أستضافه لكتاب المنتدى " أميره محمود "

[big bốss]

دى كانت اول حلقه فى برنامج استضافات الاقلام كنت هعمله

و اخر حلقه بقا

مع الكاتبه الجميله





أميرة محمود


عضو ذهبي









آهلآ بيك أميره

أهلا يا بوص


عرفينا بنفسك الاول اسمك و سنك و مؤهلك الدراسي ؟

أميرة محمود
20 سنة
طالبة في كلية تجارة انجلش

- حين يشتد علينا الحزن لا نجد الكتابه مخرج لنا و متنفس وحيد لنا - متى تعلمتى الكتابه و كيف كانت البدايه ؟

3 حاجات بتكون السبب في الكتابة
الحزن والحيرة والحب
اى موقف بتكون محتار فيه مش عارف تختار
بتكتب كل ال جواك وكأنك بترتب افكارك
ودى كانت البداية عندى
كنت في سن ثانوى وقتها
وبعد كدا بقيت اكتب خواطر هى تعبير عن المشاعر والحب
واوقات بكتب عن الحزن كنوع من اخراج الطاقة السلبية
لان الكتابة عاملة في حالة الحزن زى ال بيفضفض لحد
اما القصص عمري ما جربت اكتبها
والمقالات كمان مكنتش بكتب وجربت اكتب مقالات
لما طرحت انت فكرة لكدا قلت اجرب يعنى
وعمري ما جربت اكتب مذكرات بردوا او سيرة ذاتية مثلا


- من وجهة نظرك الكتابه موهبه فى الانسان ام ميزه تكتسب ؟

الاتنين موهبة
لكن محتاجة ثقافة تكتسب

- ايه رايك فى الاعضاء الى بتخاف تكتب مع انها بتمتلك موهبة الكتابه و ازاى نحد من الظاهره دى ؟

الكتابة عاملة زى الوحى
لازم موقف يشد اوى
عشان تكتب عنه يحرك كيانك ووجدانك كله
وساعتها الخوف بقا انك متعرفش تعبر عنه

ازاى تحد من الظاهرة دى انك تجبره على الكتابة
تدفعه يكتب غصب عنه ههههههه
يعنى لو اتعملت فكرة مثلا انك تختار موضوع من الحياة
وتختار 5 اعضاء مش هم ال يرشحوا نفسهم
لا انت تختارهم يكتبوا عن الموضوع بشكل تنافسي
يغلفه المرح والضحك بردوا مش حرب يعنى هههه
مش مجرد كتابة عادية
لان التنافس مؤثر جدا ف الكتابة ع فكرة
هيشعروا بنوع من التشجيع والثقة في اقلامهم
لانك اختارتهم يبقا اكيد واثق في اقلامهم وهيبدعوا

وساعات بيقولوا ان ال عايز يتعلم الكتابة يبدأ الاول
يكتب عن نفسه قبل ما يكتب عن اى موضوع ف الحياة
لان اقرب حاجة لاى حد هي نفسه
يعنى ممكن تعمل فكرة مثلا كأن شخصيتك في مقال
كل حد ينزل مقال عن نفسه
شخصية س ، شخصية ص
يتكلم عن الحاجات الحلوة ف شخصيته
والحاجات ال بتعصبه والابطال ال عايشين يأثروا ف شخصيته
المهارات ال بيتقنها والمهارات ال نفسه يتعلمها
عيوب نفسه يتخلص منها ومش عارف وعيوب اتخلص منها بالفعل
طفولته، حب حياته، مغامراته، صدماته، احلامه
وفي افكار تانية كتير ممكن تتطبق وتشجع الآخرين


- قيمى اداء قسم بقلم الاعضاء و ايه الافكار الى عندك لتطويره ؟

تقييمي فيه اقلام جميلة بتعجبنى
والقسم نشيط الى حد كبير
وانتم كــ مشرفين مشجعين مليانين حماس
همسات فوق القمر في بداية تسجيلي بالمنتدى
بعتتلى بتقولى اكتبي وانا اعملك تنسيق وصور وخليفات وكدا للموضوع
(وحشنى قلمها ووجودها يارب تكون بخير)
البيج بوص عمل فكرة دورة اتشجع واكتب
والفكرة دى مشجعة جدا
(مش عشان انت ال بتسألنى وكدا هههههه لا دى حقيقة )





- هل كل ما نكتبه يعبر عن حالتنا بالضروره ام نستطيع

ان نكتب دون ان نشعر ما رايك ؟

الناس البروفيشنل في الكتابة
ممكن يكتبوا حالة من وحى الخيال
وممكن يكتبوا مواقف مبتعبرش عن حالتهم خالص
الشاعر احمد شوقي كان أمير وله قصور
وساعات في شعره كان يكتب عن عامة الشعب الفقير
يعنى لو حد محترف في الكتابة يقدر يعبر عن اى حاجة
لكن انا بكتب ال بحسه بس لان الكتابة عندى
مش غاية ف حد ذاتها ولكنها وسيلة للتعبير او للتفكير
والسبب الاهم انى مش محترفة ولا نص محترفة حتى ههههههه


