الموسم الثالث من ( لـــــو ) مع ( Doaa Hammam )

[morshooo]

بسم الله الرحم الرحيم

مزاج الخير

واهلا بيكم وحلقه جديدة وموسم جديد من

( لــــــــــــــــو )




فى البدايه بس مبروك علينا خروج ( المنتخب الاوليمبى )

وماشاء الله الاعلام ماتوصاش وعمال يقولك اصل اتحاد الكورة فاشل

اصل ( البدرى ) فاشل اصل ( كهرباء وصبحى وفتحى ) فاشلين

وكل المحللين فجاة اكتشفو كل دا عن المنتخب الاوليمبى ونفسى

يراجعو نفسهم ويجبولنا كانو بيقولو ايه عن

( البدرى وكهرباء وصبحى وفتحى )

وكانو بيقولو ايه عن مستقبل ( المنتخب الاوليمبى ).

المنتخب الاوليمبى خرج بسبب الاعلام والتطبيل بتاع

( شلبى وشوبير والغندور )

وحسسو الشعب المصرى ان معانا منتخب ( العالم )

وانه افضل منتخب اوليمبى فى العالم

وهم هم دلوقتى واقفين ضد الاعبين والمدرب

طول ماعندنا عينه زى دى بتظهر كل يوم مش اقل من

( 4 ساعات ) ويطبلو ويمشو مع الموجه هنفضل كدا .

تاخد بطوله نطبلك ونحبك ونرقصلك ونشغلك اغانى فى الاستديوهات

هتخسر بطوله هتبقى فاشل ولاعيبتك فاشلين وكل تخطيتك كان فاشل يا فاشل .



طبعا اعضاء كتير فاكرين التوبيك

بس هنقول تانى

البرنامج عبارة عن

( 10 مواقف ) وكل عضو هيتم استضافته

هيقولنا ( لــــــــو ) اتحط فى المواقف دى

ياترى هيعمل ايه ؟




البدايه النهاردة مع عضوة

متميزة جديده ان شاء الله تستمر معانا

معانا المتالقه .

Doaa Hammam






تعالو نشوف ياترى

المواقف كانت ايه .

اولا : المواقف الخاصه بالمنتدى

1 / لقيتى عضو من المنتدى بعتلك رساله خاصه وبيقولك ؟
انا معجب بردودك فى المنتدى وحبيتك يا دعاء بجد حبيتك والله حبيتك ^_^ ؟

بصراحة مش هرد على الرسالة واطنشها واعتبر انها لم تكن
واعتقد ان ده مش حب انما اعجاب
ولكن البعض بيخلط بين شعور الحب والاعجاب
_______________

2 / جيتى تدخلى المنتدى لقيتى نفسك واخده حظر وبعتلك السبب ؟
مخالفه قوانين المنتدى الاخلاقيه بسبب انك غلطى فى احد اعضاء المنتدى ؟

ان شاء الله مفيش حاجة من دي هتحصل
واذا حصل يبقى هافكر انا غلطت في ايه
ولو حسيت اني غلطانة هاتقبل الوضع بكل بساطه
اما لو كنت مظلومة هازعل جدا
لكن بالنهاية في الحالتين هاتقبل قرار المنتدى وأنسحب بهدوووووء

---------------------------

3 / حد من المنتدى نزل توبيك وقال ان دعاء دى ولد مش بنت وانها بتضحك على الاعضاء ؟

حصلت معايا هههههههههههههه
بس في الفيس بوك
واحدة كتبت على صفحتها اني ولد وببعت لها رسايل اعاكسها
ولقيت الاصدقاء بيبعتولي رسايل يسألوني ايه الحكاية دي
كنت منزعجة جدا وزعلت ونزلت منشور على صفحتي أكذب كلامها
بس الحمد لله لقيت الاصدقاء كلهم واثقين في كلامي وتعاطفوا معي
لو حصلت لي في المنتدى هضحك جدااااا
وآخد الموضوع بسخرية
لان بالنهاية ايه الفرق اذا كنت ولد ولا بنت
طالما ملتزمة بقوانين المنتدى ومش بغلط في حد
يبقى ايه المشكلة
_________________________

