معجنات لذيذة

[ريانة العود]

المقادير

نص كيلو دقيق
كوب ماء دافيء للعجن
كيس لبن نيدو الصغير ابو جنية ده
معلقتين خميرة فورية صغيرة
كوب زبدة صفرااا
معلقة صغيرة ملح
3 ملاعق كبار سكر (اختياري )ممكن تقلليهم لو مش عايزاه مسكر بس انا بحبه مسكر شوية
معلقتين سمسم
معلقتين ينسون ( اختياري) اصل بحب طعمه بيدي نكهه حلوة
معلقة كبيرة بكنج بودر

ندخل علي الطريقة

نحط كل المكونات الجافة علي بعض
(الدقيق السمسم الينسون الملح البكنج بودر والللبن البودر)

وفي كوب ماء دافيء نضع الخميرة والسكر وندوبهم ونترك الخميرة تعمل
وهتعلي ويكون ده شكلها

نضع الخميرة والزبدة تكون مش مقدوحة تكون سايحة فقط
نضعهم علي الدقيق ونعجن كويس

هتلاقي العجينة مش بتلزق في ايديك
وهقولك علي تكتين جامدين جدااا
لو لقيتي العجينة بتلزق في ايديك زودي دقيق
لو لقيتيها ناشفة زودي زبدة او شوية مية دافين

انا بحب استخدم العجين عالطول بيكون اسهل في تشكيلة من لما يخمر
كنت دايما بعمل القراقيش الطويلة المرة دي حبيت اغير وعملت الشكل النص دايرة

اعمل دايرة واقسمها من النص
وارص في الصينية

ده شكلهم لما اترصو وابدأ بالشوكة انقشه بسيط
دي صينية صغيرة لباقي العجينة

اسيبهم يخمرو في مكان دافيء ساعتين
ده شكلهم بعد ماخمروا

ادخلهم الفرن علي درجة 200 لمدة نص ساعة علي حسب فرنك
اول ميحمر من تحت اطفي علية واشغل الشواية
بس انا مشغلتش الشواية هنا لان حبيت المرة دي اخليه فاتح ابني كان طالبة كدة

دي صورة من جوة الفرن شوفوا عشان خاطر عيونكم
من قلب الحدث مباشرة

وده لما خرج من الفرن
شوفوا شكلها من تحت لونها جميل ازاي

وده شكلها من جوة مقرمشة وبتدوب في الاكل دوب

[اسيل الفلسطينية]

شكلها روووووووعة بجد شهتيني
تسلم ايدك ياعسل ماننحرم من جديدك

[سارة بنت مصر]

مشكوووووور والله يعطيك الف عافيه

[╯ Princess ╭]