حوار خاص مع ( SiLver Spectra )

[عاشق متيم]

حوار خاص هو حوار هعمله مع عضو وهسأله اسئله فى عدة محاور وهنشوف وجهه نظره فى بعض الموضوعات .. ومعايا فى اول حوار عضو غنى عن التعريف معايا الادارى المتميز ( SiLver Spectra ) اهلا بحضرتك يا دكتور طارق مستعد للاسئله استنى اربط الحزام نبدأ الاسئله حياتك 1- راضى عن حياتك بنسبه كام فى الميه ؟؟ حياتي كمعيشة الحمد لله مش نفسي في حاجه أما الطموحات فدائما بشوف نفسي أقل من المطلوب 2- لو مش كنت دكتور كنت تحب تكون ايه ؟؟ موظف ضرائب بيروحوا الشغل يجمعوا و يطرجوا شوية ارقامو بيرجعوا البيت و بياخدوا فلوس حلوة ..(دا عن تجربة خالتي ) 3- ايه الحاجه اللى لسه مش حققتها وعاوز تحققها ؟؟؟ ابقى عازب لحاد ما يبقى عندي 35 سنة دا حلم من الصعب تحقيقه في مجتمعنا 4- هل ممكن تتدخل العاطفة فى اتخاذ القرارات ولا بتفكر بالعقل فقط لاغير ؟؟؟ أنا مش هنصب عليك ..الانسان بيتاثر بمواقف بس الى حد ما انا بفصل بدرجة كبيرة بين مشاعري و بين قراري كإداري هنا و إن كان بالفعل حصلت مواقف قبل كدا في جو متكهرب لكن أنا بكلمك عن الطبيعي بتاعي في الجو الطبيعي وجهه نظر 1- مع او ضد اغلاق محلات الخمور فى مصر أسهل حاجه تقول (مع) ..بس أنا هقول (ضد) لأن انت عندك في واحد مش بيؤمن بتحريمها أو ديانته بتختلف عنك..ماينفعش ألزمه بقوانين من عقيدتي هو مش بيؤمن بيها و كمان انت عندك سياحة قائمة على الترفيه (سياحة شاطئية) و دي بتشكل 70% من السياحة و في الظروف الحالية 100% الموضوع بيكون برقابة ذاتية لان لو حتى الدولة مانعه و انت عايز تشرب هتشرب .. كنت في ****************** و كان في ناس بتهرب أما رقابتك الذاتية فهي اللي هتمنعك بشكل فعال.. المفروض هي اللي تفرض افعالك مش انك تستنى عصاية اللي تفرض عليك العصاية بتجيب أمراض أخرى ..زي مرض التحرش هو في محلات مصرح بيها تبيع بانجو ؟ مافيش ..طيب و قصاد كدا هل مافيش بانجو ؟ -شايف الحب يبن الطلبه فى الجامعة ازاى مع ان 99.99% بتفشل العلاقات ضد النسبة دي لأن في كمان علاقات زواج بتفشل الانسان مش بيتعلم غير بالتجارب فلو فرضنا جدلا انك منعت الحب في الجامعات (معرفش دي تتمنع ازاي اصلا) ..هيظهرلك حب اكثر على الفيس المقصد ان الموضوع لا يؤخذ بتعميم ..كل حالة و ليها ظروفها الخاصة آه عارف ان في كتير بيكون حب أهبل أو حب سطحي بس هنعمل ايه بقى ..فطرة في الجنسين واحده عايزه تحب في الجامعة (الله يسهلها) و يوفقها على زواج . اقدر انصحها لو اطلعت على حالة الحب بتاعتها و طلبت مني اني انصحها غير كدا مش بقدم نصائح عامة عمياء 3- جامعة عين شمس اصدرت قرار بمنع دخول الطلبه بالبناطيل الفيزون والشورت شايف ان القرار ده صح ولا الطلبه حره فى اختيار لبسها قرار محترم ..لأن الجامعة مكان للعلم مش للموضة و الأزياء ابقى ضده لو كان القرار مفروض في الشارع عموما لسبب هو اني بؤمن بالحريات عامة و مش هقبل ان حد يدخل و يقولي لو سمحت التي شيرت بتاعك قصير هات واحد طويل ! لانك لو دخلت في مجال المزايدات مش هتخلص في يومك أما الجامعات فدا مكان علمي خاص ..يعني ماينفعش مثلا حد يروح بجلابية أو بشبشب و كمان مايبقاش مكان للموضة و الفيزون و الشورت 4-مسابقات الاغانى اصبحت كثيره جدااا !! ومع ذلك مش بنشوف مسابقات للمخترعين والمبدعين ؟؟ في مسابقة علمية باين بتيجي على تلفزيون قطر على ما اعتقد تقدر تقول عشان الاغاني ليها شعبية اكبر ..دا في العالم كلو حتى الدول المتقدمة ..