١١ ١١

[د. محمد الرمادي]

١١ ١١

يحلو لصبية منصات التواصل الإجتماعي؛ إفتعال مسألة ما لشغل المجتمع بها؛ دون عرض المسألة بكافة جوانبها ؛ وبالتالي عرض الحلول وإمكانيات نجاح هذه الحلول.

ثم أنه يوجد مَن يتربص بالوطن؛ فتنشغل أجهزة حماية الوطن ... كـ وزارة الداخلية .. والأمن القومي ... مؤسسسة سلامة المواطنين .... وبالتالي الأجهزة القائمة برعاية شؤون المواطن... وتنجر وسائل اعلام خلف ما ينشر على منصات التواصل الاجتماعي .... تضيع الأوقات وتضيع المجهودات...

الفيسبوك واشباهه يمكن اعتمادها جهاز قياس ما يشغل ال شباب والناس... دخول وزارة الداخلية على الخط وإفتعال مناقشات وهمية وإفتعال حوارات خيالية يشغل الجميع ...

بناء ال شخصية المصرية .... العربية ... الإسلامية يتم من خلال مؤسسسات متخصصة ذات رسالة... غياب تلك المؤسسسات عن القيام بدزرها يزيد المشكلة تعقيداً ....

النشاط التفاعلي مع ما يسمى 11 11

أو ثورة الغلابة ثورة الجياع حراك الغلابة.... فقاعة صابون في مجتمع لا يهتم بقضايا الحياتية أو الضرورية أو المصيرية...

سرعة التواصل يمكننا من خلاله أن نرفع من مستوى الإهتمامات العامة ... لنصير أمة تقترب من قمة سفوح الدول العظمى .

محمد فخر الدين الرمادي

الثلاثاء 8 صفر 1438~08 11 2016

[طبيب الهوى]

صدقت وصدق فكرك القيم د / محمد

أؤيدك تماماً فيما ذكرت أخي الكريم

تحياتي لفكرك الراقي والقيم

أبو عصام

[انجي_1]

يعني مصر هتفضل كده من ثورة لثورة ؟
الناس ليه مش عايزة تفهم انهم بكده بيدمروا بلدهم وانها بكده عمرها ما هتقوم ولا هتنهض ولا هتواكب الدول المتقدمة
ما كل ما البلد بتبتدي تشم نفسها بتعملو ثورة وتوقفوا الحال وترجعو البلد لورى
لو فضل الشعب المصري بيفكر بالطريقة دي
عمر مصر ما هتقوم
ربنا يهدي الناس
مشكلة عدم الوعي عويصة بصراحة

[حـيـــــآة ❤]

ربنا يهدي ويصلح الحال

[رعد السـماء]

انتي بتصدقي يا إنجي
دي فقاعة عملوها اللي بالي بالك وصدقوها
بالعكس ده حيكون أحلى يوم للفسح
إن شاء الله الدنيا حتكون هادية ورايقة
والشوارع فاضية وزي الفل

[αЛαstoOorα]

