تخاريف نجم ( حصري ومتجدد )

[نجم وزهره ومسافات فراق]

بصراحه وبعد تجارب كتير بالحياه
لقيت احلى شيئ
ان الانسان يمسك القلم
ويكتب
يقول
يعبر
مش مهم يكتب ايه
ولا مهم يقول ايه
الأهم يتنفس
يخرج اللي جواه
يفضفض
يتنفس

وعشان كده
عملت التوبيك المتجدد ده
وكل مره هنزل فيه شيئ جديد
كل مره هعمل تخاريفي بشكل جديد
وبصراحه في الزمن ده
مفيش احسن من التخاريف مع الورق والقلم

[نجم وزهره ومسافات فراق]

وبلقاني
ادوب في الحرف والكلمه
ورغم الفكر والهمه
اعيش الجرح وأعاني
وأعود تاني
أحاول أصنع البسمه في عز الهم
وأنسج من خيوط الفكر
بستان حلم
ألاقي الغم بيعاود على بلدي
يخليني أحس بخيبه وقويه يا أحزاني
وبلقاني
أعيش العمر متغرب ومتعذب
وضايع مني عنواني
كتاباتي
وآهاتي
وغاياتي
زمن بالفكر يهواني
أمل ياخدني يرعاني
حنين العمر متغزل بنبض الشوق
وأنا من تحت اروح طالع بصبري لفوق
وياخدني القلم مني
ينيمني
يصحيني
يخليني
اتوه وافوق
آهين مني
آهين ياني
وبلقاني
معاود فوق جبال الغربه
ولا مرسى بترعاني
معاند يازمن رافض خيوط الحب وحناني
مباعد يا أمان مني
وخايف جرحي يهواني
وأصرخ فوق مساحات الورق وحدي
بزلزالي وبركاني
وبعلن ياغضب فجر
طيوف السحر بالكلمات تكون حلوه وليها شكل وجداني
وبلقاني
مسافر وحدي كالملاح
وكلي جراح
وكل الليل وكل صباح
ألاقي كلامي زي رياح
يعود صداح يعاندني
يباعدني
وياخدني
لسفري وشطي ومواني
وبلقاني
غريب زمني غريب وطني
غريب حالي وآهو صابر
والاقي قلمي يرغمني
بفن الكلمه اعيش شاعر
وللرحمن
وانا انسان
اعيش ساجد واعيش شاكر
واحس بقيمة الكلمه
لما تكون من الآخر
لما تكون بعيد عن كل حرماني
وبلقاني
مواعد نسمة غجريه في حر الصيف
وشايل قلمي بجنوني واصبح سيف
ورافض يا ليالي القهر
كل المر
كل الزيف
وبتحدى عذاب حالي
ويجرالي ما يجرالي
لا انا عاجز ولا خالي
ولكني بنبض شريف
وقلمي الحر متواعد
بدون تكليف
رسمت الكلمه بستان ورد
وفواكه
وحلو كتير يابستاني
وبلقاني
بتغزل في كلمه حره وجميله وسهله كمان
تحيرني
تسهرني
وتخطفني الى التوهان
وشط الحلم يحضنها
ويصنع منها عنوان
وتاخدها خيوط الشمس
بكل الهمس والوجدان
ألاقي فوق جليد القلب
مكتوب فيه / دا واد فنان
دا واد عاشق كده الكلمه
وكلماتوا كما ميزان
دا واد طيب
دا واد عارف يقول الكلمه بالمعنى بلا توهان
دا واد فاهم فنون الشعر
مره يكون ولد هادي
ومره تحسوا زي بركان
دا واد مجنون
بيكتب ألف شكل ولون
وله معنى
وله مضمون
منين ما يكون
تلاقي شكل توقيعوا
مش ظالم ولا جاني
وبلقاني
دموع العين تعود فيا
تحير كل لياليا
وترميني
مع انيني
وتتعب قلبي وعنيا
وقصة قلمي تلاقيها
بنت جميله غجريه
دي بنوته
بطعم السحر والروعه
ولمسة صبح منديه
دي بنوته
وفيها العفه بطهاره
وفيها ذوق وحنيه
وفيها صدق رباني
بياخدني كده شويه
دي بنوته اسمها ورقه
صديقة قلمي وايديا
دي بنوته
وقلم واد يغازلها
يدوبها
يجننها
يخليها
يهنيها
ويهديها
تلال وتلال من الكلمات
وامنيات ورديه
ياعيني ياعيني ع التخاريف
ما تهدي يانجم بقى شويه
اهدى ياعم بقى روق
شويه وعود لنا تاني
وبلقاني
بلقاني



