مسلسل " حلـــمـ عمــريـ "

[.. בٓـيــًـًـًآءْ . .]

لكل منا امنيه بتكبر معاه كل يوم وكل لحظه بتمر من عمره وبتصبح حلم ..... حلم العمر
حدوتى المره دى بتتكلم عن احلام كتير لابطال كتيرفى قصتى ومسلسلى الجديد ده ..... المسلسل اينعم قائم على سيرة اربع بنات لكن كمان فيها قصص لاشخاص كتير غيرهم
المسلسل مليان قصص كتير متصله ببعض
واليكم ........

اولى الحلقات

القصه منقولهـ
وكاتبتها
فيروز ( fyaroz)
لحفظ الحقوق

[.. בٓـيــًـًـًآءْ . .]

الحلقهـ االاولى

رن جرس الانصراف فى مدرسة الحلميه الثانويه بنات الى موجوده فى حى الحلميه بالقاهره
ماجى : اااااوف امتى السنه دى تخلص وندخل الجامعه ونتخلص من اليونى فورم الخنيق ده
فيروز : شكلك معاكى قرشين عاوزه تبعزقيهم فى طقمين مصيرهم الدولاب كالعاده
ماجى : اعمل ايه يا روز ... مش دايما بتعجبنى الحاجه بعد ما اشتريها
فيروز : عشان متسرعه
سندس : او فنجريه ... مش عارفه ان غيرها مش قادر ياكول
ماجى وهى متنرفزه : بس انتى يامو الخير خليكى فى حالك
وقفت سندس متنحه وباصه ناحية شاب كان واقف على ناصية الشارع الى فيها المدرسه
نسرين : ايييييييه وقفتى ليه ما تمشي
ماجى : البنزين خلص ولا ايه
سألتها فيروز : مالك ياسندس انتى متنحه ليه
سندس فى قلق : ده جالى المدرسه
فيروز : اوبس ده مجنون على كده ازاى تسمحيله انه يجيلك المدرسه
نسرين : هتعملى ايه دلوقتى يامو الخير
سندس فى قلق : مش عارفه بس اكيد هيحاول يكلمنى
ماجى ببرود : طيب ماتخلصى وتكلميه شوفى عاوز ايه عاوزين نمشي
فيروز متنرفزه من ماجى : ايه الى انتى بتهببيه ده تكلمه ازاى يعنى كده فى الشارع وكمان عند المدرسه انتى ايه مخك متركب فى افاكى
سندس بقلق : طيب اعمل ايه يافيروز اكيد هيحاول يكلمنى باى طريقه
نسرين : اوباااا ده جاى ناحيتنا
سندس فى قلق شديد : اعمل ايه حد يقولى
ماجى وهى رايحه ناحيته : انا الى هعمل خليكى انتى
فيروز : مجنونه
　
　
　
راحت ماجى ناحيته وسالته : نعم ... عاوز ايه من سندس
بصلها الشاب فى استغراب وقالها : عاوز سندس
ماجى : عاوز منها ايه
هو : عاوزها
ماجى وبدات تتنرفز : يوووووه متنرفزنيش بقا ... بص هى مش هينفع تكلمك هنا عند المدرسه او حتى فى الشارع كده ... قولى الى عاوز تقوله ليها وانا هقولها
هو وبيطلع ورقه من جيبه : طيب اديها الرقم ده خليها تكلمنى ضرورى
اخدت منه الرقم بكل كبرياء : اوكى ... بايباي
هو ببرود : وعليكم السلام
نبذه عن ماجى " بنت دلوعه جدا وبنت ناس اغنيه وطبقه رفيعة المستوى ... اى حاجه عاوزاها تجيلها بدون مشاكل ... متكبره حبتين فى تعاملها مع الناس لكن مع اصحابها عادى وهم كمان بيعرفوا يتعاملوا معاها لانهم بيحبوها وصاحبتهم من زمان .... جذابه جدا وانيقه جدا ودايما مهوسه بالموضه هى ونسرين وحياتها كلها ترفيه ومعندهاش مسؤليه والحياه بمبي دايما فى عيونها "
جريت ناحيتها سندس وقلبها مقبوض : ايه قالك ايه ؟
ماجى وهى مده بايدها الرقم الى سابهولها : بيقولك كلمينى على الرقم ده عشان عاوزك ضرورى
اخدت سندس منها الرقم
راحت فيروز سألتها بحزم شويه : ايه انتى هتكلميه ولا ايه
سندس وهى باصه لفيروز فى استغراب : وفيها ايه اما اكلمه اشوفه عاوز ايه
فيروز : لاء طبعا فيها كتير .... سندس الواد ده مش مريحينى وبعدين يعنى هيكون عاوز ايه منك غير انه عاوز يمشي معاكى والهبل بتاع المراهقين ده
نسرين وهى بتوجه الكلام لفيروز : وفيها ايه يعنى ... مش هتخسر حاجه لو شافت عاوز ايه ... ده حتى امور وشيك
ماجى : يعنى مش شيك اوى
نسرين : لاء شيك
سندس وهى بتفكر محتاره تكلمه ولا لاء : طيب انا هروح عشان متأخرشي ... يلا يافيروز
مشيت فيروز وسندس وروحوا لان بيتهم فى نفس الطريق قريبين من بعض
نبذه عن سندس " بنت رقيقه حساسه طيبه جمالها رقيق جدا تحب تبصله ... متدينه ولابسه الحجاب لانها من عائله متدينه ... الصديقه المقربه لفيروز "
نبذه عن فيروز " شخصيه حاده حبتين ... جمالها عادى بس انيقه وشخصيتها قويه بتحبها كل الناس ... من عائله ميثاليه فى تربية اولادهم على حرية الراى والقرار والمسؤليه ... طموحه جدا والصديقه المقربه لسندس "

