مالي و أنا مالي !

[SiLver Spectra]

دي كانت صور لمظاهرات يوم الجمعة 18 يناير أمام السفارة الفرنسية في القاهرة
اعتراضا على التدخل العسكري في دولة (مالي)

قبل ما تجرفكم العاطفة و تلغي تفكيرك فأنا هكلمكم في الموضوع هنا بمنطلق اني من الاشخاص الي بيتابعوا السياسة الدولية أول بأول
و أزمة مالي تابعتها من أول ما بدأ التمرد المسلح ينتشر في الشمال و انتهاء بالانقلاب العسكري على السلطة

للأسف ناس كتير مش بتابع الأحداث من البداية
و بالتالي مش بيكون عنده نظرة تحليلية , مجرد ناس تقوله الحق فرنسا بتضرب المسلمين فبيقوم نازل مظاهرات

أنا هحاول من خلال الموضوع إني أعرفك الأول مين هي دولة مالي و بعدها أعرفكم الأحداث الي حصلت بشكل متتابع ((و تقدر تبحث و تطلع على المعلومات لو حابب تتأكد بنفسك))

:::::::

خلونا الأول نبدأ بداية غريبة شوية
نبدأها بفريدوم هاوس !
أكيد انتوا سمعتوا الاسم دا أيام نظريات المؤامرة و التمويل الأجنبي
على الأقل سمعتها من توفيق عكاشة

فريدوم هاوس هي احدى منظمات المجتمع المدني الي ليها مكاتب في أغلب دول العالم وظيفتها انها توثق المعلومات الخاصة بالحرية في كل دولة و على اساسها بتعمل تقريرها السنوي عن كل دولة و بتعملهم تصنيف ما بين :
دولة غير حرة
دولة شبه حرة
دولة حرة
و التصنيف بيتحدد بدرجة من 7
7 من 7 هي اسوء درجة في الحرية
و 1 من 7 هي اعلى درجة في الحرية

((من 7 إلى 5)) بتكون دولة غير حرة
((من 5 إلى 2.5 )) بتكون دولة شبه حرة
((من 2 إلى 1)) بتكون دولة حرة

التقييم بيكون مبني على عدة عوامل أهمها نزاهة الانتخابات و مشاكل الاقليات و حرية التعبد و حرية الاعلام و عدم وجود قيود فكرية و خلافها من الأمور
و التركيز بيكون على النظام السياسي مش المجتمع نفسه
يعني هل النظام السياسي بيضيق على الحريات و الاعلام ؟
و ايضا مدى رضى الشعب عن الحرية الي بيمنحها النظام

إلي خلاني مؤخرا أدخل على الموقع الرسمي ليهم و ابحث عن خريطة تصنيفهم الدولية السنوية هو نزول خبر مؤخرا
بإن فريدوم هاوس ترفع درجة مصر و ليبيا إلى اللون الأصفر من دولة غير حرة لدولة شبه حرة في تحديثهم السنوي
و انا شخصيا بتعبجني دائما تحليلاتهم في موضوعيتها و حياديتها و دقتها بالنسبة للنشاط الغربيين بصفة عامة

هوريكم الخريطة الأول لسنة 2010 و الي كانت بتقيم الحريات في العالم لسنة 2009



لاحظ الوطن العربي أو زي ما بيسموه عالميا (الشرق الأوسط و شمال أفريقيا)
هتلاقي أغلب الدول العربية يكسوها اللون البنفسجي ( دول غير حرة)
باستثناء 3 دول عربية
****************** و لبنان و المغرب (باللون الأصفر) كدول شبه حرة
و اسرائيل وحيدة باللون الأخضر كدولة حرة

الخريطة في التحديث الأخير كانت كدا




بعد ثورات الربيع العربي زادت عليهم (تونس و مصر و ليبيا)
كدول شبه حرة

ترتيب الدول العربية حسب المنظمة من الاسوء فالافضل من حيث الحرية و الديمقراطية كالتالي

