ملخص الاسبوع في ام الدنيا

[War ROFL]

ملخص الأسبوع - الخميس 10/12/2015 :-

- المتحدث العسكري: حروب الجيل الرابع تعتمد على «كيف تجعل عدوك يستيقظ ميتا؟»

ويمشي جالسا .. ويتشقلب واقفا .. ويصرخ صامتا .. وهنشوف أيام سودة وأقسم بالله مع ولاد المجنونة دول .

***********************************************

- نجل كمال الشاذلي: والدي كان سبب ثورة يناير العظيمة

مهم جدا يا جماعة في المرحلة دي والنبي نركز شوية .. شرايينك وانت بتقطعها لازم إيدك تكون لتحت علشان دمك يتصفى بسرعة.. وانت بتضرب نفسك بالرصاص بقى .. تنشن على المنطقة أعلى الأذن .. علشان ترشق في النافوخ عدل ‏‎grin‎‏ رمز تعبيري

********************************************

- في خطوة رائعة لتنفيذ تعليمات الرئيس لإحتواء الشباب .. مجلس الوزراء يوافق رسميا على إنشاء 9 سجون جديدة خلال 30 شهرًا .

اه والله 9 سجون .. واحد منهم هيبقى على مساحة 104 فدان حضرتك .. هيبقى عندنا أكبر 3 سجون في أفريقيا والشرق الأوسط .. ولو ركزنا شوية وسيادة الرئيس قرر يحتوينا أكتر .. بعون الله مصر هتبقى أكبر سجن في العالم ..

تحيا مصر 3 مرات ورا بعض بصوت يوسف شعبان ‏‎smile‎‏ رمز تعبيري

**********************************************
- في عالم موازي .. في جمهورية المناخوليا .. المتحدث العسكري يفوز على ضباط العمليات الخاصة فى تمارين الضغط .

كان في مؤتمر صحفي .. لسبب مجهول المتحدث العسكري قال لظابط شرطة تلعب ضغط ؟ وريني نفسك .. ونزلوا يلعبوا ضغط الاتنين قدام الكاميرات .. مناخوليا يعني مش أي كلام .. البلد إتجننت والله .

*********************************************

- «الشفافية الدولية»: مبارك من بين أكثر 15 شخصية «فاسدة» في العالم .

دا كلام فارغ .. إحنا في مصر بنركز على حاجات أهم .. زي إننا نصادر أموال هيثم محمدين واحمد ماهر مثلا .. ونطارد الباعة الجائلين .. ونصورهم ونشهر بيهم في الجرابيد جنب أحرازهم إللي هيا مناديل وعسلية .. يا دولة مهزأة .

******************************************

- أحمد موسى: "اللي هيطبل للحكومة في البرلمان هفضحه"

اه .. التطبيل شغلتي أنا بس ‏‎grin‎‏ رمز تعبيري

****************************************

- يوسف زيدان : المسجد الأقصى بني في العصر الأموي وليست له قدسية دينية ... وخطيب الجمعة للاعبي المنتخب : وأطيعوا الله والرسول وحسام البدري .. وضبط إمام مسجد في اسيوط يتاجر في الأفيون .

والله يا جدعان نركز بس شوية .. هنعمل دين جديد عن أبوه .. وكفار من اللي حواجبهم تخينة دي .. واصنام ونروح نكسرها من اول وجديد .. ولقد شلت يدي .. كلا إنها سليمة إنها سليمة ... وهتبقى ايام لوز بعون الله في البلد دي ‏‎grin‎‏ رمز تعبيري

**************************************

- رقم قومى لـ «الحمير» بدءا من 2016 لمنع ذبحها وبيعها للمواطنين

انا حقيقي إفتكرت إن الخبر دا مجرد ألش .. بس طلع بجد .. وفعلا مش عارف دا خبر حلو وألا وحش .. بس اللي فهمته من الخبر .. إن لحم الحمير مغرق السوق يا رجالة ‏‎smile‎‏ رمز تعبيري

*****************************************

- - شركة سامسونج تعلن أن جهات أمنية مصرية منعتها من طرح ساعة ذكية مزودة بكاميرا .

دولة منكوبة ومهزأة والله العظيم .. إية اللي عندكم هيتجسسوا عليه يا محدودين في عصر الاقمار الصناعية بتجيب ألوان ملابسكم *****!!

************************************

- الحاخام الإسرائيلي " نير بن أرتسي " .. يحذر السيسي .. لا تثق بمن حولك وكن يقظا 24 ساعة .

دي ناس بينهم مؤامرات كونية وحروب جيل رابع وكدة ... ملناش فيه يا اخوانا

****************************************

- الغزالي حرب: أخشى عودة الشرطة لممارسات ما قبل «25 يناير» .

