لقاء خفيف بينى وبين ◣ĐěŠèЯt◥ تابع مسابقة الحروف

[بحر النسيان]

لقاء خفيف بينى وبين ◣ĐěŠèЯt◥ ادعوا من الله ان تستمتعوا معانا بهذا الحوار ويارب اكون قدرت اجمع كل حاجه عن ◣ĐěŠèЯt◥ 1- الاسم ؟؟ أحمد جوده 2- السن ؟؟ 26 3- الوظيفة ؟؟ والعنوان ؟؟ بشتغل محاسب فى كريدى اجريكول من بنها 4- لو الأعضاء عاوز ه تعرف مين هو احمد فى اربع سطور ؟؟ ياترى هيقول ليهم ايه ؟ شب مصرى عادى زى اى شاب وكمان بنهاوى تشوفنى تقول هادى شوية لكن تتعامل معايا تلاقينى طاير بحلم بحاجات غريبة افكارها مطرقعة شوية وبحاول احقق اهدافى ومتفائل مش بحب النكد بحب الناس الرايقة يعنى . عموما اصعب سؤال الوصف لكن يعنى دة شبة انا 5- ولو سألتك عن سبب اختيارك لهذا الإسم ماذا ستقول ؟؟ بص ياسيدى ديزيرت عموما مش اسمى اول ماسجلت انا كان اسمى سمارت ماان وبعد كدة روحت مغيرة للانجلش ل smart m2n وبعديها desert السبب انى بحب الاسم يكون غريب فوقع اختيارى على الاسم دة وقريبا هغيرة بس لما المود يكون رايق ل اسم اغرب . 6- مكانت الاب والام 1- ياترى مكانتهم عند احمد ايه ؟؟ وياترى علاقتك بيهم بتمثل ايه ؟؟؟ اوووو جيت على الحتة الشمال المكانة كبيرة جدا يا محمود عارف لما وانت قاعد فى البيت كدة بتتنفس وانت مطمن عارف احساس ان الناس دى تعب معانا ربت وكبرت ولازم احنا نكون عند حسن ظنهم . طبعا بتمثل حياة روح ديما بحاول اسعدهم 2-وياترى مين الى مكانته بالنسبة لاحمد اكتر شويه ؟؟ المكانة واحدة طبعا 3-ومين الى يحب يتحدث معاه احمد ويعرف اغلبية اسراره منهم ؟؟؟ اللى بيعرف اسرارى هو بص انا من النوع اللى مش بحكى اوى لكن اخويا الكبير ساعات 7- طبعا بما انك 26 سنه احب اقول لك احنا كشباب بتبقه العين علينا مثلا ( اما بتخلص الجامعه وتدخل الجيش كل الى يشوفك بيسالك (اشغالك ايه الوقتى يابرنس ) وساعة اما بتشتغل وتخلصص جيش يسأإلوك برده (مش ناوى تخطب بقه ) على اساس انك هتشتريها من السوبر ماركت ، ومايعرفوش ان دى بتاعة ربنا وقدر ونصيب ،، المهم برده اما ربنا يكرمك ببنت الحلال وتخطبها وتبقه هى حياتك وتملى عليك دنيتك وكملت نص دينك بها ،، ومن المعلوم برده ان الشعب المصرى عنيد وبعد ده كله يسالوك برده (انتا هتتجوز امته ))؟؟؟ ليه دايما بتبقه العين على الشباب من وجهة نظرك ؟؟ هو الناس وراها حاجة غير الرغى يامحمود وحياتك ولو كبرت وعجزت هيقولو ادة هو لسة عايش مشكلتنا ان احنا شاغلين بالنا بحال غيرنا كل خطوة وليها وقتها وفى الاول والاخر دة نصيب سوا شغل جواز كلة نصيب 8- 1-يقولك المثل المحششي (( من طلب العلا نام الليالي وشد اللحاف وقال انا مالي)) )) المطلوب منك رد على هذا المثل ؟ بس دلوقتى ممكن تقول شد الفايبر وقال انا مالى شد التاكى وقالى اهو دةحالى امثال فلة اصل الاغلبية بتحب تعمل كل حاجة فى اخر وقت !