　
　
　
　
دخلت سندس من باب الشقه على اوضتها عدل من غير ماتكلم حد
سمعت والدتها صوت الباب بيتقفل وهى واقفه فى المطبخ
الام : انتى جيتى يا سندس
سندس من موقع اوضتها : ايوا ياماما انا بغير هدومى
وقفلت باب اوضتها ... وخلعت اليونى فورم بتاع المدرسه
ولبست لبس البيت
وقعدت على طرف سريرها وطلعت الرقم من شنطتها وفضلت تبصله متردده وهى ماسكه موبايلها ... ضغطت على ارقام النمره بتاعته وفضلت متردده تدوس اتصال ولا تكنسل
واخيرا
داست
اتصال
وجرس
صوت خشن شويه : الووو
سكتت وهى متردده ترد ... لكن تماسكت نفسها ويادوب صوتها خرج من بين شفايفها : ايوه
هو : مين معايا
سندس بنفس الصوت : انا سندس
هو : مش معقول ... بجد مش مصدق ودانى
احمرت سندس من الخجل : .....
هو : بجد انا سعيد جدا انك حققتيلى امنيتى واتصلتى بيا انا بقالى سنه مش عارف اكلمك ازاى انتى مبتدنيش فرصه ابدا انتى واصحابك
سندس بصوت هادى ورقيق : بس انت مكانشي المفروض تجيلى المدرسه ... ممكن كده تعملى مشاكل
هو وبكل زوق : انا اسف بجد بس غصب عنى كنت محتاج اتكلم معاكى باى طريقه
سندس مكسوفه وفضلت ساكته
هو كمل كلامه : والحمدلله كلمتك ... بجد انتى حلم حياتى وانا حاسس انى بحقق دلوقتى جزء من حلمى بيكى وهو انى كلمتك
سندس : .............
هو : ايه سكتى ليه ... اوعى تكونى اضايقتى من صراحتى ...
سندس وهى محرجه : آ .. ابدا .. بس ... آآ .. مم
هو : ايه مالك مرتبكه ليه
سندس وهى بتتنهد : مافيش
هو : سندس
اول مانداها باسمها اتنفض جسمها وحست بشكه فى قلبها
سندس : ايوه
هو : انا بجد معجب بيكى وهتفضلى دايما حلم حياتى الى هعمل عشانه المستحيل عشان احققه
سندس : ......................................." هتموت من الكسوف ... اول مره تسمع الكلام ده وتدي لحد فرصه يقولها الكلام ده ... ياما رفضت تتكلم مع اى معجب بيها ..لكن ده اشمعنا رضيت انها تكلمه واديته الفرصه يقولها عن الى جواه من ناحيته "
خبط الباب بتاع اوضتها وبعدين دخل اخوها الاكبر منها بسنتين ... ارتبكت وهى بتقفل الخط ووشها محمر وملامحها باين عليها القلق والارتباك
قلبها فضل يدق يدق
لاحظ اخوها تغير ملامحها وشها ان في حاجه هى مخبياها عليه خصوصا وهى بتحاول تدارى التليفون بتاعها
حمزه : انتى مالك ... في ايه وماله التليفون ... انتى كنتى بتكلمى مين ؟؟
كل ده وكان الخط مفتوح وفجاه بعد الجمله دى قفل من عنده هو
طلب منها حمزه التليفون وهى فضلت بنفس الحاله واستسلمت ليه وهو بيتفحصه وبيضرب اخر رقم وخلاص سندس ماسكه نفسها بالعافيه ومنهاره جدا من جواها وبتدور على اى مبرر تقوله لاخوها
نطقت وقالت وهو بيتفحص التليفون : انا كنت بكلم صاحبتى ... بس
وسمعت رساله مسجله " الرقم الذى طلبته ربما يكون مغلقا "
بصلها حمزه كده وقالها : بس ايه ؟؟
سندس بعد ما سمعت الرساله هديت واستعادة قوتها بسرعه : انا اتفجات بدخولك عليا فجاه ووقتها كنت بضرب رقم واحده صاحبتى لسه عارفاها انهارده وقولت لما اروح اسجل اسمها وارن عليها وكده بس دخولك خلانى ارتبكت
