انا مش معقده .. (حمله تنشيط الاعضاء الجدد)

[محبه الرحمن]

السلام عليكم ورحمة الله وبركاته



صباح الخير
انا ا لنهارده هكتب موضوع بيشغل بال كل بنات كليات الصيدله او الطب او الهندسه او العلوم
بس انا عايزه رائيكم فيه بجد
ليه لما حد بيسالنى انتى فى كليه ايه واقوله دكتوره صيدلانيه
يقولى انتى اكيد معقده وانتى اكيد دمك تقيل وانتى مبتهزريش
ده انتى موس فى المذاكره
يا حج ده انا خلصت كليه واشتغلت كمان فى القصر العينى
يقولى شوفتى الدم وبتحللى للناس وبتدى حقن يـــــع
اقوله يا ابا الحج احنا ملناش علاقه بالتحالليل ولا الدم ولاالتشريح حتى
بس واجب شغلنا لو فى حد محتاج حاجه بنعملهالو
يقولى وانتى بنت بتستحملى ازاى تشوفى المناظر دى
اقوله شغلى ودراستى كده وخدمه الناس بتخلينى مبسوطه
لا انتى اكيد مش بنت رقيقه وانتى مش رومانسيه ده انتى معقده
طيب انا لما حد يقولى يا معقده اعمل فيه ايه بالظبط
مهو يا هعمل فيه كده ... يا هعمل فيه كده ...
هى حاجه من الاثنين
لا بجد مش معنى ان انا شغلى او دراستى لازم يكون قلبى جامد فيهم
يبقى ان انا مبقاش بنت رومانسيه او هاديه فى كلامى او مبهزرش لا
طبيعه البنت دى حاجه وشغلها حاجه تانيه خالص قدام الناس
بيحسسونى ان البنات دى مبتتجوزش
واحب اطلعلهم لسانى واقولهم لا بيتجوزو
ايه رائيكم فى الموضوع ده
انك تبقى جد مع الناس اوى بطبيعه دراستك وشغلك علشان ميتقلش عليكى انتى مايصه(لامؤاخذه فى الكلمه )
ولا تهزرى وتضحكى ع الفاضى والمليان علشان ميتقلش عليكى دمك تقيل ومعقده

[دمعه حائره]

الفكره دى ممكن عشان الكليات دى صعبه وبتحتاج مذاكره وعزله
عشان تتفوقى فيها بس كلمه غلط جدا
مش عشان بنت جد وشايفه شغلها ومتفوقه تبقى متعقده
والنوعيه دى من الناس
افضل حل مايتردش عليهم غير باثابت الذات اكتر والنجاح
لان فى الحالتين بيتكلموا

[big bốss]

هى طبيعة العمل و الدراسه بتفرض على البنت انها تغير من طبيعتها

بدل ما قلبها خفيف يتقل و اعصبها تشد و تستحمل و تتعامل مع الموقف

بس فالناس بياخد فكرة انها مراه حديديه و غير طبيعيه

بس هى طبيعيه و قشطه زيها زى اى بنت ^_^

بس لما تقتل جوزها بتقتله بابشع الطرق الطبيه

[™Amiliya]

في انطباعات بياخدوها الناس حسب السمع واحيانا حسب مبيشوفو المعاملة
والانطباع دا بيترسخ جواهم ويتداول ويعمم

ومش معنى دا ان البنت في شغلها ودراستها تبقى زي في بيتها ومع صحابها

لكل مجال مقال ومينفعش خلط الامور ببعض سواء مع الناس او الزملاء

[معذب القلب]

هناك مثل سمعته من دكتور فرنسى قال الفاشل هوا من يحاول ان يحبط الناجح بتلك الكلمات او ينتقده بعمله انه ثقيل فيجب ان ننسى الفاشل ونركز فيما امامنا
ان من ينتقدك فهوا فاشل حتما لانه لم يصل الى متربتك انا تخصصى علوم الارض وكنت اسمع تلك العبارت ولكن هدفى امام عينى فانسى ما تسمعينه وانطلقى فى ما تفعلينه وحاولى بكل الجهد ان تتوسطى لا تتركى لعملك كل شئ وتنسين نفسك ولا تاخذى من الحياه وتنسين تفوقك دئما النجاح يقابله الفاشلين بالسخريه فانسى امرهم واعلمى انهم لا يكنون لكى غير الغيره والحقد
موضوع مميز

[جبل عالي]

الللي بيفكر بالمنطق ده يعتبر سطحي التفكير جدا

ربنا يكون في عونه صحيح

انا اعتقد ان اللي بيقدر يتعامل مع البشر بكل طوائفه

وخصوصا بقا فى لحظات ضعفهم بيكون صاحب

قلب حنون وطيبة وسماحة وقدرة فائقة على الإحتواء


تسلمي ياقمر للموضوع وربنا يوفقك في حياتك

ويهبك السعادة والرضا والرضوان

[нαиαи]

طيب الملاهي النسائيه فيها موظفات الوحده دمها شوربه تقيل اوي و رخمه
و الأبتسامه بتطلع في الأعياد فقط هههه

مش شرط ان المهنه ترتبط بالشخصيه ..

وكمان بعرف دكتور اسنان كنت بروح له دمه عسل

الشخصيه حاجه و الشغل حاجه تانيه : )

[ضحكة عيون حبيبى]

[size="7"]هههههههههه انتى عسل اوى وصح كمان
"مش لازم تعجبى كل الناس , لان ببساطه مش كل الناس بتعجبك "
بس حلوه دى "انتى مش رومانسيه " ده قمه الرومانسيه انك تتحملى الم حد قدامك وتعملى كل وسعك علشان تريحيه[/size]