وكانت اجابات اخونا السيد ممتازة فى معظمها
بس فى حاجة حابب اقولها لاخونا السيد
يا ريت صدرة يتسع لها
انا اعلم القدر الكبير والمساحة التى اعطاها
لك الدكتور طارق بحكم صداقتكم وتقاربكم الفكرى
دة فى حد ذاتة مش عيب ابداََ بالعكس اراة ميزة كبيرة
ولكن للاسف دائما اراك تمارس البلطجة الادبية
ودائما ألفاظك حادة جدا وتتعدى دائما حدود الردود العادية
زى ما قال لك اخونا خالد فى موضوع رسالة المرشد
انتا فى هذا الموضوع بالذات مارست ابشع انواع القهر الفكرى
وجعلت من نفسك بطلاََ قومياََ عندما تابعت اغلاقك الموضوع
بعدة اسطر رنانة ولم تعطى لة الفرصة للرد
ثم بعدها من حقك تغلق الموضوع كما تشاء
للاسف موضوعك الاخير فى قسم قلم الاعضاء
عصابات واحزاب لم يكن على المستوى
لأنى رأيت فية تغطية على خطأ ارتكب من الادارة وانت اتيت للتغطية علية
لأنك كما رأيت معظم الاعضاء ما زالت متأثرة بية
امنية شخصية منى لك .. يا ريت تتخلى عن اسلوب البطولة والتهجم على اراء
اى شخص معارض لمجرد فرض رأيك .. فأذا اردت ان نقبل أرائك فعليك تقبل اراء الاخرين
اسف اذا خرجت عن الموضوع بس انا تعودت انى اقول رأيى حتى لو كان قاسى حتى يستفيد منة الجميع
واتمنى ان يكون اللقاء دة بداية صفحة جديدة فعلا وتغير جزرى وليس شكلى
تقديرى للاستضافة المثمرة من الاخ خالد
كانت اسئلتة سلسة ومنمقة وف الصميم
وكذلك اجابات اخونا سيد مع اعتراضى وتحفظى على بعضها
مسائكم سعيد
موفقين

[عاشقة ذكر الله]

الحوااار طويل جدا فوت شويا فى الأول
وبعدين جبته كله من الآخر ههههه
بجد حوار رائع بين شخصيتين محترمين,,
اجابات الأستاذ سيد عقلانيه وتحترم على الرغم من اختلافى معها
ولكن أكيد فيها نقاط متفقه فيها,
جزاكم الله كل خير,,,
وان شاء الله البلد يتصلح حالها قريبا.

[السفينة]

حلقة جميلة جدا اخ خالد

كان المحاور والمجيب رائعين بكل ما للكلمة من معنى

اجدت اخي قلم بلا حبر الاجابة التي تنم عن شخصية واعية مثقفة

بوركت اخي وسدد الله خطاك

اخ خالد الف شكر لك على الدعوة ومشكور جدا على امتاعنا بهذا الحوار الشيق

تحيتي ومودتي

[قلم بلا حبر]

اقتباس المشاركة الأصلية كتبت بواسطة واد حبيب ايه يا عم كله دي حلقه بقالي ساعه و4 دقايق بشوف فيها حلوه اوي الحلقه يا خالد اجابه سيد كلها تمام بس انا عوز كله يعمل لصلح مصر مش يعمل لصلح جماعات او احزاب تقبلو تحياتي الحبيب

يعنى انت تعبت من القراءه ,, اومال اللى كان بيجاوب بقى يعمل ايه

دول 33 سؤال نفس عدد حبات السبحه ههههههههههه

نورت يا ابو رمضان والله يكرمك على تقديرك يا عم

بالتوفيق

[قلم بلا حبر]

اقتباس المشاركة الأصلية كتبت بواسطة المستبده اروع حوار شهدته بصراحه انا متفقه مع اخي قلم بلا حبر فيما كل ماقاله اعجبتني صراحته وقوه ااججاباته على الحوار تبين ثقافته العاليه ارفع لك قبعتي اخي وبكل اعتزاز اقول بارك الله فيك اخي خالد دائمما رائع في اختياراتك لكم مني كل الود والاحترام

بشكرك طبعا على تقديرك الجميل دا

ونورتى الحوار وان شاء الله اكون عند حسن الظن دا

بالتوفيق

[حنـــــون]

الله الله الله
اقول ايه بس مافيش كلام اقوله بعد كلامك
بتفق معاك جدا فى كل الى قولته
اداره بئه ومتفقين على كدا
حوار اكثر من رائع بحيك يااسيد جدا
وشكرا ياخالد ع الاستضافه دى والله كنت مستنيها
تعبتولى عيونى جداااااااا بس قريت كل كلمه
مصر بخير والله
تحيااااااااتى

[تناهيد الهوي]

لكم مني كل الود والاحترام