لو بنتكلم عن الشو و العروض التلفزيونية فموضوع انه يبقى عرض علمي مش هيكون له متعة في العرض زي الدانس و الغنى و الحاجات دي المفروض مسابقات العلوم بيكون تنظيمها تابع للجامعات و المؤسسات الخيرية مثلا او العلمية و بتنظم بدون شو اعلامي و استعراض لانها في الاصل خالية من الاستعراض يمكن دا يكون السبب ..و بدون استعراض يعني المشاهدة اقل يعني مافيش معلنين و المحطة غالبا بيكون هدفها الربح الا قطر بقى مرزقين بغاز و بترول 5- رأيك فى الاعلام المصرى وقناه الجزيره ؟؟ دا يمين اوي و دا شمال اوي ماحدش فيهم عدل ..الاتنين ماشيين بتوجهات القائمين على المحطة ...و ما اقولكش بقى على مهنية الاعلام المصري حاجه فضيحة يعني الجزيرة لما تكذب او تضخم بتكذب بشياكة التانيين بقى يمسكوا في خبر مالوش مصدر أو مجرد راي كاتب و يعتبروه حقيقة و يقلبوها مراجيح اليوم السابع من فترة كان منزل خبر ضد الجزيرة و بيقولك : الجزيرة تضع اعلاناتها على موقع اسرائيلي دخلت اشوف كدا لاقيتها جوجل ادسنس و في جوجل ادسنس المعلن مش بيكون ليه يتحكم في المكان اللي هيتم ظهور اعلاناته فيه و لو فرضا كان ممكن ..ايه المشكلة اصلا ! شغل اطفال كدا و في نفس الوقت ..الجزيرة هانم ايام مرسي ماكنتش بتعمل اي تغطية لاي احتجاجات ضده و كانت توجهاتها مع مرسي عموما و مش بتنتقده عامة على خلاف العربية و بعد 30 يونيو الوضع اتقلب 180 درجة في القناتين و الله العرب دول بيشوفوا العجب قريب هيجيلنا مرض زي جنون البقر كدا 6- مع او ضد الضبطيه القضائيه داخل الحرم الجامعى ؟؟ هو الخوف دائما من استخدام القانون بشكل متعسف أو بشكل خاطئ لكن برضو لازم الواحد مش يغقل التجاوزات اللي بتتم و ضعف الامن الجامعي يعني حصلت حوادث كتير ان عيال بتخش بسلاح و بشوم و سيوف و يتخانقوا جوا الحرم و الامن ضعيف جدا لان مافيش بايده اي اجراء قانوني يقدر يعمله .. فالفكرة مش جت من فراغ ..بس في توجس و خوف من الطريقة اللي ممكن يستخدم بيها القانون 7 - مع او ضد حل روابط الالتراس فى مصر دول سبب التعصب الكروي في مصر باقينا بنلعب مباراة واحده بجمهور و عشره من غير جمهور !! مش عارف ليه الاخلاق باقيت زباله كدا فاكر انت ماتشات زمان دي اللي كان بيجي قبلها اغنية مميزه كدا لما بتفرج عليها ..بعد اقول راح فين الشعب المصري الطيب الغلبان تتفرج بقى على ماتش حديث تلاقيه كلو ليزر و شغب و شماريخ و عبارات مسيئة ! و مش بعيد يكسرولك المدرجات و هما ماشيين ! بناخد اوسخ العادات ..الشماريخ اخدناها من ايام ماتش الجزائر و الليزر من ايام تونس لما الاهلي كان بيلاعب الترجي في 2010 على ما اتذكر و اللي بناخده بيلزق بس بصراحة ..معرفش انا ايه التعصب دا اللي يكون مبني على فريق كورة ! الموضوع مش مستاهل هتقولي اهلاوي و لا زملكاوي هقولك و انا صغير كنت بقول اني اهلاوي (بالوراثة) لما كبرت باقيت بشجع اللي يلعب حلو المنتدى 1- تم منع المواضيع السياسيه لفتره واخيرا تم الموافقه عليها ؛ شايف ان الاجواء اصبحت هادئه علشان كده وافقتم على المواضيع السياسيه ؟؟ اه نوعا ما قبل كدا كان في تشنج و تعصب ..مش هيولد غير كره اكثر بين الاعضاء اختلاف الراي وارد و عادي ..لكن في اوقات معينه و احداث في البلد بتوصل لمرحلة بيكون صعب انك تكمل على نفس القانون زي كمان ايام ماتش مصر و الجزائر كنا بنمنع المواضيع من الجانبين ..وقتها كان في جزائريين كتير لان المنتدى كان متأرشف بكلمة ( مصر) في جوجل الجزائر وصلت بيه اني في يوم اغلقت التسجيل في المنتدى فهي الظروف هي اللي بتحكم و بتخليك تضطر تعمل حاجه زي كدا مجرد ما الظروف ما بتتحسن بنرجعها تاني 2- شايف القسم الاسلامى محتاج ايه لكى يكون قسم نشيط ؟ القسم الاسلامي كلو منقولات ماحدش فيه بيكتب بقلمه لو يبقى في مفكرين بفكر مختلف جديد و متحدث اكيد طبعا هينشط جامد لكن قسم قائم على النقل ..طبيعي وضعه هيكون زي القسم العام 3- شايف ان الاستايل الجديد ارضى رغبات الاعضاء ؟؟ وتقول ايه للاعضاء اللى مضايقة من الاستايل ؟؟ الاستايل فكرته جت بعد ما ناس طلبت اننا نعمل تغيير طبيعي جدا يكون في نسبة بتعارض في ناس مش عاجبها الافتراضي انه برتقالي و في ناس مش بتحب اصلا اي تغيير مافيش على فكرة اي فرق بين الاستايل دا أو دا كل الفرق هو ان بقى في اطار حوالين مجموعة الاقسام اداها شكل افضل و دايرة في النص اقدر اشيلها بسهولة لكن بصفة عامة انا بحافظ على مقاييس ثابته في الاستايل لو ماكنتش بحافظ عليها كان زمانك شايف استايل و قوالب حاجت تانيه خالص .. بس أنا بحب الموقع يكون له طابع مميز و ثابت 4- انت اختارت قسم النقاش فى الاستفتاء كأنشط قسم ؛ ايه اساب اختيارك ؟؟ بجاوب على السؤال : مين هو انشط قسم دا القسم النشيط 5- هل فى عضو معين بتابع مواضيعة ولا بتابع الموضوع اللى بيشدك بس ؟؟؟؟ الاتنين في اعضاء لما بشوف عنوان باسمها بدخلها لاني بكون عارف انه بيكتب حلو أو عنده فكرة و نظره و في كمان عناوين بتشد او افكار بتشد 6- حاليا فى تصويت لمعرفة اسباب الحظر ؟؟ وحضرتك معترض على معرفة الاعضاء اسباب الحظر طب لو تم التصويت بنعم ؛ هل هيتم تفيذ رغبه الاعضاء ؛ ولا ساعتها هيبقى فى كلام تانى ..... عادي انا كلمت ساحر و قولتله اعمل اللي يعجبك مش فارقه معايا و اديه هيجرب ) بس هو فعلا في امور معينه ماينفعش تتقال لان بيكون فيها تشهير بحق العضو السياسه 1- شايف الوضع فى مصر ازاى وخاصة الوضع فى سيناء ؟؟ اللي بيحصل في سيناء كان هيحصل في يوم من الأيام سيناء اهملت لفترات طويلة جدا و كان التهريب و السلاح هناك متفشيين بشكل غير طبيعي حيثما وجد التهريب وجد السلاح تحسن الوضع هناك اظن انه هياخد وقت طويل جدا ممكن سنوات و مش هيجي غير برقابة تامه على الانفاق ..ثم بالتواصل مع الاهالي ..لان طول ما المشكلة في الدماغ هتفضل تعاني لازم الحل يبدا من الدماغ بالتوعية 2- رأيك فى لجنه الخمسين وشايف انهم هيقدروا يعملوا دستور توافقى ؟؟ غالبا حزب النور هينسحب من اللجنة و هقولك راي مع السؤال القادم 3- مع او ضد الغاء المادة 219 من الدستور "مبادئ الشريعة الإسلامية تشمل أدلتها الكلية، وقواعدها الأصولية والفقهية، ومصادرها المعتبرة، فى مذاهب أهل السنة والجماعة". هسألك سؤال : تفتكر مين اللي دولته تتسع أكثر للكل الدولة المدنية أم الدولة الدينية ؟ بمعنى أصح ..لو أنا مثلا كنت راجل بهائي ..هل هلاقي مكان ليه في الدولة الدينية ؟ لو أنا راجل مسلم و رايح اعيش في دولة اوروبية أنشر الدعوة هناك ..هلاقي مكان هناك ؟ اجابة السؤال الأول لأ اجابة السؤال التاني نعم و بالتالي بتلاقي كل الشيوخ المشهورين بيسافروا اوروبا و بيعملوا ندوات و بينشروا الدعوة و مناظرات و لا حد بيقولهم انتوا بتعملوا ايه طيب تفتكر دا ممكن يحصل مع الدولة الدينية اللي حاطه مواد في الدستور بتجرم فيه انتقاد الدين و انتقاد الانبياء ! ؟ تفتكر البهائي او اللاديني او صاحب اي ديانه هيعرف ياخد حريتك في الدولة دي زي ما هياخدها في الدولة التانية ؟ يبقى مين الأفضل ؟ الحق بيقول الدولة المدنية لأنها بتتسع للكل و ليس لفصيل واحد ..