الحلقه الخامسه من حلقات استضافه ومعانا ( ايمان طلعت )

[واد حبيب]

السلام عليكم ورحمه الله وبركاته~

اهلا بكل اعضاء منتدي بنات مصر الغالي
ومرحبا بكل زوار المنتدي الكرام
اهلا ومرحبا بكم في حلقه جديده من حلقات استضافه
هنتعرف كتير علي الضيفه وعن حياتها
معانا ومعاكم سيده الطبخ الاولي اللي هتعزمنا كلنا

ايمان طلعت
منتديات بنات مصر - مشاهدة الملف الشخصي: ايمان طلعت

السلام عليكم
عليكم السلام و رحمة الله وبركاته

*امته دخلت منتدي بنات مصر وكنت في منتديات تانيه ولا لا؟
دخلت ١٤/١٢/٢٠١٣
كنت في منتدى قبل بنات مصر واتقفل بعدين دورت على منتدى مصري ولقيت بنات مصر وسجلت على طول

*ليه سجلتي باسمك الحقيقي مش اسم مستعار؟
مش عارفة مبحبش التخفي وراء اسامي مستعارة و ممكن عشان كل حرف اكتبه يبقى موثق باسمي

*عرفتي المنتدي ازاي واي اللي شدك تسجل فيه؟
عرفته بالبحث بالصدفه سجلت على طول وقولت اتصفح لو عجبني استمر

*اي اكتر الاقسام المحببه لقلبك في المنتدي؟
الابداعات الادبية والتصاميم

*اول قسم كنتي مشرفه عليه واي اللي عجبك فيه؟
قسم الخواطر وهمس القوافي
يعتبر تبع الابداعات الادبية وانا بحبها

*ايمان كانت نشيطه لحد ما فصلت لمراقبه بعد كده قل النشاط ليه؟
انشغلت شوية في شغل المراقبه عن الكتابه وكنت حابه ادى كل واحد حقه في التقييمات الشهرية وكده

*ايه سبب غيابك الفتره دي كلها؟
وفاة امي وبعدها تعب في عيني من كتر الحزن والبكاء
بس الحمد لله على كل ما يأتي من عند الله

*كان في مشاكل في المنتدي ووجهتها ازاي؟
بالنسبة ليه محصلش مشاكل معايا واما حصل اختلافات وانا في الادارة فضلت تركها

*مين اكتر الاعضاء كان بيختلف معاكي دايما في المنتدي؟
مفيش والله الحمد لله

*انتي عضو قديم في المنتدي شايفه اي الفرق بين المنتدي زمان ودلوقتي؟
المنتدى زمان كنت بسيب اي حاجه ورايا وافتحه
كان فيه ناس كتير وشغل ومسابقات وسهرات وتوبيكات ضحك وهزار بالساعات وحوارات جاده وافكار كتير
دلوقتي الاعضاء قليله والشغل قليل فبنحس بالملل ونبطل ندخل

*اي الفرق بين المنتدي ده واي منتدي تاني؟
الحقيقة دخلت منتديات تانيه بعد بنات مصر وكل مرة ارجع اركز هنا فالمنتدى هنا ناس بتقرأ وتفهم وتعلق عالموضوع اي منتدى فيه تفاعل كتير بس تفاعل كله نسخ ولزق من غير ما حد يقرأ حتى

*لو اختارتي ترجعي الاشراف تاني تمسكي قسم اي؟
لا انا كده تمام اوي مفيش مسؤلية ولا اي حاجه اعمل اللي اعمله وقت ما احب

*هتكوني متواجده بصفه مستمره ولا هتغيبي تاني؟
ان شاء الله اكون موجوده والغياب ده بيبقى حسب الظروف والله اعلم باللي جاي

*المنتدي بيمثل اي لايمان هوه مجرد تسالي ولا حاجه تانيه؟
كان الاول بدخل للتسلية بس بعد كده اتعلمت حاجات كتير وبقى مكان للتعلم والترفيه و التسلية بقى مكان فيه صحاب ادخل ازورهم

*مين اقرب الاعضاء لقلبك هنا اختاري بأسماء؟
بدون اسماء الكل هنا مقرب لي وغاليين فعلا

*ةجهي كلمه للاعضاء اللي مش بيدخلو تشجعهم علي الدخول؟
اللي مش بيدخل حاسس بملل المكان محتاج لكل واحد فيكم عشان الملل ده هيروح بشغلكم و تواجدكم ارجع ومش هتندم
واللي مش بيدخل لمشاكل واختلافات ياريت تنسى مفيش حاجه مستاهلة

*شايف ان في اعضاء مظلومين في المنتدي؟
المنتدى مش منظومة حكومية ولا شغل عشان يبقى فيه ظالم ومظلوم هنا الكل بيدي اللي بيقدر عليه والناس اللي بتعمل مشاكل المفروض تفهم كده

*مين اللي نفسك يرجع المنتدي تاني ويفضل علطول اختار ليا اسماء؟
جبل عالي..حوراء..براءة طفله..فنا..بوبا يا هاجر..شجرة الدر..طبيب الهوى..قلم..الماجيك..المنشاوي..مورشو..سيلفر سبكترا..ملك جبال الاحزان..طائر الشرق
اكيد فيه اسماء كتير بس الزهايمر بقى

*لو قولتلك اختار 5 اعضاء بيعملو نشاط تختار مين؟
حاليا اكتر نشاط هم
واد حبيب..سينا..بج بوص..دمعة حائرة..فداء
لكن لو تقصد مين في وجوده بيحصل نشاط
طبيب الهوى..مورشو..بيج بوص..قلم..المنشاوى

