الحلقة3 من مدونتك في سنة مع ( Words Whisper )

[جبل عالي]

ازيكم يا احلى اعضاء .... اعضاء قسم صفحات مكشوفة النهاردة الحلقة التالتة

مع الرقيقة وصاحبة القلم الفلسفي الخاص
Words Whisper
تعالو نشوق الحلقة مع بعض




ازيك ياقمر وكل سنة وانتى بكل الخير ياجميل

وإنتِ بخير وصحة وسلامة ..

سنة فاتت بكل مافيها اكيد سايبة جوانا علامات

والعلامات دي كتيرمننا مسجلها على مدونته بما انها

المتنفس لكل واحد بيكون فيها مع نفسه وقلمه وبس

أكيد كل يوم من أعمارنا بيترك فينا أثر ..

فكرة موضوعي هو انك تجاوبي على الأسئلة دي

من خلال مدونتك ساعة ما كتبتي ورأيك او تحليلك

للمشاركات دي دلوقت .... ها جاهزة معايا ؟؟

جميلة الفكرة ..
تسلمي عليها ..

اتفضلي يا قمر



* هتجيبي احب مشاركاتك (اقتباس) وتقولنا ليه بتحبهيا ؟

بصي هو عامة
أي حاجة بكتبها فهي بتعبر عن جزء مني
حتى لو مش بتعبر عن حياتي الشخصية
لكن بتعبر عني بردو ( رؤيتي - مبادئي - أفكاري .... الخ )
وبالتالي كل اللي بكتبه قريب ليا
آه فيه حاجات بتكون الأقرب بس كله بحبه
عشان كدا صعب أختار
وخصوصاً ان المفروض أدور بمشاركات عام كامل ..




* أصعب مشاركة برضو ولك حرية الشرح

اقتباس وجع بلا أرفف و لا سقف !!|~

صعب أرجع لتواريخ قديمة
بس المشاركات اللي بتحمل التعبير دا عامة ..




* أسوأ مشاركة ونفس الموضوع

لا أنا مش بكتب حاجة سيئة
أنا حلوة وأي حاجة أكتبها حلوة




* أغرب مشاركة

مشاركة غريبة ليا !
أكيد مادام أنا كاتباها فهي مش غريبة عليا
بس ممكن دي لأنها مُبهَمة :

اقتباس قرف ..~ بس كدا كتبت كلام كتير ومسحته كله وسبت دي ..

* أطول مشاركة

دي من المشاركات الطويلة ::

اقتباس أحمد الشقيري رااائع أصلاً عقلية عربية مسلمة راااااائعة ماشاالله حد فاهم الإسلام مش بس مُلقَّن فعارف ازاي يعرف الناس بالدين وفرق بين المعرفة و التلقين .. الله خلق البشر الأصل فيهم الخير الأصل الخير باختلاف الديانات الفطرة بتتأثر بالتلقين و البيئة و الشخص ذاته لكن أبداً مش بتموت لأنها في أصل الخلقة .. عجبني اوي لما قال ان دا احترام آه دي حقيقة لما هتتعامل مع اللي قدامك بانك تحسسه انك بتحترمه هتخليه يبادلك الاحترام ويحترم حسن الظن اللي وضعته فيه إنما لما انت بتخوِّنه و شايفه وحش يبئا طبيعي انه علاقة الاحترام بيننا تتكسر .. إيه اللي يخلي دول عادي تحط شيء تجاري بشكل مفتوح معتمدة على أمانة الناس ؟؟ ان الدول دي عارفة ان الأساس صح وان التعليم عندهم بيعلم من ينتسب ليه الـ[أخلاق] بينما احنا كدول شرقية التعليم عندنا ان لسه شايفين انها مشكلة ان المدرس اتمنع يضرب الطلبة وفي بيوتنا لسه شايفين ان الضرب هو وسيلة التربية !! ووظيفة المدرس و كل وسائل التعليم هي التلقين !! ونسمع اللي في الكتاب !! وبنطلع في الآخر بنتيجة ان الأساس غلط و ان دين الأخلاق اللي بننتسب ليه لانلتزم بأخلاقياته عشان بنعلم غلط ومصرين نتمسك بأساليبنا الغلط وبعتمد على التلقين مش التعليم احنا عارفين ان الأساس غلط ,, هما عارفين ان الأساس قوي و صح < دا الفرق ببساطة [التعليم] ثقافة مجتمع .. من الجزئيات المهمة بردو ان زيادة نسبة الفساد الحكومي بيكون تأثيرها زيادة نسبة الفساد العام لأن الدول اللي فيها الفساد الحكومي أعلى بتكون فيها ثقافة المجتمع أعلى فسادا .. احنا شعب كويس وملياااااااان خير بس بارعين في إعطاء نفسنا رسائل سلبية وان نفضل نقول مش هنعرف و الدنيا وحشة و الناس وحشين و ..... الخ احنا اللي مش عايزين نشوفنا كويسين حتى لما بنشوف حاجة كويسة بنفضل مُصرين على التشكيك هما شايفين الناس بتدفع و مصرين ان الفكرة هتفشل !!! بجد الشعب المصري خيِّر و جدع اوووووووووووي بس محتاجين نؤمن بالخير جوانا ..

