بصراحة مع كوين ميرو

[مِسكُ الشَهادة]

عشنا معا ً لنفس الوطن ... أهدافنا مشتركة وغاياتنا واحدة وإن تعددت أفكارنا وإن إختلفت دياناتنا لكن في النهاية يبقى هناك شيء يضمنا جميعا ً يرحل بنا نحو أمل ٍ يعيش بقلوبنا إنه الوفاء والإخلاص لوطن ٍ عاش فينا ما حيينا ضيفنا لهذة الحلقة من برنامج بصراحة أختا ًَ نختلف معها ولا نختلف ع أخلاقها الراقية وتميزها وحضورها الذي يُسعدنا جميعا ً إنها الأخت الغالية ( كوين ميرو ) أهلا ً وسهلا ً بك ِ أختي شرفنا جدا ً مرورك ننتقل بكم لمضمون الحوار... 1_ كيف تفسري لنا رؤويتك للمسلمين والدين الإسلامي؟ رؤيتى للاسلام كاديانه من اللى قريته غير للاسف تعامل كتير من الناس دلوقتى يعنى انا قريت كتير احاديث فيها محبه وتقبل ومعايشه وايات كمان فى القرأن الكريم بتحث على المعايشه وتقبل الاخر استاذ محمد محى قالى كلمه عجبتنى جدا ( مسلمين بدون اسلام ) وده بظبط اللى بحسه كتير اما رؤيتى للمسلمين فهم بشر وفيهم الكويس وفيهم اللى مش كويس 2_ سمعت ُ منك ِ يوما ً أن الأقباط مظلومين أتمنى أن توضحي لنا ما هي نقاط الظلم الواقعة عليهم بالتفصيل؟ الاقباط مظلومين علشان فى عصر مبارك كان الكارت اللى بيلهو بيه الشعب علشان يبعدوهم عن السياسه وياما شوفنا حوادث تشيب شعور الراس وياما قولنا لازم يكون فى قانون موحد لدور العباده علشان احنا فى بلد قانون ومينفعش نكون عايشين بالدراع مينفعش كنيسه تتبنى عافيه ومينفعش بردو تتقفل عافيه وكل واحد وشطرته بقى لو فى قانون هنبقى كلنا تحت القانون ده قامت ثوره وقولنا بس ده كله انتهى ونتفأجئ كل شئ زى ماهو هى هى المشاكل وهى هى طريقه التعامل الاقباط مظلومين علشان شوفنا جرايم كتير بترتكب ضدهم ويتعدو على صوابع الايد الواحده اللى اتحسبو على الجرايم دى عمرى ماهنسى سلسه الحوادث اللى حصلت فى اسكتدريه وفى الاخر يطلع الاعلام يقولنا ده مريض نفسى او مختل عقليا ولا هنسى الكشح واللى حصل فيه ولا كنيسه القديسين والماساه اللى حصلت فيها ولحد انهارده مش عارفين مين سببها ولا هنسى الكمونى اللى راح قدام كنيسه قتل شباب زى الورد بدون وجهه حق او سبب ولما تحكم عليه بالاعدام بعد سنتين تقريبا رغم ان القضيه كانت واضحه ومفيهاش كلام عايزين قانون رادع عايزين قانون يخلى اللى بيفكر يعمل فتنه سوء مسلم او مسيحى يفكر مليوووون مره من المسأله القانونيه الاقباط مظلومين علشان ولحد يومنا لما قبطى بيمسك منصب مهم او كبير بيكون حدث واكنه فضل مش حق انا نفسى يبقى الحكم بين انسان وانسان فى التعينات راجع للكفأفاه والقدرات مش ده جرجس ولا محمد الاقباط مظلومين علشان ولحد انهارده فى المدارس الحكوميه مدرس الدين الميسحى اى مدرس مسيحى فى المدرسه وسلام ولحد انهارده فى تلاميذ بتاخد حصه الدين فى المكتبه او فى مدخل المدرسه تخيل ومظلومين لما يكون فى عيد يناير يكون العيد 7 ينياير والامتحانات 8 يناير ويطلع بعدين الوزير بكرم اخلاقه يأجلها طيب ماهو من الاول المفروض مكنش يتحدد فى الميعاد ده مراعاه للاقباط ونيجى لعيد مايو العيد يوم 5 مايو والامتحانات يوم 7 مايو 3_ تذكري كما أذكر أيام الإحتجاجات والإشتباكات التي كانت تتم للأسف ما بين المسلمين والأقباط لأسباب أهمها هذة أسلمت وتم حبسها وغير ذلك برأيك ما الأسباب التي تؤدي لذلك؟ ببساطه غياااااااااب القانون لما انا اكون مدعى او مدعا عليه اللى هيحسم بينا القانون والقانون كان واخد اجازه 4_تصفين وضع الأقباط في مصر اليوم مظلومين وكان وضعهم إن لم يكن أشد في عهد مبارك كذلك فلماذا برأيك نرى هجوم من بعض الأقباط على مرسي أكثر من مبارك وهنا أخصص السؤال لرؤية الأقباط الخاصة من الأنظمة الحاكمة؟ بص يا استاذ خالد طبعا كلنا متفقين ان الاقباط كانو مظلومين جدا وكانو الحلقه الضعيفه ايام مبارك ومحدش ميسحى او مسلم بيختلف على ده هجوم الاقباط بقى حاليا او اعترضهم على الرئيس مرسى وانا اول المعترضين عليه بصراحه راجع لانه رئيس جاى بعد ثوره فى عصر مبارك المصرين فى العموم كان طلعان عينيهم وساكتين لكن بعد الثوره كل واحد اتعلم يطالب بحقه بقى فى نوعا ما صوت بيطلع ويقول انا حقي كذا وكذا والاقباط زيهم زى كل المصرين اتعلمو يطلع لهم صوت ويطلبو بحقوقهم من رئيس جاى بعد ثوره من رئيس المفروض ان سياسته عكس سياسه مبارك المخلوع ولكن اللى اصتدمنا بيه بقى نفسى السياسات للنظام اللى فات ونفس طريقه التعامل وده وصلنا لاخر حادثه وهى حادثه الكاتدرائيه اللى تعتبر رمز لكل الميسيحن الارذثوكس فى العالم كله 5_ الإخوان المسلمين لهم علاقة حميمة بعض الشيء مع الاقباط فقد كان نائب رئيس حزبهم قبطي ومن أشد أصدقاء الإمام البنا قبطي وآخر من زار البابا شنودة هو فضيلة المرشد فلماذا لم ينتخب الرئيس مرسي من الأقباط سوى أقل من 1 بالمئة ؟ وما رؤيتكم للإخوان المسلمين بكل صراحة؟ اسفه مقدرش اوصفها بالحميمه لاسباب كتير اولا المفكر القبطى رفيق حبيب اللى كان يشغل نائب رئيس حزب الحريه والعداله كلنا عارفين وواثقين انه كان ديكور سياسى لا اكتر ولا اقل واكبر دليل على استخدمهم الديكورات السياسيه اللى حصل فى عيد الميلاد المجيد عيد 7 يناير لما يكون على الموقع الرسى للاخوان المسلمين باللغه الانجليزيه تهنئه لكل ميسحين العالم وعلى الموقع باللغه العربيه تحريم المعايده على الاقباط فى اعيدهم ده بظبط اللى بيسمى ديكور سياسى الاخوان المسلمين فى نظرى خاصه وفى نظر الاقباط عموما جماعه انتهزيه وممكن تاثر على الناس بحكم الدين وهما ابعد مايكونو عن الدين 6_ نحن نختلف كديانة ولكن نقول الدين لله والوطن للجميع هل تعتقدي أن هذة العبارة تجد ممارسة فعلية على أرض الواقع أم أنها كلام على ورق ؟ للاسف مش مع كل الناس لان فى ناس بتزرع فى نفوس البسطاء والغلابه عكسها بظبط وبتخلق من الاخر عدو وياريته مثلا عدو شخصى لا بيكون عدو دينى وده اخطر انواع الاعداء طبعا لاى مواطن مصرى لاننا شعب متدين او بيدعى التدين 7_ هناك من يرى أن حرية العبادة ليس أن تبني بكل جانب مسجد كنيسة نظرا ً ربما للفارق االسكاني من وجهة نظر هؤلاء ..برأيك أين تكمن حرية العبادة إذا ًَ وهل يواجه الأقباط قمع على أساس ديني أم لا برأيك؟ يواجه الاقباط قمع على اساس دينى ده طبعا ااااااااكيد اما موضوع دور العباده حله بسيط جدا صدقنى بس النظام اللى فات كان بياجل القانون علشان يبقى ورقه يلعب بيها وقت ما يحب لكن نفسى اعرف سر تاجيله دلوقتى ايه !!!!!!! حل دور العباده بسيط وهو كا الاتى يتعمل احصاء رسمى بعدد الاقباط فى مصر وبناء عليه نبقى عارفين نسبه دور العباده اللى تتبنى ويكون فى قانون يضع شروط مقبوله لكل الطرفين لبناء دور العباده وانا مش هفرح لو بقى فى كل شارع كنيسه مش ده اللى هيسعدنى اللى هيسعدنى القى مكان اعرف اصلى فيه استاذ خالد اقرب موقف حصلى بسبب بناء الكنايس ده لسه الجمعه اللى فاتت روحت الكنيسه انا وولادى مكنتش لاقيه مكان اقف فيه اقف بس اقف واضطريت غصب عنى قبل ما القداس يخلص امشى ولانها الكنيسه ا الوحيده اللى بتخدم المنطقه اللى ساكنها فيها كانت زحمه بشكل مش طبيعى فى اللحظه دى حسيت احساس فظيع بانى حقى مهدور فى بلدى ارجع واقول لحضرتك انا كاميسحيه نفسى فى قانون موحد لبناء دور العباده مش بطلب طلب خرافى او صعب 8_الأنبا شنودة موقفه من زيارة إسرائيل معلوم للجميع موقف مشرف فهل أنت ِ مع هذا الموقف ولماذا ؟ وكيف تنظرين لمن يخالف ذلك ويزور إسرائيل ؟ انا معاه جداااا طبعا لانه موقف وطنى وضرورى واى حد بيخالف ده ويزور اسرئيل انا شايفاها بردو حريه شخصيه مقدرش احكم عليه او اقيمه 9_هل تعتقدي أن التشدد والتعصب في بعض رموز الدين الإسلامي فقط أم لا وبرأيك ما الأسباب التي تؤدي لذلك ؟ لا طبعا التعصب موجود فى الطرفين بس مع تفاوت النسب الاسباب كتير منها مثلا الجهل بالدين منها مثلا وجود زارعين الفتن والتعصب لاسباب سياسيه وده اللى بنعيشه فى مصر للاسف ومنها ويمكن اهمها بنسبه ليا هو غموض الاخر وعدم معرفتنا بيه 10_الإخوة السلفيين كيف تنظرون لهم ؟ هتكلم عن وجهه نظرى الشخصيه بمنتهى الصراحه متعصبين جدا جدا دايما اسمع عن الدين الاسلامى انه يسر مش عصر من رايى السلفين خلوه عصر 11_ برأيك ما القانون الذي يجب وضعه لمنع الفتنة الطائفية ؟ قانون رادع لاى معتدى على دين الاخر بعقوبات رادعه وقانون موحد لبناء دور العباده 12_هناك من يقول أن بعض الأديرة مليئة بالأسلحة وأن الأقباط دولة داخل دولة ودي وجهة نظر لأصحابها كيف تردي على ذلك ؟ ببساطه ايه اثبتكم لو مجرد كلام مرسل يبقى ده كلام بيحث على الفتن ولازم يتعاقبو لانها اتهامات مرسله ولو الكلام ده حقيقى ماهو فى كنايس كتير انضربت مشوفناش مسدس واحد طالع من كنيسه ليه مشوفناش ليه الكنايس دى بتدافع عن نفسها ولا مثلا شايلين الاسلحه دى يكور وحكايه اننا دوله داخل دوله نفسى افهمه يعنى لو واحد ميسحى قتل او سرق دلوقتى بيتسلم للكنيسه ولا بيتسلم للقضاء اكيد زيه زى اى مصرى للقضاء الكنيسه زيها زى الازهر جزء من الدوله وليست دوله 13_ بعضا ً من أقباط المهجر طالب بتدخل خارجي لرفع الظلم عن الأقباط كيف تفسرين هذا الأمر ؟ افسره ضعف وعدم حكمه البابا شنوده قال كلمه جميله جدا جدا وبتعكس راى الاقباط كلهم اللى عايشين فى مصر لو حمايه الاقباط هتيجى من الخارج فليمت الاقباط ولتحيا مصر 14_ الأنبا تواضرس هناك من يعترض عليه من الأقباط ووجهة نظرهم أنه لا يمتلك شخصية قوية كالبابا شنودة ويرون أنه لن يملئ مكان البابا شنودة أحد بعد اليوم ما تعليقك على ذلك وما مميزات البابا شنودة من وجهة نظرك ؟ انا شايفه ان الانبا توضروس اختيار ربنا وطالما ربنا اختاره يبقى هو الانسب وزى ماقولت قبل كده قبل البابا شنوده كان موجود البابا كيرلس وبعد نياحته شعب الكنيسه حزن وشاف انه مستحيل حد يملى مكانه بس كان اختيار ربنا للى بابا شنوده ويمكن البابا شنوده مقدرش يملى مكان البابا كيرلس لان محدش بيجى بدل حد لكن كمل اللى بدء بيها البابا كيرلس وده اللى حسيته من اختيار ربنا لبابا توضروس ربنا بيختار لكل وقت الراجل المناسب ليه مميزات البابا شنوده عايزه صفحات ومن سبيل المثل وليس الحصر كان راجل مثثقف بمعنى الكلمه وكان حكيم جدا ووطنى جدا جدا وكان عنده شخصيه قياديه قدر بيها يحتوى كل ابناء الكنيسه وابناء مصر كانت روحو خفيفه وفى عز الازمات كان عنده روح التعزيه وكان بيقدر يتحكم فى غضبه وحزنه حاجات كتير جداااااااااااااااا 15_ لا أنكر أن لدينا مشايخ لا يعلمون عن الدعوة سوى إسمها وهناك أقباط يشاطرونهم نفس الصفة أنت ِ كفتاة مصرية كيف تنظري لهذة الفئة من كلا الطرفين ؟ ضاعف نفوس واحيانا قاتله نفوس لانهم احيانا بيبثو سموم فى عقول الناس وقلوبهم باسم الدين 15_ هل من أمنياتك الشخصية أن يكون هناك رئيس قبطي لمصر بغض النظر عن الظلم والعدل أنا أتحدث كفتاة مصرية قبطية هل تتمنين ذلك أم لا ولماذا ؟ لو رئيس قبطى شايفه انه هيضيف لمصر ليه لا اااااااااااتمنى المهم يكون اضافه مش لمجرد انه رئيس قبطى بس 16_أنا كخالد من دعاة التعايش ولي أصدقاء أقباط في الواقع وأقرب صديق لي هنا كبرياء رجل وهو قبطي سؤالي :_ ما مفهوم التعايش من وجهة نظرك ؟ ومتى سيدرك المصريين أنه بجد الوطن للجميع والدين لله برأيك؟ مفهومى للتعايش كتبته فى خاطره قريب هنا فى المنتدى كتبت فيها اللى عيشته زمان مع جيرانا المسلمين من محبه وود وامتزاج وانا لحد يومنا ده ليا صديقه مسلمه من ايام الدراسه تقريبا كل عيد بتكون او المعيدين عليا امتى بقى ندرج مفهوم الوطن للجميع والدين لله دى فى علم الغيب بس محتاجين وقت ومجهوووووووود كبير 17_كيف كان موقفك كفتاة مصرية قبطية من الفيلم المسيء للرسول محمد ص الله ع وسلم وبرأيك ما الأسباب التي تدعو هؤلاء لفعل هذة الإمور وهل أنت ِ مع ردة الفعل بالعنف كما جرى من حرق لبعض السفارات التي تأوي هؤلاء أم هناك طرق كثيرة للرد ؟ انا كاميسيحه ضد العمل ده وبشده لانها مش من تعاليم الميسيحه ابدا بالعكس تماما وطبعا ضد رده الفعل العنيفه والحرق لانها بتشوه سمعه مصر والمصرين كان فى طرق كتير ممكن يترد بيها على الاهانه دى ومن راى كان هتكون اقوى وفعاله اكتر 18_ ما موقفك من الثورة السورية المباركة ؟ الثوره السوريه زى كل الثورات العربيه للاسف انحرفت عن مسارها انا مش مع بشار الاسد طبعا واللى بيعمله فى شعبه ولا مع الجيش الحر كمان الاتنين اهدفهم سياسيه بحته واللى بيدفع التمن الشعب السورى 19_في المنتدى هنا هل لأمست ِ نوعا ً ما عنصرية أو تعصب معين من أحد أم أن الجميع على مستوى واحد من المعاملة ؟ بصراحه المنتدى مفيهوش تعصب بالعكس انا اتعرضت لموقف هنا من سنتين تقريبا كان فى موضوع مسئ للميسحيه ولما عملت شكوى فى قسم الشكاوى اتمسح 20_ هناك من يرى من الأقباط ان الإخوان والسلفيين يكرهون المسيحيين وهناك من يرى من الإخوان والسلفيين أن الأقباط يكرهونهم فلماذا لا نركز على أن هناك أناس من كل الأطراف يتقربون لبعضهم البعض من أجل مصلحة مصر اولا ً واخيرا ً هل أنت ِ معي لذلك أم لا ؟ انا معاك جدا وبتمنى طبعا تسود روح المشاركه والتعايش لانها السبيل الوحيد للبناء بين كل اطياف الشعب مش بس بين اقباط واخوان او سلفين محتاجين روح المشاركه والتعايش جميعا 21_بعيدا ً عن تعاليم الدين لي ...تعلّمت في الإخوان مبدأ يقول أنت تختلف مع القبطي في قضايا الأديان ولكن محال أن تختلف على وطنيته وعلى مساهمته في بناء الوطن معك لذا فلا تنظر له سوى كمصري كما هو ينظر إليك سؤالي :_ لماذا يُفكر بعض الأقباط بالهجرة عن مصر سيقال لظلم النظام الحالي فلماذا لم نرى تلك الدعوات في عهد مبارك ؟ ولماذا نسافر وإن كنا مظلومين أليس الوطن أغلى ما نملك وإن جار علينا ؟ ثم إن هناك من يقول أن الظلم يقع على الجميع وهذة وجهة نظرهم وليس على الأقباط فحسب ما ردك ؟ انا رديت قبل كده على السؤال ده بس هجاوب على حضرتك السفر بقى اسهل دلوقتى لكتير من الاقباط بسبب فتح بعض البلدان باب الهجره بسبب الاضهاد الدينى وده بيخلى ناس كتير تدور على الامان برا بلدهم وطبعا انا مع حضرتك جدا ان الوطن غالى بس الظلم اللى بنتعرض ليه كاشعب مصرى فى العموم وميسحين فى الخصوص بيقتل جوا الناس روح الانتماء وزى ماقولت قبل كده انا مع حضرتك ان الشعب كله مهدوره حقوقه التعليميه والصحيه والاجتماعيه ولكن الميسيحن منفردين بقضيه الاضهاد الدينى وده سبب اضافى 22_هل أنت ِ مع سقوط النظام الحالي في مصر وما البديل برأيك وهنا أقصد بالبديل ليس مطالب كأن يكون حاكم عادل وووو أقصد أشخاص بأسماءهم تجدين أن هذة الصفات تنطبق عليهم من وجهة نظرك؟ انا مع سقوط النظام الحالى وانهارده قبل بكره كمان البديل رغم ان مع الاايام فقدت نسبه من اقتناعى بيه وهو حمدين صباحى او مثلا المحامى خالد على شاب ومشرعو الانتخابى بصراحه عجبنى ايام لما طرحه ايام الانتخابات الرئاسيه 23_ هناك من يتهم الإخوان بالنفاق لأن أحدهم قام بتهنئة الأقباط بأمر يخصهم باللغة الإنجليزية ولكن في المقابل هناك كثير من الأقباط يهنئون فضيلة المرشد في كل مناسبة تخص الجماعة سواء برسالة خطية أو بزيارة خاصة رغم معارضتهم الشديدة له فهل هذا نفاق أيضا ً أم يجب أن نعتبره بادرة حسن نية وإن كان هناك خلاف واسع ما بين الطرفين؟ لا الاتهام باالنفاق جيه لما موقع الاخوان هنئى الميسيحن فى العالم بعيد الميلاد المجيد باللغه الانجليزيه وعلى موقعهم بالعربى وفى نفس المناسبه حرمو المعايده على الاقباط اما المعايده فى العموم فى المناسبات الدينيه من الطرفين انا معاها جدا لانها بتنمى روح المعايشه 24_ تضعين صورة الراحل عبد الناصر صورة رمزية لك ِ ولكن هناك من يقول أن عهد عبد الناصر كان عهد الرجل الواحد يحكم البلد بالقبضة الحديدة لا معارضة ومن يعارض يعدم او يسجن بعيدا ً عن الإنجازات الإقتصادية والسياسية التي لها وضعها أنت ِ كإنسانة أولا ً وأخيرا ً ما موقفك من وجهة نظر هؤلاء ؟ وتعتقدين أن مرسي حاكم ظالم فهل لو عامل المعارضة بنفس الطريقة سيكون عادلا ً وقتها؟ اولا لكل رئيس عيوبه ومميزته مش هنقدر ننكر ولانخفى انجازات جمال عبد الناصر فى مصر وفى العالم العربى كله ومش بنحكم على اى رئيس فى موقف لا بنحكم عليه بالاجمال يعنى بالاجمال عبد الناصر كان اكفئ رئيس مسك مصر فى التاريخ الحديث انا طبعا ضد تكميم الافواه ويمكن ده ماخذ على سياسه جمال عبد الناصر اما عن الرئيس مرسى انا شايفه انه تقريبا بيطبق سياسه تكميم الافواه حاليا وده طبعا لمسناها من كميه القضايا المرفوعه ضد الاعلامين ومن القنوات الكتير اللى اتقفلت وكمان من خطاب التخوين اللى دايما بيتكلم بيه 25_ ما رأيك بالرئيس الراحل محمد أنور السادات ؟ طبعا مش هنسى دوره فى حرب اكتوبر واسترداد سينا بس للاسف الرئيس الراحل انور السادات لعب بالنار واول من اكلته النار هوا 26_ ما رأيك بنجيب ساويرس ؟ رجل اعمال ناجح محتاجين زيه كتير ياخد بايد اقتصاد مصر بس للاسف ملهوش حظ فى بلده 27_ كيف تعرفت ِ على منتديات بنات مصر؟ بالصدفه من جوجل 28_ ما هي نظرتك للترقيات الأخيرة من إداري ومراقبة وvip لعدد من الأعضاء الأفاضل ؟ بصراحه كانت اختيارات صاااااااااااائبه جدا 29_ كيف تنظري للخلافات التي تسود ما بين الأعضاء مع كل أسف ؟ للاسف انعدام روح المحبه 30_أقرب الأصدقاء لك ِ هنا ؟ مورشو وادهم ورودى 31_ رسالة منك ِ لـــــ :_ 1_ morshooo انت اعلامى ناجح يااحمد وشخصيآ انت طيب جدا واسفه على سوء الفهم اللى بينا 2_ دمعة حائرة انا محصلش بينى وبينها اى تعامل خاص بس لمست روح طيبه وخلوقه فيها 3_ كبرياء رجل هقوله طبعا كل سنه وحضرتك طيب وبالف خير 4_ عاشقة الهدوء محصلش بينى وبينها اى معامله خاصه بس اتمنى ليها السعاده 5_ إختاري أي عضو تودين أن تبعتي رسالة له ؟ اممممم هختار ادهم واقولو انت انسان طيب جدا وعارف ازاى تكون محبوب وبتعامل كل الناس بزوق ورقه بس عيبك الوحيد التسرع لما بتزعل بتتسرع فى تصرفك وده ممكن يزعل ناس كتير منك حاول تكون اهدى 32_ ما رأيك بنشاط المنتدى بشكل عام ؟ المنتدى فيه اقلام كتير جميله ومميزه بس للاسف الجو المشحون الموجود بيفقدنا لزه التمتع بالاقلام دى وخصوصا الخلافات لما بتقلب شخصيه 33_ نصيحة لأخوك ِ خالد ؟ اولا اتمنالك السعاده يارب النصيحه بقى : ليس كل شائع صحيح ولا كل صحيح شائع 34_ كلمة أخيرة للأعضاء ؟ الانسان بيموت وتفضل ذكراه حاولو تسيبو ذكره طيبه بعد سنين طويله هتكون دى كل اللى بتملوكها فى قلوب الناس والمحبه نحاول نحب بعض ونستحمل بعض علشان المنتدى هنا علشان نفيد بعض ونقضى وقت ممتع ومفيد ومش ساحه حرب وفرض سلطات اااااااشكرك جدا استاذ خالد على الاستضافه كانت اسئله صعبه جدا بس ممتعه تحياتى وشكرى الشكر لك ِ أختي الكريمة لشرف حضورك الذي أسعدنا ونسأل الله لك الخير والسعادة دمت بالف رضا وسلامة

