ليه مش بناخد اللي بنحبه ؟!

[Muhammad_Adel]

مش قيس وليلا لأ ! ولا عنتر وعبله والله ^!^

الصوره لــ

م/مصطفي العُسيلي & ا.أسماء

البشمهندس مصطفي زميلي ودفعتي اتخرجنا السنه دي

مصطفي حب ا.أسماء واتقدملها علي سنة الله ورسوله زي ما أي شاب مُحترم وابن ناس بيعمل مع اللي بحبها ويوفي معاها ويدخل من الباب , بس مصطفي مش مليونير ولا معاه ملايين ولا شنطة علي بابا ^_^ علشان طلبات أهل العروسه الغريبه اللي بقينا بنشوفها الأيام دي !!

إلا إنه واثق في حبه واللي بحبها وانها هي كمان هتوقف بدورها جنبه , وهنا كان الفصل من ا.أسماء اللي وافقت عليه لذاته ووقفت معاه لحد الآخر وهي عارفه انه لسه بيدرس وظروفه الماديه مش كويسه اتزوجوا وهم لسه بيدرسوا ^^ وكانوا بيساعدوا بعض وجنب بعض دايماً , مصطفي دلوقتي عنده بنتين

ربنا يحفظهمله وزوجه صالحه ’’ بميت راجل زي ما بيقولوا ’’

وسند ليه , وبفضل ربنا عايشين حياة زوجيه سعيده

أصل السعاده مش بالفلوس والله ^^ ولا هي عربيات وقصور !!

طلعوا في Events كتير قبل كده وحكوا للناس قصتهم

, اشتغلوا في تنظيم حفلات تخرج .... الخ )

,,

الشاهد في الموضوع ان الزواج سهل اهو ^^ وقصص الحب بتتم في الواقع مش في الأفلام بس زي ما غفلونا وقالولنا واحنا صغيرين ! , كل الحكاية شاب ابن ناس مُحترم يوفي بوعده للي بحبها وبنت جدعه تكون قد ثقته وجديره بالحب ده وهتقدر توقف قصاد اهلها علشانه

فيه ناس هتستغرب من كلامي ! بس السنه دي أنا شوفت كذا قصة حب بائت بالفشل ولسه مكملتش بسبب ضعف طرف من الطرفين , صحيح هو السبب الرئيسي الأهل في الرفض في القصص دي كلها لكن البنت القويه بتفرق عارف ان ده صعب في بعض الأسر وانها هتتأذي كتير قوي وهتتعرض لضرب كمان وسب وترخيم في الرايحه والجايه !!

بس كل بنت عارفه أهلها وعارفه تصرفهم وطباعهم يعني لو مش هتقدر تقاومهم لحد الآخر وتحقق أمنيتها وقصة حبها تكمل طيب ليه حبت من الأول ؟! ليه علقت حد بيها وادتله أمل ولما جاء وقت الحسم ودورها استسلمت ؟!

كمان نفس الكلام بيحصل مع بعض الشباب برضه

متحبوش حد وانتوا مش قد الحب ده يا جماعه

متعلقوش حد بيكم من البدايه وانتوا عارفين انكم مش هتقدروا تواجهوا أهاليكم

في الآخر ! , الحب عمره مكان للناس الضعيفه علشان مش هيكمل صدقوني ^^

,,

سيدنا النبي صلي الله عليه وسلم قال : (( إذا جاءكم من ترضون دينه وخُلُقَه فزوجوه )) مقالش منصبه وفلوسه !

ليه الأغلبيه دلوقتي والد البنت أو اخوها أو أي شخص هي مسئوله منه

( ولي أمرها ) بقي بيطلب طلبات غريبه ؟!

ليه بيفضل يقول عايز كذا وعايز كذا وهم أصلاً مش موفرين الكذا دا لبنتهم ؟!

ليه مش بياخدوا رأيها ويعملوا بـ الإسلام ولو هي موافقة يزوجوها ؟!

ليه مش بنراعي الشباب في ظل ظروف البلد الحاليه واحنا عارفين ان مفيش لا شغل ولا نيله هي الناس دي مكنتش زينا برضه في يوم من الأيام ؟!