تخشى ؟؟ شاكك يعني ؟؟ حضرتك هما جابوا الممارسات والأولاد والمدام ومشرفينا هنا ..

***************************************

- دينا: أخلاقنا وديننا يمنعونا نتفرج على «أفلام إباحية»

أنا إتفاجئت الحقيقة .. الرأي الشرعي دة يتنافى تماما مع رأي مدام إنتصار .. أنا رأيي نشوف رأي مدام صافيناز أو نلعب ضربات جزاء .

*****************************************

- المتحدث العسكرى: لو داعش فكرت تدخل مصر هنبعتهم للصعايدة يعملوا منهم فوانيس

هوا بغض النظر عن إن داعش موجودة بالفعل .. إلا إذا كان يقصد إن سيناء تتبع دولة ناميبيا .. بس وأقسم بالله يا بية إنتوا بتحرضوا الناس دي علينا .. أنا رأيي حضراتكم والدواعش تتفاهموا معاهم .. وإحنا هنبعتلكم الفونيس ‏‎smile‎‏ رمز تعبيري

****************************************

- الداخلية تناشد أي مواطن يتعرض للتعذيب إبلاغ النيابة .

ايوا .. علشان نعرف مماتش لية من التعذيب .. ونصلح غلطتنا المرة الجاية .

******************************************



- حكم بتأييد التحفظ على اموال ابو تريكة .. وترفع التحفظ عن أموال حبيب العادلي .

إنقلاب زي ما الكتاب بيقول .. وشوف الفجر والعند .. الحكمين في نفس اليوم .. بلد رخيصة ملهاش قيمة مبتتشطرش غير على النضاف ..

*******************************************

- السيسي يقترح تحويل كل مصرى بالخارج 100 دولار لحل أزمة نقص العملة .

أزمة العملة مبقتش بتتحل بالسياحة ولا تنمية الصادرات .. ترعة المفهومية وبرميل النباهه شايف إن الحل إن المصريين بالخارج يتبرعوا ب 100 دولار .. أول رئيس عايز يعمل جمعية ويقبضها الأول عسكري منتخب .. جمهورية سوق التلات ‏‎grin‎‏ رمز تعبيري

*****************************************

- رسميا : سما المصري تتقدم بأوراق تأسيس حزب سوف تترأسه .

انا والله بثق في الولية دي عن النخب والنظام الحاكم كله على بعضه

*****************************************



- رسميا تأجيل بطولة العالم للإسكواش في القاهرة لأجل غير مسمى بعد إنسحاب 11 دولة بسبب الظروف الأمنية .

الإستقرار هيفرتك الدنيا
***************************************

- محكمة دولية تعاقب مصر بغرامة "مزدوجة" بـ1.7 مليار دولار لصالح إسرائيل وشركة شمال المتوسط المملوكة لحسين سالم .

ايون خسرنا القضية .. وحكم نهائي كمان .. بس اقذر تفصيله في القضية دي .. إن الجانب المصري لم يجرأ إنه يدعي ببطلان العقد بسبب شبهات الفساد إللي اهمها سعر التصدير المتدني جدا .. بس عارفين معملناش كدة لية ؟؟ علشان العقد دة تمر تمريره بمباركة جهات سيادية مهمة " فشخ " كانت هتتفضح في الطلعة دي .. ندفع بقى وحلال عليهم .

*******************************************

- للمرة الثالثة.. امتناع ضابط القليوبية عن حضور التحقيق في اتهامه بـ"التعذيب" .

3 مرات يعقدوا جلسة للإستماع وهوا مبيروحش .. انا مش فاهم مكبرين الموضوع لية .. الراجل يعني عامل كام حالة تعذيب .. وقاتل متهم في قسم شبين القناطر .. فين المشكلة يعني !! إحنا في مصر مبنحاكمش غير العيال اللي بتلبس تيسرتات لا للتعذيب ‏‎smile‎‏ رمز تعبيري

*****************************************

- توفيق عكاشة : تم إغتيال عمر سليمان بحقنة في الغدة " النشوية " .

النشوية ‏‎grin‎‏ رمز تعبيري رئيس البرلمان المصري القادم ‏‎smile‎‏ رمز تعبيري

****************************************

- الزند يمثل مصر في ''المنتدى العربي'' لاسترداد الأموال المنهوبة .

اه والله .. الزند إللي سارق أراضي نادي القضاة في بورسعيد واللي بيظبط صفقة بين الحكومة وحسين سالم علشان يدفع 10 مليون جنية مقابل اسقاط تهم بسرقة مليارت .. هيمثل مصر في منتدى إسترداد الأموال المنهوبة ... دولة مهزأة تعيسة يعني مش أي كلام ‏‎grin‎‏ رمز تعبيري

****************************************

- الإفراج عن الجاسوس الإسرائيلي عودة ترابين .

