بعد مباراة الزمالك وغزل المحله

[محمود الصاروخ]

السلام عليكم ورحمة الله وبركاته
--



الحمدلله رب العالمين إنتهت منذ قليل مباراة الزمالك وغزل المحله
ضمن مبارايات الأسبوع العاشر من الدوري المصري لهذا الموسم
حيث حسم الزمالك اللقاء لصالحه بنتيجه كبيره وهي خماسيه بيضاء
سجل الزمالك الهدف الاول عن طريق لاعب المحله كالوشه بالخطأ في مرماه
ثم عاد اللاعب أحمد حسن مكي ليسجل الهدف الثاني والثالث للزمالك
والهدف الرابع جاء عن طريق اللاعب الموهوب جدا محمود كهربا
وأخيرا الهدف الخامس والاخير جاء عن طريق المدافع محمد كوفي


وبرغم فوز الزمالك اليوم بهذه النتيجه الكبيره جدا لم يقنعني أداء اللاعبين
ولا شخصية المدير الفني للزمالك باكيتا في توجيهاته للاعبين طوال اللقاء
ولي أيضا تعقيب بسيط علي حكم اللقاء وسأقول بكل وضوح وبكل صراحه
وكما ذكرت في المباراه الماضيه لست من هواة تعليق الفشل علي الحكام
ولكن اليوم اذا كانت مباراه صعبه لكان الحكم قلبها علي الزمالك من أفعاله اليوم
هل هي تعليمات ؟ هل هي تعليمات ؟ أكررها مره ثالثه هل هي تعليمات ؟

لاعب غزل المحله رمضان ربيع كان حريف في صنع المشاكل داخل الملعب
حيث بدءها ب كوع من غير كوره لمسمار نادي الزمالك طارق حامد
وبعدها ضرب من غير كوره للقائد ومدافع نادي الزمالك أحمد دويدار
وبعدها ضرب متعمد للولد الشقي والجولدن بوي مصطفي فتحي
وبعدها ضرب متعمد أخر لمسمار نادي الزمالك طارق حامد
وفي النهايه الحكم يحتسب انذار لهذا اللاعب !

وجهة نظري المتواضعه ك زملكاوي وبعد هذا الفوز
هذه النتيجه خادعه جدا وأداء متوسط من لاعبي الزمالك
ولو واجهنا فريق منظم دفاعيا ويوجد لديه تكتلات دفاعيه
سنواجه صعوبات كبيره وقد يتفق البعض معي في هذا الأمر

ولكن برغم هذا الاداء المتوسط وكما يعلم الجميع بأن
المهم .. أن يتحقق المهم وهو الفوز بالمباراه بأي حال من الأحول

مليون مبروك لكل عشاق ومحبي الزمالك في مصر والوطن العربي
هارد لكل كل محبي وعشاق نادي غزل المحله وأتمني لكم التوفيق دائما

( اسئله للنقاش )

- ما رأيك في اداء الزمالك في مباراة اليوم أمام غزل المحله ؟
- ما رأيك في مدرب الزمالك الجديد باكيتا بشكل عام ؟

الله - الوطن - الزمالك
محمود الصاروخ

[bobaOo]

ماشاء الله

فريق قوي ويستحق كل خير

بالتوفيق

تحياتي

[توحد ارواح]

وعليكم السلام ورحمة الله وبركاته

أداء الزمالك كان كويس
لان المحلة ظهر علي غير العادة امام الزمالك كفريق ضعيف
بالنسبة للمدرب لسه الرؤيه مش وضحت اوى
مش حاسه انه مدرب قدير
بس ربما الايام تثبت عكس ذلك
مبارك للزمالك
تسلم ع المجهود المميز

[العاشق الذى لم يتب]

مبروك للزمالك
والشكرليك محمود

[Just Ahuman]

زي ما قولت على الأهلي إمبارح هقول على الزمالك النهارده النتيجه ليست مقياس للفريق .. والأداء أقل من المتوسط والمحله أظهرت ضعف ووهن كحرس الحدود بالأمس .. والحكم بصراحه بعيداً عن إنتمائي الأهلاوي شايفه كان متهاون فى بعض القرارات وأنا شايف فى آخر المباراه كان لابد من طرد لاعب المحله بعد دخوله فى مناوشات مع جهاز الزمالك

