خبطة العمر .. قلم مهيب

[مهيب الركن .]

كنا بنشوف فى الأفلام البطل الأعمى
لازم يتخبط خبطه جامده عشان يرجعله بصره
والواقع فعلا كده وبيقول كده
شوف كام خبطه انت اتخبطتها فى عمرك رجعتلك بصرك
وخلتك تشوف حاجات مكنتش شايفها قبل ما تتخبط
عنيك فتحت وقدرت تفرق بين الناس اللى تستحق تكون جنبك
وبين الوشوش اللى كان نظرك الضعيف مش شايف ملامحهم الحقيقية
شوف كام خبطه قوتك وخلتك تستحمل الف خبطه بعدها
التطعيم مش فى الطفوله وبس
كل الأبتلاءات والمحن اللى بيتعرض ليها الأنسان هى مجرد تطعيم وصقل له
ولازم دايماً وطول الوقت تسأل نفسك عن ايجابيات أى مشكله انت مريت بيها
لأن الدورس اللى بتخرج بيها دى هى أصلاً الهدف من مرورك بأى صعوبات فى حياتك
ولو متعلمتش الدروس دي يبقى سقطت فى الامتحان
وساعتها للأسف هترجع تمر بنفس الأختبار لحد ما تتعلم الدرس كويس
وخليك دايماً عارف
كل حاجه الأنسان بيمر بيها ليها حكمه
حاول تدور علي الحكمه دى عشان تعرف تعدى الامتحان
ولو معرفتش ايه الحكمه من اى صعوبات انت مريت بيها
يبقى اخترع حكمه نفسك تستريح ليها
الله خير ولا يأتى من عنده الا كل خير
وان عجزت ابصارنا ان تراه فلا يجب ان تعجز بصيرتنا عن ادراك حكمته
فسبحان الذي بيده ملكوت كل شيء وإليه ترجعون ..

بقلم مهيب

[فداااااااااااء]

صحيح كل شيئ بيحصل في حكمة وراه مش شرط نعرفها فى وقتها ممكن مع مرور الزمن توضح
الحياة تجارب ووجب التعلم منها
مقال قيم اخى دام تواجدك الراقي

[*فجر الاسلام*]

كلامك صح طبعا كل محنه لازم نتعلم منها
وربنا يستر من كتر الخبطات مانعماش خالص
تسلم اخي الله يسعدك
تحياتي

[دمعه حائره]

صدقت اخي وضربات الحياه الموجعه هي دي اللي بتعلمنا
بتخلينا منتبهين بعد كده والواحد طول ماهو عايش بيتعلم
تسلم ربنا يحفظك

[شاعر الإحساس]

كل موقف بيعلمنا حاجه...
كل تجربه بتعلمنا ...
واكيد بتعلم فينا....
اختلفت الاشكال...والنتيجه واحده

الحياه كدا..كلها مفاجآت...
بس تجارب الحياه اكيد رقم قسوتها
لكن لابد منها ....
لان محدش بيتعلم بالساهل


اخي مهيب موضوع واقعي
وحقا صدقت فيما قلت...
ونسأل الله الصلاح والفلاح


دمت بكل خير وسعاده
تحياااتي وتقديري واحترامي


شاعر الإحساس

[ايمان طلعت]

الواحد لازم يتخبط عشان يفوق من غفلته ويتعلم
ولو متعلمش يستاهل اللي يجراله

[SaMa.]

صح انا اتخبط وفتحت عنيا ع حجات مكنتش شيفاها
عجبنى كلامك

[Fatma eissa]

الواحد يحتاج
دايما حاجه تفوقه
عشان يعرف يتاقلم
في حياة
ويستوعب العلام منها
عشان يقدر يكمل


موضوع أكتر من رائع
تسلم ايدك

[فصيح]

الله عليك يا مهيب وأنت هنا حكيم وكلامك رزين
سلم الله هذا الفكر وهذا القلم
تحياتي لك يا غالي

[بحر القمر]

ليس الاعمى فقط هو الغير قادر على الابصار فهنالك بعض البشر ممن يضرون غيرهم حفظنا الله جميعا منهم عيونهم مظلمه تماما رغم ان ظاهرها مبصر
ليس العمى فقط هو عدم الابصار بل هنالك عمي القلوب والارواح والافكار
الله يهدي الكل ويوفق الكل
حياك اخي