حمزه : اه ... اوكى ... عموما انا كنت جاى اقولك الغدا جاهز
سندس بنفس هدوءها المعتاد فى الكلام : حاضر انا جايه حالا
بصلها بنظره غريبه وخرج من الاوضه
سندس " اوووووف ياااه كنت هروح فى داهيه ... الحمدلله انه قفل موبايله "
وبعدين سرحت سندس اول ما افتكرت كلامه وهى هيمانه وسعيده رغم الى حصل مع اخوها دلوقتى وكانت هتروح فى داهيه
" انا بجد معجب بيكى وهتفضلى دايما حلم حياتى الى هعمل عشانه المستحيل عشان احققه "
　
　
　
　
　
　
　
　
　
　
　
الساعه سته مساءا
فى بيت فيروز
بتحضر نفسها عشان دلوقتى معاد الدرس فى بيت نسرين
قدام المرايا
صافي : هترجعى امتى من الدرس
مسحت فيروز بفرشة البلاشر على خدها بخفيه وردت على سؤال اختها ببرود شديد
فيروز : مممم .... مش عارفه .... حسب الظروف
صافى : كنت عاوزاكى تنزلى معايا نشترى شوية حاجات عاوزها ...
بصتلها فيروز نظرة سؤال ؟؟؟
كملت صافى وقالت : انتى عارفه ان خلاص الوقت قرب على يوم زفافى و ........
قاطعتها فيروز : صفصف حبيبتى ... انتى متوتره ليك كل التوتر ده ... خليكى ريلاكس وكل شىء هيعدى
ظفرت صافى بنفس عميق بعد ما كشفت فيروز الى جواها من توتر
صافى : هو باين عليا اوى
فيروز : بصراحه ... ايوه
صافى بصوت يائس : طيب اعمل ايه
فيروز وهى تمسك بشنطة يدها : تعملى فيا خير وتسبينى اورح الدرس الى هتاخر عليه
صافى بنظرة حزن : اوكى
بصتلها فيروز وقربت منها وهى بتقولها : هحاول ارجع بدرى .... عشان خاطرك ... يا احلى اخت ليا ... بايباى
ابتسمت صافى ابتسامه هاديه : بايباي يا حبيبتى ... خدى بالك من نفسك
صافى "اسمها الحقيقي صافيه تبقى اخت فيروز الكبيره وهى مخطوبه وعلى وشك الجواز وميعاد زفافها قرب ... بنت زكيه جدا وطيبه جدا وهى وفيروز اصدقاء مقربين لبعض ... وفيها طباع كتير قريبه من فيروز "
　
　
وقفت فيروز عند موقف الميكروباصات تتلفت حوالين نفسها تدور على ميركوباص مليان عشان يطلع بسرعه وتلحق قبل ميعاد الدرس ( بتحب تحترم المواعيد جدا )
اخيرا ركبت الميكروباص وخدها على بيت نسرين
فيروز لسواق الميركوباص : نزلنى على الناصيه دى لو سمحت
نزلت منه وبصت فى ساعتها وهى بتقول : هه الحمدلله لسه فاضل خمس دقايق على ميعاد الدرس
التفت ناحيتها يمين وشمال على امل انها تقابل حد من البنات اصحابها بالصدفه ويطلعوا سوا بيت نسرين
لكن مافيش
　
　
　
كانت قاعده نسرين تتفرج على التلفيزون ومنفضه خالص لميعاد الدرس وان فى طلبه واستاذ هيجوا عندها ناو عشان ياخدوا الدرس .... لكن مين وازاى وفين ولا على بالها وهو ده الى بسميه تكبير الجمجمه
على صوت ضحاكات نسرين العاليه رن جرس الباب ....
نسرين بصوت عالى بتنادى على حد من اخواتها : حد يجى يفتح الباب
جه اخوها الكبير يوسف وهو بيبصلها باستحقار ... واتجه ناحية الباب وفتحه
يوسف : ..........
فيروز : ..........
يوسف : اتفضلى .... نسرين موجوده
فيروز : ........ اه اوكى ... ميرسي
دخلت فيروز وقفل يوسف وراها الباب
شاورلها ناحية مكان نسرين وقالها : اتفضلى هى فى الـ ليفنج روم
فيروز : اوكى ... عن اذنك
　
　