موضوعك غير منطقي ..لآن الآفتعالات الوهمية اللي بتقول عليها دي عبر وسائل التواصل الآجتماعي
عملت ثورة آسمها ثورة ( 25 ) يناير ..ودي اللي بسببها اتغير مسار الكون بحاله ..
وآنك تتهم كل الناس اللي بيدعو للنزول يوم 11/11 آنهم ناس مُفتعله وبيشغلو الرآي العام وآجهزة الدولة
بتآمين الشعب المصري من التربصات الخارجيه اللي ناتجه من الآفتعالات دي
وتنسي آن في ناس مش لاقيه تاكل؟ وناس موظفة بتاخد بالـ 500 جنيه وبالـ600 جنيه ومرتبها دا
ميجبش حتي عيش حاف ف الشهر .بعد الغلاء الفاحش اللي شوفناه خلال الآيام الآخيرة
وتنسي آصلاً آن الثورة قامت من 6 سنين عشان الناس مكانتش لاقيه تاكل وتقارن الوضع بالوضع الحالي
هتلاقينا عدينا كل مراحل الا عيشة ..بمعني آصح ..عايشيين ميتيين .والناس بتشتكي لربها
مش هقول آن مفيش ناس ع الفيس وغيره ..واخدين اللي بيحصل دا فرصه وموجة وراكبين عليه
عشان يخربوها ..بس اللي مش صح ..آنك تتهم جميع الناس بدا وتشوف معظمهم مجرد آفتعالات
ليس لها قيمه الا تعطيل عجلة الآنتاج ..وزعزعة الآمن الوطني ..!
آنت من الناس اللي ساندت مؤتمر الشباب ودعمته ..المؤتمر اللي ف نظري ليس له آي قيمة
غير آن كله كلام وهمي وضحك ع الدقون .وتجميل الصورة الحقيقية للوضع الراهن..
آحنا مش عاوزين ثورة تانيه؟؟ لآن الغلبان مش من مصلحتة دا ..واحد زيي شغال اليوم بيومه
لو قعدت يوم يقصر معايه ..وممكن ملاقيش..ف من مصلحتي ميحصلش دا ..بس مش من مصلحتي
السكوت برضه علي السواد اللي بنشوفه ؟
آنا لا آخوان ولا عميل .ولا فلولي ..وآول واحد كان بيدافع ع السيسي ف المكان دا
واي حد كان بيخش يشتم عليه او يهاجمه كنت بعمل معاه مشكله
آما دلوقتي ..لا هكون مع الآخوان ضد السيسي .ولا هكون مع السيسي علي حساب الناس البسيطة

[د. محمد الرمادي]

الوعي السياسي؛ والنضج الفكري؛ والإلمام من عدة جوانب للمسألة الواحدة .. نتيجة تقديم معلومات صحيحة وشفافية في العرض من مؤسسات حكومية أو غير حكومية ...كــ منتدى مثلاً يترتب على كل ذلك رؤية واضحة... و عليها يتم عرض حلول للمسألة(المشكلة)... ثورة 25 يناير قام بها شباب يطالب بأمور .... كان ينبغي أن توضع في مخيلته كيفية الحلول ... ليس فقط مجرد المطالب وإن كانت مشروعة وحقيقية ...
وضع العالم كله تغير... وها هي أمريكا بلسان رئيسها الجديد تتكلم عن الداخل وإصلاحات الداخل وإعادتها دولة قوية ... منذ 2011؛ وقبلها والعالم العربي تفكك : العراق؛ سوريا؛ ليبيا؛ اليمن... والعين على مصر...

[رعد السـماء]

كما توقعت
كان أجمل يوم للفسح والخروج
من سنين لم أرى الإسكندرية بهذا الجمال والهدوء والروقان

[السفيره عزيزه]

القاصي والدانى يعلم ان حال مصر متدنى
داخليا وخارجيا .وتلميع الاعلام الدائم وتضخيم كل ما
يظهر ان هناك انجازات وتقدم الى الافضل .ما ان تنقل عينك
من على الشاشة الى ارض الواقع لا تجد منه شيء .اذا هناك
مشكلة كبيرة اسمها فشلالحكومة الحالية فى ادارة البلاد والنزول
بها الى منحدر قد يؤدي لعواقب وخيمة سيدفع ثمنها لا اقول نحن بل
اولادنا ال لسه ما شفناهم .
والحل ان يستبدل الفاشل باحد على قدر المسؤوليه ومن البديهى
ان لا يستمر حتى لا يكبد البلد خسائر اكثر ..

واي وسيلة تقوم بنزعه من على كرسي الحكم
سواء ثورة او انقلاب عليه او حتى زلزال ارضي
مش شغلنا كتير المهم الفاشل وحكومة الفشله
كفايها خساير وفساد ..

ال خرج فى 11 11 هم هم من تعودا الخروج وبالعربي
كده الناس ال مش بتخاف من الغاز والرصاص وكلنا لا ينكر
كيف كانت القبضة الامنيه والاستعداد لهذا اليوم .ومع ذالك
خرجوا فى محافظات كتيره بس الاعلام كان بينقل الينفع
من وجه نظره الحكومة ايه ال يتشاف وايه ال يتعتم عليه.
نعم كل من قال ساخرج لغلاء الاسعار ونقص السلع التموينة
واي اسباب اخري غير مصلحة الوطن خاف واترعب لما شاف الدبابة
والاستعداد الامنى ..وال فضل يهتف ضد الفاشل ال مؤمن بقضية
التغيير لانقاذ مصر من الوضح المؤسف ال وصلت اليه .