3 قصص حب علي ايدي السنه دي وكلها من سنين اعرف اصحابها كويس متمتش وحصل رفض لما الشباب اتقدم بسبب حاجات غريبه من اللي ذكرته فوق !

أفيدونا أفادكم الله

[روح الروح]

الملخص يا محمد احنا بنحب المظاهر

ولو حساب أمور كتير
ولاسف اللى بيعمل غير كده يتوبخ انه غلبان ومش قادر
ونظره وحشه له من الجميع
اللى بيعرف يكمل اللى عنده ثقه في نفسه وفى اللى معه
والثقة ده نفسها بتكون لاسف مش مضمونه
دومت بود وتقدير

[قلـــــــــــــــــم]

يا محمد مش زي ما انت متخيل او متوقع

انا واحد من الناس بقولها ليك

لو عندك بنت هتخاف على مستقبلها

معلش انا هسلمك الكبد وتضره ومع عصر الشباب الحالي الاغلبيه العظمى تفكير واخلاق منعدم

ينظر للفتاة كأنها قطعة مثيرة وما أسرع ان يرميها


ملحوظة البنت كبد بوها تمرض الكبد يتلف

عندما اطلب منك مؤخر كبير فهذا لا يعني أني اعجزك. انا اضمن مستقبل ابنتي فقط

لأَنِّي لا اعلم ما تخفيه الأيام
ونحن بمجتمع فاسد عقليا يظهر للمطلقة نظرة سيئة

انا مربييش بنتي وأتعب في تربيتها وكمان اجهزها وانت تاخد حلاوتهم بالساهل

ال بتشتريه غالي بتحافظ عليه. وال بتاخده رخيص بتدوس عليه برجليك



اغلب الأمور بتتلخبط بعد الزواج ممكن فعلا تصدف بنجاح لكن مش الكل ناجح

مش الكل مثل مصطفى. ولا الكل مثلك هناك عقول تختلف اختلاف تام عن فكرة الزواج والتقديس الاسري

فلا تغضب عندما أهل البنت يحاولون الحفاظ على مستقبلها

لان مجتمعنا ذو نظرة غريبة بالنسبة فيما بعد

تحيتي اليك والى ما قدمت من موضوع يعد شائع في مجتمعنا

تحيتي اليك وتقديري

عصام

[fanaa]

بص هقولك ع حاجه انت بتتكلم فى اتجاه واحد ان الشخص دا كويس
انا كمحاميه بيمر عليا العجب وبقول نعم لكسر ضهر الشاب لحمايه البنت
متستغربش زى مافى مثل كويس فالاضعاف منيله بنيله
لما الاهل بيكحموك بطلبات وانت بتشوفها تقيله فالاهل فهامين كويس انك لاقدر الله
لو طلعت شخص مش كويس منيل يعنى فيعرفوا ياخدوا حق بنتهم
ولو انت كويس يبقى خلاص لاضرر
اعرف نماذج واصحابى شخصيا اخدوا بعض عن قصه حب طويله عريضه .. واهم بيشرشحوا لبعض دلوقت بمحاكم الاسره رغم ان الواد الاهل مأسروش معاه وبسطوا كل حاجه ليه واهو خبى العفش وطعن القيمه ا وووو...الخ... فى اساسيات يوم ما يبقى عندك بنوته ان شاء الله بفطره عندك هتعملها..

[دمعه حائره]