السعودية و سوريا هما الأسوء ب7 من 7

ثم كانت
الامارات و اليمن و ايران و العراق ب6 من 7

ثم كانت قطر و عمان و الجزائر و الاردن ب5 و نصف درجة

و دل كلهم مصنفين كدول غير حرة

ثم الدول الشبه حرة و كانت
مصر و ****************** ب5 درجات

ثم ليبيا و لبنان و المغرب ب4 درجات و نصف

و اخيرا افضل الدول العربية حسب التصنيف كانت تونس ب3 درجات و نصف

و الدولة الوحيدة المصنفه حرة باللون الأخضر هي اسرائيل بدرجة و نصف

ممكن تسأل نفسك ليه احنا اتأخرنا عشان تصنيفنا يعلى ببساطة لأنك لسه عامل الانتخابات من كام شهر بس
طيب و ليبيا ليه تصنيفها احسن من مصر , من الاسباب هو هدوء الاحتجاجات هناك و حالة الرضا العام الي مفقوده في الشارع المصري خلافا على الانتخابات اللي بتكون في مصر فيها شوية تجاوزات و بتقرها اللجنة نفسها و ايضا جو التشرذم الي بيحصل وقتها

ممكن تسأل كمان و تقول ليه اسرائيل متقدمه ,,لان هما عندهم ديمقراطية نزيه منذ قيام دولتهم , حتى في الانتخابات الاخيرة الي قاطعها العرب الاسرائيليين فاز فيها العرب ب19 مقعد من 120 في الكنيست
العرب دول مسلمين
غير ان وسائل الاعلام العربية بتشتغل في اسرائيل رغم عداوتها ليها
زي الجزيرة و العربية و خلافه من القنوات
و دا مش بتلاقيه في الدول العربية ( تخيل ان مراسل القناة الثانية الاسرائيلية ماشي في شوارع القاهرة ,,دا هياكل ضرب )
فدي كلها امور بتخليهم يحطوا تصنيف اسرائيل أعلى و من ضمن الدول الاكثر نزاهة في الانتخابات

طولت أنا و لسه مش دخلت في مالي
انت ممكن تفحص و تشوف باقي الدول , هتلاقي اوروبا بيكسوها اللون الاخضر ما بين 1 و 1 و نصف درجة
و كذلك اغلب دول قارتي امريكا

دا الموقع

http://www.freedomhouse.org

نرجع لموضوعنا
ايه علاقة دا بمالي ؟
هقولك يا سيدي
و أنا بلقي نظرة كدا على الوان الدول حسب التصنيف لفت نظري دولة مالي باللون الأخضر في 2010 !




هي مالي كانت دولة ديمقراطية !

و في التصنيف الأخير تحولت لدولة غير حرة




طب ايه الي حولها كدا فجأة !!؟

تعالوا نعرف الأول شوية تفاصيل عنها قبل ما نجاوب على السؤال و نتكلم عن أزمتها

للاسف من كام يوم كنت سامع مذيع الحياة بيتكلم و بيقول مالي دولة صغيره ! كالعادة مهنية ضعيفه من الاعلام المصري

مالي دولة مساحتها مليون و ربع مليون كيلو متر و مربع تقريبا (( اكبر من مصر بربع مليون كيلو متر مربع))

مالي دولة مسلمة
بيشكل فيها المسلمين 90% من تركيبة السكان



عدد سكانها 14 مليون و نصف
و ميزانيتها ضعيفة كحال اغلب دول افريقيا

طبيعتها الجغرافية (نص صحرا و نص استوائي)
و الصورة دي هتوضح أكثر




هي دولة حبيسة ( لا تطل على البحر)

عاصمتها (باماكو) و تقطع جنوب غرب البلاد
((النقطة الصفرة على الخريطة))




نتكلم عن التاريخ السياسي بشكل مختصر
مالي كحال أغلب دول شمال و غرب افريقيا كانت من ضمن المستعمرات الفرنسية باسم (السودان الفرنسية) الي كانت كمان بتضم السنغال
و في سنة 1960 حصلت على استقلالها و بعدها بفترة انفصلت الدولتين (مالي و السنغال)

