عيال أخر زمن ...!

[محمود الصاروخ]

سالخيير عليييكم جميييعا
==

طبعاا زى ماحنا عارفين إن إختلاف الزمن و المرور من وقت لـ وقت بيغير الناس
العاادات و التصرفات كله بيتغير

يعنى زمن السبعينات و الى قبله .. مش زى زمنا دلوقتى
أبوياا و أبوك ماتربوش زينـا بالتأكييد

إحنا طبعا عايشين أخر حلاوه عنهم زى ماهما تربيتهم مختلفه عن تربية أباءهم

أنا الى محيرنى بقى ..

إن العيال الصغيرين الى بنسميهم " أطفـال " إتغيروا همااا كماان


يعنى الطفل دلوقتى بيتكلم و هو عنده كااام شهر
على أيامنا كان الواحد يقعد سنتين على ما ينطق

أيام أباهتنا كان يتكلم وهو عنده 40 سنه
لا والله بجد العيـال الصغيرين بقوا حاجه فظيعه وتقطيع كلام متخلصش منه

ماهو حقهم برده .. طفل طالع لاقى الكمبيوتر فـ بيتهم
و الفضائيات يبقى لازم ينطق

أنـا مثلا ..

عندى إبن أخويا .. مش اخويا يعنى هو أبوه ابن عمى بس مع بعض ع طول يعنى

إسمه " يووسف "



أقوله تعالى يا يوسف أقولك .. يقولى عايز إيه ياعم انت
زمان احنا كنا بنقول نعم عايز ايه .. مكنش فيه ياعم انت دى
بس حكم الزمن بقى

أقوله " واد يا يوسف " يقولى متقولش واد انت هتهرج
ده انا بتريق عليه عشان بيقولى ان عنيه خضره و مبسووط
قولتله لا عنييك عسلى رد عليا قالى لا انا عنيا مربى

أبو سنتين بيشتغلنى

أموووت و أعرف إيه الى غيير الأطفااال بالشكل ده
فين أياام التنطيط ف الشوارع بس الإحترام كان أساسى

دلوقتى " يوسف بيه " مبينامش غير لما بيسمع جنات
تربيتى بقى
وطول ماهو ماشى يقولى " إنت قلبك قاسى أوى أوى "

أنا منطقتش ولا عرفت الكلام ده غير لما دخلت ثانوى من 4 سنين أو 5
و يوسف بيه دايس من دلوقتى

ده حتى بيقولى إنت فـ " تمريض " عشان انت فاشل
طب أرد أقول ايه ؟ بيقولى انا فاشل عشان ف تمريض
مش عارف ان انا ملاك من ملائكة الرحمه

حد فيكوا متفق معاه أو مديله فلوس عشان يقول كده ؟؟

هههههه
فعلا عيـال أخـر زمـن

خالص حبى
محمود الصاروخ
بروف قديمـا .. إشطـه حـاليـا

[morshooo]

امحموووووووووود
الواد تربيتك هااااار اسود
مش كفايه انتا يابن المنصورة
صايع هتطلع الواد كمان
^^

[big bốss]

الواد دا له مستقبل مشرق من الاخر

ما خلاص يا حوده الدنيا اتغيرت - قول للزمان ارجع يا زمان

احنا جيلنا اخر جيل محترم

[ana lola]

ههههههههـ مالو الجيل دا مهو زى الفل
اهو,, بس كل جيل بيبقى فيه حريه اكتر عن الى قبله
والى بيدى لطفل حريه انه يتكلم معاك كدا
يلا ربنا يخليهولك

[توحد ارواح]

كمان بتخليه يسمع جنات ؟ يا خبر
و بعدين تقول الجيل اتغير اهو كله من جنات ههههه
بس يوسف زى العسل ربنا يخليه
فعلا اختلاف الجيل والنت والفيس والفضائيات
اصبح للاطفال لغه ولهجه تانيه خالص
شكرا ع التوبيك الجميل

[Lost Pearl]

هههههههه ،، هم فعلا بقو لمضين

يمكن عشان معاهم وسائل تواصل مع المجتمع غيرنا

احنا كنا بنشوف spacetoon و كدة يبقي زي الفل

ربنا يخليهولكو بقي

[ايمان طلعت]

صحيح والله عيال اخر زمن
العيل وهو فى اللفه بيضرب بالقلم
ولما يشد حيله شويه اول كلمه ينطقها يقول لا
ياسلام لما يمشى بقى ويتطق متقدرش عليه
وكل العيال كوم واللى اسمهم يوسف دول كوم تانى
اساتر عليهم
اصلى مجربه ابنى يوسف
ربنا يعينكم عليه بقى ويخليه
و ادام تربيتك يبقى عليه العوض فيه

[ساحر الأحزان]

هو العيال زهقت

ولا أية يا محمود

[شاعر الحب الحزين]

ههههاي بس كده دي بسيطة يا حودة

انا ابني عنده 3 سنين ولما اشتمه بيردهالي

لا ولو زعقتله بيزعل ويقوم من ع الأكل ويسألني

رايح فين وكنت فين وبيقوللي عايز اتجوز هههههاي

يلا ربنا يخليهولك يا حودة ويباركلك فيه

وبالنسبة ل جنات تتحب الحقيقة هي جميلة وتقريبا

احسن مغنية في لبسها وصوتها واغانيها روعة

جميلة جدا مواضيعك دايما يا حودة وبتحكي عن واقع

تسلم يا ابن المنصورة الغالية

[محمود الصاروخ]

اقتباس المشاركة الأصلية كتبت بواسطة morshooo امحموووووووووود الواد تربيتك هااااار اسود مش كفايه انتا يابن المنصورة صايع هتطلع الواد كمان ^^

انت تعرف عنى كده يامورشو
حبيبى والله منور الدنيااا كلها
^^