ودي بردو وبعتبرها مشاركة مهمة ::

اقتباس فيه حاجة حابة أتكلم فيها وممكن أبئا اعملها موضوع مستقل -الله أعلم- ..~ ------------------------------------------ ( إسرائيل ،، إسرائليين ) بداية تماماً برفض الكلمتين دول ولو لاحظتم أي رد ليا في السياق دا بكتب ( الصهاينة ) لأني فعلا برفض مجرد ذكر المسمى (اسرائيل) وإنما هو ( الكيان الصهيوني - الصهاينة ) ومش حد يقولي المُسمى مش هيفرق مع كامل الاحترام للرأي دا لكن بالنسبة لي لاااا يفرق كتييير لانه مجرد التسمية وترديدها هو اعتراف بشكل ما بوجود دولة بالاسم دا لما أنادي لشخص وأقوله يافلان يبئا أنا بعترف ان دا اسمه وأنا لاأعترف بوجود دولة للكيان الصهيوني وبالتالي الاسم دا مش في قاموسي تم الاعتراف دوليا بــالكيان الصهيوني المحتَل على أرض فلسطين كدولة (إسرائيل) عام 1948 برفض كلمة (اسرائيل) كدولة لكن بالتأكيد لاأرفضها كلفظ ديني (يعقوب عليه السلام) وبرفض تماما التطبيع مع الصهاينة لأنه عدوي واللي ايده ملوثة بدمي مابيصير أسلم عليه (عار) برفض الصهيونية لكن كمان برفض الخلط بين الصهيونية واليهودية اليهودية دي دين يُحترَم واليهودي مش شرط هو الصهيوني اليهودي دا شخص ديانته اليهودية والديانة ليست جريمة لكن الصهيوني دا مجرم يعتنق اليهودية فيه يهود مش صهاينة ولهم وقفات إنسانية مع الشعب الفلسطيني ورفضوا أساسا قيام كيان صهيوني على الإجرام لكن كمان مهما كان الشخص مُدعي للسلمية فمجرد موافقته على حمل اسم دولة تمارِس الإجرام والاضطهاد وسرقة وطن فدا لايُبرؤه من ذنب الكيان دا مادام قبِل الانتساب له مع استثناءات الناس اللي كبرت ولقيت نفسها معاها الجنسية زي البنت اليهودية اللي كانت بتدافع عن حقوق الفلسطينيين وقتِلت تحت جرافة صهيونية عشان وقفتْ قدامها واعترضت على هدم بيت رجل فلسطيني فسُحِقَت بالجرَّافة مع البيت .. فعلا فيه كلمة سمعتها قريب من (أحمد راتب) الممثل وقلت عنده حق تماما كان بيقول انه سبب ظهور المتعصبين دينيا المنتسبين للاسلام هما الصهاينة تعصب ولَّد تعصب وهو عنده حق فعلا والمتطرفين المنتسبين للإسلام فعلا وجودهم ارتبط برد فعل للتعصب الصهيوني للأسف بيتم إستخدام الأديان للجرائم !! زمااااااان كان فيه حروب صليبية بردو كانت قائمة على استغلال الدين وانه دا لأجل الدين رغم انه لايوجد دين عنصري والأديان السماوية من رب الرحمة والعدل لكن علماء الدين للأسف هما اللي فيه منهم بيحرفوا ويشوهوا الأديان الصلبيين خرجوا تحت اسم خدمة الصليب بسبب كذبات رجال الدين الصهاينة خرجوا تحت اسم خدمة دينهم واقامة دولة دينية بسبب تحريفات رجال الدين والمتطرفين الإسلاميين خرجوا للقتل بسبب بردو تحريفات مفاهيم الدين الفرق بين الصهيونية واليهود زي الفرق بين الحروب الصليبية والنصارى الحروب الصليبية كانت حروب من نصارى أوروبا موجَّهة للشرق وفي الوقت دا نصارى الشرق كانوا مع مسلمي الشرق مش مع حروب أوروبا ..