و كأغلب دول افريقيا , كانت الدولة بتحكم بشكل عسكري ديكتاتوري بياخد السلطة بانقلاب,, إلى أن ينقلب عليه قائد عسكري جديد و هكذا ,,
و في عام 1991
انقلب شخص عسكري يدعى ( حامادو توماني توري) على الحاكم الديكتاتوري (موسى تراوري) و أطاح به
و في لافته طيبه قرر العسكري الجديد و الي كان قائد فرقة المظليين في الجيش , تسليم السلطة لرئيس مدني منتخب في العام التالي
و بالفعل في عام 1992 تم تنظيم أول انتخابات ديمقراطية نزيهة في البلاد و لم يهتم (حامادو ) أو (أمادو بالانجليزية ) بالعمل السياسي و تفرغ في الاهتمام بمنظمات المجتمع المدني و خلافه
و استلم الحكم شخص آخر
و في عام 2002 استقال حامادو من الجيش و انضم للحياة المدنية و رشح نفسه لانتخابات و فاز فيها

(حامادو توري)

كان بيشكل رمز ثوري محترم في البلاد
و هو شخص مسلم و كفاية صورته






و اثناء الثورة الليبية تسربت الاسلحة للمتمردين في شمال مالي الي بيطلق عليهم قبائل الطوارق
مما صعب المهمة على الجيش المالي في مواجهة تلك الجماعات بعد أن اصبح تسليحها مقارب للجيش المالي المتواضع

و قبائل الطوارق دخل معاها تنظيم القاعدة و الجماعات بقى الي بتسمي نفسها باسماء زي التوحيد و الجهاد و نصرة الدين و حط الي نفسك فيه من الاسماء

الرئيس المالي (حامادو) كان من المفترض ان تنتهي ولايته في 2012 و كان مقرر عدم ترشحه مره ثانية

بدا الجيش المالي يشتكي من الرئيس و طلب تسليح اكبر لمواجهة التمرد في الشمال و هدد مؤسسة الرئاسة , و طبعا نتيجة الظروف الاقتصادية الضعيفة للدولة كان من الصعب تسليح الجيش بشكل قوي لمواجهة التمرد الي كان بيتسلح بشكل كويس من الاسلحة المسربة من ليبيا

ومن هنا حصلت الأزمة بالتحديد في 21 مارس 2012
قام عدد من افراد الجيش بمحاصرة القصر الرئاسي و مبنى التلفزيون و اماكن حيوية اخرى و اعلن خبر الاطاحة ب(حامادو) و تعطيل الدستور مؤقتا لحين انتخاب رئيس جديد مستقبلا و فرضوا حظر للتجوال في المدينة

الاضطراب السياسي زاد الوضع سوء في شمال البلاد و أدى لسيطرة المسلحين على كامل الجزء الشمالي في البلاد (الصحراوي)
و اعلانهم بقيام دولة اسلامية فيها

و كانت المفاجئة لاصحاب الانقلاب و هي ان الدول الغربية الي بتقدم مساعدات لمالي هددت مالي بقطع المساعدات عنها بعد القيام بالانقلاب
و طلبت اعادة العمل بالدستور و اعادة الرئيس و عمل انتخابات نزيهة

دي بعض الردود الدولية




أما بالنسبة للجزء الشمالي الي سيطرت عليه الجماعات المسلحة فطبعا زي ما انتوا عارفين تنظيم القاعدة لما يحب يعمل دولة بفكره الهدام
قاعدوا يهدوا شوية اضرحة و يعملوا قوانين , لكن مافيش اي بناء
زي افغانستان بالظبط
افغانستان كانت دولة تابعة للاتحاد السوفيتي
و بدات الجماعات المسلحة تحارب السوفيت فيها , و كانت الولايات المتحدة بتدعهم في سياق الحرب الباردة الي كانت بين السوفيت و الامريكان
و بعد انهاير الاتحاد السوفيتي لظروف اقتصادية و انفصال افغانستان , بدات الجماعات المسلحة الاسلامية تضرب في بعضها و تصفي في بعض , كل جماعة عايزه هي الي تحكم لغايه ما كانت الغلبة في النهاية لطالبان
وقتها العالم الغربي قالك احنا مالنا هما احرار
بدأوا يعملوا الدولة بتاعتهم , طبعا بفكر هدام , شوية تماثيل بوذا يفجروها (الي بتمثل تاريخ و حضارة البلد)
يمنعوا الاعلام و مافيش حاجه اسمها اذاعة و تلفزيون, البنت ماتروحش مدرسة و خلافه من الامور
ماكانتش دولة يعني بمصطلح الدولة العصرية