دخلت فيروز على نسرين .... لقيتها قاعده على الكرسي ومريحه على الاخر ورجلها الاتنين فوق ايد الكرسي وفاتحه بؤها ع الاخر تضحك على الفيلم الكوميدى الى بتتفرج عليه
فيروز بعصبيه : انا هنا يا هانم
اتنطرت نسرين من على الكرسي بسرعه مفزوعه
نسرين : خضتينى .....
فيروز : ..............
نسرين : تعالى اقعدى ده حتة فيلم تحفه بجد بيموت من الضحك
فيروز : سخيفه
نسرين : انا سخيفه ؟؟
فيروز : بزمتك ده منظر .... هتقابلى الاستاذ بيبجامة البيت ... خلاص الدرس مش فاضل عليه الى دقيقه
نسرين : يييييييه ... الوقت بيجرى بسرعه ليه كده
فيروز : عشان الوقت عندك رخيص
نسرين : خلاص بقا انتى هتعملى فيها التلميذه المجتهده
فيروز : منا فعلا مجتهده ... مش محتاجه اعمل فيها حاجه .... الرك عليكى انتى يا فاشله
نسرين : خلاص خلاص ... انا هقوم البس ... ثوانى وراجعه
فيروز : استنى
نسرين : ايه تانى
فيروز : اوضة السفره جاهزه ولا لاء
نسرين : ادخلى شوفيها ... معرفشي
فيروز : ........ ربنا يهديكى
　
　
　
جرس الباب تانى عند نسرين
دخل يوسف اوضة اخته وقالها بصوت حاد وغاضب
يوسف : روحى افتحى لزمايلك انا مش شغال عندك بواب
نسرين : اوووف ... حاضر ... متشغلشي دماغك انت
وكملت نسرين لبسها ولسه الجرس بيرن
دخل يوسف اوضته وقفل عليه الباب وهو فى قمة الغضب من تصرفات اخته الى تغيظ
　
　
　
فيروز : ايه محدش عاوز يفتح الباب ولا ايه .... مممم يمكن مافيش حد فى البيت غير نسرين وهى بتلبس ... لا اخوها موجود .... يمكن نزل .... يووووه بقا جرس مزعج انا هقوم افتح الباب وامرى لله
　
　
فتحت فيروز الباب
سندس : روز ... عامله ايه
فيروز : تمام ... حد معاكى
سندس : اها ... ماجى طالعه ورايا استنى
وثوانى وجت ماجى ودخلوا اوضة السفره وجهزوها للدرس
فيروز بعد مابصت فى ساعتها : الاستاذ اتاخر انهارده وهو والولاد الى بياخدوا معانا
سندس : يعنى متأخروش كتير ... يادوب فات عشر دقايق على الميعاد ... والغايب حجته معاه
فيروز بتذمر : ده اسمه اهمال وعدم احترام المواعيد ... بكره كده
ماجى : اووووف وانا الى كنت فاكره نفسي اتأخرت وطلسقت فى لبسي ... بجد مش طايقه نفسي كده
دخلت نسرين وهو بتقول لماجى : ليه يا قمر مانتى زى الفل .... يابت انتى قمر من غير اى حاجه
ماجى : حبي ... دايما رافعه من معنوياتى
ترررررررن ... جرس الباب
فيروز : روحى افتحى يالى رافعه من معنوياتها ... عشان انا معنوياتى هتفرقع منكم خلاص
نسرين : ده اكيد الاستاذ .... انا هروح افتحله
　
　
　
　
　
بعد الدرس ........
الاستاذ : ده الورق الخاص بدرس انهارده صوروه وهاتولى النسخه الاصليه الحصه الجايه .... خليه معاكى انتى يافيروز
مدت ايدها واخدت الورق : فى الحفظ يا استاذ
　
　
　
قدام مكتبه لتصوير الورق والمستندات
واقف الجميع مستنى تصوير الملزمه
كالعاده واقف نسرين تضحك مع ماجى بصوت عالى ويتبادلوا الحوار والضحك
فيروز وهى فى قمة اليائس منهم : خلاص .... بجد حرام كده .. انا زهقت منكم.. مممكن كفايه فرجتم علينا الشارع كله
