جيل التسعينات جيل المغامرون الخمسه

[العقل الباطن]

- احنا اللي كنا بنلبس يونيفورم واحنا رايحين المدرسة الحكومي .. اه وربنا

- كنا بستأذن علشان نبري القلم برة الفصل ..

- كنا بنعمل غديوة ساندويتشات مع بعضينا في الفسحة ..

- وكنا في عز الخناقة نقول : اوعي ترمي الشنطة دي فيها كتاب دين ..

-احنا اللي كنا بنطلع لسانا علشان نعرف مين صايم ومين فاطر في رمضان

-احنا اللي ياما بوظنا شرايط كاسيت علشان دوسنا علي الزرار الاحمر ..

-احنا اللي شوفنا التليفزيون وهو بيقفل ... ششششششش

- احنا اللي ماكناش نعرف ان في حاجة اسمها سياسة .. غير يوم الجمعة في أنباء وأراء ..

- احنا اللي كسبنا 5 كيموكونو ورا بعضهم ..

-احنا جيل الزلزال .. والانتفاضة ..

- احنا اللي شفنا القرموطي في سر الارض .. وكريمة مختار في اعلانات تنظيم الاسرة . وصفاء ابو السعود بتلعب مع فرشة سنان

- احنا اللي كنا بنشرب صاحبنا الرخم من غطا الزمزامية ...

- احنا اللي كان اقصي احلامنا عجلة المصيف .. والطيارة الورق ام ديل ملون ..

- احنا جيل جوابات الحب , وشرايط الفيديو , وبنك الحظ ومجلة علاء الدين ,وسينما الاطفال وعروستي

- مكانش في غير قناتين اولي وتانية .. واهلي وزمالك .. وبوجي وطمطم .. وونيس ومايسة .. وماما نجوي وبقلظ .. وتوم وجيري ..و هرقليز وزينا

- احنا اللي كنا بناخد جنيه جديد يوم العيد .ونفضل نصرف فيه مايخلصش .

- احنا الجيل اللي اتفرج علي "الطريق الي ايلات" بعدد سنين عمره وكنا كل مرة ندعي البرقوقي مايموتش !!!.

- احنا الجيل اللي كان بيخاف لو حد قاله عيب .. وبيقول آسف لو غلط ..

- احنا الجيل اللي شاف شارع بحاله بيعمل كحك العيد مع بعضه .. وعيلة كاملة قاعدة تاكل مع بعضها .

- احنا بتوع الشمعدان والسامبا وسنجام والكاراتيه ولايز والعسلية وكوتش اميجو اللي بينور والفانوس ابو شمعة والبيبس ابو ربع جنيه والنمر المقنع وكابتن ماجد صاحب اطول جون في التاريخ (3 حلقات).

-احنا جيل السيجا والياباني , والتليفون ابو سلك , واخترنا لك , ونادي السينما وبانوراما فرنسية والشيخ الشعراوي ود.مصطفي محمود

- احنا الجيل اللي عاصرنا قرنين وحضرنا الالفية ..

- احنا الجيل اللي كانت لمته تفرح , وفرحته طالعة من القلب ..

- احنا الجيل اللي فضل يحلم بالجادون ...وللاسف مالقهوش

احنا جيل اللبان ابو ربع جنيه
احنا جيل مازنجر و المغامرون الخمسه و ماوكلى انتو مين !

[العاشق الذى لم يتب]

كلام جميل
فعلاجيل التسعينات
كان له خواص تختلف نهائى عن الحالى
اختنى معاك للوراء
حيث كانت الطفولة
سلمت يمناك
ينقل للقسم المناسب

[ايمان طلعت]

يااااااااااه
فكرتني بايام زمان وناس زمان
وحلاوة زمان واخلاق و براءه زمان
فين كل دة دلوقتي
الله يرحمك يا زمان
رجعتني لذكريات فاتت
موضوع رائع
تحياتي

[جنون قلب]

