استضافه 8 مع ملك جبال الاحزان

[واد حبيب]

السلام عليكم ورحمه الله وبركاته
اهلا بكل اعضاء المنتدي وكل زوار المنتدي ومبدعين المنتدي
النهارده معانا حلقه من نار
حلقه فيها برنس المنتدي الاول صاحب قلب كبير واصيل
حلقه جديده من حلقات استضافه ومعانا
ملك جبال الاحزان
اهلا بيك يا غالي

حبيبى تسلم على المقدمة النار ديه 😎

عرفنا بنفسك بس اتكلم برحتك

مش عارف اتكلم براحتي ازاي بس اناخللت هنا 🐸
عايش فى القاهرة من " امبابة" 😎 ٢٣ سنه ولسه مخلص جيش ✋

ايه يا ملك الاحزان هيه الاحزان دي مش ناويه تروح ولا ايه

معتقدش لانى من الناس الفقرية شوية وعندى يقين ان مهما فرحت بيجيبى خازوق من حيث لا ادرى 😀

ايه السر في تسجيلك باسم دي

لانى انسان كأيب . مش باين عليا بس انا كأيب صدقنى😎

قولينا عرفت المنتدي ازاي

مش فاكر اوى لان بقالها كتير جدآ
بس كان تقريبا بسبب انى اخد حاجه من هنا "سرقه " 👽

ومين اعز اصحابك هنا

كتير والله مش عايز انسي حد بس ملهم من الناس القديمة
الناس الجديدة من ٢٠١٥ وانت طالع قليل الكلام معاهم

ايه الفرق بين المنتدي ده وايه منتدي تاني

ياااه كتير جدا الاول كان في لمة حلوة بجد
وكان مساعد على كدة وجود الناس قريبين مع بعض
فى اسباب كتير اوى مش حابب اتطرق ليها بلاش كأبه 🐸🐸


شايف انك واخد حقك في المنتدي بما انك عضو قديم وصاحب نشاط عالي

هو انا مش صاحب نشاط خالص علشان علشان ابقى صريح من ساعه ما دخلت الجيش وانا منقطع عن المنتدى من ساعتها وزحمه الحياه شاغله الواحد وده لمعظم الناس السبب الرئيسي انشغالهم فى حياتهم الشخصية


ايه سبب عزلك من الاشراف كان لطلب منك ولا من الاداره

لا كنت طلبها لانى كنت مشغول بالجيش ومش هقدم حاجه
وكان ساعتها فى ناس قادرة تشيل القسم ساعتها كنت سايبها فى ايد امينة 👍


مفكرتش ترجع الاشراف تاني

لاللاسف . لانى مش هقدم حاجه للقسم


ايه الفرق بين اداره المنتدي دلوقتي والمنتدي زمان
وايه التغير اللي حصل في المنتدي

الصراحة اداره المنتدى الجديدة معرفش شغلها ومعرفش معظمهم اصلا مقدرش احكم عليهم بس اتمنى يكونو قد المكان ده لان شغله كتير ومهم


مين اقرب عضو ليك هنا

مش حد معين فى كذا حد كلهم وجودهم جميل جمبى


مين الاعضاء المظلومين في المنتدي من وجهه نظرك

مقدرش اقول اسم معين لانى مش متابع الصراحة ✋

نفسك مين من اعضاء زمان يرجع ويفضل في المنتدي علطول

كان فى حد زمان اوى قليل اللى هتلاقي عارفها
بنت اكابر * قد ايه البنت ديه وحشتنى كانت من اقرب الناس لقلبي
ربنا يوفقها فى حياتها كانت انسانه جميلة


سؤال بيني وبينك كده
هنكدب يا قرموطى ده المنتدى كله هيشوفو 😂😂

ليك حب هنا في المنتدي
ولا مفيش حد دخل قلبك

لا فى مكدبش فى كدة بس للاسف كل حاجه وليها نهاية .ايآ كانت النهاية حلوة او وحشه

بعد ما خلصت جيش مش هنفرح بيك قريب ونشوفك عريس

معتقدش فى الفترة ديه بس ملكة جبال الاحزان تحضر نفسها 😂😂

ممكن يجي يوم ونشوف ملك جبال الاحزان خطب بنت من المنتدي ولا ده مستحيل

مفيش حاجه مستحيلة النصيب ممكن يكون فى اى مكان 😎

ميدو شايف مصر ازاي دلوقتي

زفت ✋

ممكن يقوم ثوره جديده بسبب غلاء الاسعار

نفسي والله انا كنت من الناس اللى كانت مع السيسى وضد الاخوان
دلوقتى انا ضد السيسى وضد الاخوان بردو ً😀
نفسي فى حد نضيف يمسك البلد ديه بقا


ايه الفرق بين مبارك ومرسي والسيسي من وجهه نظرك

نن وجهة نظرى التى لا قيمة لها على الاطلاق 😎
مبارك . بيسرق ومش محسس الشعب
مرسي. هيملى بطنه هو وجمعته بس هيموت الشعب
السيسى . بيسرق وبيموت الشعب 😂

شايف ان السيسي ناجح في حكم مصر ولا كبيره

شايف السيسي بيبداء يعمل حجات كويسه
بس للاسف مش باصص للغلابه اللى مش هتستحمل اللى بيحصل ده
فعلا الناس تعبت

بما انك شاب ايه طموحك في الحياه

من كتر ما عماله تضيق طموحى عنال يضيق اوى
وصلت لدرجة ان كل همى شغلانه كويسه بيت وزوجه صالحة
وب ٢ جنيه عيش 👀