اتدخل ولد من المجموعه وقال : اصلا الشارع فاضى ومحدش فيه الى احنا
ردت عليه فيروز بنرفزه : وانت ايه الى دخلك يا سخيف
نسرين : فيروز ... براحه هو عملك ايه بس عشان تشتميه
سندس : خلاص يا جماعه حصل خير
رد عليها الولد : مين الى سخيف يا مزه ... ما تلمى نفسك وبعدين انتى تعلى صوت وتشتمى فى صحابك بس مش فيا
شده ولد تانى من المجموعه وهو بيهديه : خلاص يا محمود .... عيله وغلطت
اتنرفزت فيروز لما سمعت كده : مين دى العيله يا معفن انت
ماجى : في ايه ياله انت وهو ماتلموا نفسكم انتم مش عارفين انتم بتكلموا مين
فيروز : اسكتى بس كده يا ماجى اما نشوف اخرتها
محمود : هي هي لا بجد خفت وركبي بتخبط فى بعض
سندس : ارجوكم كفايه ... محصلشي حاجه عشان يحصل كل ده
ماجى : استنى ياسندس عشان العيال دى عاوزه تتربي
مسكت نسرين موبايلها وقالت بتهديد : انا هتصل دلوقتى با خويا يجى يشوف صرفه مع العيال دى
رد عليها ولد تالت من المجموعه : ان شالله تجيبي كل عيلتك ولا يهمنا
محمود : ا قسم بالله ... لولا انكم بنات كنت مسحت بيكم الارض دلوقتى
ماجى بطريقه شبه الردح : نــــــــــــــــــــــعم .... تمسح بمين ... قول تانى كده مسمعتش
محمود : اعملك ايه ان كان سمعك تقيل
ماجى ردت عليه وهى واثقه من كلامها : اقسملك انا بالله لاخلى يومك اسود ومطين بستنين نيله وهتيجى تتحايل عليا انت واهلك عشان اطلعك من الفحره الى هوقعك فيها ان شاء الله
دخل وقتها يوسف فى المناقشه ... جه بعد ما اخته اتصلت بيه على طول وهو فى قمة القلق
يوسف : فى ايه ... فهمونى ... مالهم بيكم العيال دى
نسرين : عيال مش محترمين وقليلة الادب
يوسف : عملوا ايه يعنى
ردت فيروز : بيتدخلوا فى الى مالهمش فيه معانا وانا ماسمحشي ابدا لاى عيل فيهم يتدخل بحرف معايا
بصلها يوسف نظره عميقه بعد كلامها ده
لاحظت فيروز مدى عمق نظرته ليها
يوسف وجهه كلامه لواحد من الولاد دول : مالك ياض منك ليه ... ما تلموا نفسكم شويه انتم جاين يتاخدوا درس ولا تاخدوا علقه متحلموش بيها
محمود : اييييه يعم انت ... ما تتلكم عدل ولا هو عشان انت اكبر مننا وفى منطقطك .... ماتلم اختك والبنات دول الاول وبعدين اتشطر علينا
ردت نسرين بعصبيه : انت ..... انت بتقول ايه هو احنا اصلا عملنا ليكم حاجه مش انتم الى ادخلتوا فى الى مالكمش فيه
يوسف وهو بيزعق : هوووووووووس ... مش عاوز كلام كتير ... يلا روحى على البيت وانت ياض انت وهو اختفوا من قدامى فورا ومش عاوز اشوف وشكم تانى والدرس خدوه فى مكان تانى
احمد : يلا يا محمود ... يلا بينا
مشيوا اخيرا ..... واخد يوسف اخته ومعاها اصحابها البنات وطلعوا شقة نسرين
　
　
　
يوسف : بصى بقا ... واسمعى الى هقولهولك .... لت وعجن النسوان الى عملتيه انتى واصحابك ده مش عاوز اسمع عنه تانى .... لو حد ضايقك سبيه وامشي على طول وتعالى قوليلى ... مش تقفوا تردحولوا فى الشارع ... مفهوم ... والكلام ليكم كلكم
قعدوا كلمهم مخرسين بعد الكلمتين الى اخدهم فى جنابهم دول
بعد ما مشي يوسف من المكان
ماجى : اوووف اخوكى ده رخم ... هى ناقصاها يملى علينا اوامره كأننا بنموت فى الخناق