بدأوا بعد كدا يعملوا تنظيم القاعدة لتنفيذ عمليات في دول اخرى
برضو الغرب قالك احنا مالنا طالما ماجاش عندنا

فحصلت احداث سبتمبرالشهيرة في امريكا و ما تبعها
فهنا الدول الغربية تعلمت الدرس في انها ما تسيبش تنظيمات مسلحة بفكر جهادي يكونوا دولة
لان النتيجة هتكون في فتح مراكز تدريب و التخطيط لتنفيذ عمليات في دول اخرى و خلافه
و دي هي فكرة الوجود الغربي في افغانستان و هي لتشتيت الجماعات المسلحة و اضعافها مش اكتر
لا اعمار افغانستان و لا اي بتنجان , عايز تعمرها الشعب الي المفروض يعمرها

نرجع لمالي تاني
مؤخرا , بدات الجماعات المسلحة في مهاجمة مدن الجنوب
و هنا بدات فرنسا تتحرك باعتبارها المسؤولة دوليا عن غرب افريقيا لاعتبارات تاريخية
فبدات تنفذ عمليات الي مازالت مسترة في شمال مالي لاضعاف الحركات المسلحة في الشمال

هما الفرنسيين و الغرب عموما عندهم قناعة بان الناس دي لو سابوهم يكونوا دولة , هيبداوا يصدروا تنظيماتهم المسلحة بعد فترة للدول المجاورة و قد تصل إليهم
و دا ملحوظ في الجزائر الي بتعاني في حدودها مع مالي من التنظيمات دي

الدول دي فقيرة جدا , مافيش مصالح اقتصادية


عرفتوا بقى قصة مالي ؟
بيؤسفني دايما لما اشوف حد بيدافع بشكل اعمى من غير ما يفهم ايه القصة
حامادو الي الغرب كان بيدافع عنه دا مسلم

مؤخرا مرسي قال تصريحات عن مالي و رفض التدخل فيها
ممكن وجهة نظره ان الافضل هو عمل حوار
بس الكلام سهل و التطبيق صعب
و الا كان الحوار تم بين مرسي مع جماعته و جبهة الانقاذ و المعارضة

و اظن لو حصل هنا في مصر و جماعات مسلحة بدات تحارب الجيش ,,ماحدش هيبقى راضي و ساعتها كلنا هنقف ضد التنظيمات دي حتى لو كانت بتسمي نفسها باسماء اسلامية

أظن ان تصريحات مرسي هدفها كسب الاسلاميين الي في الغالب بيتعاطفوا مع اي حد شايل الرايه حتى لو كان ظالم
و اظن انه كان غير موفق بدليل الهجوم من الصحافة الفرنسية عليه بعد خطابه
و كمان الزيارة الي هيعملها لفرنسا يوم الجمعة الي جايه ان ماكانتش هتتأجل
يا راجل دا احنا بنشحت من الاتحاد الاوروبي !
و رئيسة صندوق النقد الدولي فرنسية ,,يلا يا عم
بس هما في فرنسا عاقلين شوية مش زي الامريكان كانوا سلخونا هههه

و معلش عالإطالة
و ربنا يهدي حال مصر ,,

[booody99]

أولا بشكرك يا طارق على الموضوع المهم

وبلا شك تعبت فيه وكلام بالوثائق ولكن

الصورة بتاعت الردود كانت كلها اعتراضاً على انقلاب الجيش مش الشمال

بالمقارنة بما حصل في جنوب السوادن وانفصالهم وإقامة دولة مسيحية الديانة

هتقولي طائفي أو غيره أنا بتكلم بجد طب ليه وافقوا لجنوب السودان والمتمردين بالأنفصال؟؟

شمال مالي به زي ما بتقول متمردين طيب قبلها بأسبوع فرنسا دخلت أفريقيا الوسطى لكن لحفظ السلام بس مش لحرب

نيجيريا جماعة بوكو حرام ليه فرنسا مش راحت حربتها ليه مسلمي شمال مالي

والمره دي واضح جداً إنها حرب ضد المسلمين حتى لو متشددين

واعتقد إنك شوفت تصريح ضاحي خلفان ممثلاً الإمارات

وتصريحه بإن جميع تكاليف الحملة الفرنسية البريطانية الحربية على مالي تكفلها الإمارات