حتى ياريتها هتتسع لكل المسلمين .. (المادة مفصلاها على السنة) نرجع بقى لسؤالك هل انت مع المادة : الاجابة أنا ضد اقامة الدولة الثيوقراطية اللي كانت موجوده في العصور الوسطى و اللي بسببها ظهرت العلمانية كحل ليها يبقى المادة دي واضح انها بتأسس لدولة طائفية خاصة بفصيل واحد و كان مستقبلها هيكون أسوء من طائفية اسرائيل فأنا ضد المادة 4- رأيك فى مظاهرات الاخوان ومحاولتهم تعطيل مترو الانفاق؟؟ ما اتعطلش الدعوة فشلت بس بصفة عامة فقطع الطريق مالوش اصل قانوني و لا ديني و لا اي حاجه بتبيح تعطيل مصالح الناس و التسبب في عدم الاستقرار لو فكرت بس شوية هتعرف ان اكتر حد بتضره هو المواطن العادي 5- رأيك فى موقف تركيا مع مصر ومهاجمه اردوغان لشيخ الازهر ؟؟ المصالح بتغلب يعني فكرك الخليج واقف معاك عشان عايز ديمقراطية مثلا ! الخليج متخوف من الاخوان و فكرة ان يكون في خيمة دينية غير خيمة ال سعود بترعبه..لانك كدا بتنافسه و بتشكل خطورة عليه السلفيين موالين للسعودية لان اصل فكرهم وهابي ..مش بتخاف منهم على خلاف الاخوان تركيا عندها عقد من التدخل العسكري و الاطاحة بالحكم اللي حصلت عندها كذا مره اما نقد اردوغان لشيخ الازهر ينتقد ..هو حر في رايه زي ما أنا حر في راي أنا ضد تقديس الأشخاص زي ما أنا ضد التنكيل لأهداف سياسية و مصالح و على فكرة أنا معرفش هو قال ايه ..كل اللي بسمعه استنكار لهجومه على الازهر قال ايه معرفش و لا هاممني اعرف بصراحة اوتوجراف اعضاء من المنتدى دمعة حائرة بنت حلال ..خدومة و مهذبة و طيبة و بتشتغل بضمير و مش بتحب حد يزعل منها morshooo عكس اللي قولته عن منه ههههههه مورشو دا طوني خليفة المنتدى ممكن نعمله فقره بعد ابراهيم عيسى بصراحة بيعمل جو حلو في المنتدى و من غيره المنتدى هيفقد كتير..و هو كمان هيفقد كتير الأميرة رودي بنت حلال ..مهذبة و طيبة و متفاهمه و مش بتعمل مشاكل في القسم عندها مش عارف هي مدلعاهم و لا ايه big bốss دا بقى جوكر المنتدى اي حاجه في اي مكان لازم بيدي بصمته فيها فوتوشوب و تلاقيه راشق ..حتى لو مش بيعرف يصمم ههههههههه هو مضمون مواضيعه مش بيكون دسم ..بس هو نشيط و بينزل مواضيع كتير و بيحرك الجو ۩۩ elMagic ۩۩ أحمد دا زي النسمة هادي ..و خدوم جدا ..يعني اي حد بيطلب استفسار فني بيساعده بضمير ..بحسه مبسوط كدا دا كفاية بس ان هبيحب يحل مسابقاتي Arco Baleno مبدعة الهوايات و التصميم قسم الهوايات كان طول عمره قسم ميت و ماحدش بيقرب منه هي احيت القسم دا و خلته من الاقسام اللي تحب تدخلها و تشوف ابداعات الاعضاء شخصيات عامه عدلى منصور بيسموه ايه ؟ الطرطور ؟ ههههههههههه أنا بشبه انه اللي مرسوم على ورقة ال200 جنيه التمثال اللي مربع دا عبدالفتاح السيسى بحي السعودية ..و الامم العربية ..بمسي عالامارات دي كلها دولارات محمد مرسى لسه كنت بسمع اخر خطاب له بتاع الشرعية و شوفت فيديوهات تريقة بصراحة احنا شعب نكدي اننا نشيل راجل زي دا ..كان مسلي جدا ههههههه خيرت الشاطر الزغلول الكبير الرجل الغامض بسلامته محمد بديع بحسه غلبان مش عارف ليه بتحسوا معايا الاحساس دا ؟ القرضاوى كان بيقولك ايه ..ربنا وهب لنا الغرب لخدمتنا حاجه زي كدا هو مش عارف ان احنا اللي بنخدم الغرب مثال لشيوخ السلاطين (امراء قطر) حقه برضو ماهو لحم كتافه من خيرهم عمرو موسى بؤ دبلوماسي اردوغان أبو صوابع بكرا هيدك اكراد سوريا بالطيارات زي ما بيعمل في اكراد تركيا و العراق توفيق عكاشة مهيساتي مش بسمعله من زمان جدا رايه بالنسبالي زي راي راجل دماغه على اده بيشتغل على تاكسي عمرك تلوم راجل زي كدا ؟ أو عمرك تهتم براي راجل زي كدا اصلا !! اخر سؤال من خلال خبراتك ايه النصيحة اللى تحب تقولها للاعضاء والزوار ثور على خمولك وبكده يكون انتهى الحوار دمتم فى امان الله

