شايفة بيتنا..إحساسك في صورة

[د/ عبد الله]

بقولك ايه
ايه فيه ايه

شايفة حاجة
حاجة ايه
طب هقولك...

شايفة بيتنا؟
ده كل حاجة فيه شافتنا
شايفة شجرة تين بتطرح
شايفة ورد ف كل مطرح
شايفة يومي بنفس لونك
ضحكتك أهي مالية صوتنا

شوفت بيتنا
بعد بيتك ايه فايتنا
ما انت بيتي وانت أهلي
انت أجمل شئ حصللي
وانت حلمي اللي محاوطنا

سامعة لحني..
شايفة ضهري وهو محني
لما شبت ولسه شايلك
أيوة طفلة أنا لسه شايفك
والشقاوة دي طبع فيكي
تستخبي وتجري مني

أيوة بنتك..
طول حياتي هعيش حبيبتك
والسنين هتزيد حلاوتي
وأشغلك أنا من شقاوتي
أجري واستناك ف حضنك

شايفة بيتنا
ده كل حاجة فيه شافتنا
بنت شبهك ماسكة ايدي
ضحكة تجريلي ف وريدي
حلم نحكيه ف حكايتنا.

[حـيـــــآة ❤]

جميله اوي بجد
عجبتني جداا.
تسلم ايدك دكتورنا

[شروق محمود]

جميله وفيها رتم موسيقى رائع
دام نبضك دكتور

[بحر القمر]

ابدعت واحسنت استاذي
ربي يسعدك

[*فجر الاسلام*]

انا مش عارفه اكتب اي
بس روعه العاميه بتاعتك تجنن بجد
بفكر اسرقها😂
تسلم ايدك بجد
تحياتي

[ايمان طلعت]

احلى محاكاه للصورة
اجدت التعبير
رائعه جدا جدا الكلمات عجبتني
سلم نبض قلمك الراقي
تحياتي

[.Lamar]

بصراحة مش عارفة ارد
اقتبس ايه ولا ايه
كلها حلوة جدا
يا رب منة تعمل مسابقات كتير
عشان نشوف الابداع دة

[SaMa.]

حلوة اوى وانهم بيكلمو سوا

[د/ عبد الله]

اقتباس المشاركة الأصلية كتبت بواسطة حـيـــــآة ❤ جميله اوي بجد عجبتني جداا. تسلم ايدك دكتورنا

تسلمي يا هاجر
الاجمل هو وجودك وكلامك الحلو
نورتيني

[د/ عبد الله]

اقتباس المشاركة الأصلية كتبت بواسطة شروق محمود جميله وفيها رتم موسيقى رائع دام نبضك دكتور

تسلمي يا شروق
والاجمل هو تذوقك الموسيقي
نورتيني