يسقط يسقط حكم العسكر
ومكملين الى ان نلقي الله
وعند الله تجتمع الخصوم

السفيرة .

[ahmed 22]

ورة 25 يناير قام بها شباب يطالب بأمور .... كان ينبغي أن توضع في مخيلته كيفية الحلول ... ليس فقط مجرد المطالب وإن كانت مشروعة وحقيقية ...

انا بتفق معاك يا دكتور محمد في النقطة دي بنسبة ألف المية
بس الأكيد أن الثورة كانت عفوية .. وده كان اجمل ما فيها
بس دايما مشكلتنا فيما بعد أن نثور ..

المشكلة بعد الثورة ... ان كانت هناك الكثير من الفرق المتنازعة
كل واحد كان عاوز ياخد حقوق البث بطريقة حصرية زي الكورة كدا..
ويطبق مبادئه علي الدولة سواء اخوان او ليبرال او ثوريين ..
والنتيجة بر أيي كانت هتكون واحدة .. كل الطرق تؤدي الي الفوضي .
طالما الناس اتفقت علي ان لا تتفق ..

بس أسباب أنك تثور مقبولة .. وحال بلدك كان قبل 2011
كان يدعوك أنك تقوم بثورة .. دلوقتي أنا واحد من الناس اللي عندهم قناعة
أنك بعد الثورة مش لازم تصلح .. بقدر ما أنك لازم تتعلم
واحنا بقالنا 5 سنين بنتعلم .. بس بنتعلم بالضريبة الصعبة ..
وده نتاج طبيعي للسكوت في حقك لمدة اكتر من 70 سنة
انا واحد كل اللي بتمناه أن احنا مانخدش وقت كتير للتعلم
النطاق الطبيعي أن المفروض ناخد اكتر من 15 سنة
عشان بس ترسي قواعد للنهضة ..

وقواعد الديموقراطية كبداية هنعرف أحنا اتعلمناها ولا لاء في الانتخابات الجاية ..
ويا هل اكتسبنا الوعي من تجاربنا اللي فاتت ولا لاء ..يا تري المدة بتاع التعلم هتقصر ولا هتزيد
.. الله اعلم ..

ويا تري الناس هتفكر بعد كدا قبل ما تثور أنها تدور علي البديل
ولا مجرد ثورة تزيد من الاعباء وتقلل من خطواتنا ..

ويا تري هنسمو فوق خلافاتنا واختلافتنا ولا هنستمر دايما في حالة طار مستمر
وانا برضه عندي اقتناع ولو حتي في ثورة علي السيسي وهتشيله
هتدور في نفس الدايرة ... سواء مقتنع بيه ولا لاء ..

الفكرة حالا أن احنا كبلد نصنع بدائل تقدر تدخل في سباق الديموقراطية
وباعتقادي أن اول خطوة تغيير حقيقية المفروض نسعي ليها بدل الثورة
ان الانتخابات الرئيسية الجاية يكون علي رأس الدولة رئيس جديد بطريقة منظمة ..
وليس مجرد زيادة لحلقات الكراهية المستمرة .. اللي بتزيد بكل فوضي نصنعها
واتمني يظهر ناس جديدة علي الساحة الفترة الجاية ...لانه المشكلة انه مافيش اي
كفاءات ظاهرة قدامنا وكل النخبة اللي كانت موجودة اخر خمس سنين بقت كروت محروقة ..
وده اللي مصعب الدنيا ..

اي خطوة غير دي هاعتبره مجرد اضاعة للوقت .. وزيادة احمال علي المواطن العادي
الثورة في الفترة الحالية لا هتخلي الأسعار تقل .. ولا البلد تبقي من بلاد العالم الأول ..
انما التحضر انك تغزو المؤسسات من داخلها وده اللي هيعمل للبلد قيمة وسط الدنيا كلها ..