كيف احنو علي طفلي ؟

[نادر المصريِ]

سألتنى, كيف أكسر الحواجز بينى وبين الطفل .. وكيف أحنو عليه ؟!

من الآخر وببساطه ::::: "عامليه زى ما بتعاملى اصحابك" .. أيوة والله ..
احنا للاسف بنعامل الاطفال على انهم درجة تانية .. طب ازاى ؟!!

سبع تصرفات تكسر الحواجز وتقوى علاقتك بولادك (وولاد غيرك لو فيكى نفس ;] )

1. افهمى طبع الطفل .. وتقبليه كما هو ..

وان طبعه يبقى سبب فى انه يتصرف غلط .. ركزى انه غصب عنه .. خديه على جنب واسأليه ايه رأيه فى التصرف ده .. وان كان يحب حد يعامله كده ؟


2. حاولى تحسي بيه ...

شوفى ازاى هو صغير .. ضعيف .. تفتكرى هو شايف العالم حواليه ازاى ؟ .. تخيلى بيبص لك على انك ديناصور مثلا .. صدقينى فرق الحجم كافى مش محتاجة تزودى الامر بصريخ وتبريق وتهديد .. كده احنا بنربى مجرم المستقبل يكبر يخوّف اللى حواليه هو كمان


3. الطفل محتاج يحس بحنان وحب ويحس انه منتمى لمجموعة بترعاه ..♡ ♡

ابعتيله رسايل حب على طول ... احضنيه .. بوسيه .. بوسه فى الهوا .. اخبطى ايده علامة انتصار .. ابدعى ... واحلى حاجة ان الطفل سهل جدا اقل تصرف فيه انتباه منك كافى انه يبقى فى قمة السعادة .. قَبَّل النبي صلى الله عليه وسلم الحسن بن علي، وعنده بن حابس، فقال بن الحابس: إن لي عشرة من الولد ما قبَّلتُ منهم أحدًا، فنظر إليه رسول الله فقال: "من لا يَرحم لا يُرحم".


4. الشعور بمشاعره عندما يحزن لاى امر مهما صغر فى عينك..

لازم تفهم انه هو فعلا بيعيط عشان متأثر .. فمنظوره للعالم مختلف تماما وبسيط .. فبينزعج من اقل شىء ...
يقول أنس بن مالك كان النبي "صل الله عليه وسلم" يدخل على أم سليم، ولها ابن من أبي طلحة يُكَنَّى أبا عمير، وكان يمازحه، فدخل عليه فرآه حزينًا، فقال: "ما لي أرى أبا عمير حزينًا؟!" فقالوا: مات نُغْرُه الذي كان يلعب به، قال: فجعل يقول: "أبَا عُمَيْر، مَا فَعَلَ النُّغَيْر؟". إنه لا يسخر من مشاعره، ولا يُسفِّه حزنه، بل يشاركه ويضاحكه... زينا بالظبط

5. شجعيه وحسسيه بتميزه فى نقاط فى شخصيته ..؛ )

ودايما قولى له انا محتاجة مساعدتك .. انت بتعرف تعمل كذا وكذا .. اوكلى له مهام يقوم بها مهما صغرت فى عينك بتحسسه بقيمته جدا ... وبتشعره بتميزه

6. شاركيه بعض اهتماماته ..

لازم يبقى في وقت تتكلمى معاه عن احلامه .. عن افكاره .. عن اسباب ضيقه .. لازم تحاولى تحسسيه ان فى اهتمام مشترك .. اختارى انتى وابدعى

7. احترميه ...

ولا تقللى من كلامه ... ولا توجهيه امام الاخرين بشدة ... وان اخطأتى فى حقه اعتذرى له .. حيساعدك تعملى كده انك تستشعرى انه مش ملكك .. ده امانة حتتسألى عليها يوم القيامة ..

حقيقى .. أخطاء الاطفال بتقل كثير لما احنا نبدأ نوطد علاقتنا بيهم ونبدأ نشتغل على علاقتنا ونهتم بيها اكثر ما نهتم بالعقاب والزعيق وهى أمور لا أرى لها اى أصل فى سنة رسول الله صل الله عليه وسلم .. وده يفصل فى مقال آخر ..

ما أبلغ ما قاله أنس بن مالك رضي الله عنه وهو يصف رحمة الرسول بالأطفال إذ قال: "مَا رَأَيْتُ أَحَدًا كَانَ أَرْحَمَ بِالْعِيَالِ مِنْ رَسُولِ اللَّه ". فجددوا النية ..

Reham helmy

[سارة بنت مصر]

مشكوووووور والله يعطيك الف عافيه

بالتوفيق والى الامام دائما

[نادر المصريِ]

اقتباس المشاركة الأصلية كتبت بواسطة سارة بنت مصر مشكوووووور والله يعطيك الف عافيه بالتوفيق والى الامام دائما

لازمتك العافيه في حياتك سارة
منوراني بوجودك الجميل

[ندى المهندس]

تسلم ايديك اخى نادر
موضوع راقى كرقى طلتك

ننتظر جديدك اخى

[ابو نصير]

تعلم يانادر.. أجمل شىء فى الوجود الأطفال وأكبر نعمه أنعم الله بها على البشريه
لأنهم لا يعرفون الحسد الحقد الضغينه الكره يعرفون فقط الإحساس والمشاعر
بالمشاعر يقيم كل إنسان يتعامل معه لأنه يعيش فى عالمه وعالم الطفوله فقط الخالى من النفاق والرياء .......
ولذلك لا بد على كل أم أن تتعامل مع هذه الطفوله بعالمه وليس بعالمها
أشكرك نادر على أختيار موضوعك الذى يعالج الطفوله البريئه
والأمومه العجيبه
أخوك ابو نصير
وتحياتى وتقبل مرورى يامصرى

[.Lamar]

ﻃﺮﺡ ﻣﻜﺘﻤﻞ ﺑﺠﻤﻴﻊ ﺟﻮﺍﻧﺒﻪ ﺟﻌﻞ ﺍﻗﻼﻣﻨﺎ
ﺗﻘﻒ ﻋﺎﺟﺰﺓ ﻋﻦ ﺍﻻﺿﺎﻓﺔ
ﺑﺎﺭﻙ ﺍﻟﻠﻪ ﻓﻴﻛﻰ ﻋﻠﻰ ﻫﺬﺍ ﺍﻟﻤﻮﺿﻮﻉ ﺍﻟﻤﻔﻴﺪ ﻭﺍﻟﻨﺎﻓﻊ
ﻛﻞ ﺍﻟﺸﻜﺮ ﻭﺍﻟﺘﻘﺪﻳﺮ