تسييس الكورونا

[ahmed 22]

الناس وصل بيها الحال من قلة الثقة انها بقت بتسيس الكورونا
وحتي واخدينها طريق لمهاجمة النظام الموجود وكدا
من حيث ان البعض بياخدها من قلة الشفافية
او حتي قلة الكفاءة ... والكل متخيل انه مضحوك علينا
واحنا اللي بنصدر الكورونا لبره وبتاع ..
واحنا مش عارفين يا هل في كورونا عندنا ولا لاء ...
انا طبعا مش بقولك حب النظام بتاعك
بس فيه بعض الحاجات زي المرض والفيروسات الخطيرة دي
ماينفعش فيها التهريج والتنظير والفلسفة والاستغلال السياسي

هو طبعا ماحدش بعيد عن الكورونا يعني ... وهي مش شتيمة في حقنا
لو جات لينا يعني .. يعني هي لسا بتخبط الباب وغالبا هتشرفنا...
فربنا يستر

بس ده مش معناه ان احنا نرسم الحدث قبل ما يحصل..
وحتي اللي فهمته ان ال 3 اشخاص اللي سافروا من هنا لفرنسا او كندا
واتقال انه اتنقل ليهم المرض من مصر ... وكانوا افواج بالمناسبة
يعني الفوج فيه 14 شخص و2 بس اتصابوا منهم .. والكلام ده من نص شهر
اعتقد لو كانت الاصابة من هنا كان فعلا الفوج كله هيكون عنده مشكلة
او الاعراض ظهرت ابكر من كدا
حتي انه لا ينطبق عليهم الشروط اللي حطتها منظمة الصحة العالمية
للاصابة بالمرض من حيث التشخيص ...
يعني بنسبة 80 % الاصابة ممكن ما تكونش من مصر
وباقي 20 % علي حسب وزارة الصحة كان فيهم شك
عشان يتأكدوا
وفعلا اتقال انه تم الذهاب للاماكن
اللي كانوا فيها .. ولم يتم الاشتباه بأي شخص ..
يعني علي حسب كلام وزيرة الصحة

وبعدين احنا لازم نثق شوية لما الموضوع يخص الفيروس ده .. مش بقولك ثق في السلطة..
يعني الي حد ما نثق في الكلام اللي بيطلع من بيانات رسمية من الحكومة بتاعتنا
مش كل حاجة هتكون قابلة للتشكيك واللعب بعقول الناس والتهريج او تكدير الناس ..
لأن هما حكومة مالهومش مصلحة في الكدب او تضليل الناس ..
بالعكس والعقل يعني .. المصارحة هتقلل شوية من مسؤليتهم وده واضح جدا
من تعامل دول العالم مع الامر ... فاحني مش هنفتي بقا ..

يمكن الخوف من قلة الكفاءة اكتر ..
بس الكفاءة مالهاش علاقة بالثقافة الشعبية
يعني الناس المفروض تكون دواء لنفسها في الأوبئة اللي زي دي ..
وتقرأ اكتر عن الموضوع ... بحيث انه لا قدر الله لو شافوا اعراض
يكونوا فاهمين الي حد ما خطورتها او يبلغوا للخط الساخن وكدا ..
لأنه لازم الكل يكون مشارك في المسؤلية للحد من الانتشار سواء دولة او مواطنين ..
بالعكس انا شايف ان دورنا احنا كمواطنين اكبر من الدولة في حاجة زي كدا ..

وبرضه لازم الاعلام بتاع السوشيال ميديا يكون رحيم بينا شوية
يعني عشان الناس تدخل لينك لخبر وتجذبهم ليه ..
بيكتبوا حاجة تفزع اوي والناس بتنشرها ومش بتقري المضمون بتاع الخبر ..
ودي حاجة بقت مستفزة جدا ... انه كله بيكسل يقري مضمون الخبر مع انه سطرين
ومش الكورونا بس .. اي خبر .. وبياخدوا العنوان بتاعه
اللي صفحة الموقع او الجريدة بتتعمد تكتبه كدا
ويعملوه عنوان يفتحوا بيه جدل بين الناس عشان مشاهدات زيادة ورواج ليهم ..
وتلاقي كله داخل يعلق علي العنوان ده
بكل الطرق السلبية اللي ممكن تتخيلها
ومافيش حد بيدخل يعدل الكلام او يوضح ...
و 90 المية من الناس مش بيقروا خالص وبتكسل

يعني في حاجة حصلت من نصاية كدا هي اللي خلتني اكتب الموضوع ده
وهو ان في خبر نزل ان اكتر من 1400 شخص تم الاشتباه بيهم ان عندهم كورونا
فقامت الصفحات تناقلت العنوان من غير المضمون ..

فأنا قريت المضمون ... وشوفت ان فيه فرق كبير بين العنوان والمكتوب في الخبر ..

والمضمون بتاع الخبر كان
وهي ان وزيرة الصحة عاملة مؤتمر بتشرح فيه الموضوع من بدايته
وان ازاي الدولة اشتبهت في اكتر من 1400 حالة من بداية الموضوع
وتم عمل التحليل ليهم وطلعت كلها سلبية كتدابير احترازية ..
ماعدا الرجل الصيني اللي طلع مصاب و اتعالج وخرج كمان ...
ودي بتقارير من منظمة الصحة العالمية وبتاع ..

