استضافه سياسيه 2 ~ و معانا Bright Brain

[big bốss]

السلام عليكم و رحمة الله و بركاته النهارده تانى حلقه من الاستضافه السياسيه و معانا الدكتور احمد Bright Brain عضو مميز ===================== قبل ما أبدأ كلامي أحب أقول حاجة مش لازم تكون حيادي أو أقول لك مفيش حاجة اسمها حيادي أو بمعنى آخر أوعى تكون حيادي خلي لك رأي ومبدأ امشي عليه وفي نفس الوقت تكون عادل " وإذا قلتم فاعدلوا " قل ما لك وما عليك ومتتعصبش لفكرة معينه وتدافع عنها عمال على بطال شغل الجمجمة شوية وهي صحيفتك املأها كما شئت 1- اى فلسفه او نظام سياسي بتعتنقه او بتشجعه ( الشيوعيه - العلمانيه - إمبريالية - الليبراليه - ....الخ ) و لماذا ؟ أشجع النظام الاسلامي ليه ....!! لأنه هو النظام الوحيد إللى كفل لكل واحد حقه كفل ان كل ظالم له عقاب مش كده وبس دا عقابه هيخلي اللي يفكر يظلم بعده يخاف يظلم نظام مفيهوش سيد وعبد مفيهوش أي شائبه بس احنا نفهم الاسلام صح ونطبقه صح " حكمت فعدلت فأمنت فنمت يا عمر " دا إللى أقصده وإن شاء الله هنرجع لعصور عظمة الإسلام من جديد هنرجع لعصر زي عصر عمر بن عبد العزيز إللى كل لما كان يخلص حاجة من حاجيات الدولة تخلص وبرضوا لسه فيه في الخزينه لدرجه انها قال " انثروا البذور على قمم الجبال لكي لا يقال جاع طير في بلاد المسلمين " ولا نرجع لعصر كان فيه قائد جيوش المسلمين شاب عنده 16 سنه وسيدنا أبو بكر وسيدنا عمر ماشيين وراه وهو القائد بتاعهم ولا نرجع لعصر كان لما جيوش المسلمين يمشوا بالسفن بتاعتهم في البحر المتوسط فمدن أوروبا تخاف تدق أجراس كنائسها خوفا من أو يستفزوا المسلمين فيفتحوا المدينه وييجي زعيم منهم يستنجد بملك الصين ويعرفه انه خايف من المسلمين ييروح ملك الصين رادد عليه ويقول له لا قبل لي برجال لو أرادوا أن يخلعوا الجبال من أماكنها لفعلوها دا بقى لما كنا فاهمين يعني ايه اسلام صح لما كنا بنطبق الاسلام منهاجا وطريقا وعقيده وتربيه وأصلاحا وتهذيبا مش في البطاقة بس ....!! 2- الى اى الاحزاب تنتمى فى مصر ( حزب الاخوان المسلمين - حزب السيسى - حزب الكنبه - حزب الناس الغلابه الضايعه فى الرجلين ) ؟ الإخوان المسلمين كجماعة دينية حزب الحرية والعدالة كحزبا سياسيا رغم ان ليا اعتراضات كتيره عليه بس شايفه الأقرب إلى فكري 3- من وجهة نظرك اى الطرق الآنسب للخروج من الازمه السياسيه فى مصر فى الوقت الراهن ؟ في الوقت الراهن " مفيش حل " الحل الوحيد هو بعد 30 أو 40 سنه على رأي السيسي والحل هو إنه ينشأ جيل يكون آباؤه وأمهاته عاشوا ثورة كثورة 25/1/2011 وعاشوا انقلابا عسكريا كـ 3/7/2013 وعرفوا معنى الحرية بعد الثورة وذاقوا طعم الظلم بعد الانقلاب الشباب بتاع اليومين دول " دا إللى هيفضل منهم على قيد الحياة يعني " هيربي جيل عارف يعني ايه عزة وكرامه هيتربوا على انهم لما يعملوا ثورة يحافظوا عليها وما تتقرطسش منهم زي 25 يناير مهي اتقرطست مننا 4- هل ترى ان اخطاء الماضى تتكرر مع كل نظام سياسي جديد يعتلى القياده فى مصر ؟ بالظبط كده كله عمال يكرر أخطاء أسلافه حتى السيسي نفسه بيكرر أخطاء عبد الناصر مفكر انه لما يقتل الناس اللي بتفكر في البلد البلد هتبقى بتاعته حتى الاخوان برضو مستفادوش كتير من ماضيهم اللي ملئ بالظلم اللي وقع عليهم طيله الـ 80 سنه اللي فاتو ....!! حتى الناس اللي بتهري في أي كلام وخلاص " الإمّعة " برضو مبيستفيدوش 5- ما هى مصلحة تركيا و ايران و روسيا فى منطقة الشرق الاوسط ؟ تركيا كل اللي يهمها الاقتصاد وكمان عندها فكره اقامة مشروع اسلامي وعاوزه حد يكون في ضهرها من الدول إللى في منطقتها إيران إللى يهمها انها تكون مسيطره سواء بنووي أو بخلافه فلذلك بتلجأ إلى إي إتفاقيات تعزز من قوتها ولكي تواجه بها أمريكا واليهود ومن ضمن التعزيزيات إللى إيران بتستخدمها هو الدين لكن للأسف على النذهب الشيعي روسيا عندها حلم انها ترجع امبراطوريه عظمى زي ما كانت زمان دخل الشرق الأوسط ان دا هو مرتع من لا مرتع له ودا بسبب غباء القاده اللي متحكمين في الشرق الأوسط لأن في إيديهم الكثير بس بيحبوا يعيشوا مش حنب الحيط لأ دول بيحبوا العيشه داخل الحيط نفسه 6- هل انت مؤيد اتجاه مصر الى روسيا كبديل للسلاح عن الولايات المتحده ؟ وإيه فايده السلاح لما تكون أنت مراقب في كل حاجة تعملها ومعدود لك كام مسدس تقدر تشتريه وكام دبابه تكن متواجده على أرضك لأ وكمان توكن فين على حدودك زي سينا مثلا فيه مناطق محذور على الجيش انه يتواجد فيها ببعض أنواع سلاحه وبرضو ايه فايده السلاح لما ميكونش عندك حد بيعرف يستخدمه مش هنضحك على بعض 99.99% من اللي بيدخلوا الجيش بيدخلوه متكرهين وبيدوروا على وسايط عند طوب الأرض عشان ياخدوا اعفاء وإللى بيدخل حربيه غالبا بيكون لإما معوق ومعاه واسطه أو لإما داخله عشان برستيج وبرضو معاه واسطه مش داخله عشان عنده عقيده الدفاع عن بلده لأ أبدا 7- كل يوم تقريبآ يتساقط شهداء من الجيش و الشرطه من المسئول عن ذالك ؟ رؤساء الجيش والشرطه هما المسؤولين مش عارفين يأمنوا إللى شغالين معاهم 8- فيه مقوله للشعراوى " الثائر الحق يثور ليهدم الظلم و يهدأ ليبدا فى البناء " تبعآ لذالك ما رايك فى الاعتصامات الفئويه التى تحدث الآن ؟ و هل انت مؤيد اما معارض لها ؟ الثائر الحق هو الذي يثور ليهدم الفساد ثم يهدأ ليبني الأمجاد حكمة جميله بس اللي ينفذها بس برضو عشان يبقى ثائر حق ميسكتش إلا لما يهدم الفساد شخصيا نزلت أيام 25 يناير وبعدها أيام المجلس العسكري كنت شايف ان الفساد لسه لم يهدم كنت بنزل مظاهرات ولحد ما ربنا أكرما برئيس منتخب سواء كان مين هو رغم اني كنت ضده في الأول بس هدأت ،، عشان نبني الأمجاد =D ولما شوفت الفساد رجع تاني يعد الانقلاب رجعت أنزل مظاهرات تاني و ما رايك فى مظاهرات الاخوان المتكرره بشكل يومى ؟ و ما الرجاء منها ؟ باختصار ( يثورون لهدموا الفساد ) لما يكون الحراميه دول كلهم ناهبين البلد وماشيين يقتلوا في الناس يبقى لازم حد يثور ضدهم لما يكون أعز أساتذتي اتقتل يبقى لازم أثور ضدهم لما يكون فيه 12 واحد من أعز أصدقائي في المعتقلات يبقى لازم أثور ضدهم لما حتى الاطفال الصغيرين إللى بقعد أهزر معاهم قدام المسجد بعد صلاه العشاء يعتقل منهم 2 يبقى لازم نثور ضد إللى اعتقلهم لما نكون شايفين بلد كان بدأ حالها يتصلح وفجاة جه واحد رجع بيها 200 سنه للخلف يبقى لازم نثور 9- " الجزء من جنس العمل " اعلن رئيس الوزراء اليوم انه سيتم ترميم المنشأت العامه التى قام الاخوان بحرقها او تدميرها من اموالهم - ما رايك فى ذالك ؟ فين المنشئات إللى الاخوان قاموا بحرقها ....!! ولا هي سبوبه الحكومه عاوزه تستنفع منها لكن فيه جمله الرسول عليه الصلاة والسلام قالها جميله جدا " ربح البيع أبا يحي ربح البيع أبا يحي " ودا لكا كفار مكه صادروا أموال سيدنا صهيب وهو سابها لهم في سبيل ما يؤمن به 10- سد النهضه اكبر مخاوف مصر الآن -من رايك ما السبب فى خلق هذا الكابوس و كيف يمكن ان نواجهه ؟ الاعلام المصري أم الأجنبي هو إللى بيفتعل أي أزمه هو إللى حضر الفعريت ايام مرسي يصرفه هو بقى 11- ما رايك فى دور المملكه العربيه السعوديه فى مساعدات مصر سياسيآ و اقتصاديآ ؟ و هل انقذت مصر من مخطط الغرب و تركيا للنيل منها ؟ ما هو إلا غرض شخصي لدول الملوك والأمراء بيقضوا على أي حاجة اسمها ثورات عشان خايفين على ملكهم وعرشهم ليزول منهم رغم انهم مغدقين على شعبهم بالأموال الطائله لكي ينشغلوا عن السياسه إلا ان الثورات ستقوم ضد ظلمهم 12- ما رايك فى انسحاب مرشحى الرئاسه من الانتخابات الرئاسيه مثل الفريق عنان و خالد على ؟ و هل ذالك يؤثر على ديمقراطية الانتخابات ؟ " لما السفينه بتبدأ تغرق الفئران بتخرج منها " يعني هما مكنوش عارفين ان دا انقلاب عسكري وإن دا تكميم للأفواه وقتل للحريات وقتل ما يسمى بالديمقراطية يبقوا هما من الأساس ديكور ومينفعوش لحاجة خالص 13- ما رايك فى ترشح السيسى للرئاسه هل انت معه ام ضده و لماذا ؟ وهو عبيط عشان يترشح للرئاسه السيسي دا يلهط على طول الحق يقال السيسي رجل مخابرات من الطراز الأول ولعبها بالنسبه له صح وتولع البلد بقى بس ياعيني مش هيحقق حلمه ويشيل السيف وهو لابس الساعه الأوميجا =D ويبقى رئيس بقى وييجي وزير دفاع رخم يعمل عليه انقلاب ويعلن الحرب على أنصاره ويقعد يقتل فيهم وهيصه بقى انهما هو دلوقتي وزير دفاع نائب أول لرئيس الوزراء إللى بيقولوا عليه رئيس الجمهوريه المعين هو إللى عينه وهو إللى بيمليه يعمل ايه ويقول ايه وهو إللى في ايده كل حاجة بخصوص القوات المسلحه وكمان معاه تحصين كام سنه قدام كده حاجة فخيمه يعني من الهبل اننا نسأل يترشه ولا لأ يا ريس السيسي هو المتحكم الحقيقي في البلد من بعد انقلاب 3/7 14- ما رايك فى فتاوى حرق سيارات الشرطه و فتوى عدم الصلاه على شهداء الشرطه و الجيش و هل هذا يتفق مع الاسلام ؟ مين بس إللى أفتى بكده ودا طبعا لا يتفق مع الاسلام خاالص بس إللى يتفق طوبى لمن قتلهم وقتلوه ناس نتنه اضرب في المليان هقول لك من الآخر قتل اخواتنا في الجيش والشرطه ما هو إلا لعبة من ألاعيب المخابرات القذرة مهو إللى بيموت وهو مجند في الجيش ما هو إلا صاحبي أو أخويا أو جاري وإللى بيموت في المظاهرات ما هو إلا صاحبي او أخويا أو جاري أو أنا عن قريب أو عن بعيد ---- أحمد ،، نورت يا دكتور احمد بارائك السياسيه