وبالنسبه لباكيتا وضعه نفس وضع بيسيرو مش هينفع نحاسبه فى الوقت الحالي على الأقل 5 مباريات من الآن

ومبروك الفوز يا محمود

[აα∂ Ԑγεა]

المحلة تاني اسوء فريق ف الدوري المصري بعد حرس الحدود
يفرق عن الحدود انه عندهم دوافع , لكن نفس الامكانيات المحدودة في الاتنين
فوز كبير , طبيعي , ومش مقياس لاي حاجة علي الاطلاق

اللي ناخده من المباراة دي بعض الخطوط العريضة علي تاكتيك باكيتا اللي هينتهجه
الاعتماد علي 2 دفيندرات صراح " ابراهيم صلاح وطارق حامد " في نص الملعب
مع تحرير الباكات هجوميا كان شكل الفريق في اوقات كتيرة 3 4 3 مش 4 2 3 1
لانه كان ابراهيم صلاح بيضم مع المساكين وبيتقدموا الاتنين الباكات لنص الملعب
ودا شكل جبهه خطيرة جدا لعمر جابر واللي اتسببت في معظم اهداف الزمالك
يمكن لو كان كمان موجود محمد عادل جمعة في الباك الشمال كانت الفكرة هتبان اكتر
لكن وجود طلبة خلي الهجوم كله من ناحية عمر وخطورة الزمالك عنده

تغيير الاماكن بشكل كبير بين رأس الحربة والثلاثي اللي تحته وبالاخص محمود كهربا
اللي كان مش ملزم بمكان واحد في الملعب ولعب تقريبا في كل الاماكن الاربعة
كان كهربا اقرب لمهاجم تاني منه لجناح مع خروج مكي كذا مرة لدخول كهربا للعمق
دايما بقول كهربا كمهاجم تاني هيكون اخطر لاعب في مصر

في بعض الملامح مش قادر احكم بالظبط لكن الكرات الثابتة ظهر فيها الزمالك بشكل افضل
الزمالك في اخر كام موسم وبالتحديد منذ رحيل شيكا والكرات الثابتة بانواعها كانت رميات تماس !
النهاردة وان لم يستغل الزمالك اي من ركنياته لكنه كان في اغلب الوقت الكورة لصالحه
تواجد ممتاز في المنطقة وتحرك جيد من اللاعيبة يمكن لولا انها بتيجي لابراهيم صلاح كنا سجلنا

لسه اللاعبين متطبعين علي اسلوب لعب فيريرا العقيم وهياخد وقت تغيير عقلية الفريق
رغم تكتيك باكيتا واعتماده علي 2 دفيندرات واحد منهم بيتاخر مع الاتنين المساكين
الا انه حمادة طلبة كان بيتقدم بصعوبة اكنه مش عاوز يعمل دا !
كذلك عمر جابر اتاخر كتير تلت ساعة تحديد منا ما اتقدم بشكل اكبر وشكل الخطورة
باكيتا كذا مرة يشاور علي تقدم الفريق والدفاع لكنهم متطبعين علي فكر قديم مختلف
زي ما ذكرت في توبيك الجيش انه المدرسة الجديدة هتاخد وقت