ماشاء الله ربنا يحميهم ويباركلهم فى اولادهم
ياريتها كانت بالفلوس مكنش حد غلب كان كل واحد اشترى اللى بيحبه وخلصنا
ولاهى بالحب كمان هى بالتكافؤ والتفاهم
الحب عاوز قوة وسند يحمية يقف قصاد الظروف والعادات
تكافؤ فى التربية والعادات بين الولد والبنت والعيلتين
زى مانت شوفت قصص حب ضاعت بسبب التحكم من الاهل
انا شوف جوازات عن حب انتهت بسبب العناد وعدم التفاهم
الجواز ده مسؤوليه كبيرة مش اى حديقدرعليها
محتاج راجل بجد يفهم فى الاصول والاحتواء
وبنت تستحمل وتكون ام وحبيبة وصديقة
عشان قصة زى دى تكمل لازم الاتنين يكونوا شبه بعض اوى
فى قوة الحب والدفاع عنه يكون عندهم هدف يسعوا ليه يتحقق
وجود الهدف وقوة الارادة هم سبب النجاح اللى شوفته دة
نختار صح فى الاول واللى مش قد الحب يقولها فى البداية على رأيك
تسلم وربنا يرزقك بزوجة صالحة تصونك وتكمل معاك المشوار

[*فجر الاسلام*]

حلوه اوى الردود بجد عجباني
ليه نلوم اهل البنت بس ما انت لو بتحب هتعمل اى حاجه عشناها
اى نعم طلبات بقا غريبه بس اللى ميقدرش يحاول يتصرف لو بجد عوزها
لو مش قادر يبقى زى ماقولت مافيش داعى نحب
ملحوظه
قصص كتير خلصت مش بسبب الماديات والكلام ده
اوقات الاهل مش بيدوا فرصه اصلا حد ينطق
كانهم ولا حاجه
وربنا يصلح حال الجميع

[Lamees]

ببساطة لا مفيش حب صادق
يستحق التنازلات
يعني البنات واهاليهم بيفكروا بعقلهم
كمان هناك قصص كتيرة فشلت
بعد ما البنت تتحدى اهلها
يطلع العريس لا يستحق
ومش بيقدر تضحيتها
فانا شايفة ان البنت تسمع كلام اهلها
وهما عندهم الخبرة اكتر
في اختيار الصالح
وده مش يمنع ان الاهل يراعوا ظروف الخاطب

تحيتي

[شاعرة الرومانسيه]

للاسف نادرا مابتنجح قصة حب وتنتهى بالزواج
انا شخصيا فشلت وقولت انفذ رغبة اهلى فى اختيارهم واقول طيب وحاضر واهى عيشة واخرها الموت وللاسف بردو فشلت
مالها الوحده جميلة ان اعيش وحدى افضل من ام العكننة كل لحظه

[Muhammad_Adel]

الملخص يا محمد احنا بنحب المظاهر

ولو حساب أمور كتير
ولاسف اللى بيعمل غير كده يتوبخ انه غلبان ومش قادر
ونظره وحشه له من الجميع
اللى بيعرف يكمل اللى عنده ثقه في نفسه وفى اللى معه
والثقة ده نفسها بتكون لاسف مش مضمونه
دومت بود وتقدير
,,,
للأسف هي المظاهر اللي بقت سايده في أغلب الأماكن دلوقتي !
تلاقي مثلاً في أماكن معينه بنت فلان جبت عفش من كذا وطلع وراها 3 أو 6 عربيات محملين ^_^ ونفرض ونجبر باقي المنطه انهم يعملوا كده وكلها اشياء زايفه في الآخر !
صحيح الثقه بتكون صعبه وخصوصاً من اهل البنت في الشباب لأن
دي بنتهم ونور عنيهم برضه الا ان فيه شباب يستحق , يستحق نساعده ونسانده ونديه فرصه .. واصل الناس بيبان عليها والله مين اللي توقف جنبه ومين اللي لأ ,, بيبان من أول ما بيتقدم ونسأل عنه ,, الفكره ان الناس بقت بتخلط وخلاص .. مش بسخر من حد لكن ده واقع بنعيشه , عندي اخوات بنات برضه الا اننا هنعمل بوصية الرسول .
,,
نورتيني , واستفدت من ردك , شكراً

[Muhammad_Adel]

يا محمد مش زي ما انت متخيل او متوقع

انا واحد من الناس بقولها ليك

لو عندك بنت هتخاف على مستقبلها

معلش انا هسلمك الكبد وتضره ومع عصر الشباب الحالي الاغلبيه العظمى تفكير واخلاق منعدم