*فرق بين ايمان في المنتدي وخارج المنتدى؟
ولا اي حاجه هي هي

كده خلصنا من المنتدي
ايمان طلعت خريجه كليه اي
m. F. T
معهد فني تجاري😁

*سمعت انك محترفه في التصوير دي هوايه ولا اي؟
مش محترفة ولا حاجه مين طلع الاشاعه دى..هو شغل مش هوايه

*لو قولتلك اختاري عضوه تصوريها وتحتفظي بصورتها تختاري مين؟
دمعة حائرة

*احكي لينا موقف حصل معاكي وانتي بتصوري
واحد كان عايز يتصور ومعاه كرافته مش عارف يربطها بيقولي تعرفي تربطيها قولتله لا وانا بعرف 😁 متخلف اصلا كرافته ايه اللي اربطهاله ده

*اي علاقه ايمان باولادها شديده ولا بتصوت طول النهار؟
كنت بصوت طول النهار دلوقتي كبروا الحمد لله بقيت الطم طول النهار 😂

*بتعرفي تطبخي ولا علطول اكل من بره قولي من غير كسوف؟
بعرف اطبخ الحمد لله كل حاجه واحلى من اكل برة كمان😌

*حياتك مستقره ولا فيها مشاكل ولو وجهتك اي مشكله بتحليها ازاي؟
الحمد لله حياتي مستقرة واكيد بيعدي على اي بيت مشاكل وبتعدي
معرفش على حسب المشكله بتتحلل بطريقتها

ساعات اولادك بيكونو نقطه ضعفك ولا في حاجه تانيه؟
لا مفيش غير ولادي

*اي الحلم اللي بتحلميه ونفسك يتحقق؟
ان ولادي يكونوا كويسين

ماذا تفتقدين فى حياتك؟
لو شخص يبقى امي
لو شئ يبقى قلمي

*ما هى الصفه التى لا تستطيعى تغيرها فى نفسك؟
سرعة البكاء
*ما هى اكبر اخطائك؟ و هل تغتفر فى حق الغير؟
اكبر اخطائي كانت في حق نفسي
الحمد لله مبظلمش غير نفسي😥

*اي الشي المميز في ايمان غير باقي الناس
مفيش زيي زي كل الناس...مش عارفة اكيد مش انا اللي اقول

ارجعي بالزمن شويه لورا جوزك عن حب ولا تقليدي
كان تقليدي وقلب 😊

*احكي لينا اول موقف حصل بعد ما انخطبتي
بعد ما اتخطبت روح بيته كلمني في التليفون 😁

وجهه كلمه لمنتدي وللاعضاء المنتدي
ياريت الكل يرجع ونتلم تاني ونبني المكان تاني زي الاول حقيقي المكان يستحق

اشكرك ابو اياد للاسيتضافه

[بحر القمر]

يارب يسعدكم
تحياتي لكم

[فداااااااااااء]

ربنا يرحم امك عزيزتى ويبارك لكِ فى اولادك

استضافة رائعة لايمى الجميلة والمحبوبة

ربنا يديم تواجدها الحلو بينا

سلمت اخى محمد

[حازم34]

ما أجمل وأنقى وأطيب من هذه الاستضافه الأخت ايمان ونعم والله الكل يقدرها وهي محبوبه من الجميع ساهمت بتواجدها الجميل في اعلاء ونشاط المنتدى اسأل الله ان يحفظها ويبارك لها في اسرتها ويغفر لوالدتها وان يرزقها برها دائما وابدا.... اسعدك الله اخي ابو إياد على هذه الاستضافه الجميله تحياتي

[big bốss]

معهد فني تجاري😁

كنت فاكرك واخده دبلون 😂

ايمان طلعت نبض قلب المنتدى و من الشخصيات الجميله و المحترمه

و كلنا بنحترمها و نقدرها و بنحبها

[سيناا]

ربي يرحم والدتك ويعطيك الصحة والعافية يا ابلة

حوار جميل لانسانة دخلت قلوب الجميع برقيها واحترامها

الابلة ايمان كانت ومازلت تعطي وتقدم ولكن بالفترة هذه نريد المزيد والمزيد يا ابليتي

تتذكري لما صممتي لي صورية رمزية جون سينا كان ماسك فانوس رمضان
ههههههههههه

ولا وقوفك معي في مسابقة اختر حظك لولاك لما قدمت المسابقة

حقيقي شكرا يا ابلة

[حـيـــــآة ❤]

ربنا يرحم والدتك يارب العالمين ويجمعكم بعد زمن طويل في جنات الخلد اللهم امين
نورتي الاستضافه يا إيمي
شهادتي مجروحه فيكي ❤️❤️

تسلم ابو إياد عالمجهود ❤️❤️

[دمعه حائره]

ربنا يرحم والدتك ويصبرك علي فراقها
حوار جميل نورتي ياايمي وربنا يحفظك انتي واولادك
ولو علي الصوره تعالي نتصور سوا يحصلي الشرف
شكرا يامحمد علي الاستضافة

[شروق محمود]

عليكم السلام ورحمة الله
استضافه جميله مميزه
ايمان عسوله خالص
تسلم محمد ويدوم التميز

[ايمان طلعت]

اقتباس المشاركة الأصلية كتبت بواسطة ياسر عبد الباقي يارب يسعدكم تحياتي لكم

شكرا ياسر للمرور
تحياتي