لو جالك فرصه سفر تحب تسافر فين
مبحبش حوار السفر ده ومنعنى عنه ظروف شخصونيه كدة
عايز الفرصه ديه تجيلى بس فى بلدى

انت مبسوط في حياتك ولا فيها صعبات
الحمد لله على كل حال بس صعوبتها كتير وعمال ادور على اول سلمة فى سلم النجاح مش لاقيها 😑

قولنا ايه موصفات شريكه حياتك

طيبه . جدعه. قد المسئوليه. بتعرف تحب من قلبها بجد . وتكون مبتقلبش على كل حاجه تكون بتستحمل

ندخل علي المدونه
امته عملت المدونه

من زمان اوى 2012 تقريبآ مش فاكر والدي

دي اول واحده ولا عملت واحده قبل دي

لا ديه اول واحدة والاخيرة ✋

ليه اخترت الاسم ده
لانى من انسان بميل للجنون مع اى شعور بحس بيه


شاايف ان المكان ده ممكن تقول فيه اسرايك

اه وبيحصل اى حاجه بحس اتى عايز اكتبها بكتبها

ايه اللي بيميز الصفحات عن اي قسم تاني

انك بتطلع اللى فى قلبك ومش مستنى رأى حد فيه اتكتب وخلاص والناسشافت رايك واساسك مفيش فيه رجوع

حصلك مشاكل قبل كده في الصغحات

لا لم يحدث ✋

ايه رايك في الاعضاء اللي بيلقحو كلام علي بعض هنا

دول اللى بيبقو خلاص مش قادرين يعملو حاجه غير كدة
ده اخرهم

مين اكتر عضو بعتلك تقيم
مببصش لموضوع التقييمات ده لانى مبيظهرليش فى الاشعارات 😎😀
بشوفه صدفه

اخر تقيم كان من مين
مممممم ثوانى ✋
من سهر . كانت بتشتم 🐸🐸

هل الايكات اثرت علي نشاط القسم
جدااا بحس ان الناس هنا بتقيم نفسها بكام لايك جالها 😠


قولي افضل مدونه من وجهه نظرك
كتير والله مضمونهم حلو ممكن بتاعت
فجر، سهر،حياه

وافضل اسم مدونه
حروف بلا قيود 👍

مين الاعضاء اللي بتبعهم باستمرار
حياه ، سهر

عوز منك تقيم لمشرفي القسم
من الناس القليلة اللى لسه حابه اللى بتعملو
مش مجرد تزويد مشاركات وديه الخاجه اللى يتميز الناس اللى يتحب المنتدى كمكان بترتاح فيه . موفقين واستمرو 👍

كلمه لاعضاء القسم

لاعضاء المنتدى كله نفسي تحبه المكان لان لو حبيته المكان هتحسو بعد كدة ان المكان ده اول مكان هتلجأو ليه وقت ما هتحسو بعزلة عن الناس

سعيد جدااا باستضافه معاك يا غالي

انا اسعد وشرفنى وجودى معاك ويارب اكون خفيف عليكم وافادتكم بخبراتى 😀😀😀✋

و السلامو عليكم

[سهـــر]

ميدو صديقي اللدود ^_^
منور طبعا وكل الكلام ده
مه اني مش متفقه كعاك في حاجات ككدا
اكيد انت عارفها
بس ليه بتسيحلي الناس عارفين اني محترمه ومش بشتم
بتجرسني ليه ي باشا

[حـيـــــآة ❤]

ميدو ضفادع 🐸🐸🐸🐸🐸🐸
منور الاستضافه
ربنا يسهلك حالك ويصلحه
وان شاء الله تلاقي سلمة النجاح

استضافه قميله ابو اياد
يسلم مجهودك
ربي يسعدكم

[رنوش روشي]

منور يا كبير تسلم يا ابو الرومضي وماتنسنيش بقى في شويه بورتقان علي شويه سوفندي والافندي وأي حاجه ان شالله ربع جندي .

[العاشق الذى لم يتب]

ميدو الغالى
حبيب الملايين
ربنايسعدك
ومنور البرنامج
وتسلم ابو رمضان
والبرنامج الجميل
عاوزين برامج كتيرة وننشط المنتدى ان شاءالله

[فارس الكلمة]

واد حبيب
حوار جميل مع ملك الأحزان ميدو الخلوق
أسئلة سهلة وبسيطة وكل ردوده منسقة ومرتبة
تسلما على الحوار الجميل وننتظر كل حوار جديد وجميل
خالص ودى للجميع

[توحد ارواح]

بالفعل حوار راقى من اسئله مميزه تشمل نواحى كثيره

الى اجابات تتسم بالوضوح والصراحة والعقلانيه

ربى يوفقك فى حياتك


تسلم لجميل مجهودك ا/ محمد

[YOo YA]

بصراحه انت افدتنا كتير من خبرتك 😏
واحب اقولك اني عتبرعلك بال 2جنيه عيش
تطلع بيهم اول سلمه ف سلالم النجاح😊
واحب اقولك ان كئيب بهمزة ع نبره
عد الجمايل🐸

[bobaOo]

استضافه جميله.

نورتوا

[يحيى الفضلي السودان]

ود حبيب لقاوبنا تدخل

تعطي للاحساس رهافة

كنت جميل مع ميدو تسال

والردود بكل حصافة

نحن نسعد وبيك نحفل

نسمو بالكلمات شرافة

ميدو لا اسما بيغفل

حسه بين الناس رهافة




يســــــــــــــــــــــــلموا