فيروز : هو عنده حق ... الى احنا عملنا غلط كبير ومش لازم يتكرر
نسرين : مش انتى السبب ... يعنى كان لازم تشتميه
فيروز بنرفزه : انتهينا خلاص يا نسرين وانا قولت الى عملناه غلط ومش لازم يتكرر .... هه انا ماشيه ... يلا مع السلامه
سندس : استنى يافيروز ... انا كمان همشي ... سلام يابنات
نسرين وماجى : سلاااام ياقمرات
يوسف " اخو نسرين الكبير .... انسان حاد الطباع وقوي الشخصيه ... جاد فى تعاملاته وميحبش اللوع ابدا ويحب يمشي ضهرى "
　
بتفتح فيروز باب الشقه بتاع نسرين عشان تمشي
لقتيه جاى من الكريدون الى قدام باب الشقه
يوسف : انتم ماشين ؟؟
فيروز : ايوه ... عن اذنك
يوسف : اتفضلوا ... بس خدوا بالكم من نفسكم .... ولو حد منهم ضايقكم اتصلوا بيا فورا
فيروز : ...... اكيد
يوسف : ............
نفس النظره من يوسف ........
فيروز : يلا ياسندس ..... مع السلامه ومتشكرين اوى
يوسف : العفوا .... انتم زى نسرين ولازم اخاف عليكم
　
　
　
فى الشارع ... ماشيه سندس هى وفيروز للبيت
سندس : هو بيبصلك ليه كده
فيروز : قصدك يوسف
سندس : ايوه
فيروز : بجد مش عارفه
سندس : شخصيته قويه اوووى ... عامل زى اخويا
فيروز وهى شاردة الذهن : ايوه
　
　
　
الساعه 10 باليل فى بيت نسرين .....
قاعده قدام التلفزيون هى ويوسف واخوها الاصغر منه حسام ... ومامتها كانت فى المطبخ بتحضر عشا وباباها كان قاعد بيتكلم فى التليفون فى حاجه تخص شغله
فتح الموضوع حسام اخوها الاكبر منها بسنه بيستفسر عن الى حصل انهارده معاها وهى اصحابها مع الولاد الى اتخانقوا معاهم بتوع درس التاريخ
حسام : انا سمعت من ماما ان العيال الى بياخدوا معاكى الدرس ضايقوكى انتى وصاحباتك
نسرين وهى مندمجه فى الفيلم وبترد عليه بدون اهتمام : عيال ايه ؟؟
ادخل يوسف فى الحوار : مافيش حاجه يا حسام موضوع عبيط وانا حليته خلاص
حسام : حصل ايه اصلا
يوسف : اهو شوية عيال وبيعيشوا ايامهم
حسام : عملت ايه معاهم
يوسف : قولتلهم ماشوفشي خلقة واحد فيكم تانى والدرس خدوه فى مكان تانى ... بس اختك واصاحبها غلطانين مكنشي المفروض يقفوا يتخانقوا معاهم ... كان المفروض من البدايه يجيوا يقلولى العيال دى بتضايقنا وانا اتصرف .. لكن دول وقفوا ردحلهم وفى الاخر اتصلت بيا الهانم اختك
حسام وهو بيبص لنسرين : هى حره لو اتكرر الموضوع ده تانى
بصتله نسرين بغيظ وهى بترد عليه : يعم ايه الى انت بتقوله ده ... دول عيال مش متربيه وانا اعمل ايه
يوسف : الصراحه بنت واحد عجبتنى فى اصحابك
نسرين وهى مستائه : عارفه اكيد فيروز
يوسف : ايوه هى دى ... كانت حازمه اوى فى تعاملها واعترفت بغلطتها
بصتله باستغراب : وانت عرفت منين انها قالت اننا غلطنا وانت عندك حق
يوسف : غبيه انا مش قصدى كده وبعدين انا مسمعتش وهى بتقول كده ... انا كل الى قصدى عليه انها باين عليا بنت جد مش زى ماجى صاحبتك
نسرين : ومالها ماجى بقااااااا
يوسف وهى اتخنق خلاص : اسكتى خلاص ... دانتى مقرفه
حسام : مين فيروز دى ... انا شوفتها قبل كده