[big bốss]

و ما رايك فى مظاهرات الاخوان المتكرره بشكل يومى ؟ و ما الرجاء منها ؟

باختصار ( يثورون لهدموا الفساد )
لما يكون الحراميه دول كلهم ناهبين البلد وماشيين يقتلوا في الناس
يبقى لازم حد يثور ضدهم


طيب ما الشعب فى 30 يونيو ثار على فساد الاخوان

ليه مش سابوا الحكم و ليه مش سمع لاصوات الشعب ؟

و لما ساب الحكم غصبن عنه ليه بيخربوا فى البلد و بيدمروها

علشان يرجعوا للحكم تانى ؟

[خارج عن القانون]

لو هعلق ع الاسئله مش هخلص

بس احمد شخصية محترمه وله فكره الخاص

بعيد عن ان كنت متفق مع فكره او ضده فـ يجب ان يحترم

بس هو سؤال صغنون جداااااا

اقتباس ولحد ما ربنا أكرما برئيس منتخب سواء كان مين هو رغم اني كنت ضده في الأول بس هدأت ،، عشان نبني الأمجاد =d ولما شوفت الفساد رجع تاني يعد الانقلاب رجعت أنزل مظاهرات تاني

يعنى افهم من كده ان ايام مرسى مكنش فيه فساد؟؟

وتكمله للسؤال ايه رايك فى اللى حصل فى الاتحاديه؟؟؟

وانت كــ احمد كنت فين من موقعه الاتحاديه؟؟؟

اقتباس أشجع النظام الاسلامي ليه ....!! لأنه هو النظام الوحيد إللى كفل لكل واحد حقه كفل ان كل ظالم له عقاب

اتفق معك تماماااااااااااا

لكن فلتعطينى مثال حي موجود الان عن النظام الاسلامى الذى تتحدث عنه؟؟

اللهم لو كنت تقصد ايام الرسول والصحابه ؛ والتى لن تكرر فى زمننا هذا مطلقا.

ايه رايك فى خطف الجنود ايام مرسى؟؟ وايه رايك فى تعامل مرسى مع اللى حصل؟؟

[العاشق الذى لم يتب]

جميل البرنامج الساسى يانور
الله ينورعليك
وعارفك مقهورحبتين وزعلان كام حبة
انامالبيش دعوة
انت اللى جيبته لنفسك
ومن غيراقتباسات ولاتعليقات
وعلشان ماحدش يوجع دماغى وألاقى المنتدى اتقسم نصين
واحد بيشتمنى والتانى بيمدحنى
واناماليش فى الجوده
هقول الله ينورعليك يااحمد
كلام جميل وهواه عليل
وأنامعاك فى كل كلمة
روح ربنايسترك
تحياتى

[الأميرة رودي]

د/ أحمد منـور طبعا
قليل فى لقاءاته ولكن يتميز بعقل وثقافه عاليه
نـورت باجاباتك ووجهه نظـرك تُـحترم أكيد
ربنا يهدي الأحوال لبلدنا يارب
وأيا كان الظالم ربنا ينتقم منـه ويولي من يصلح يارب

استضافه مميزه نـور
تسلــمو

[AHMED SEVEN]

يا رااااااجل .. والله منارادد ههه

على العموم بشكر كاتب الموضوع نور على الاسئلة الاكتر من رائعة

بصراحة اخ احمد مش عايز رد ده عايز ار بي جي هههه بهزر اوعي تزعل

موفقين

[Bright Brain]

الحلقة نزلت
كويس كويس

هرد على كل اللي علق
بس لما ادخل من اللاب

[احساسى صحيح]