وبكل غباء يقول ونحن ضد أي أحد يمس أمن إسرائيل ^_^ طب مالي وإسرائيل يا عم خلفان

مالي دولة مسلمة فقيرة نعم ولكن قد تكون تسرعت فرنسا بدخولها

وبكرر عليك السؤال مرة ثانية

لماذا لما يقف الإتحاد الأوربي مع السوادن لما تمرد أهل الجنوب ورضوا بالإنفصال ؟؟

ويقف ضد شمال مالي لما أراد أهل الشمال تطبيق الشريعة أو الأنفصال ؟؟

شكراً لك على مجهودك

[Mo chahin]

بسم الله الرحمن الرحيم ..

وفقت جدا يا طارق فى سرد موضوعك ,,

ووالله حتى ان كنت اطلت اكتر كنت هتابع للنهايه ,,

لأنه موضوع استثنائى جدا ,,

وفيه جديد مكناش نعرفه ,,

وبمناسبه اننا مش متابعين الاوضاع السياسيه الدوليه .. عندك حق جدا ,,

انا شخصيا اول مرة اعرف الاوضاع بين مالى وفرنسا ,,

دا غير اللى بيحصل على الحدود الجزائريه ,,

دا بجانب موضوع الحكم فى مالى وطريقه تغيير الرئيس او الحاكم ,,

واستغربت جدا من بعض النقاط اللى سردتها فى موضوعك ,,

ازاى يكون ناس بتفكر كده لسه .. مع العلم اننا فى عصر متفتح ؟؟

ياللا ..

اتمنى اننا فعلا نشوف كل المواضيع من جميع جوانبها ,,

عشان حتى لو اخدنا قرارات .. ناخدها صح وعن علم .. مش عن جهل ,,

فا نصبح فى الاخر غلطانين فى كل حاجه ,,

ربنا يهدي الحال ديما يا طارق ,,

ويصلح مصرنا ويهدى بال شعبنا ,,

وموضوع رئيسه الصندوق الدولى دا جديد عليا يا طارق ,,

ربنا يستر بقى وميعملناش مالبحر طحينه .. اهى كل حاجه واضحه زى الشمس ,,

وفقت جدا يا طارق ,,

[ساحر الأحزان]

مالى وانا مالى

لا عنوان جميل يا دكتور

مهو التنظيمات دى لما تنساب حتتصدر علينا هنا وعلى جيرانا ’زى ما حصل فى السودان كدة والصومال الى لحد دلوقتى ,,

مش قادرة تقف على رجليها من الحركات دى الى خربتها وكان الشعب ضحيتها’’لان كلنا فى خندق واحد

يبقى حتلاقى الفقر والتفكك زاد زيادة كمان عن دلوقتى ’

تقرير جميل منك عن معدل مستوى الحريات وكويس اننا فى مصر دلوقتى شبة حرة وأن شاء الله نتعلم والامور تهدى

وتبقى حرية كاملة,,

موضوع جميل منك كما عودتنا بتعمقك السياسى الهادف

تحياتى

[SiLver Spectra]

اقتباس المشاركة الأصلية كتبت بواسطة booody99 أولا بشكرك يا طارق على الموضوع المهم وبلا شك تعبت فيه وكلام بالوثائق ولكن الصورة بتاعت الردود كانت كلها اعتراضاً على انقلاب الجيش مش الشمال بالمقارنة بما حصل في جنوب السوادن وانفصالهم وإقامة دولة مسيحية الديانة هتقولي طائفي أو غيره أنا بتكلم بجد طب ليه وافقوا لجنوب السودان والمتمردين بالأنفصال؟؟ شمال مالي به زي ما بتقول متمردين طيب قبلها بأسبوع فرنسا دخلت أفريقيا الوسطى لكن لحفظ السلام بس مش لحرب نيجيريا جماعة بوكو حرام ليه فرنسا مش راحت حربتها ليه مسلمي شمال مالي والمره دي واضح جداً إنها حرب ضد المسلمين حتى لو متشددين واعتقد إنك شوفت تصريح ضاحي خلفان ممثلاً الإمارات وتصريحه بإن جميع تكاليف الحملة الفرنسية البريطانية الحربية على مالي تكفلها الإمارات وبكل غباء يقول ونحن ضد أي أحد يمس أمن إسرائيل ^_^ طب مالي وإسرائيل يا عم خلفان مالي دولة مسلمة فقيرة نعم ولكن قد تكون تسرعت فرنسا بدخولها وبكرر عليك السؤال مرة ثانية لماذا لما يقف الإتحاد الأوربي مع السوادن لما تمرد أهل الجنوب ورضوا بالإنفصال ؟؟ ويقف ضد شمال مالي لما أراد أهل الشمال تطبيق الشريعة أو الأنفصال ؟؟ شكراً لك على مجهودك