طول السنة فستك طاير.مثلا ايام ثانوى العيال كانت عينيها متنفخة من كتر المذاكرة وانا هوب ولا هنا بقعد اسمع اغانى بس كنت بحب اذاكر فى اخرشهر مثلا 2- وياترى حماده كان اخباره ايه فى الدراسه ؟؟ اخبارى فى الدراسة فلة مش كنت بروح اساسا كنت بصحى متاخر بروح بعد ما الكل يدخل بالذات فى الشتا انت عارف الجو بيكون تلج ببقا عاوز المدرسة تتهد عشان انام بس عادى كنت ولد هادى عموما . 3- لو عندك مدرس مش بيشرح فى الفصل هل بتحضر ولا بتسيب الحصة وتمشى ؟؟ لو عندى مدرس فى الحصة مش بيشرح دة نعمة حد يكرة النعمة احضر طبعا واسبها لية يعنى احضرلا انا عموما فى ثانوى مش كنت بروح الا قليل قبل المرحلة دى كان اعتقد كلة بيشرح.. 4- بتفرح اما يبقه فيه اجازه ولا عاوز الايام كلها دراسه؟؟ ياراجل دراسة اية انا بفرح بالاجازة جدا حتى لما كبرت ببقا عاوز انزل اتصور فى النتيجة مع اليوم دة يا باشا مافى احلى من الانتخة 9- 1-ايه راى احمد فى الحب ؟؟ بيمثل له ايه ؟؟ الحب .لو بخطوات جادة وانت فعلا عاوز الانسانة دى يبقى لية لا على الاقل هبقى عارفها 2- لولا قدر الله حبيت انسانه واتعلق قلبك بيها وحبيتها حب ليس له حدود وللاسف اما قررت ترتبط بيها الاهل رفضوا وصمموا على واحده تانيه وقالوا لك دى عروستك وشريكت حياتك هتعمل ايه وقتها ؟؟ بص يامحمود هو ينفع اكل غصب عنى مابالك دى كل يوم قدامك 3- هل احمد ممكن يوافق على عروسه اختارها له احد الابوين ولا لازم هو الى يختارها ؟؟ لا طبعا اهم حاجة الراحة والقبول بين الطرفين والتفاهم بس الاول هفهم اية السبب للرفض واكيد قدام اخترت يبقى انا مرتاح ليها وحاسس ان هى دى وعموما دة مش عندنا 10- 1- ياترى لقيت شريكة حياتك ولا لسه ؟؟ وياترى موصفاتك كان ايه فيها ؟؟ بص هو تقدر تقول تونس مش عارف بصراحة اسئلها لما تبقى تيجى هو انا عموما لسة يا محمود ربك يسهل ربنا يهدى الحااال بس لسة مش مرتبط عموما يعنى بالنسبة للمواصفات مش مواصفات يعنى صعبة. اولا بنت ناس ومحترمة طيبة اقصر منى وفى بينا تفاهم واحس انها جزء منى واكيد تكون بتحبنى 2- وعاوز اعرف رايك فى هذه المقولة كنت اسمعها من اشخاص معينه ((شورت المرأة بخراب بيتها سنة إن صحت فما بالك لومصحتشى؟؟ وهل ممكن تشوار وتعمل بالمشورة ولا لا ؟؟؟ مصحتشى الكلام دة بص اولا انا مش بحب اكون شخص ديكتاتور باخد رايها طبعا بس راى هو اللى يمشى لاطبعا لازم يكون فى تفاهم بينا وتبادل اراء لكن القرار الاخير للراجل 11- قلم وورقة بين يديك ماذا سوف تكتب من مداد حبرك على سطور تلك الورقة ولمن؟ حلوة من مداد حبرك دى انا كان القلم بيقعد معايا ترم يامحمود بص من قلة الكتابة .اكتب اللهم أعني على ذكرك وشكرك وحسن عبادتك 12- ايه رايك فى الزمن ده ؟؟ وليه اجدادنا بيقولوا علينا ان احنا اجيال ليعلم بيهاالى ربنا ؟؟ وهل الجيل ده احسن من الاجيال السابقه ولا كلها واحد ولا بتختلف من جيل لآخر ؟؟ كل ما الزمن بيعدى بيجى اوحش دة طبيعى ولما نكبر هنقول نفس المقولة دى على الاجيال الجديدة الدنيا بتتغير يا محمود وطبعا كل جيل مختلف عن التانى دة غير اللى جاى سنة الحياة احنا بالنسبة للجديد بعد سنوات هنكون قدام 13- أغمض عينيك لدقيقة وتخيل أنك تملك العالم بين يديك ماأول أمرين تفعلهما؟؟ اهو نغمض اول حاجة الف العالم كلة بحب الطبيعة بشكل جنون وياسلام لو الف على كل جزر العالم مزاج .تانى حاجة انام ووقت ما احب اصحى اصحى عارف انت احاسس الفشل دة نجربة و هدخل مصر كاس العالم 14- كلمة (( والله ماأعرف )) كلمة من زمان جدا مسمعتهاش ،، ممكن حماده يقولى لو اتسأل على حاجه وميعرفهاش ممكن يقول معرفشى ولا لازم يفتى زى اغلبية الشعب المصرى ؟؟ وابصط مثال على ذلك ((كنت فى مشوار فى القاهرة وسألت على اسم حاجه وهى موجوده فى الشارع ده وقبلت واحد ماشى فيه وبساله عليها قالى مش فى الشارع ده يااستاذ بعد 4 شوارع رحت وسألت هناك قالوا ليه ارجع الاربع شوار تانى وفعلا رجعت ولقيت العنوان فى الشارع الى كنت سال عليه الراجل وليه دايما الشعب المصرى يرفض يقول معرفشى من وجهة نظرك ان الكلمه دى عيب ولا ايه ؟؟ طب انت يرضيك اكون غير الشعب هو بالنسبة لة كدة عاوز يساعدك وياسلام لو قولتة حاجة وحس انة مش عارف يوصف. او مش عارف المكان لازم يفتى و يقول برضو طب روح هناك واسئل ويمين فى شمال .لحد ما تلاقى عمارة انت زعلان على واحد توهك امال انا بقا. بص ياسيدى قابلنى واحد وبسألته على دكتور قالى دة نقل من هنا بقالة سنة وراح المهندسين قولتة ياراجل!!!!!!! قالى والله وفى شارع جامعة الدول كمان روحت هناك وانا كنت فى مصر الجديدة بسئل واحد قالى مين قالك كدة دة فى مصر الجديدة بعتة محترمة ومشوار رايق روحت مصر الجديدة تانى وطلع موجود ولاهو ولا نقل ولا حاجة طبعا مش عاوز اقولك كنت بقول اية عشان الرقابة 15- 1- احمد متابع للسياسه ؟؟ اكيد متابع 2- ورايك فى الى بيحصل فى مصر ؟؟ زى اى مصرى بيحلم ببلد كويسة مستقرة فى كل شى سياسيا اقتصاديا اتمنى المرحلة دى نعديها خلي البلد تشتغل شوية ولا كل سنتين هنغير رئيس الاختيار للشعب وهو صاحب القرار 3-وهل ممكن مرسى يرجع تانى رئيس ؟؟ واللى بيقول مرسى هيرجع دة مش عايش هيرجع ازاى مش فاهم !! 4- وتتوقع ان السيسى ممكن يترشح للرئاسه ؟؟ اتمنى ان السيسى مش يرشح نفسة يبقى عمل اكبر غلط وقلب الدنيا علية احسن لة انة يفضل فى الموقع العسكرى فقط. 5-وليه الشعب كله بيكلم فى السياسه الوقتى ؟؟ وليه أغلب الناس متعلقه بالسياسه فى الزمن ده حتى الناس الى مش متعلمه متابعه السياسه ؟؟ ((طبعا ان عاوز اجابتك تكون راسيه كده وبلاش نطلع عن المضمون عشان طارق مش يحذف المضمون )) والله احداث البلد ولا افلام هوليود دراما واحداث متعاقبة وبعدين الناس كانت فى زمن حكم 30 سنة من بعديها الناس حست انها بتختار بجد ل اول مرة فا تلاقى اى واحد بيتكلم فى الاحداث والبلد واللى فيها وكدة .لا مش تخاف طارق متفهم مش هيحذف 16- 1- رايك فى التلفزيون فى الوقت الحالى ؟؟ اغلبة عك فى عك 2- وليه بتحس بالمملل اول ماتفتحه ؟؟ الله دة انت عارف بقا هههه بحس ان كلة شبة بعض ،دة شبهة دة . لسة امبارح فتحت اتفرج على فيلم على قناة كدة مش فاكر اسمها توكتوك باين مليت ياراجل نص ساعة اعلانات وياريت اعلانات جديدة بتتعاد روحت قايم عموما انا الفترة الاخيرة متابع قليل اوى 3-زمان كان الواحد بيحب يتابع التلفزيون دلوقتى لا ليه ؟؟ يمكن عشان تحس انة لا جديد برنامج دة زى دة زى دة وكمان النت سحب من التليفزيون رصيد كبير 4- ايه رايك فى الاعلانات الى بقت بتاخد اكتر من ربع ساعه ولو بتتفرج على فيلم مثلا بيقعد اربع ساعات انما لو مفيش اعلانات بياخد ساعتين بالكتير ((هل ده السبب الى جعل التلفزيون ممل ولا فيه سبب تانى من وجهة نظرك ))؟؟؟ هو صاحب القناة عاوز اعلانات دى بالنسبة لة بيعوض الفلوس اللى بيدفعها فمش عندة مانع يقعد خمس ساعات !!هيقول لا يعنى مش مهم عندة اللى قاعد بيتفرج دة عادى بالنسبة لة ..فا دة بيمل الواحد لو حاجة عاوز اشوفها بقول هشوفها على النت بعدين. لكن السبب ان دخول النت سحب كتير 17- المرض ليه كثرت الامراض فى الوقت الحاضر ؟؟ وليه اغلب الامراض ظهرت ايامنا مثل الكبد وانفلونزا الخنزير؟؟ وهل مع تقدم العلم يزداد الامراض عاوز رايك فى الموضوع ده ؟؟ مش بقا فى ضمير الناس عاوزة تكسب حتى لو على حساب صحتك شوف كامثال مثلا الزراعة .الناس بتستخدم مبيد عشان ينجز ويكسب بسرعة زى الطماطم مثلا بتترش اكسيد عشان تحمر وتتباع والبلح. والاكسيد دة اخطر مما يمكن وغيرة وغيرة ودة بيظهر الامراض طبعا. وكمان ثقافة الشعب يرمى فى النيل عدم الاهتمام يلا ويقولك اصل احنا شعب حديد 18- 1-ايه رايك فى المنتدى دلوقتى ؟؟ المنتدى نايم شوية ودة طبيعى دراسة وكدة لكن افضل مما مضى وطبعا الفيس اخد شوية من طاقات البعض انا حضرت السايت زمان كان اية لكن انا عموما بحب المكان بدخل عشان انبسط اروق ببعد عن اية حاجة فيها مشاكل ومع نفسى اجرى فى السايت 2-وعاوز رايك بقه اختيارك انك تكون مشرف اليوتيوب ؟؟ وليه برده حبيت القسم ده ؟؟ بالنسبة لليوتيوب انا مدمن يوتيوب جدا بص على طول موجود بدور بسمع بلف .وحبيتة عشان هو اقرب حاجة لية 3-لو حابب تقول كلمه للاعضاء بخصوص القسم ده تقول ايه ؟؟ اليوتيوب ممتع هتلاقى فى كل حاجة افلام اغانى مسريحات افلام وثائقية كلة معرفة مجانية 4-لو خيروك انك تختار عضو مثلا يكون مشرف معاكم فى اليوتيوب تختار مين ؟؟ طبعا سعد منور القسم اضافة راقية جدا لكن لو حد تالت يعنى امممم رباب اللى هى برنسس برضو بتحب اليوتيوب وكانت موجودة بالمناسبة بس اختارت الطبخ 5-عاوز منك تعرفنى يعنى ايه اليوتيوب شرح مبسط كده للاعضاء وليه برده ؟؟ شرح اليوتيوب فديوهات سوا فن ثقافة اغانى كلة موجود ةمرفوعة وللمشاهدة :18 19- عاوزك تختار 10 اعضاء من المنتدى تكلم عنهم فى كلمه واحده مميزاتهم وبرده عيوبهم ؟؟ انت الى تختار ؟؟ خلينى اعمم اجابة السؤال ومش هخص حد وبكل امانة طوال فترة وجودى هنا سوا الفترة الماضية او لو يعنى فى جاى انا بحترم الجميع وعمرى ما كان فى دماغى اصلا انى اكره حد. بحب ان اكون ضيف خفيف وان بعد كدة لما امشى لو حد افتكرنى يعنى اكون سايب ذكرى حلوة 20- لو دخلت المنتدى يوما ما ولقيته بيقولك عذرا الصفحه المطلوبه مقفلة نهائيا ؟؟ ياترى هتزعل ولا لا ؟؟ وياترى ايه الى هيبقه فى ذاكرتك من المنتدى ؟؟ بص لو انا غلطان او سبب منى مش هزعل عشان عارف السبب. واكيد الواحد بقالة 4 سنين حفظنا القوانين مش معقولة بعد دة كلة ابقى رمادى واالسايت مكان انة احبة هفتكرة بالخير كل الايام الحلوة حتى بعد الرحيل 21- من الافضل من جميع النواحي العرب ولا الاجانب !!!؟ سؤال عجبنى كثيرا وحبيت اطرحه عليك ؟؟؟؟؟؟ كل واحد فيهم لة مميزاتة ولة عيوبة 22- 1- ياترى ايه رايك فى الحلقة ؟؟ الحلقة جميلة يا محمود يمكن انا مقل فى الظهور مش بحب الاضواء الكاشفة واتمنى التوفيق ليك يلا نصيبك بقا وقعت معايا اتمنى اكون وشى كويس 2- عاوز منك سؤال واتجاوب على نفسك كنت تتمنى انى اساله وانك تجاوب عليه ؟؟ سؤال اسئلة لنفسى؟ واجاوب كمان الاتنين ياراجل انت تقريبا ناقص تاخد رقم البطاقة عموما كنت متوقع مثلا بتحب اكل اية؟ سؤال المدارس دة ؟اقولك المشويات بشاميل كدة 23- رايك فى الى بيقولوا ان مصر هتغلب غانا 6 /0 وايه السبب ان منتخب مصر يتلقى هذه الهزيمة وهل ممكن مصر تفرحنا ولا ده حلم ؟؟ بص المنتخب تعبان دفاع تعبان وسط تعبان جون تعبان مش هنضحك على نفسنا فاطبعا نتيجة دة لو كسبنا مش هنكسب حتى 6 انت مش بتلاعب مركز شباب وغانا فريق قوى الكلام دة لو بتلاعب مثلا فريق تعبان وفريقك قوى اة نحلم ونقول ممكن لكن القماشة تعبانة مافيش غير كام واحد والكورة لعبة جماعية فا صعب .مش عاوز الناس تحلم اصل بقيت اسمع كلام كتير اصل اة وممكن !!1ازاى عموما مافيش مستحيل لكن منطقى صعب جدا والسبب انك اولا قابلت لسوء حظك اقوى فريق فى الفرق التانية وكمان سوء التشكيل والتخطيط والدفاع اتمنى ان اكون محاور يعجبكم ويارب الحلقة تعجبكم كتيرا كان معكم المحاور محمود (بحر النسيان )