نفس الاسئله يا نور ليه ما غيرت طريقة سرد الاسئله
وعلى الاقل توازن بينها ما تتهم طرف واحد
خليك زى مورشو واطرح كل وجهات النظر وليس وجهة نظرك انتا بس
لسه قدامك كتير يا جنرال ...
على العموم عجبنى اجابات دكتور احمد وعقليته ما شاء الله
وطريقة تفكيره كمان بتعجبنى وبيضرب فى المليان ..
ربنا يحفظه ويحميه

اقتباس المشاركة الأصلية كتبت بواسطة big bốss و ما رايك فى مظاهرات الاخوان المتكرره بشكل يومى ؟ و ما الرجاء منها ؟ باختصار ( يثورون لهدموا الفساد ) لما يكون الحراميه دول كلهم ناهبين البلد وماشيين يقتلوا في الناس يبقى لازم حد يثور ضدهم طيب ما الشعب فى 30 يونيو ثار على فساد الاخوان ليه مش سابوا الحكم و ليه مش سمع لاصوات الشعب ؟ و لما ساب الحكم غصبن عنه ليه بيخربوا فى البلد و بيدمروها علشان يرجعوا للحكم تانى ؟

لو ايام مرسى كان فيه فساد
طيب ليه مفيش ولا تهمة فساد فى الاتهامات اللى بيتحاكم عليها
وكل الاتهامات للرئيس مرسى ومعظم القيادات كلها تحريض
يعنى ايه تحريض ما المرشد طلع وقال بعلو الصوت
سلميتنا اقوى من الرصاص يبقى فين التحريض ده ربنا يهدى
انا عايز منك تذكر لى الفساد إللى بتقول عليه وشوفته وتدلل عليه وتأكده
وبالعكس فى الحاصل دلوقتى لو عايز الف دليل على الفساد انا موجود
مشكلتك إنك بتدافع عن السيسى وتتهم مرسى او الاخوان بالسمع او ما يقال فى الاعلام
فين رؤيتك الشخصيه للامور وفين إعمال العقل فى التحاور ؟
ربنا يهديك يا نور وتتلافى تلك النظره الضيقه للامور

ان شاء الله الحلقه الجايه يكون فى تغير ووضع كافة وجهات النظر للطرفين
تحياتى لك وللدكتور احمد

[Bright Brain]

اقتباس المشاركة الأصلية كتبت بواسطة big bốss و ما رايك فى مظاهرات الاخوان المتكرره بشكل يومى ؟ و ما الرجاء منها ؟ باختصار ( يثورون لهدموا الفساد ) لما يكون الحراميه دول كلهم ناهبين البلد وماشيين يقتلوا في الناس يبقى لازم حد يثور ضدهم طيب ما الشعب فى 30 يونيو ثار على فساد الاخوان ليه مش سابوا الحكم و ليه مش سمع لاصوات الشعب ؟ و لما ساب الحكم غصبن عنه ليه بيخربوا فى البلد و بيدمروها علشان يرجعوا للحكم تانى ؟

أولا فين الشعب اللي نزل في 30 يونيو دي
جرّد منهم الفلول وجرب منهم الشباب إللى أيقن ان السيسي استغلهم وعمل على ظهرهم انقلاب عسكري
هتلاقيهم نفرين تلاته " مبالغه شويه " بس دا مجاز على قله العدد
وبفرض يا سيدي ان دي ثورة وثورة 30 يونيو المجيده " كده وكده يعني "
لو قلنا ان ثورة 25 يناير اتقرطست بعد حوالي سنتين ونص
فثورة 30 يونيو اتقرطست رابع يوم في 3/7 " أحلى من كده مفيش "
وهو أساسا فيه ثورة بيأيدها الاعلام والداخليه والفلول ياعم صلي على النبي وبلاش نضحك الناس علينا أكتر من كده
وعلى رأي أبواسماعيل " سنصبح أضحوكة العالم " هو صدق بصراحه بس احنا طلعنا أكبر أضحوكه بجد

النقطه التانيه فين فساد الاخوان دا
هات قضيه فساد ضد أي حد من الاخوان
هات منصب حد من الاخوان خده وهو مش من حقه
هات جنيه مرسي خده من خوانه الدوله - دا حتى مرتبه مكانش بياخده
الاخوان لما بيمسكوا حاجة بتنضف بجد - وأبسط مثال على ده وزاره التموين مع باسم عوده ....!!