نفرج عن جواسيس اه .. إنما العيال بتاعة البلالين والتيشرتات .. ينطسوا إعدامات فورا .

****************************************

- فاكرين اشرف فوزي إللي هوا كان تاني دفعته ومتعينش معيد بالعافية كدة .. وراح قدم على مدرس بالحصة ب 150 في الشهر وإترفض.

باركوله .. بعد 6 شهور في سويسرا .. إتقبل رسمي وتم تقييده في جامعة زيوريخ .. بصفة باحث ‏‎smile‎‏ رمز تعبيري

ام الدنيا وهتبقى قد الدنيا وكدة ‏‎grin‎‏ رمز تعبيري

*****************************************

- قرار من وزير العدل يتيح زواج المصريات من رجل غير مصر يكبرها ب 25 عام شرط أن يدفع 50 ألف جنية وديعة في حسابها ..

مش دي المشكلة .. ميرفت التلاوي بتدافع عن قرار الزند": "البنت في الحوامدية بتتجوز 3 مرات في الشهر"

ايوا دي رئيسة المجلس القومي للمراة إللي دورة يدافع عن المرأة ‏‎grin‎‏ رمز تعبيري

********************************************

- مصر تفوز برئاسة رابطة تطوير التعليم في أفريقيا لمدة عامين .

ايوا إحنا القبل الاخير عالعالم في جودة التعليم ..هنرأس رابطة التعليم في أفريقيا .. ولسة ؟ والله لنطربق الكوكب دا على دماغكم ..

**************************************

- مسؤل حكومي في إتصال هاتفي مع شوبير حكم تعويض اسرائيل مش إلتزام على مصر دا التزام على هيئة البترول المصرية التابعة لوزارة البترول "

معروفة .. هيئة البترول المصرية التابعة لوزارة البترول المصرية .. لا تتبع الحكومة المصرية .. تتبع الفائز من نادي مصر المقاصة وغزل المحلة ... كنافة يا جدعان .. كناااااااافة .

****************************************

- دار الاسلحة والذخير .. تعلن عن إحياء الراقصة غزال لحفل رأس السنة .. سعر التذكرة 125 جنية شامل قطعة جاتوة طبقتين .

بصوا .. هيا غزال صاروخ .. وتستحق فعلا تحيي حفل دار الأسلحة .. خير قاعات الأرض .

*********************************************

- الصحة تلفي المزايا المالية المقررة لأعضاء المهن الطبية .

كانوا بياخدوا بدلات بتاع 30 جنية تقريبا .. لغوهم .. أصلهم بيكلفوا خزينة الدولة كدة .. لازم نوفر كل جنية علشان زيادات القضاء والجيش .

*******************************************

- الدستورية تلغي حكم النقض بالكشف عن المستحقات المالية لأعضائها .

ايوا المحكمة حكمت لنفسها والله .. هتمثل وهتعمل مندهش ؟؟

*********************************************

- وزيرة الهجرة: مصر كالأم تنادى أبناءها بالخارج و«بتقولكم ارجعوا محتاجة مساعدتكم»

ما تيجوا بقى .. إنتوا مبتيجوش لية .. بصوت سومة العاشق .. الله يخربيتك أسيادة الريس .. بوظت العيال والبلد بقت أخر مياصة ومرقعة .

*****************************************

- الحكومة: ''قضية الغاز'' لن تؤثر على العلاقات بين مصر وإسرائيل

ايوا .. علاقتنا بإسرائيل أكبر من محاولات الوقيعة إللي بيعملها الثوار والنشطاء عملاء إسرائيل بردوا ‏‎grin‎‏ رمز تعبيري

***************************************

- جائزة أفضل بيمب مصطفى بكري تذهب هذا الاسبوع لداليا زيادة وتصريحها إن الإخوان هم من إخترعوا الإختفاء القسري ولا يوجد معتقلين في مصر .


******************************************

- براءة 3 قيادات إخوانية وفتاة في قضية "البلالين" بالإسماعيلية

ايوا إنت قريت العنوان صح .. قضية احرازها بلالين .. الناس دي مقبوض عليها من سنتين ونص تقريبا ومرميين في السجن .. في قضية بلالين في جمهورية مصر العربية للأمراض النفسية والعقلية.. اتقفشوا وهما بيوزعوا بلالين صفرا على الاطفال في عيد الأضحى .. بس يا سيدي ومن ساعتها وهما مرميين في السجن .. مهم جدا تقروا حيثيات القضية ‏‎smile‎‏ رمز تعبيري

عدا ذلك كل شئ هادئ في مصر

[توحد ارواح]

دا ملخص صعب اوي
شر البلية ما يضحك فعلا

تسلم ع الطرح القيم
تحيتي