تخاريف نجم

[نجم وزهره ومسافات فراق]

يازمن اللص والعكسر

حقيقي هقول الله اكبر

ما بين الوهم والحيره

يروح الحق يتكسر

زمن غايب مع عجايب

وصفقة والي مع مخبر !

وما بين العطش والجوع

تلاقي والينا متكبر

يقولك عارف مين يحكي

ومين فينا كده يقرر

ياعم اهدى على روحك

دي اثيوبيا بقت تقدر

عايزنا ايه نقولك تاني

ما ترحم مصر قوم فكر

حرام والله يا بلدي

يكون الحال متكدر

حسبي الله ونعم الوكيل

اشرب ياشعب مصر

ولسسسسسسسسسه

غضب حصري

[نجم وزهره ومسافات فراق]

رايحين فين
ياحلوين
ياموافقين للاخوانين
عايزين ايه
شعب يموت
توت توت
وبلدنا حكمها النبوت
توت توت
وكلامي دوغري ومظبوط
توت توت
هتعارض خد لك شلوت
هتعارض
اتجنن موت
لازم يحكمنا الاخوان
اه يا هوان
مولد شغال كده بركاوي
بقى صاحب الفكر مهان
مولد شغال الحق واخطف
واونطه مع مهرجان
مولد مولد خد لك حته
وابقى قابلني في الصوان

[نجم وزهره ومسافات فراق]

تخاريف تخاريف تخاريف
ياشعب مشلول وكفيف
فيك اللص اصبح شريف
وفيك الشريف اصبح ضعيف

منتهى التخاريف
منتهى الحال السخيف
منتهى الحال المخيف
منتهى الرعب المخيف

فاضل ايه
شوهوا الامن وخلاص
شوهوا كل الخلاص
شوهوا حتى الاخلاص
شوهوا كمان الرغيف
وبدون تكليف

اعتبروها تخاريف بس حصريه

[نجم وزهره ومسافات فراق]

تؤمر ع الراس وع العين
ميل واديني سدين
يانهضه ياخراب مسعور
هتخلي العدل يغور
مين فاضل وعليه الدور
وياخدوا له ف راسوا رصاصتين
من اياهم الدمويين

يانهضه والحال احزان
حرمان بيعود مع حرمان
والله هيجي لي جنان
وبغني وبقول آهين


مع الاعتذار الى الرائع فريد الاطرش

[نجم وزهره ومسافات فراق]

نهضه يانهضه يامتغندره
حلوه حليوه اوي وسكره
بكره هنعطش ياحلوين
عيشوا ف دور حلو وفشخره


بكره نجوع واهو لسه كمان
الحال لسه فيه مسخره
بكره نحس بخيبه كبيره
وهنرجع مليون سنه ورا


سلموا لي ع النهضه

[نجم وزهره ومسافات فراق]

قرب قرب قرب
والحق واخطف جرب
بلدنا فيها مولد
الحق دوغري واكسب
ومناصب شغاله
والحال بات متغرب
قرب بص علينا
افكارنا بتتسرب
احوالنا المغلوطه
فيها الغلطان يلعب
فيها الصح حرام
لازم لازم يتعب


وعليه العووووووووووووووووض

[نجم وزهره ومسافات فراق]

اللعبه متفصله
والله ترزيه
والخيبه متأصله
ميه كده لميه
وحزين ياحق يموت
ياعيوب وعلنيه
خلاص معدشي حياء
احوال كده غبيه
ربنا يستر علينا
ف الايام الجايه
وعلى فكره الكلمات
دي كلها حصريه

[نجم وزهره ومسافات فراق]

واحد يقول لك
انا فنان كده فنان
وواحده بتسرسع وراه
أصلوا زمن توهان
وفكر متلخبط مع حال ومتخبط
رز وبلوظه وكوسه
أشكال على ألوان
ويستمر السؤال
ياترى فاضل ايه كمان ؟