شر البليه ما يضحك

[nooody]

شويه كدة يا أفنديه عشان النفس بس

ما فيش داعى للزحمه مش عايزين اصابات الله يخليكوا

أول يوم شغل بقى والواحد نازل من البيت على سنجه عشرة وتروح عشان تركب السرفيس زى خلق الله

تلاقى امه لااله الا الله مستنيه والمشكله انك نازل وفاكر انك هتكون اول واحد

واستنى دورك بقى يا بيه يا اما يجى يا اما لاء وعشان أطمنك فهو غالبا مش هيجى عشان اصلا ما فيش حاجه اسمها

دور .

فالسرفيس ولا الاتوبيس ما هم الانتنين حاجه واحدة فكلاهما يأخد بنظريه الحشر

( كل ما تحشر اكتر فرصتك فى المكسب تكتر )

　
والغريبه ان بعد دة كله السواق مش عايز يتحرك وعايز ركاب كمان

حكمتك يارب .

ولو تجرأ حد من الركاب وفال للسواق

(احنا مستعجلين يا أسطى ورانا أشغلنا ) يدوب هو يقول كدة وبس

وأجارك الله على وابل الشتائم واللى مش عاجبه ينزل يأخد تاكسى .

　
تاكسى ايه أعوذ بالله واحنا بتوع الحاجات دى ماله السرفيس يعنى !

حاجه زى الفل وعلى فكرة مش اى حد يركبه لحسن تفتكر انه قليل ولا حاجه .

دة عشان تركبه قدامك حل من أتنين :

يا اما يكون عندك واسطه او اى حد يحجزلك تقولش راكبين طيارة

ودة حل مش مضمون .

　
يا اما تحارب بشرف عشان توصل للباب والحل دة غالبا مش هيوصلك الا لحاجه واحدة واطمن هى مضمونه

ان عمرك ما هتوصل للباب وهتقف على الرصيف تستنى اللى بعدة لحد ما الشمس تقور دماغك

دا ان لاقيت مكان تقف فيه على الرصيف اصلا .

وفى حاجه فى غايه الروعه فى السرفيس بصراحه اول ما تركب تحس انك رجعت لايام زمان

قمه الترابط الاجتماعى

ياااة الواحد كان خايف يموت قبل ما يشوف اللحظه دى >> بس خلاص لحسن اعيط

　
ويا سلام على وصله الغناء الشعبى الهابط تحس ساعتها ان عمرك ما هتسمع تانى ولو ربنا كتبلك عمر جديد

ونزلت منه بالسلامه تبقى مش مصدق نفسك انك لسه بتسمع .

　
ولو اتهورت وقولت للسواق بعد اذنك وطى صوت الكاسيت شويه >> ما هو انت اللى جبته لنفسك

اسمع بقى :

( ايه يا أفندى الاغانى كلها دلع وأنا مزاجى رايق ودى عربيتى , وأنا حر أسمع اللى أنا عايزة )

　
واذا مش عاجبك كلامه أوعى تفكر انك تفكر ان تتخانق معاة الا اذا كنت تملك علامه الجودة

وأنا متأكدة ان الناس الحلوين اللى كانوا ديما بيقعدوا فى الفصل ورا هيسألوا أيه هى علامه الجودة دى؟

　
علامه الجودة هى انك تكون واخد مطوه فى وشك مثلا

وغير كدة ما تفكرش فى حاجه اسمها خناقه

لان الناس دول لهم قوانين خاصه بيهم ألا وهى

قوانين الشوارعولوجى .

ديما عربيتهم بتبقى قديمه ولا تصلح للاستخدام الادمى

وعندهم مبدأ قانونى بيقولك ايه

( اللى خايف على عربيته يروح )

وبما ان الناس الشربات دول مالهومش أى علاقه بقوانين السير ولا حتى القواعد الاخلاقيه

فنصيحه أخويه يا جماعه أوعى تخشوا معاهم فى أى نقاش

أو تحاولوا تغيروا وجهه نظرهم .

[غنوجة امها]

بيشرفني اني اكون اول من يرد على موضوعك الرائع ...

مشكورة على الموضوع الرائع ........