نكمل الحلقه الجايه

[PrinCesS Gege]

ميرسى ليكى يا سما بجد رووووووووووعه وفى انتظار الباقى

وانا سعيده ان انا اول واحده ترد عليكى

تقبلى مرورى

[.. בٓـيــًـًـًآءْ . .]

اقتباس:
المشاركة الأصلية كتبت بواسطة g d
ميرسى ليكى يا سما بجد رووووووووووعه وفى انتظار الباقى

وانا سعيده ان انا اول واحده ترد عليكى

تقبلى مرورى



مرسى g d
على مرورك الكريم
نورتينى ..

[.. בٓـيــًـًـًآءْ . .]

الحلقهـ الثانيهـ

نظرت عنيه .... مش مفارقه خيالى
قفلت باب اوضتها عليها ... ونامت على سريرها... مسكت موبايلها وضغط على رقمه ..... اتصال

...... : الووو
سندس بصوت خافت ورقيق
: ايوه .... عامل ايه
هو : سندس ... بجد انتى ... مش مصدق
سندس : هههه .... ممم الاول عاوزه اتاسفلك على الى حصل الصبح .. اخويا دخل عليا
هو : ايوه منا الحمدلله اتصرفت بسرعه
سندس : انا متشكره اوى ... بجد خلاص كنت ممكن اروح فى داهيه
هو : بعد الشر عليكى ... متقوليش كده ... ومتخافيش من اى حاجه طول منا معاكى
سندس : ............. .

　
　
　
　
فى اوضة فيروز ...... نايمه على ضهرها ونور الاوضه مقفول وفاتحه نور الابجوره جمبها ...
صافى : روز ... اقفلى نور الابجوره مش عارفه انام
فيروز : حاضر ياصافى
وقفلت الابجوره ... ولسه مفتحه عيونها سهرانه مش جايلها نوم ... مشغوله فى امر ما
فيروز فى سرها " ليه بصلى كده ... مش ممكن تكون نظره عاديه ... لو كانت مره واحده يبقى معلشي ... لكن مرتين وبوضوح ... مممم ... انا ليه مشغوله بالموضوع ده اوى كده ... انا بجد مابقتشي عارفه مشغوله بنظرته الغريبه ليا ولا مشغوله بيه هو ... بصراحه هو شخصيه جميله ومحترمه اوى ... شخصيه شاحه اوى اليومين دول ... مش زى الشباب التافهه الى بشوفهم ... ما علينا انا لازم احاول انام ... عشان المدرسه الصبح ... الامتحانات قربت وهنقعد فى البيت ونخلص من المدرسه دى خالص ... يامسهل يارب "

　
　
فى انفايت على النت كانو مجتمعين مع بعض
مذاكره مذاكره مذاكره
اووف زهقت .... احنا لازم نخرج يوم الخميس باى طريقه
سندس : مممم مابلاش نخرج الاسبوع ده الامتحانات قربت
فيروز : سندس عندها حق .... احنا المفروض نلم نفسنا شويه ونقعد نذاكر عشان بجد احنا استهبلنا اوى السنه دى
نسرين : لا بجد حرااااااام انا زهقت ... انا عاوزه شوية مرح .... عشان خاطرى نخرج الاسبوع ده
سندس : انتى حياتك كلها مرح ... المفروض تكونى زهقتى بقا
فيروز : انتى بتنفخى فى قربه مخرومه يا سندس ... والله كل واحد مش بينفع الا نفسه
نسرين : يييييييييه بقا ... انتم هتعملوا فيها بوليكا مكانتشي خروجه دى
فيروز : انا مش سامعه صوت ماجى هى فين
نسرين : موجا .... انتى فين يا مزه
سندس : يمكن مش موجوده ع الجهاز
فيروز : البت اتخرست خالص
نسرين : استنوا اعملها جرس ع الخاص
_
_
_
_
_
نسرين : مش بترد
فيروز : اوكى انا هقوم بقا عشان نازله مع اختى نشترى شوية حاجات عشان فرحها
نسرين : انتم كل يوم تنزلوا ما تشتروا الحاجه بالمره
فيروز : الحاجات كتير ومش هينفع نجيبها مره واحده
سندس : اوكى يا روز انا مستنياكى بكره نذاكر مع بعض
فيروز : اوكى يا سندس .... يلا سلام
نسرين : سلام يا قلبي
سندس : مع السلامه يا روز
خرجت فيروز من الروم
نسرين : هى فيروز جيالك بكره
سندس : ايوه ... ماتيجى انتى وماجى نذاكر سوا
نسرين : مظنش ماجى ترضى تيجى .... انتى عارفه انها بتتكثف تيجى عندك البيت عشان اهلك متدينين وكده وهى لبسها متبري منها
سندس : عادى مافيش مشاكل ... محدش عندى فى البيت بتدخل فى شئونى
نسرين : يا سلام ... با مارة حمزه اخوكى الى دخل عليكى وانتى بتكلمى صاحبك .... الا صحيح هو اسمه
سندس : على
نسرين : هى فيروز عرفت انك كلمتيه
سندس : مممم لاء محدش يعرف غيرك انتى وماجى ... مش عارفه ايه رد فعل فيروز لو عرفت
نسرين : هى اصلا مش بيعجبها العجب ... واكيد هتعترض وتقولك الكلمتين اياهم المعتاده عليهم ... ده شغل عيال ومراهقين واحنا لسه سننا صغير على الحورات دى وبعدين ده بيلعب بيكى وبتاع وكلام ملهوش لازمه
سندس : بس والله ده لطيف اوى ... نفسي تصدقنى ومتقولشي عليه بيلعب بيا وشغل مراهقين
نسرين : يابنتى مهما تقولى ... فيروز دى بايعه قلبها خالص ... دى مخلوقه غريبه
سندس : ابدا والله انتى متعرفهاش قدى ... هى بس مجمده قلبها وماشيه فى طريق واحد وهى هدفها الوحيد تخلص درستها قبل اى حاجه
نسرين : الحب لما بيجى محدش بيقدر يمنعه
سندس : فعلا ... انتى عندك حق
نسرين : انتى حبتيه ولا ايه
سندس : ممممم مش عارفه ... بس مظنش انى حبيته بالسرعه دى ... بس هو لطيف اوى واعترف ليا باعجابه وكلامه ليا بيقول انه بيحبنى
نسرين : وهو قالك بحبك