- ما هى نوعية الرويات الى بتحبيها ؟ و من هم اهم الكتاب الى بتقرى لها ؟
الرومانسي رقم 1
والبوليسى الغامض او الالغاز رقم 2
احبه اه لكن معرفش اكشف اللغز ابدا ههههههه
زى سلسلة عشق لم يدوم لمحمود ابوزيد
وجاوبت في الآخر اللغز غلط من غير حسد بقا
والاجتماعي رقم 3
زى سلسلة من قتل سلمى ال بتنزلها اطياف الماضي
والخيال العلمى رقم 4 زى كتب انيس منصور
في سفن الفضاء و الة السفر عبر الزمن والجن والعفاريت ...
والرعب رقم 5 زى سلسلة قصص جيب زمان
كان اسمها صرخة الرعب

الكتاب ال قرأت لهم
يوسف السباعي
كانت مجموعات قصصية كلها كانت حب ايام المراهقة طبعا
نجيب محفوظ
قرأت اللص والكلاب وقصر الشوق
وبين القصرين والسكرية ومفيش فيهم حاجة عجبتنى
سوري يا عمو نجيب يعنى هههههه
وطه حسين
قرأت له الايام وضايقنى في جزء
كان بيقول فيه ان القرآن
مثل اى عمل ادبي من حقنا اننا ننقضه
وشكسبير
قرأت كل اعماله كان حوالى 35 عمل
ولانى ملاقتش منها مترجم قراتها بالانجلش
هاملت والكينج لير وعطيل وديدمونة وروميو وجوليت .. الخ
والكسندر دوماس
قرأت له الفرسان الثلاثة
وروبرت لويس ستيفنسون
قرات له دكتور جيكل ومستر هايد
وديوان شعر الامير احمد شوقي وحافظ ابراهيم
وامل دنقل واحمد مطر وخليل مطران
ونزار قبانى وفاروق جويدة


- دائما ما تضحكين فى ردودك فى المواضيع - فما

سر هذه الابتسامه ؟

نووو.. في الموضوعات الجد بـرد بجد
بس فيه موضوعات بتموتنى من الضحك اعمل ايه
والمنتدى فيه اعضاء دمهم خفيف بشكل اووفر
ولانى البنوتة الوحيدة في اخواتى اخدت الدلع كله
فـ شخصيتى بحب الضحك مايصة على هبلة كدا هههههه
ربنا يهدينى قول يارب

- كيف ننمى من موهبتنا فى الكتابه و نطور منها ؟

هو مش قضية نطور موهبتنا
هو قضية انتاج افكار
ممكن يكون حد موهوب بس خلص الكتابة في كل الافكار
ومش لاقي حاجة يكتب فيها تانى
لانه مش عنده القدرة على انتاج افكار
وفيه كم عضو هنا بسم الله ماشاء الله عليهم
بينتجوا افكار نيوو افكار غير مستهلكة من قبل
والحل ان الانسان يتعامل كتير وينمى ثقافته ويسافر
عشان نوافذ الافكار تتفتح اكتر
وكل ما يمارس الكتابة اكتر كل ما الموهبة هتزيد




شكراُ يا اميره على قبول الاستضافه

و نورتى

[يحيى الفضلي السودان]

عجبتني ردودك اوي والصراحة

وراحة النفس اللهي اهم عامل للكاتب

موفقة انشاء الله

[أميرة محمود]

أكتر حاجة عجبتنى
طبيعة كل سؤال
وكأنها نوافذ فكرية وأدبية وعقلة
مش مجرد فكرة استضافة
وبذكاء اخرجت مجموعة من اشياء محجوزة بعقلي
تحيتى لعقلك وافكارك الحلوة يا بوص

[أميرة محمود]

استاذ يحي
ثانك يو لكلماتك
وسعيدة باعجابك بالاجابات

[Sea Pearl]

استضافة جميلة نور
اميرة مميزة فى مواضيعها وردوها
اجابات عجبتنى وشكلك بتحبى القراءة ذيى
اسئلتك فيها عمق نور ومميزة
جميل الحوار

[رآقيہ بأخلاقـى]

ماشاء الله عليكى يا اميرة
شكلك دحيحة قرأة قصص
قرأتى لكل دول
لا امسك الخشب احسن احسد ولا حاجة
والله اسمتعت كتير بأجاباتك يا اميرة
وكمان اسئلة نور كانت كلها جامدة
ربنا يهديكى يا مايصه وهبله
بهزر يا قمر اوعى تزعلى
كنتى منوره

[أميرة محمود]

sea
ثانك يو ياقمر
احلى حاجة انك بتحبي القراءة هنبقا صحاب بقا
انا فعلا عجبتنى طبيعة كل سؤال جدا
يسلم لى ذوقك وكلماتك الجميلة

[أميرة محمود]

يا راقية انا كنت مقضية فترة ثانوي كلها
ف القصص وحب ابن الجيران
ههههههههه
ازعل منك لا طبعا بس هاتلى حته جاتوه
عشان مزعلش منك
ثانك يو راقية على كلامك الجميل يا قمر

[big bốss]

اقتباس المشاركة الأصلية كتبت بواسطة أميرة محمود أكتر حاجة عجبتنى طبيعة كل سؤال وكأنها نوافذ فكرية وأدبية وعقلة مش مجرد فكرة استضافة وبذكاء اخرجت مجموعة من اشياء محجوزة بعقلي تحيتى لعقلك وافكارك الحلوة يا بوص

اكيد لما تكون قدام شخصيه مثيره للجدل

لازم تخترق عالمها و عقليتها بذكاء

موفقه دايما

و جميل اوى التثقف و القراءه استمرى

[انجي_1]

حلقة جميلة استمر يا كبير