ازاى تجهز اكل لمريض السكر

[esra2 mohamed]

السكر دا مرض مُزمن،
بس فى ناس مش عارفه إيه اللى بيحصل؟
!..ببساطة شديدة جداً..الأكل اللى بتاكله جسمك -المفروض-
بيستفيد بيه..عن طريق إنه يخش الخلية
بواسطة الإنسيولين اللى بنسميه “المفتاح”
اللى بيفتح الخلية عشان يدخل السكر..
بس لما المفتاح ده مش بيبقى موجود؟..
السكر بيفضل فى الدم وبيرفع نسبة السكر فيه،
والدم ساعتها بيبقى عامل زى “شربات الكنافة” تقيل كده..
وممكن يبوظ الكلية وأعضاء حيوية فى الجسم..
عشان كده لازم مريض السكر
ده ياخد جرعة إنسيولين مظبوطة،
بس فى المقابل لازم يحسن أكله عشان
ما يجهدش جسمه على الفاضى..



النظام الغذائى إيه بقى؟!

مريض السكر ملوش نظام غذائى معين!!..شوفت دى؟!..

الفكرة إن مريض السكر لازم ياكل وجبات بنسبة معينة وميفتريش فيها،

والكلام دا برضو ممكن ينطبق على الناس العادية عشان

يتجنبوا الإصابة بالمرض -لا قدر الله-.

حضَّر طبقك بنفسك!!

عشان تاكل مظبوط، حط اللى هتاكله فى طبق واحد عشان متسرحش فى الأكل..

وقسم طبقك كده كأنك بترسم مخطط لمدينة جديدة

• المعلم الكبير يكون فيه الخضار اللى تلاقيه قدامك

بس ميكونش فيه سكريات كتير زى:

السبانخ – الكرنب – الخس – القرنبيط – الفول الأخضر –

اللفت – البتنجان – الجزر – البصل – الفلفل –

الطماطم والحاجات اللى زيه..لأن الحاجات دى كلها

بيبقى فيها ألياف فبتشبع،

والسعرات الحرارية فيها قليلة وكمان الأكلات دى

بتقلل امتصاص السكر من المعدة فمترفعش السكر فى الدم بسرعة.

• قسم الحُبوب بقى والحاجات اللى فيها سكريات زى:

العيش المخبوز (اللى فيه ردة مش الأبيض)

ويستحسن عيش السِن اللى بيتباع فى الفرن
– والحبوب المطبوخة زى
“الفول – العدس – الفاصوليا – اللوبيا – البليلة”

والأشياء الشبيهة ليه..عشان بردو فيها الألياف

اللى قلنا عليها قبل كده.

• قسم البروتين (قصدى النوعين الحيوانى والنباتى).

الفراخ “بس من غير الجلدة اللى عليها”

– السمك اللى فيه مادة اسمها أوميجا 3 ودى بتحسن وظايف المخ

وبرضوا بيساعد على تحسين
وظايف القلب ودى حاجة مهمة لمريض السكر،

عشان القلب يقدر يضخ الدم بشكل كويس وخصوصا

“التونة – السلامون – الماكريل”،

والمأكولات البحرية كذلك – واللحمة برضو “بس مش السمين منها”

وتبقى مسلوقة عادى وتشرب شربتها – البيض –

والجبنة القَريش واللبن الخالى الدسم،

والزبادى من غير قشطة.

شوية حاجات مفيدة، هتنفعك..

• نقلل استهلاكنا من السكر وخصوصاً

فى المشروبات اللى مش بنبقى عاملين حسابنا

فى نسبة السكر فيها قد إيه!..

ممكن نستعوض عنها بسكر دايت

ودا بيتباع فى الصيدلية عادى.

• كل وجبات قليلة على مدار اليوم..

متكبسهاش فى طقة واحدة عشان تتجنب

ارتفاع مفاجئ فى نسبة السكر فى الدم..

فأحسن وقت ممكن تاكل فيه هو بعد أما تعمل تمارين رياضية أو قبلها

..يعنى بعد مجهود عضلى “إنك تمشى مثلاً”.

• الوزن الزيادة بيقصر على الجسم،

وخصوصاً القلب..عشان القلب بيحتاج قوة أكبر

عشان يوصل الدم التقيل “اللى نسبة السكر فيه عالية”
لكل حتة فى الجسم.

• زيت الزيتون والجوز وعين الجمل والمكسرات

وزيت عباد الشمس مفيش عليها

مشاكل لمريض السكر عشان دى

من الدهون الغير مشبعة فلا غبار عليها..ب

س من غير ما تحطه على النار عشان

ده ممكن يحولها لدهون مشبعة وتبقى خطر على القلب.

ممنوع منعاً باتاً أكل الحاجات دى، لأنها ببساطة “هتقضى عليك”.

– الحلويات بشكل عام المشروبات الغازية

عشان بتزود الوزن وبترفع السكر..

بس ممكن نستعوض عليهم بالفاكهة زى التفاح،

عنب ،برتقال، كمثرى، أناناس.

– الفواكهة قلنا أه..العصاير بتاعتها لأ!..عشان بيتحطلها سكر

“بس لو عصير بس من غير أى إضافات مفيش مشاكل

”..بس المشروبات المهمة عندنا زى القرفة والجنزبيل

أو ممكن “هوت سيدر” عبارة عن عصير تفاح بالقرفة.

– الزبيب والقراصيا والحاجات المجففة برضو..

عشان الحاجات دى لما بيتشال منها الماية

بيبقى نسبة السكر فيها مركز جداً..فممكن
“زبيبيايه” تعمل مشاكل.

– البطاطس المحمرة والعيش الفينو “العيش الأبيض”

واللبن كامل الدسم والوجبات السريعة كل الحاجات دى

بتعمل مشاكل فى القلب والوزن ونسبة السكر فى الدم.

[توحد ارواح]

معلومات مهمه جدا
خاصة ان مرض السكر مش بيخلو من اي بيت نتيجة ضغوطات الحياه المستمره
تسلمي اسراء ع الافاده القيمه

[جبل عالي]

بعدما اصبح هذا المرض كالزكام بالضبط
يظهر فجأة وبدون مقدمات وفي جميع الاعمار
تسلمي للمجهود الطيب هنا
تحيتي لك وكل التقدير

[esra2 mohamed]

اقتباس المشاركة الأصلية كتبت بواسطة توحد ارواح معلومات مهمه جدا خاصة ان مرض السكر مش بيخلو من اي بيت نتيجة ضغوطات الحياه المستمره تسلمي اسراء ع الافاده القيمه

تسلمى توحد على اهتمامك بالمواضيع
نورتى

اقتباس المشاركة الأصلية كتبت بواسطة جبل عالي بعدما اصبح هذا المرض كالزكام بالضبط يظهر فجأة وبدون مقدمات وفي جميع الاعمار تسلمي للمجهود الطيب هنا تحيتي لك وكل التقدير

فعلا حتى صغار السن بيصابوا بالسكرى
نورتى

[.Lamar]

طرح مفيد و معلومات قيمة

سلمت يداكى

بالتوفيق

[سارة سرسور]

ألف شكر حبيبتي
على المعلومة المفيدة
تسلمي