كام واحد اتظلم في عهد مرسي
كام واحد كان بيبات بره بيته خوفا من الاعتقال
و.........و......
فاهم انت بقى بقيت الاسئله

[Bright Brain]

اقتباس المشاركة الأصلية كتبت بواسطة خارج عن القانون لو هعلق ع الاسئله مش هخلص بس احمد شخصية محترمه وله فكره الخاص بعيد عن ان كنت متفق مع فكره او ضده فـ يجب ان يحترم بس هو سؤال صغنون جداااااا يعنى افهم من كده ان ايام مرسى مكنش فيه فساد؟؟ وتكمله للسؤال ايه رايك فى اللى حصل فى الاتحاديه؟؟؟ وانت كــ احمد كنت فين من موقعه الاتحاديه؟؟؟ اتفق معك تماماااااااااااا لكن فلتعطينى مثال حي موجود الان عن النظام الاسلامى الذى تتحدث عنه؟؟ اللهم لو كنت تقصد ايام الرسول والصحابه ؛ والتى لن تكرر فى زمننا هذا مطلقا. ايه رايك فى خطف الجنود ايام مرسى؟؟ وايه رايك فى تعامل مرسى مع اللى حصل؟؟

هرد عليك وأقول لك ايام مرسي
كان الفساد فيها كان عامل ازاي
كام وزير اغتلس أموال الدوله وهرب بره مصر
كام مليار اتحول لأبناء مرسي والاخوان عموما
كام مليون فدان اتباعوا للإمارات والسعوديه
كام واحد اتقتل وهو في مظاهرات
كام واحد بات بره بيته خوفا من الاعتقال
يا أستاذ محمد انت راجل ثورجي قدير
كنت آمن على نفسك أيام مرسي ولا لأ
ودلوقتي لو نزلت مظاهره أو أي حاجة هتكون آمن ولا لأ
انت نزلت التحرير أيام 25 يناير وأيام المجلس العسكري
وكنت انا معاك في الاتنين بس ملتقيناش ولا مره
عدم الامان إللى كنا فيه
تبخر أيام مرسي
وانت كنت بتنزل مظاهرات ضد مرسي براحتك خالص من غير أي قلق
دلوقتي بقى ايه الوضع
تعرف كام واحد مش بيبات في بيته
تعرف كام واحد بيموت في المظاهرات كل يوم
طيب والــ 529 حكم إعدام دول نظامهم ايه مش فساد مثلا
وأموال الدولة إللى عماله تضيع دي على الفاضي والمليان نظامها ايه

إللى حصل في الاتحاديه
قصدك على الاخوان إللى اتقتلوا هناك إللى مرسي بيتحاكم على قتلهم
ولا قصدك على الونش إللى كان بيشيل الباب

كنت فين منها
كان عندي مذاكره كتير يومها ومكونتش فاضي =d

النظام الاسلامي يصلح لأي عصر بس عاوز فهم صح
مع تطبيق بشكل كويس
على سبيل المثال عمر بن عبدالعزيز
لما مسك الحكم بعد الطاغيه الحجاج بن يوسف
عزل كل القضاه
حتى إللى كان لسه متعين بقاله أقل من شهر
دا من باب تطهير القضاء وغيره كتير

هيرجع عصر زي الصحابه بالظبط
وانت المفروض تكون مؤمن بإن الخلافه هترجع تاني " وابقى ابحث واسأل ليه "

تصرف مرسي مع الجنود
محدش اتصرف بحب ورحمة زي مرسي في الموضوع ده
راحل استقبلهم وكلف قوات تروح تمشط سينا
وكلف قوات تعمل عمليات نسر على ما أتذكر اسمها كده صح ولا لأ

ومش هقارن بين موقفه وبين موقف إللى متوليين الحكم دلوقتي
بالنسبه للجنود إللى عماله تموت
وإللى جابوا صورهم متكتفين ومقتولين من فتره

وحاجة كمان فاكر الجنود إللى ماتت في رفح
كان منهم واحد معرفه
من قريتي
من تكريم مرسي لهم
زوجته جت قريتي
من غير حراسه ومن غير أي حاجة خالص
قضت مع أهله اليوم ومشيت
ومن غير ما حد يعرف خالص
معرفناش إلا بعدها