انت مش واخد بالك ان مالي 90% منهم مسلمين
يعني الطوارق الي بيعملوه هو انهم بيقتلوا جيش مالي المسلم !
يبقى حسب النظرية بتاعتك دول مش مسلمين لان المسلم مايقتلش اخوه المسلم

فرنسا بتساند الجيش المالي
و بمناسبة الردود الدولية فانا عارف انها كانت ضد الانقلاب
و العسكر الي عملو الانقلاب كانوا بيعتمدوا على ان الغرب هيساندهم ضد المسلحين في الشمال

جنوب السودان له قصة تانيه
لان جنوب السودان عاش في حروب من وقت ما تم اعلان استقلاله
فكانت الدولة ماشية بنظامين و بحكومتين مركزيتين مش بحكومة واحده
حكومة الخرطوم و حكومة جوبا
و دا له جيشه و دا له جيشه
و حاربوا بعض سنين كتير , المجتمع الدولي حاول يوفق بينهم بس كان واضح ان ماينفعش يستمروا في بلد واحده خاصة مع اختلاف الثقافة و الدين و اللغة في الجنوب

فحب عمر البشير يكسب رضى الغرب و اقر بعمل استفتاء و الشعب صوت بنسبة تفوق ال95 بالانفصال

اما بالنسبة لشعب مالي في الشمال , انت مين قالك ان هما راضيين بالحكم الجديد !
دول تنظيمات مسلحة و جت فرضت عليهم الحكم
و انا شخصيا شوفت تقارير كتير لناس بتشتكي منهم و يقولك عايزي نرجع الدولة تاني زي ما كانت

بالنظرية بتاعتك فكدا اي جماعة ملثمة بشوية عربيات مسلحة تيجي تحتل سينا و يقولك يلاا هننفصل !
ساعتها الجيش هيجي يديهم على نفوخهم

لكن جنوب السودان كان ليهم اصلا حكومة مستقلة

كل دولة ليها ظروفها
هما بيحاربوا الفكر الهدام مش هقولك لأ
بس لو بالنظرية بتاعتك انهم بيحاربوا المسلمين
امال بيدوا مصر مساعدات ليه !!
على كدا مرسي عميل او مش مسلم هههههه

[حنـــــون]

شكرا ع الموضوع ياطارق
وفقت جدا فى سرد الموضوع
حقا استفدت ^^

[booody99]