[واد حبيب]

حلقه جميله منك يا خالد
وكوين ميرو منوره الحلقه طبعا
كل سنه وانتي طيبه يا كوين
عيد سعيد عليكي يارب

[نجم وزهره ومسافات فراق]

موفق أخي
موفقه أختي
توبيك جميل منكم


طبعا اخي خالد انت اكبر من كلامي عنك واكيد انت عارف ده
عن اختي الغاليه اوي عندي ميرو
لو اتكلمت كلامي هيكون كتير

ومع الاحترام لكل اخوتي هنا
وبرغم اختلاف ديانتي واخلاف ديانة ميرو
الا اني بعتبرها وبصدق اخت بمعنى الكلمه
حكيمه
هاديه
متزنه
صاحبة مبدأ
بتعرف تقدر المواقف كويس

حتى الدعابات بيننا عمرنا ما حسينا ولا هنحس بفوارق لان مفيش اصلا أي فوارق
ميرو اخت غاليه وهتفضل حتى لو ايه بيننا ودي رساله بوجهها ليها
ميرو
خليكي كده واوعي تتغيري
وبعلن على الملا
فكرك بحترموا جدا

ميرو
اوعي تنسي العزومه وتطلعي بخيله
من هنا بقول
يارب مقدما عيد سعيد وجميل عليكي وعلى كل اخوتي المسيحيين كلهم
ويارب تدوم الاعياد والمناسبات الجميله

وليكي هنا مقوله من جواب
لو حكم رئيس مصر قبطي
انا كمسلم اتمنى التجربه دي تحصل ونجرب
واعتقد جه الوقت ننسى النغمات اللي مالهاش لزوم
اه مصر دوله مسلمه انما ما احنا جربنا الاخوان ودول صدعونا بالشعارات
عملنا ايه ؟
وايه اتغير ؟
محلك سر ويمكن بنرجع أسوأ

بحترم اسألتك جدا اخي خالد
وبحترم ردودك تماما اختي العزيزه ميرو

وتوبيك بكل جداره هايل
اخترت صح جدا يا اخي
موفقين يارب دوما

ومؤكد احلى نجوم لكما
اخوكم

[Magic Dreams]

حلقه روعه يا خالد منتظرين اللى جاى

[شاعرة الرومانسيه]

كل سنه وأنتى طيبه ياميرو حبيبتى

ومنوره الدنيا طبعا

اسئله موفقه واجابات اروع

لقاء موفق ان شاء الله

ننتظر جديدك يا خالد

[اسيل الفلسطينية]

حلقة مميزة جدا استمتعنا بحوار رائع جدا وراقي على جميع المستويات
وكنت موفقا اخي في اختيارك للشخصية الجميلة ((كوين ميرو))
ماشاءالله عليها اجابات تدل على فكر مستنير وصاحبة رؤية صائبة للامور
اتمنى التوفيق لها والف شكر لك اخي خالد على نشاطك الملحوظ واسلوبك المميز
لك بصمة تميزك عن غيرك
تحياااااااتي للجميع

[العاشق الذى لم يتب]