تحياتي الك

[Mo7aMeD Lotfy]

ههههههههههههههههههههههههههههههههههههه

فعلا والله حاجات بنشفها كل يوم والمشكله ان السواق بيحسسك انه رئيس الوزرا او رئيس الجهوريه

بس المشكله مش فى كده المشكله فى شرطة المرور اللى مش عارفه تظبط اى حاجه وكله على بعضه والليله ماشيه

بس بجد موضوعك جميل جدا وممتع ومميز لانه فعلا موجود فى حيانا اليوميه

فى انتظار جديدك يا غاليه

خالص ودى واحترامى

اخوكى

محمد لطفى

[حنـــــون]

موضوع جميل اوى يانودى

واسلوبك جميل وبسيط

وانا هاخد بنصحتك ومش هعمل اى

خناقه معاهم هو حد مستغنى عن عمروا

المهم نوصل الاول

بشكرك جدااااااا يانودى على الموضوع الجميل ده

تحيااااااااتى اختك حنون

[Mahmoud Mohie]

اقتباس والغريبه ان بعد دة كله السواق مش عايز يتحرك وعايز ركاب كمان

والله كل السواقين كده

يعنى السرفيس بقى على اخره عاوز ايه تانى

هو بيبقى نفسه يركب الناس فوق

المشكله انه لو لقى اى أمين شرطه بينزل اللى قدام الباب

والله حاجة تطهق

اقتباس ايه يا أفندى الاغانى كلها دلع وأنا مزاجى رايق ودى عربيتى , وأنا حر أسمع اللى أنا عايزة

والله الواحد بيبقى عايز يتكلم فى الموبايل يقوله هدى الصوث شويه

يقوم سايق فى العبط ويعلى ولا كأنك، بتتكلم

والاغاتى بتبقى زباله اصلا<<هههههه

اختى الغاليه / نووووودى

ابدعتى فى كتابه الموضوع

احترامى

اخوكـى

m@7m0ud

[CuOp!D]

اقتباس ويا سلام على وصله الغناء الشعبى الهابط تحس ساعتها ان عمرك ما هتسمع تانى ولو ربنا كتبلك عمر جديد

هههههههه فعلا كتير اوى من السواقين اللى دايما يشغلوا حاجات مهيسة ع الصبح

الواحد يكون رايح الجامعة او الشغل بتاعة واسمع بقى الطرب الهابط


تسلمى يانودى ع طرحك الجميل

منتظرين جديدك دائما

تحيــاتى

[wessa]

ههههههههههههههههه

انتى ليه فكرتينى بالذى مضى يا نووودى

يلا كلنا لها

المهم تفتكرى منكن يعنى فى يوم من الايام يكون فى حل

ومنلاقيش الموضوع ده موجود

ياااااااااااااااه دانتى بتحلمى يا وسام اكيد

يارب اشوف اليوم ده قبل ما اموت

ميرسى يا قمر على التوبيك والموضوع الجديد

تحياتى

[noona]

ههههههههههههههههههه

حلوة قوانين الشوارعولوجى دى :vb19:

بصراحة بقت معاناة ان الواحد يركب اى مواصلة فى مصر

يعنى تبقى رايحة مشوار مش حياخد منك عشر دقايق تضيعى عليها تلات ساعات فى المواصلات

والمشكلة ان انتى تلاقيها ...

فى اوقات مش بتلاقى حتى تاكسى تركبيه ...

ويتأمر عليكى .. لا انا مش بروح المكان الفلانى .. لا تدفعى كذا .. لو سمحتى يا انسة بالراحة على الباب

وحتى لو معاكى عربية مش بتلاقى حتة تركنى فيها

يعنى الازمة طايلة الكل ومالهاش حل :no:

ومش عارفة ايه السمة المشتركة بين كل السواقين واعجابهم بالاغانى الشعبية دى

واضح انها من قوانين السواقة عندهم

والحل بقى ان يكون فى مواصلات تغطى الضغط ده ...

يا اما الناس تبطل تركب وتقضيها موتورجل

:liverpool-flag:

تسلمى يا نودى على الموضوع الجميل واسلوبك الخفيف

تحيــــــــــــاتى ،،،

[delight]

موضوع رائع ,,,,,,,,,,,

وللاسف هو ده اللى بيحصل فعلا ,,,,,,,,,,, المفروض ان كل يوم بيكون جديد لكن مع السرفيس ده او اللاتوبيس اياه!!!!!!!!!!!!!!!!!! فى هذه اللحظة بيكون الاحساس انه اخر يوم


(((((((( و عجبى ع الدنيا))))))))

:cv46:

[lolla]

ياااااااه يا نودى فكرتينى قبل ما اخد الاجازة والله كنت متبهدلة

بالذات من موضوع الكاسيت دا بيشغلوا اغانى شعبية هابطة والفاظ غريبة

وكل دا ويقولك انا حر وهو اصلا مش فاهم يعنى ايه حرية

بس انا عموما بحاول استحملهم اهو ارحم من انى ادخل فى حوار مع الناس دى

وميرسى على الموضوع الجمييييييل

تسلم ايييييييدك