اقتباس المشاركة الأصلية كتبت بواسطة silver spectra انت مش واخد بالك ان مالي 90% منهم مسلمين يعني الطوارق الي بيعملوه هو انهم بيقتلوا جيش مالي المسلم ! يبقى حسب النظرية بتاعتك دول مش مسلمين لان المسلم مايقتلش اخوه المسلم فرنسا بتساند الجيش المالي و بمناسبة الردود الدولية فانا عارف انها كانت ضد الانقلاب و العسكر الي عملو الانقلاب كانوا بيعتمدوا على ان الغرب هيساندهم ضد المسلحين في الشمال جنوب السودان له قصة تانيه لان جنوب السودان عاش في حروب من وقت ما تم اعلان استقلاله فكانت الدولة ماشية بنظامين و بحكومتين مركزيتين مش بحكومة واحده حكومة الخرطوم و حكومة جوبا و دا له جيشه و دا له جيشه و حاربوا بعض سنين كتير , المجتمع الدولي حاول يوفق بينهم بس كان واضح ان ماينفعش يستمروا في بلد واحده خاصة مع اختلاف الثقافة و الدين و اللغة في الجنوب فحب عمر البشير يكسب رضى الغرب و اقر بعمل استفتاء و الشعب صوت بنسبة تفوق ال95 بالانفصال اما بالنسبة لشعب مالي في الشمال , انت مين قالك ان هما راضيين بالحكم الجديد ! دول تنظيمات مسلحة و جت فرضت عليهم الحكم و انا شخصيا شوفت تقارير كتير لناس بتشتكي منهم و يقولك عايزي نرجع الدولة تاني زي ما كانت بالنظرية بتاعتك فكدا اي جماعة ملثمة بشوية عربيات مسلحة تيجي تحتل سينا و يقولك يلاا هننفصل ! ساعتها الجيش هيجي يديهم على نفوخهم لكن جنوب السودان كان ليهم اصلا حكومة مستقلة كل دولة ليها ظروفها هما بيحاربوا الفكر الهدام مش هقولك لأ بس لو بالنظرية بتاعتك انهم بيحاربوا المسلمين امال بيدوا مصر مساعدات ليه !! على كدا مرسي عميل او مش مسلم هههههه

لا أنا مش برر موقف متمردين شمال مالي

ولكن أنا برفض التدخل العسكري الغربي

وزي ما انت عمال تقارن كل حاجة علينا

أنا طبعاً مش هوافق في يوم مهما حدث تدخل خارجي لمصر زي ما كان في ناس بتطلب

وإقليم دارفور الصومال لما دخلت أمريكا وطلعت منها على وشها

شوف أنا مش معاهم ومش ببرر ليهم ولكن بنرفض التدخل الخارجي عموماً

وهي لسرقة خيرات تلك البلاد والسباق عليها

[SiLver Spectra]

اقتباس المشاركة الأصلية كتبت بواسطة booody99 لا أنا مش برر موقف متمردين شمال مالي ولكن أنا برفض التدخل العسكري الغربي وزي ما انت عمال تقارن كل حاجة علينا أنا طبعاً مش هوافق في يوم مهما حدث تدخل خارجي لمصر زي ما كان في ناس بتطلب وإقليم دارفور الصومال لما دخلت أمريكا وطلعت منها على وشها شوف أنا مش معاهم ومش ببرر ليهم ولكن بنرفض التدخل الخارجي عموماً وهي لسرقة خيرات تلك البلاد والسباق عليها

مالي دولة فقيرة ,,و عايشه بمساعدات غربية اصلا زي افغانستان
ماعندهاش حاجه تتسرق ,زي البيترول كدا مثلا ,, بس هما مش حابين تنظيمات مسلحه تبدا بعد كدا تعمل معسكرات تدريب و غيره و تصدر جماعاتها لدول تانية


هما زي ما بقولك ماعندهمش مشاكل في التعامل مع الاسلام المعتدل زي تونس و مصر و خلافه من الدول
لكن الاسلام المتشدد الي بيكون هدفه تدمير المصالح الغربية و التفجيرات و غيره هتيعامل معاه ازاي اصلا !
و الشخص المتشدد لو فكر ازاي يبني بلده هيتحول لشخص معتدل
لانه هينحي الكراهية على جنب و هيبدا يحاول يستفيد من الغرب و بالتالي هيتعامل معاهم
فدا هيخليه يبعد عن العنف و هيتجه للسلم

منور ,,

[countess]

عارف افتكرت آغنية وردة الجزئريه

مالي وانا مالي بالأحزان وانا مالي ههههههه

لاء موضوع سياسي بحت فيه تعمق آوي لنظرة حال مصر وكمان الدول العربية

بتوفيقات >>>

[Mo chahin]

عارف يا بودى ..

المشكله ان تفكيرنا فى الموضوع دا منحصر على حاجه واحده بس ,,

ان الناس دى بتتمسكن لحد ما تتمكن وبعد كده بتفرض سيترطها واستيلاءها على البلاد ,,

مع ان فى منظمات دوليه بيكون شغلها الشاغل او هما بمعنى ادق .. هو الحفاظ على امن البلاد ,,

مع العلم ان الناس اللى فيها اساسا مش عارفين يحفظوا امنها ولا سلامها ,,