ودي ::

اقتباس بالإمكان أن أتقبل اليهودي لأن دا صاحب دين واختيار دينه حرية مكفولة له واحترام الأديان واجب لكن لايمكن تقبل صهيوني تقبل ان يكون تعريف هويته ( إسرائيلي ) يعني تقبل انتماؤه للظلم و الإرهاب و الفاشية و السرقة و ...... الخ .. المواثيق الدولية بتنص على احترام سيادة الدول ومش عاد فيه حاجة اسمها دولة تحارب دولة عشان تاخد أرضها الكلام دا كان أيام الهمجية الاستبدادية حتى لو وُجدَت دول بتحاول فرض سلطاتها فدا بيكون مُقنن لكن الجيش الوحيد في العالم اللي مش بيحترم دا ولسه بيقاتل بطريقة همجية للاستيلاء على أرض غيره هو الجيش الصهيوني !! مش من المنطقي ان الأرض ( طابا و سيناء ... الخ ) اللي مات عليها شهداء ليحفظوا حرمتها تبئا مباحة للي قتلوا الشهيد تحت بند السلام أصلهم [سياح] أرض مباركة مباحة للي استباحها !!

ودي ::

اقتباس من الطبيعي والبشري أننا لانعيش ضمن المدينة الفاضلة لكن أن تكون المدينة الفاسدة فهذا هو ماليس طبيعيا ليس الفساد فقط أن يُترَك الدين وإنما أيضا أن يُؤخذ بجهالة وأن يُدَّعى العلم به وهو مأخوذ بتجارة ونقطة أكثر أهمية من كل هذا لاأحد يكره الدين فـ هو من يُبقينا بكرامة البشر لكن الدين صار يُخاف لأنه وللأسف صار هناك من يدعون أو يُدَّعى لهم أنهم الدين !!~ ولاشخص هو الدين لأن الدين هو الدين فقط وليس المتحدث عنه فالمتحدث بشر ناقص وقد يكون فاسد والدين كامل لايمثله بشر غير رسول الله صلى الله عليه وسلم ولأنه كثُر من يدعون أنهم الدين كثُر فسادهم وكثر الجُهَّل بالدين المنساقون ولذا فالذنب الأكبر وذنب كل مُعرِض عن الدين وخائف منه في رقاب أولئك المُنفرين منه ولو كان صلح العلماء لكان صلح المستمعين وصلح المجتمع لكن الكثيرين ليسوا إلا فساد مدعي العلم والدين للأسف يعتمدون على الترهيب ويلعبون على الجهل ويتشددون ويدعون للدين أراءهم .. أصلح الله علماء الأمة ليصلح الخلق فعندما كان العلماء علماءً كانت الأمة أمة وليست هاوية ..

ودي وبعتبرها مهمة جدا ::

