النهايات اخلاق ,, هكذا قالت امي

[phalsteen]

مساء الخير
من حوالي 13 سنه كانت لسة عندي امي اعظم من ان كلامها يتنسي
او ميفضلش محفور في ذاكرتي لحد دلوقتي او لحد موتي
ربنا يرحمها ويرحم امواتنا جميعا
جيت من مدرستي مرة اشتكلها من واحدة كنت بعتبرها اعز صحباتي
بستناها واروح اصحيها ومعرفاها علي اهلي واخواتي
وهي كانت من النوع اللي بيحب اوي ياخد لكن ميديش
مستغله اوي يعني رغم اننا كنا اطفال
روحت اشتكي لامي وانا عصبية وبقول شوفتي يا ماما انا عملتلها وعملتلها
وهي بتعمل ايه

يوميها فاكرة رد امي كويس لما قالت ,, النهايات اخلاق ,,

ولما سألتها يعني ايه ؟

قالت ان اسوأ الناس خُلق اللي يعرف سرك ويسيبك تقرب منه
ولما تفترقوا او يحصل بنكم مشاكل يقول في حقك ابشع التهم ويرميك بأقذر العبارات
حتي لو كرهتوا بعض واتفرقتوا حتي لو عمرنا ما هنتقابل
ربنا هيجمعنا يوم المشهد العظيم
اوعي تغلطي في حقه اوعي حتي تقول عيوبه لحد وتعيبي في حقه
سيبي يا بنتي الباب متوارب
مش يمكن تحس بغلطتها او تتغير او ربنا يهديها
ووقتها لما تفتكر رده فعلك بعد غلطها هتعلي اكتر
في نظرها وهتندم علي مكانتك اللي ضاعت هتعرف انها خسرت حد يستاهل
انك تمسكي غضبك دا جهاد كبير
بعض الغلط لو سكتنا عليه ميعتبرش ضعف قد مهو درس للي قدامنا
يعكس مدي تربيتنا واخلاقنا

اكتر حد قريب منك هو اكتر حد يقدر يأذيك
لانه معاه كل مفاتيحك
فختار حد تتأتمنه علي نفسك حتي وانت في ابشع صورك ؟
اختار حد يخاف ربنا
بيخاف عليك من نفسه

ودا اللي استفدته من امي
البت متصاحبش غير امها او اختها
دول لو محلوش مش هيفضحوا يا بنتي
دول سرك معاها عمره ما هيروح لطرف ثالث ولا لصديق


تخيلوا بئه حالنا دلوقتي ازاي الوضع اتعكس
انا للأسف بصادف في خناقات زوجية مثلا
لو واحدة زعلانه من جوزها ابو ولادها اللي اكيد هترجعه ودي مجرد زعله
من كتير فات وكتير جاي
تلاقي كل اسرار البيت طلعت وكل عيوبه بقت لبانه علي لسان دا ودا

وهو كذلك لازم يحكي لامه وامه تقول لجارتها عن مصايبتها في مرات ابنها
اللي فيها وفيها وبتعمل وتعمل
والجارة تقول للجارة

والاتنين يرجعوا تاني لبعض
ومطلوب الناس تنسي
انتي وهو هتنسوا لكن الناس هتفضل عارفه عنكم كل حاجة ومنكم مش من الغريب ؟

قصه الحب الباهته بتاعت الايام دي تلاقي الطرفين في الاول منتهي المثاليه
هو وهي راضيين بكل العيوب
وشايفين الحياة وردية
ولما يحصل الفراق او حتي الخلاف تلاقي خصوصا الشاب شافها بعين شيطانية
وابتدي حرب تشويه السمعه وكأنه مثلا مالوش اخوات
او حتي يرضيها علي نفسه او بنته بعد كدة ؟

في قصص حب بتبدي وتخلص ومبنعرفش عنها حاجة
في ناس بنعرف بس من ارتباطهم انهم كان بينهم حب
ياتري الناس دول متخانقوش وسابوا بعض 100 مرة
لا عملوا اكيد
بس هما عرفوا يختاروا
وعرفوا يحافظوا علي اللي بنهم ودول لو سابوا بعض
مهما كان السبب هتلاقيهم يحترموا بعض
لان النهاية عكست اخلاقهم والطريقه والاسلوب

وهكذا علاقتك بصحابك او بزمايلك او بمجرد المعرفه العابرة
ليه متكونش النهايات حتي لو قاسية بنفس نكهه البدايه
يعني منلوثهاش بشوائب البشر وسوء طبعنا
فشلنا نستمر مننهاش بكره وحاجات صعب تتنسي

انت ضامن عمرك ؟
هتقدر تتحمل قدام ربنا وزر مظلوم ؟
وزر حد ظلمته بكلمه او شوهته بحرف ؟

فاكرين الجمله دي

يا بخت مين نام مظلوم ولا نامش ظالم

برضو سمعتها من امي


انتهي
25/11/2015

بقلمي / نفرتيتي

[توحد ارواح]

قالها رسولنا الحبيب فيما معناه
ان اية المنافق ثلاث من ضمنها
اذا خاصم فجر
يعني اما تكون الامور تمام
وبعد كدا حصل خلاف او خصام
يقوم يذكر كل عيوبه ومساوئه
رغم انه ف يوم ما ائتنمه علي سره
ده بالفعل عيب وحرام طبعا
فضفضه راقيه جميله
تسلم ايدك سما

[دمعه حائره]

النهايات اخلاق ويبان منها رقي الاشخاص ومدى تدينهم
مين عارف هاتتلاقي الوجوه تانى ولا خلاص
ولازم نعرف ان الندم وحش ولو مات احد الاطراف صعب تخليه يسامحك
تسلمى على التوبيك القيم وربنا يرحم والدتك

[bobaOo]

النهايات اخلاق فعلا
ويابخت من بات ظالم ولا بات مظلوم

وكتير وكتير من نصائح وحكم للام بتعلم فينا ومبتتنسيش
وبتنتقل لاجيال

ربنا يخليهملنا ويحفظهم

تسلمي سما
تحياتي

[جبل عالي]

يا بخت مين نام مظلوم ولا نامش ظالم


ومييييييييييييييييييييييين سمعك يابنت الحلاااااااااااال ؟؟
كلامك كله صح فعلا ده بيحصل وأكتر كمان

وبيفضل حكم أهالينا هي الفيصل

تسلم ايدك لفضفتك القيمة جدا

[countess]

فعلا كلها هو الصح

عشان أقلها يكون عشرة عمر

او لو حتى المدة قصيره يكون بينهم عيش وملح
ف أكيد مهما حصل بين الأصدقاء
او المجوزين

من زعل او فراق

مش توصل الكرهه

اقل الإيمان ي عالم تدعي لصديقك او او او الخ بكل خير

تشكري على موضوعك ألقيم

ربنا يرحم طنط عرفت تربي

كفايه نصائحها لحد دلوقت بتتعلمي منها

خمس نجوم 👌

[SaMa.]

حلو. العنوان وان البني ادم يحترم ذكرياتو مع الناس
الل كان يعرفهم ف يوم لانو كدة بيحترم نفسو