خلآص إنهــآ النهــآيه سيدى
اختفت البرآءه ولم يعد يوجد شىء يجعلنــآ ننتظر القــآدم
قتلوآ دآخلنـــآ الطفل الذى يحن ل المــآضى
لآنه ومع الاسف
حينمــآ نعود\ .. سنجد اكثر مرآره ممــآ رآينــآ ونحن هنــآ
علينــآ الرضى بمــآ نحن فيه
ولآ ننتظر ان نعود من جديد ل ســآبق عمرنـــآ



.
.
سيدتى .. العقل البــآطن
أجدت فى روآيه تفــآصيل الحكــآيه لنــآ
الحكـآيه التى لم تغيب لحظه عن ذهننــآ
لك منى فــآئق الشكر والتقدير
دُمت ب امـآن الله

[SaMa.]

حلوة الذكريات دي وانك تعتز بجيلك

[ياسمينااا]

ياه فكرتني بأيام زمان والله
رغم دا كله كنا بنبقي مبسوطين أوي
دلوقتي بقي التكنولوجيا سهلت كل حاجه
ولا بقي فيه عيب ولا آسف
قليل لما تلاقي حد دلوقتي بتعذر علي خطأعمله
توبيك جميل جدا
تسلم إيدك أخي
دمت بخير وسعاده

[Hearts Whisper]

انا معاشرتش غير حاجات قليلة اوي من دي
زي الاولي والتانية وونيس وكدا
بس بتحكي قداامي كتيير
تسلم ايدك توبيك حلو جدا ..
استمر

[طارق الجميل]

من أكتر من عشرين سنه ايوه يزيد أيامهاأنا عرفت الشريطعرفته طبعا من قبلها لكن دا وقت ما اشتريته من مصروفى من البيتالدنيا دى ايامها كانت فاضيه وكان عملنا فيها بسيطوالناس كانت عايشه فى البيوت من غير لاتسجيل وتلفزيون وما فيش تنطيتلكن دلوقت البيوت عمرانه منظومه وكمبيوتر وكمان شاشات بتتعلق على الحيطلكن زمان لو كان معاك بس راديو مش تسجيل بباب فى البيتكانت الناس تمشى كدا جانبك الغنى يابابا ولا الصيتلكن والدى كان فى السفر فكان عندنا تليفزيون والتسجيل الناشونال البسيطوانا فى الوقت دا كنت 12 أو 13 انت عارف الشباب بقه والتخبيطنسمع بقه الاغانى بس حقيقه ماكنتش اقدر اشترى الشريط
كان تسجيله بربع جنيه واللى مايقدرش يشحته بقه مافيش تنطيت
شوفتوا البساطه ازاى لكن دلوقتى اديكم شايفين التلخبيط


النهارده انا شوفت المكان اللى كنت بسجل فيه الشريط
زى ما هو ماتغيرشى والتلفزيون الابيض والاسود والله البسيط
والمكان زى ما هو والله بنفس الشخابيط
ولما بصيت عليه شوفت الصور لسه مكانها متعلقه ع الحيط

كل اللى اتغير عمنا اترسمت على وشه التجاعيد
بانت الشيخوخه عليه بانت حتى من بعيد
لكن لما شوفت المكان حسيت انى رجعت العشرين سنه بنفس الشرط
وافتكرت الزمن اللى فات والله حبيت انو يرجع من جديد
افتكرت الاصاله افتكرت البساطه افتكرت كل الحواديت
وقد ايه كان غالى عندنا أيوه كان غالى الشريط

13/4/2009
اخى الغالى انا متعرفتش ارد عليك يوم ماكتبت الموضوع الجميل بتاعك
وانا شوفته الا النهارده على مالقيت القصيده بتاعتى اللى كانت تايهه
عنى لان قد ايه كلامك بالفعل رجعنى لزمن دائما ما احن اليه
بسبب بلاء مانراه ونعيشه اليوم انا بشكرك جدا جدا وجدا
بحاجات فكرتنا بيها من زمن جميل ياجميل