الشكر لك اخى خالد وتحياتى وتقديرى لشحصك الفاضل اختى كوين مقدما كل سنة وحضرتك واباؤك وجميع اهلك وكل المسحيين بالف خير وصحة وسعادة كل سنة وانت طيبة فقط لى تعقيب بسيط حيث شاهدت فى كثير من أقوالك أنت تعانين والاخوة المسحين من مشكلة قلة الكنائس وتجدى صعوبة فى العبادة وأنا فقط أطلب منك دليل واحد يثبت أن أحدكم منع من أداء صلواتكم فكيف يكون الاضطهاد فى العبادة نروح للرئيس مرسى قلت زيه زى مبارك هل شاهدت وزير الداخلية فى عهدمرسى دبر لحرق كنسية وهل شاهدت فى عصر مبارك منكم واحد فى القنوات أو الجرايد كان يستطيع أن يشتم سيادته كما هو موجوزد الآن منكم الكثير الذى ينتقدمرسى ويسبه عياناجهارا فى كل مناسبة هل رأيت أوسمعت أنه أمر المخابرات والشرطة بحبس الذى سبه وأعتقاله كما كان يفعل مبارك وبعدين وقبل الانتخابات الرئيسية وبتصريح ماأظنك ماسعتهوش وهوموجود ومسجل فى مكان وكان على الملأ صرح البابا الموقت وهو فى فترة الانابة وقال بالحرف الواحدحينماسأل عن أين من المرشجين هتنتحب قال نار مبارك ولاجنة الاخوان وذلك أختى الفاضلة يدل على كره الاخوان وبس ومااظن فى مدة مرسى رأيت فتنة مقصودة زى اللى كان فى عهد مبارك كثيرا قرأت لك وأشهد انك انسانة مثقفة وذات حث وطنى وقلب وعقل كبيرين هو شيئ واحد دائما أستشفه من كتاباتك ألاوهو الظلم لاننكر وجود ظلم ولكن هو وكماموجود مع اى مصرى سواءمسلم او مسيحى ولكن علشان يبقى الظلم كماتذكريه دوما أعتقد أنه مبالغ فيه فى كل جزء فى مصر يعيشون المسحيين يعملون مزارع صانع وموظف وتاجر لاواحد بطل شغله ولاتجارته وتعالى وشوفى بنفسك عندنا فى اسيوط أكبر تجار وأغنى الأغنياء مسحيين ولا واحد قفل محله ولاواحد منع من الصلاة فأتمنى منك أختى الفاضلة أسعدك الله وزادك من خيره بلاش تكترى من تلك الكلمات حتى لاتحدث من وراءها اشياء تجدفى النفوس صداها وكم سمعت فى قنواتكم السب والشتم والقاء التهم على مرسى والاخوان بل على الدين الاسلامى وسب الرسول وهناأسألك وانت تتابعى القنوات الاسلامية هل رأيت أى شيخ أو ضيف سب المسيح أومريم كمايفعلوا القساوسة فى قنواتكم أرجومنك أختى بلاش التعميم والمبالغة فى حكاية ممنوعين من الصلاة وانا اقول ذلك أختى مااقصد غير فتح باب للمحبة والتسامح لك والاخ كبرياء كل تقدير ومعزة واحترام خاصة وكل مسيحى أراه أخى فى المواطنة واختلاف العقائد هناك رب يعلم من على صواب ومن على حطأ وهو وحده بس اللى بيحاسب يوم القيامة نحن هنا شركاءفى كل شيئ لكم مالنا وعليكم ماعلينا كل سنة وانت طيبة أختى الفاضلة وأسرتك والاهل مودتى

[ساحر الأحزان]

حلقة جميلة خالد

مع كوين أرائها تحترم

ومفيش اجمل من التعايش بسلام وأحترام مع نفسنا ومع أصحاب الديانات الاخرى ..

فديننا الحنيف وصانا بكدة الأخاء والأحترام والعيش بسلام؛؛

نورتى كوين الحلقة بهدوئك وتعقلك وارئك القيمة

موفقين

[countess]

حلقه جميلة والأجمل هدوئها ي خالد ،،

وعجبني رد الضيفه <<<

اقتباس [color=#]المنتدى فيه اقلام كتير جميله ومميزه بس للاسف الجو المشحون الموجود بيفقدنا لزه التمتع بالاقلام دى وخصوصا الخلافات لما بتقلب شخصيه[/color]

معاكي حق فقدنا الروح دي لنا فتره كدا
ف ياريت الكل بقا يرجع حالة الأستقرار والحب

ونحافظ ع المكان الي عطانا كتير من تنميت مواهب وحجات كتير لو آحكي فيها مش هخلص

ليه نعمل في منتدنا كدا الي هو بمثابة بيتنا التاني

نبعد بقا ع كل مواضيع المشحنات نروق حبه كدا

عشان المكان دآ مش يستاهل الي بيحصل فيه

وبس نورتي تاني ي قلبو ؛؛؛؛

[gold rose]

حلقة جميلة أوي والله .,
بجد الضيفة ررائعة جداً .,
واتكلمتوا عن حاجات كتير .,
تسلم إيد أ\ خالد .,
ومنورة يا ميروو .,