اقتباس كنت النهارد بشوف فيلم أجنبي وتطرق بشكل كبير للحروب الصليبية وبعدين الفارس بيقول للقس انه دا مش عشان الرب فالقس بيقوله انه المتحدث باسم الرب !! بعيدا بئا عن باقي الحوار مقزز أوووي بجد ادعاء أشخاص انهم المتحدثين باسم الرب عشان مصالحهم ماهو من مصلحتهم انه يعطوا نفسهم قُدسية ينالوا بيها الـ حظوة بشكل ما غالبا مادي والغريبة انه إلى اليوم مُدعي انهم رجال الدين بيلعبوا اللعبة دي وكل الفساد واللاأخلاق يحدث باسم الدين وأوامر الرب قامت الحروب الصليبية تحت عباءة الدين والكنيسة قالت لهم انه اللي يموت فدمه في سبيل الرب وانه دمه هيكون طاهر وانهم بيحاربوا الآثمين وبينتقموا للـ رب !! الحرب اللي شملت الأطفال كمان كانت لقتل الـ آثمين !! الصهيونية قامت تحت اسم إعلاء الدين اليهودي والانتصار للدين المغلوب أهله !! وبئا قتلة الأطفال عندهم أبطال !! المتشددين الإسلاميين القتَلة قالوا لهم بردو انهم بيحاربوا دولة الطاغوت وبيقتلوا من دمهم مباح لأنهم تابعين للطاغوت !! وانه دا الجهاد واللي يموت وهو قاتل يبئا شهيد !! وبئا قتل المسلمين جهاد وشهادة !! وكل دول مجرد إرهابيين تحت اسم الدين وخدمة الرب بسبب كاذبين باسم الدين !!

كنت كاتبة واحدة تانية فُصحى بنفس المعنى دورت عليها مش لقيتها ..



* أقصر مشاركة

فيه مشاركات قصيرة كتير
بس هختار دي ::

اقتباس لا أنسى رواية شاركتْني البكاء ..

* مشاركة بتندم عليها

لا مش فيه
مش بندم على كتاباتي ..



* مشاركة نفسك تعيدها

اقتباس حمني جاب لي هدية مسبقا لعيد ميلادي انني مبسوطة .. ربنا يسعده ياااارب ..

عشان كنت سعيدة كتير ومازلت الذكرى دي بتسعدني
وكل المشاركات اللي اتكلمت فيها عن سمسمة أو زينب ..



* مشاركة نفسك تنساها

الوجع عامة
مش المشاركة وإنما الذكريات
أصل نسيان المشاركة لايُنْسي الوجع ..



* مشاركة مش فاكرها اصلا

تقريبا فاكره كل الحاجات اللي كتبتها ولو معنى ..



وآخر سؤال ليكي ياترى بدأتي السنة الجديدة على مدونتك
إزاي ؟؟ وبأي إحساس ؟؟

اقتباس new year ياااااااااارب أسعد الناس اللي بحبهم وعايزاهم معايا عرَّفتهم فيه ناس قررت اني أحطهم جوايا في 2014 بحبر عشان أكيد عايزاهم معايا وواثقة انهم هيحافظوا على وجودهم معايا وأكيييد سمسمة أولهم واقعيا هما شخصين بس سمسمه و نانو وفيه تصنيفات تانية بس ماعلينا .. سمسمة ياااااااااااااااارب يكون عام أسعد عليكِ و عليا وعلى كل اللي بنحبهم وربنا يحفظ لنا اللي بنحبهم ♥♥

مبسوطة و خايفة كنت ..

وايه اللي بتتمنيه لباقي أيام المدونة ؟

ان يكون الجاي فيها أكثر سعادة ..



سؤال أخير ... ياترى هل استرجاعك للمشاركات اللي فاتت دي
ايه أثره عليكي ؟؟

افتكرت حاجات كتير وأنا بقلب ف المدونة ..

طب وفكرة الموضوع ايه رايك فيها ؟

جميلة كتير ماشاالله
تسلمي عليها
وبالتوفيق ..


انا طماعة بجد بجد وعايزة طلب أخير
(ممكن تعرضي لجبل مشاركة من على مدونتي وتقوليلي رأيك فيها ؟؟؟)

عامة مدونتك راقية بحبها ..
هختار من المشاركات الأخيرة ::

اقتباس الحياة كلها عبارة عن حلم .... مجرد حلم لا يمس الواقع بأي صورة أو الحقيقة لأن الواقع الأصل والحقيقة الوحيدة هي ....... الآخرة حيث لاموت بعدها هناك تكمن الحقيقة والواقع .... فلماذا نحزن ؟؟ ولماذا نتمسك بالحياة هكذا ؟؟؟

جميلة أوي المشاعر وتعبيرها جميل
بس الحياة مش حلم هي واقع تماماً
الأحلام لانُحاسَب عليها والحياة بنحاسب عليها
هي الحياة الدنيا مرحلة في حياتنا لكن مش هامشية
هي حياتنا واللي هيُبنى عليها مصيرنا الأخروي
ومش ينفع بردو نهمشها رغبة في الآخرة
آه احنا عايزين الآخرة لكن كمان الله اعطانا حياة دنيا نعيشها
وبإيدنا نخلي أيامها أكثر خيرا وأفضل قد الإمكان ..

