الفرحة حتة شكولاتة

[™Amiliya]

زمان لما كان يجي عندنا في البيت ضيوف كانت ماما او جدتي يقولولي متخرجيش والضيوف هنا وخدي لعبك شيلها في اوضتك
واوامر كتير عشان الضيوف يقولو بنتهم يااااه دي مؤدبة جدا وبتسمع الكلام

طبعا دا ميمنعش اني يوميها بجهز نفسي عشان اعمل حركات الفت نظرهم اني هنا واتفرج على لبسهم واسمع كلامهم

كنت بتحايل عليهم بس اسلم على الضيوف واخرج على طول فكانت تيتا تقولهم ايمي بنت محمد وطبعا بسمع احلى كلام منا داخلة عشان كدا الي تقول بسم الله ماشاء الله زي القمر والي تقول انتي سنة كام ياعسل والي تبوسني والي تقرص خدي


وياسلام لو حد فيهم فتح شنطتو واداني هدية مصاصة مثلا او شكولا

بس معظمهم بيسلم وبيبوسني وبيديني من الشكولا بتاعت البيت الي عيني على حتة تانية ومنعوني عشان الضيوف


وبس ماخلص سلام تبصلي تيتا او ماما عشان اخرج من الصالون واجري لبرا خلاص خدت الي عايزاه


واجري في الصالة واقعد عند اقرب كرسي ليا وافتحها واكلها وانا مبسوطة اووووي

مش عارفة سعتها الفرحة دي عشان حتة شكولا ولا عشان اتحايلت على قوانين البيت في وجود الضيوف واخترقتها وفزت بالحتةدي

حتى بعد مبيمشي الضيوف وعلبة الشكولا متاحة ليا اخد الي عايزاه مبكونش طعمها زي الي خدتها لما كانو هنا


الفرحة الي بنحسها واحنا صغيرين مع اوامر اهالينا وتوجيهاتهم لينا باستمرار حتى لو متذمرين منها بس بتفضل سهلة الاختراق بحيل طفولية بنضحك عليها لما بنكبر

-

ايميليا

[SaMa.]

وسعات الفرحة ف تكسير الاوامر دى
حلوة فضفضتك فكرتنى بزمان

[دفاتر القمر]

حلوه الزكريات خصوصا
ايام الطفوله جميله الفضفضه
تسلم ايدك

[كريم عاصم]

حلو العنوان ومن العنوان حكاية وفضفة وما أحلاها ذكريات الطفوله مع حتة شيكولاطة فعلا بتكون فرحة كبيرة مع الأهل والأقارب والضيوف بتنزكرها حاليا .. ونضحك ونفضل الذكرة جوانا فضفضة جميل أختى ايميليا الف تحية

[شاعر الحب الحزين]

جميلة الحكمة وجميلة التشبيهات

الفرحة بشكل عام معناها لمة حضن وضمة

دلوقتي الفرح نسبته 1 % والحزن مالي الأمة

الفرح كان زمان أهل وخلان دلوقت أصبح مجرد كلمة


جميلة الذكريات بس صدقيني دي شقاوة طفولية ف الماضي

لو كان بجد الفرح حتة شكولاتة اثبتي ده ولما ييجي عندكم ضيوف

ادخلي على اوضة الضيوف وخدي حتة الشيكولاته مش هتقدري صح

كتير حاجات بتسعدنا واحنا صغيرين ولما بنكبر بنتمنع عنها وبيبقى العكس

مبقاش فيه شوكلاته عشان مبقاش فيه زيارات كتيرة زي زمان

الدنيا بتنسي وبتلهي يا إيميليا بس اكيد الفرح موجود بس فين الله اعلم

ربنا يفرحك يا إيميليا ويسعدك دايما

احترامي وتقديري

[قلب وكلمات]

السلام عليكم ورحمة الله وبركاته

موضوع شيق للفضفضة ، رجعتينا للذكريات

والطفولة بما تحمل من براءه وشقاوة ، وكسر القواعد

موضوع ظريف بجد ، تقديري لكِ ايمليا

وخالص تحياتي

القيصــر

[العاشق الذى لم يتب]

وذكريات عبرت
وطفولة راقية
ومفاهيم راسخة
تبدلت وتغيرت مع حداثة الحاضر
سلمت يمناك ايمى
والفضفضة الجميلة
تحياتى وودى

[Words Whisper]

عارفة
يمكن المشكلة مش كانت في اختراق قوانينهم
لكن في ان بفطرة الطفولة السليمة
بنلاقي انه القوانين دي بتتعارض معانا
زي إيه الغلط ان آكل قدام الضيوف ؟!
إزاي يبئا ف شكولا وأنا عايزاها ونسيبها بس للضيوف ؟!!
وأنا صغيرة مش كنت بحاول أكسر القوانين دي
لما كبرت بئيت بكسر أي قانون مش يقنعني وبدون ماأدور على حيلة ..


تسلمي إيميليا ..

[phalsteen]

هي كانت الفرحه
في انك تكركب النظام وتشقلبه
متعه اللعب والتطنيط والانبساط
وجو الاسرة اصلا ميتعوضش
لحظات جميله
تسلمي حببتي
فضفضه مميزة