[حَرفُُ هجآءّ]

السلام عليكم
الحلقة فعلا جميله اوووى
احمد انا معرفش عن شخصيته اى حاجه ويمكن اعضاء كتير متعرفش شخصيته
نورت احمد الحلقة وميرسى اوى لتلبيه طلبى
بحر النسيان اسئله جميله وشامله كل حاجه
بالتوفيق

[SiLver Spectra]

سو كيوت يا جوده )

اقتباس هو الناس وراها حاجة غير الرغى يامحمود وحياتك ولو كبرت وعجزت هيقولو ادة هو لسة عايش

هههههههههه بالظبط كدا

منور و الله ..هادي كدا و ابن حلال
و الله ماحاجه مبوظه الشعب اليومين دول غير السياسة

[همسه دموع]

بحر النسيان لقاء بجد جميل وسهره حلوه

واحمد اتشرفنا بمعرفتك

فى انتظار حلقه جديده وعضو جديد


بحر النسيان
وبصراحه ربنا يوعدك بلى يجيبك فى برنامج ده انت مش سبت حاجه اصلا غير وسئلت فيها هو انت وكيل نيابه ولا محامى ههههههههههههه

[واد حبيب]

حلقه جميله جدااا
واسئله واجابه جميله جداااا
بتوفيق ان شاء الله

[جبل عالي]

حلقة جميلة وهادية وراقية فعلا

تسلم يابحر للإستضافة ولنوع الأسئلة

وكل كل الشكر للمستضيف ( ديزرت) ربنا يوفقك يارب بحياتك وعملك

تحيتي وتقديري وبكل التوفيق

[™Amiliya]

لقاء جميل واسئلة فعلا مدروسة وحلوة
دا حواركم وبالتوفيق ليك ĐěŠèЯt

[game010]

لقاء جميلة جداً
ضيف رائع و مميز
اسئلة جميلة و اجابات رائعة
فى انتظار المزيد
تحياتى

[countess]

اقتباس 4- ايه رايك فى الاعلانات الى بقت بتاخد اكتر من ربع ساعه ولو بتتفرج على فيلم مثلا بيقعد اربع ساعات انما لو مفيش اعلانات بياخد ساعتين بالكتير ((هل ده السبب الى جعل التلفزيون ممل ولا فيه سبب تانى من وجهة نظرك ))؟؟؟ هو صاحب القناة عاوز اعلانات دى بالنسبة لة بيعوض الفلوس اللى بيدفعها فمش عندة مانع يقعد خمس ساعات !!هيقول لا يعنى مش مهم عندة اللى قاعد بيتفرج دة عادى بالنسبة لة ..فا دة بيمل الواحد لو حاجة عاوز اشوفها بقول هشوفها على النت بعدين. لكن السبب ان دخول النت سحب كتير

انت جيت في ملاعب آحمد ههههههههههههههههههه

هو بيعشق الأعلانات بس مش دي الممله لا القديمة آويييي

اجباتك جميلة وكلها كدا رايق مروق ديما بقا

وربنا يوفقك يا احمد بجد ديما شخصيه كدا تحسها اخوك قريبه يعني مريح اوووي

حلقة تستاهل التقيم على آسئلتك

[DESERT]

فى البداية احب اشكر محمود على الاستضافة واتمنى لة التوفيق
ويكفى ان عرفتة عن قرب اول مرة يحصل كلام بينا
بجد شخصيةجميلة و انسان محنرم اتمنى لة التوفيق دايما