4 / نزلتى توبيك ولقيتى الاعضاء بتقولك لما تنزلى توبيك ونقلتيه من منتدى تانى ابقى اكتبى ( منقول ) ؟

هاتقبل النصيحة واقول اشكرك
بس يفضل لما الواحد ينصح حد ينصحه على الخاص مش العام
النصيحة قدام الناس فضيحة ههه
__________________

5 / الاداريه ( توحد ارواح ) بعتتلك تختارى قسم تشرفى عليه ولما اخترتى بعتتلك ( اسفه مشرف القسم مش موافق تبقى معاه مشرفه ) ؟ هتعملى ايه ؟

بصراحة انا مش بحب المسئوليات
والاشراف دي مسئولية تحتاج تواجدي بصفة مستمرة في القسم
وده صعب عليا لضيق الوقت
فغالبا انا هارفض الاشراف واعتذر لتوحد




ثانيا : الاسئله الشخصية
1 / بتشترى حاجات من السوبر ماركت ولقيتى واحد ماشى وراكى وبيعاكسك ؟ هتعملى ايه ؟

هاعمل نفسي مش فاهمة ومش سامعه
هاصدر له الطرشة يعني
ولو تجاوز حدوده معايا ممكن أشتمه وألم عليه الناس ههه

هتصدريله الطرشه الله اكبر عليكى
خلاص نزلى عنوانك عشان الاعضاء
نفسها تشوف الطرشه بتتصدر ازاى
________________________

2 / قاعدة مع جوزك وموبيلك اتبعتلك عليه 5 رسائل ورا بعض وكلهم من رقم مش متسجل وبيقولك ؟ ( بحبك ) ؟ تفتكرى هيحصل ايه ؟

لالالا ان شاء الله مش هايحصل ابدااا .
بس لو حصل زوجي مش هايسكت وممكن يروح يعمل بلاغ في الرقم ده
او يشتكي في شركة اتصالات لمراقبة الخط واتخاذ اللازم

ومن هنا يبقى كلنا عرفنا ان العضوة
معاها خط اتصالات اتقلو بس هحاول اجبلكم الرقم
----------------------------

3 / قاعده سهرانه بليل وفجاه النور قطع ولما رجع لقيتى 2 حراميه قدامك ؟ هتعملى ايه ؟

ممكن أروح فيها ...
بس لو لسا عايشة هاقول لهم خدوا كل اللي عايزينه وسيبوني في حالي

الله على البراءة تعرفى ممكن كمان تقوليلهم
خدو الى عايزينه بس انا عندى مرجيحة جوا مرجحونى عليها الاول
__________________


4 / ماشيه فى الشارع وفجاه لقيتى ناس جايه عليكى جرى وعمالين يقولو ( هى دى الى سرقت الغسيل هى دى الى سرقت الغسيل ) ؟ هتعملى معاهم ايه ؟

هاضحك ههههههههههه
وبعدين اقول لهم انتو الكاميرا الخفية أكيد
وبعدين اروح معاهم القسم وأثبت كذبهم وأسجنهم واطلب رد شرف

لا انتى فهمتى غلط احنا حرامى الغسيل ما بيرحش القسم
الناس بتتقمص شخصيه كل رتب القسم فى اللحظه دى
____________

5 / قاعدة مركزه مع فيلم شغال وقاعدة لوحدك فى البيت وفجاة بتبصى جنبك لقيتى ( فأر ) بيتفرج معاكى على الفيلم ؟

يا لهوووووووووي ..
أراقب الفار واشوفه راح فين
واروح انا غرفة تانية بعيده عن الفار
وبعدين أكلم والدتي وأخويا بالتليفون واقول لهم تعالوا الحقوني
هما بقه ييجوا ويتصرفوا مع الفار
ولو مش معايا تليفون في الغرفة ممكن أجري بسرعه على باب الشقة
واروح الصيدلية اشتري مصيده واتركها في المطبخ
واروح انا لوالدتي لحد ما الفار يتمسك وارجع البيت تاني