فرديا ,
* كهربا كالعادة رهيب بالنسبالي افضل لاعبي الزمالك وقادر يكون حاجة خرافية
* مكي رغم الجونين الا انه مش مهاجم الزمالك برضوة !
* حمودي احسن من اللي فات اكيد وكان له دور في اغلب اهداف الزمالك النهاردة بمشاركة مباشرة
لكن في رأيي مستوي الخصم ساعده ورتمه بطئ ولولا وجود عمر جابر جمبه مكنش هيقدر يقدم دا
شايف محمد ابراهيم افضل منه بكتير الحقيقة ومستغرب من تفكير اعارة محمد ابراهيم
* ابراهيم صلاح لسة مش ابراهيم بتاع بداية الموسم الماضي وعبدالخالق مستني الفرصة
* حفني مش حفني الموسم اللي فات كذلك لكنه لا غني عنه في الزمالك والفريق بيعاني بعد خروجه
* طلبة افضل من طلبة المعتاد , اتقدم ولو بحذر , معملش فاولات , قطع كرات كتيرة , لا وبيمر !
لكن طبعا بلا شك محمد عادل جمعة الافضل في المركز دا وبالاخص مع الاعتماد علي تقدم الاجناب
* عمر جابر امكانيات رهيبة وسلاح كبير في اي مكان يلعب فيه سواء باك يمين او خط النص
لاعب ممتاز جدا وعنده حلول وزيادة هجومية خطيرة علي اي دفاع ( مش زي العقيم حازم ! )
لا وكمان كابتن فرقة حقيقي , طلع الكورة علشان باسم ينزل , وكان في كورة قدامه يشوط فيها
الا انه مررها لباسم مرسي يمكن باسم يسجل , بيحاول يرجع الثقة لباسم ويرجعه للملعب والتهديف
دا الدور اللي المفروض يقدمه كابتن الفرقة وابن النادي بيعمل دا فعلا .

من المحلة ,
* كالوشا لاعب عادي جدا ميستحقش اهتمام الزمالك بخدماته علي الاطلاق
* رمضان ربيع ماشي بمبدأ اتعرف باي طريقة ان كانت نجاحك او فشلك المهم تتعرف


اخيرا باكيتا ,
لسه زي ما ذكرت الحكم عليه مش دلوقت ومحتاج وقت علشان نقدر نحكم عليه بشكل فعلي
الملامح الاولية كويسة في التاكتيك واسلوب اللعب لكن التغييرات عليها بعض الكلام
كان ممكن يستغل الماتش دا في انه يرجع لاعبين مهمين ويدخل ناس في الملعب تاخد فرصة
بالاخص انه الماتش انتهي بدري بدري قبل اي تغيير وكان ممكن يستغل دا
لكن في المجمل لسة ننتظر لعله يكون لسه معرفش كل اللاعيبة اللي عنده وامكانياتهم كاملة
الاداء مش مطلوب حاليا قد النقاط وظهور ملامح لفكر الراجل تطمنا

مبروك الفوز , المباريات اللي جايا اصعب , بتروجيت فريق صعب حاليا وبيلعب بشكل غلس
فريق بيضغط ضغط عالي دايما بيكون مشكلة ضد الزمالك والاهلي
هنشوف قدرة باكيتا عملي علي قراءه الخصم والتعامل مع الضغط ( شيئ فشل فيه فيريرا جدا)

[ندوشه 2011]

الف الف مبروك للزمالك زغرطي يا انشراح لووووووللللللي الزمالك كسب يا بت معقوله لوووووولللللللي وانا مالي يا عم كسب ولا خسر سمعت تامر حسني الجديد

[الفيلسـوف]

اعتقد انى كلام محمود ساد ايز مافيش بعده كلام وتحياتى وتقديرى لمجهودك ياصاروخ

[محمود الصاروخ]

اقتباس المشاركة الأصلية كتبت بواسطة boba0o ماشاء الله فريق قوي ويستحق كل خير بالتوفيق تحياتي

أداء الزمالك في المباراه برأي كان متوسط
تسلمي بوبو علي مرورك الجميل
منوراني دايما

[محمود الصاروخ]

اقتباس المشاركة الأصلية كتبت بواسطة توحد ارواح وعليكم السلام ورحمة الله وبركاته أداء الزمالك كان كويس لان المحلة ظهر علي غير العادة امام الزمالك كفريق ضعيف بالنسبة للمدرب لسه الرؤيه مش وضحت اوى مش حاسه انه مدرب قدير بس ربما الايام تثبت عكس ذلك مبارك للزمالك تسلم ع المجهود المميز

مفيش شك إن المحله الموسم ده من أضعف أضعف الانديه في البطوله
المحله يمتلك 3 نقاط فقط من 10 مباريات في المركز الاخير
ولكن أداء الزمالك النهارده كان متوسط برأي
ربنا يكرم ان شاء الله ف اللي جاي
منوراني دايما ندي
...