ينظر للفتاة كأنها قطعة مثيرة وما أسرع ان يرميها


ملحوظة البنت كبد بوها تمرض الكبد يتلف

عندما اطلب منك مؤخر كبير فهذا لا يعني أني اعجزك. انا اضمن مستقبل ابنتي فقط

لأَنِّي لا اعلم ما تخفيه الأيام
ونحن بمجتمع فاسد عقليا يظهر للمطلقة نظرة سيئة

انا مربييش بنتي وأتعب في تربيتها وكمان اجهزها وانت تاخد حلاوتهم بالساهل

ال بتشتريه غالي بتحافظ عليه. وال بتاخده رخيص بتدوس عليه برجليك



اغلب الأمور بتتلخبط بعد الزواج ممكن فعلا تصدف بنجاح لكن مش الكل ناجح

مش الكل مثل مصطفى. ولا الكل مثلك هناك عقول تختلف اختلاف تام عن فكرة الزواج والتقديس الاسري

فلا تغضب عندما أهل البنت يحاولون الحفاظ على مستقبلها

لان مجتمعنا ذو نظرة غريبة بالنسبة فيما بعد

تحيتي اليك والى ما قدمت من موضوع يعد شائع في مجتمعنا

تحيتي اليك وتقديري

عصام

,,,,,

’’ يا أستاذ عصام من اؤتمن علي العرض لا يُسأل عن المال ’’

خوفي علي مستقبلها ميخلينيش امتنع واغض الطرف عن كلام الرسول

, لعلمك عندي اختين , وربنا يرزقني ان شاء الله بــ بنات صالحه زي ما حضرتك ذكرت لكن عمرنا مفكرنا بالطريقه اللي اتكلمت عليها الحمدلله , لأن انا بآمن شخص علي أختي او بنتي مش ’’ ببيعهاله ’’ ! تمن كبدي ومستقبلها دا علي حد قولك .. ميكونش فلوس ولا دهب يا استاذ عصام , هيفيدني بايه انا الدهب والفلوس لو لقدر الله بيتها اتخرب بعدين أو فشلت الزواجه !! هل هيعوض عن شيئ ؟!

,,
يا أستاذ عصام وهي الكبد دي هنكون أغلي من كبد النبي صلي الله عليه وسلم ؟!
سيدنا النبي لما جاله سيدنا علي يخطب السيده فاطمه بنته ( أقرب بنات النبي وأحبهم الي قلبه ) مكنش معاه شيئ يخطبها بيه ! عارف مهرها كان ايه ؟
كان درع سيف سيدنا علي .. عارف ان الشباب مش علي بن ابي طالب لكن البنات برضه مش السيده فاطمه !

,,
متفهم كلامك جداً , ومقدر موقفك كمان .. حضرتك أكبر مني سناً وعلي دراية بشئون الحياة الإجتماعيه , لكن اللي انا خايف منه وظاهره مش كويس ما ادلهوش بنتي ولا أختي من البدايه ..
,,
يمكن حضرتك موصلكش رسالتي بشكل كويس , كلامي كان علي الناس اللي بتخلط بين الكويس والوحش وبيعاملهم بنفس المعامله وبينسي ان دينا دين يسر وانه لما ييسر عليه هيحافظ علي بنته وهيصونها ,, أصلها مش بهيمه لا مؤخذه وبنتمنها واللي يدفع أكتر يبقي الله يباركله !! , لو الشاب كويس ليه نعجزه وهو لسه في بداية حياته ؟! , ليه ننسي ان الزمن بقي غير الزمن ومنشوفش واقع العيشه والشباب بقي ايه وانهم كانوا شباب في يوم برضه ؟!
لو هو وحش يا سيدي متقبلهوش من البداية بلاش تبيعهاله بالفوس وتكتفه اصلاً , بس دا لو هو وحش فعلاً بعد نسأل عليه ويثبت عليه ده ..

,,
وفي الآخر بحترم ردك وتواجدك القيم يا أستاذ عصام , لطالما كان تواجدك مثير ومفعم بالحيويه في الرد والنقاش ^_^ , حفظك الله بحفظه , وجمعتك مباركه .