[جبل عالي]

تنوع جميل منك ياعاشق ماشاء الله

حقيقة منور القسم بروعة الحوار ودسامته

دمت موفق بإذن الله

[فروتى روتى]

بجد كنت مستمتعة جدا وانا بقراء الحوار
وشكرا عاشق على المجهود واستضافتك للمدير العام

[اميره الشعر الشجين]

هههههههههه حوار رااااااائع بجد من انسان رائع وخفيف الدم واحلى حاجه رئيو فى مرسى وبديع بحس نفس الاحساس والله

بجد اجابات ممتازه واسئله رائعه من محاور رائع

يدوم التميز يا اخوانى ^_^

[ساحر الأحزان]

وانت يا طارق اية الى خلاك تشتغل دكتور أسنان

كنت أشتغلت مأمور ضرايب أحسن

كنت حتلم فلوس كتيرة وكنت برضة حتتكلم كتير فى محبوبتك سياسة هانم؟

نورت يا دوك مع عاشق فى حوار جميل

[Mo chahin]

استمتعت جدا بالحوار دا يا عاشق

لان اى حوار مع طارق بيكون مختلف وممتع والواحد بيتعلم منه

صحيح طارق اوقات بيكون بارد لكن بحبه ههههه

حسيت ان الحوار دا جزء تانى لحوارى امبارح مع طارق ع الموبايل

صح يا دوك ؟


ربنا يوفقكم يا ولاد انتو الاتنين

[الأميرة رودي]

حوار جميل.. الاسئله جديده ومش تقليديه
واجابات طارق أجمل >> هو انسان عاقل ومثقف
عجبني جدا التنوع ف الفقرات مابين سياسه وحياته الخاصه واعضاء المنتدى

يمكن أكتر فقره عجبتني هيا وجهه نـظر
أراءك في أغلبها منطقيه ياطارق

وشكـرا بقى لرأيك فى البنت اللى اسمها الآميرة رودي
هيا أه مدلعاهم ف القسم

مفيش أجمل من انك تلآقي الناس بتحبك ياراجل مش مستاهله مشاكل

أختيار مميز عاشق واختيارك للآسئله كان موفق جدا جدا جدا
وضيفك نور الحلقه باجباته الحلوه
تسلــمو وبالتوفيق ليكم دايما

[دمعه حائره]

حلقه جميله جدا والاسئله جديدة
واجابات طارق اكيد عجبتنى وهوا اصلا اى استضافه ليه بتكون رائعه
شكرا لكلامك فى حقى وده من بعض ماعندكم
نورت الحلقه وشكرا عاشق على الاستضافه الحلوة دى
واتمنى تستمر فى البرنامج

[SiLver Spectra]

جزاك الله خيرا يا عاشق متيم على الاستضافة
معلش انا اديه لسه مبلوله كنت بتوضى هههههههه

لا بجد شكرا ليك على حسن نيتك و برنامجك و هدوءك
و بالتوفيق دائما و في انتظار المزيد من حلقاتك ..

[تيتشر نفشه ツ]

طب والله حواااااار جااااااااامد جدا جدا جدا
وماتوقعتش الاسئله تكون كدا جميله جدا
وطارق عداه العيب وأزح

منورين كلكو وانا كمان