زي كل دول العالم ما بتعمل لما حد بيقول ان الاعراض عنده
لأن اصلا اعراض الكورونا اولبرد العادي متشابهة ..
فالناس الي حد كبير بقت بتخاف من اقل الاعراض وبتبلغ
او حتي من شمن الاشتباه أنك رحلات الطيران اللي جاية
من الخارج بتعمل ليها تحليل خصوصا من الدول اللي نشط فيها الفيروس ..

انما العنوان لما انتشر من غير ما حد يقرأ المضمون
شفت بقا اكتر من ييجي 100 كومنت ولا حاجة من ضمن الاف طبعا ماقريتهمش كلهم
ما بين فزع وما بين اللي بيتريق علي وزيرة الصح
وما بين اللي شايف ان احنا بنصدر الكورونا وبنهزر
او مستكترين علينا اللطف اللي ربنا مغطينا بيه لحد دلوقتي ..

وحتي لما علقت علي بوست منهم عشان اوضح الصورة بشكل احسن
فيه اللي فهم ... بس فيه بقا اللي داخل يتريق .. واللي داخل يقول يا عم هو في حد ممكن
يخف من الكوروناو في قلة المام بالموضوع او اهتمام ..
والصراحة اكتشفت ان دماغنا في اللالاند خالص ..
وسهل فعلا توجه الناس للسلبية ... حتي في مواضيع
هي المفروض مواضيع الساعة والناس كلها مشغولة بيها في العالم كله
ومالناش غيرها في السوشيال الميديا وبتاع ...

بالمناسبة واكيد يعني اللي مطلع عالموضوع عارف
ان اكتر من 80 المية من الحالات اللي تم اكتشاف انها مصابة بالكورونا
هي خفت وبقت احسن فعليا ... وان معظم اللي توفي من المرض
كان لاما كبار سن ... او ناس عندهم امراض مزمنة ..
يعني في ناس ممكن يجيلها الفيروس وتخف علي حسب قوة المناعة
هو مش فيروس قاتل ... بقدر ما انه فيروس متنقل وخبيث شوية ..
ومع دخول الصيف وكدا وان الجو يبقا حر شوية
احتمالية الاصابة بالمرض هتقل كتيرر جدا ...

المهم يعني أنك بتحس ان الناس فعليا مش فالحة غير في التهكم والسخرية والندب
او متبرمجة عالسطحية او انها تتفزع وتتحسر وتقول ربنا يستر من غير ما تفهم ...
ومستعجلين عالفزع ... يا جدعان لو فيه حاجة والله ما هتستخبي ..
ده احنا بلد المليون منظراتي .. يعني عادي ..

ولو بلدنا جيه فيها كورونا فاحنا مش احسن من العالم اللي بره دي خالص
ما هو كل البلاد المتقدمة طلع فيها حالات ..وهو غالبا هيشرفنا يعني
يعني لو طلع مسؤل عندنا وقال عندنا كورونا .. هنقوم عليه بثورة يعني ..

ومش مقياس ان بلادنا فقيرة او غير متقدمة .. انه يعني لازم يبقا عندنا
ما هو بلاد العالم كتير .. ومعظم البلاد اللي زي حالتنا ربنا لاطف بيهم
وماحدش لسا اعلن عن حالات فيها ...

احنا اكتر من 200 دولة منهم حوالي 20 ولا 30 اللي اعلنوا
ومعظمهم من بلاد العالم الأول تقريبا ودول متقدمة ...
والباقي لسا ..

او بقا الأهم انه يتم تسييس الحدث وبعض الجبهات تستغله
في التقليل من امكانيات السلطة وبتاع وتكسب نقط ليهم كمعارضة
مع الناس وبتاع ...
يعني عندكم حاجات كتيرة ممكن تستغلوها في لعبة السياسة وانا مش ضدها الصراحة
اهي السياسة لعبة قذرة عامة وكل شئ فيها متاح
بس بلاش المرض تسيسوه .. وتستغلوا الناس
لأغراض مش لطيفة ... مش كل حاجة ينفع فيها سياسة
وخاصة في الوباء اللي محتاج جهة واحدة بس اللي يطلع منها الخبر
ونحاول نثق في الجهة دي قدر الامكان ... مهما كان اختلافنا معاها
والا هيصيبنا ما هو اسوأ من المرض .. وهي الهستيريا والفزع الجماعي
وحتي لو الخبر اتأخر فده افضل من افتعال مليون خبر يفزع ..
لحد ما الحقيقة توصل ..

[Totoa top]

موضوع حلوه تسلم ايدك

[lamara]

كلام فوق الجميل

[Totoa top]

كلام فعلا جميل
تسلم ايدك على موضوع ممتاز

[شروق محمود]

فعلا انا حاسه ان الناس بقا عندها فزع وهلع
رغم ان دول كتير فعلا متقدمه وظهر فيها حالات كتير
ربنا يسترها علينا ويحفظ مصر واهلها

[حور الشمري]

الله يستر علينا من ها المرض

[شيزوفرينيا]

شكراً لك

تحياتي