ثوانى ثوانى هتراقبى الفار راح فين
وتروحى غرفه تانيه الله على المراقبه
لا وخيالك حلو ممكن تدخلى ماتلقيش الموبيل فهتنزلى تجيبى مصيده
شكلك مجربه وحلتلك ( حكايه الفار ) قبل كدا ماشاء الله
عارفه كل الطرق بتاعته




وبكدا بتخلص حلقه النهاردة

انتظرونى ومواقف جديده

وضيف جديد

[شاعر الحب الحزين]

ههههههههاي بصراحة ضحكت جدا ع التعليقات بتاعتك

واجاباتها برده دعاء والاسئلة كمان خصوصا سؤال الغسيل ههههاي

برنامج كله على بعضه حلو وبيستحق المتابعة وان شاء الله يكون

برنامج يومي ونشوف كل يوم عضو جديد ف ضيافتك مورشو

دعاء همام انسانة محترمة وهادية بتمنالها التوفيق

تدوم روعاتك يا مورشو

منورين الدنيا

[bobaOo]

ههههههههههههههههه
تعليقاتك واسالتك فصلتني اقسم بالله
اسأله حلوه
ودعاء انسانه رقيقه وواضح انها هاديه وطيبه خالص
تحياتي لشخصك الجميل ي دودو

متابعه معاك ي مورشو بالتوفيق بئا
تحياتي

[Just Ahuman]

هههههههههههههههههههاى متهيألي أنت لو كنت سألتها تلت أربع أسأله كمان كانت هتقر بكل حاجه تلقائي .. وموضوع الفار والغسيل فطسوني ضحك بصراحه ..

بس واضح إن دعاء شخصيه طيبه واللي فى قلبها على لسانها .. ربنا يوفقها

وتسلم يا أحمد على المقابله دي فى إنتظار الضحيه الجديده

[ايمان طلعت]

دعاء باين عليكي هاديه وتلقائيه
اجاباتك كلها جميله الحقيقه هههههه
منورة المنتدي وان شاء الله مكمله معانا
تسلم للحلقه مورشو

[حازم34]

والله يا احمد انت ما شاء الله عليك حاجه جميله

وتعليقاتك جميله خالص هههههههههههههه

وواضح ان الاخت دعاء ما شاء الله وحتي دا واضح من مواضيعها وروددها في المنتدي

انسانه طيبه القلب خلوقه جدا

بس الفار تسيبه لوحده بالشقه ههههههههههه وتروحي تجيبي المصيده

هههههههههه

وهيكون راح فين

وطيب والفيلم هيخلص كدا

ما شاء اجابات جميله واسئله جميله

وبرنامج جميل

لكم مني التحيه

[توحد ارواح]

فعلا اجابات دعاء جميله جدا وتلقائيه
يمكن ف كتير من المواقف دي هعمل زيها برده
حلقه جميله بجد ومميزه بدعاء
تسلم ا/مورشو دمت بتميز

[Doaa Hammam]

كده برضو يا أحمد

احنا ماتفقناش على التعليقات دي هههه

وكمان الاصدقاء ما شاء الله ... عملوا لي تحليل نفسي ممتاااااز

فعلا شوية أسئلة كمان كنت هاقول لك رقم موبايلي كام وعنواني فين

وهاعترف على كل حاجة بالتفصيل

مش بعرف أخبي حاجة واللي في قلبي على لساني

وممكن اقول كلام يودي في داهية وانا عادي جدااا في منتهى البراءة يعني

......................

أشكركم على تعليقاتكم الحلوة

وواتمنى تكونوا استمتعتم بالمواقف وردود الافعال


وأشكرك يا احمد على استضافتي

تحياتي ّ

[phalsteen]

انتي عسولة اوي ع فكرة

مورشو حلو البراجرم وحشني كنت بحب اضحك
ع الاعضاء
رغم اني مسلمتش منه

منورين

[Dr. AnOosHo]

تسلم ايدك مارشو نور البرنامج المتدى من تاني

دعاااااء انتي شخصيه عسوله جداااا وفعلاا منورة المنتدى