تقبلي تحيتي وتقديري ياجميل

تسلمي جبل
فكرة جميلة والـأسئلة جميلة ..
شكراً ليكِ ولكل اللي هيتواجدوا ..


انا اللي بأشكرك من كل قلبي ياقمر


والى لقاء جديد ومدونة في سنة

جبل عالي

[ملك جبال الاحزان]

أ.اسماء من الناس اللى مدونتها جميلة
وانا اتشرف انى من متابعينها
تنظيم مميزاحسن كل مرة
وضيوف مميزين ايضأ
اجابات جميلة منك أ.أسماء

اقتباس * أسوأ مشاركة ونفس الموضوع اقتباس لا أنا مش بكتب حاجة سيئة أنا حلوة وأي حاجة أكتبها حلوة

يخربيت التواضع
لا فعلآ اجابات كلها مميزة
تسلم الايادى للضيفه والمسستضيفة

[ساحر الأحزان]

أستضافة جميلة جبل

واسماء من اصحاب التفكير

والاراء التى تحترم

ومدونتها جميلة

بتمنى ليكى وليها كل توفيق

[Lamees]

لقاء جميل مع سمسمة الجميلة
وذكريات مدونة أجمل
يدوم الجمال ي جبل
روني

[العاشق الذى لم يتب]

حوار رائع
ولقاء بدكتورتنا العظيمة أسماء
تشرفت ومررت أكثرمن مرة على مدونتها
الأخت أسماء أحسبها ولاأزكى على الله أحدا
تحمل قلب كبيروعقلا مستنيرا
جميع كتاباتها تشدنى حيث أجدالفقائدة
والعقلانية فى كل ماتكتب
حتى ردودها لها نكهة خاصة
ومرور أسعد به إينماكانت
كل سنة وأنت طيبة دكتورتنا
ربنايسعدك ويحقق لك كل ماتتمنى
وشكرا أختى أم عبدالله
من خلال برنامج الجميل
نتعرف أكثر وأكثرعلى جوانب فى الشخصية المضبفة
سعدت بمرورى هنا
تقبلوا تحياتى وودى
رفعت كان هنا

[دمعه حائره]

ستضافه حلوة وسمسمه جميله ومدونتها رائعه
نورتى حبيبتى واختياراتك قيمه
تسلمى جبل على الاستضافه

[الأميرة رودي]

حوار جميل جداا وهادي
طبعا مدونه أسماء فيها كل معاني الرقي والروعه بدون كلآم وأنا من أول متابعيها
بحب جدا فلسفتها ورؤيتها لأغلب الآمور وعقليتها الواعيه
وبرغم انها كتير بتكون مهمومه وحزينه بس بيعجبني ثقتها فى الله وفى نفسها وتفاؤلها
ربنا يسعد أيامك ي سمسمه ياآرب ويخليلك أحبابك وأصدقاءك اللى بتتمني يكونو جنبك
ومش تتحرمي من اى حاجه بتحبيها

استضافه مميزه جبـل
وضيفتك جميله حقيقي
تسلـمو

[™Amiliya]

حلقة جميلة مع شخصية اجمل ومدونتها فعلا جميلة

دام التالق لكما

[۩۩ elMagic ۩۩]

حلقه مميزه جداا
وأسماء شخصيه راقيه
ومدونتها من المدونات
اللى باحب اتابعها كده من الوقت للتاني
تسلمي جبل لمجهودكـ
مودتــي ,,

[كوين ميرو]

اختيار موفق اموله حبيبتى

ضيفه راقيه وصاحبه قلم وفكر ناضج ومميز

اسماء رحله رائعه فى مدونتك

بتمنالك السعاده ياقمر

تسلم ايدك جبل مجهووود رائع ياقلبتى

تحياتى