سندس : لسه
نسرين : ولو قالك بحبك هتعملى ايه
سندس : مش عارفه بجد ... انا خايفه
نسرين : متخافيش ومالكيش دعوه بفيروز وكالمها ولو بتحبيه قوليله ... يابنتى مافيش احلى من الحب وانك تكونى مع انسان بيحبك بجد
سندس : الى يجيبه ربنا بقا .... انا هقوم عشان اكمل مذاكره
نسرين : ربنا يعينك ... انا كمان هقوم عشان ماجى شكلها فطست مكانها ومبتردش
سندس : اوكى ... بايباي
نسرين : بايباي

　
　
　
فى اوضة ماجى .....
ماجى وهى حاطه موبايلها على ودنها ....
ماجى : ايوه ... اوكى ... زى ما تفقنا يوم الخميس عند سينما روكسي
............
ماجى : بايباي
نزلت التليفون من على ودنها الى احمرت من كتر الرغى كل الوقت ده
ماجى وهى بتبص فى الروم الى كان فى الانفايت مع اصحابها
ماجى : ايييييه ده ... كلكم خرجتم وسيبتونى ... كل ده بسبب رغيه وال انا بديه ميعاد .. اووف بقا .... هو انا مالى متضايقه ليه ... منا كنت هموت واخد ميعاد منه واخيرا حصل ... ماهو ده المهم اعمل الى فى دماغى وخلاص

خبت الباب على اوضتها ودخلت مامتها مبتسمه ابتسامه كلها حنان
ست سنها مش كتير اوى يعنى حوالى اربعين عام ... مظهرها شيك جدا وشكلها من الستات الى بيهتموا بمظهرهم ورشاقتهم لانها بتشتغل فى مجال الموضه

ماجى : مامتى وحشتينى رجعتى امته من بيروت
باستها مامتها من خدها واترمت ماجى فى حضنها
الام : وحشتينى خالص يا موجا ... اخبارك ايه ياحبيبتى
ماجى : تمام ... بس هكون تمام اكتر لو قولتيلى جيبتى ايه معاكى من بيروت
الام : اه عارفاكى انتى بتاعة مصلحتك دايما ... يعنى مامى مش وحشتك ولا حاجه
ابتسمت ماجى ابتسامه مكر وقالت
: لا لا لا ابدا يا ماما والله وحشانى كتير بس انا اتعودت على انك تجبيلى هدايا كل ما تسافرى بيروت
الام : اول ما عم صلاح يطلع الشنط هتشوفى مامى حبيبتك جابتلك ايه ليكى انتى ومارى ... امال فين مارى صح
ماجى : مارى خرجت مع اصحابها
الام : من امتى ؟؟
ماجى : يعنى بقالها حوالى ساعه ... ساعه ونص كده ... استنى اتصل بيها على الموبايل اقولها انك جيتى
الام : اوكى بس استعجيلها عشان وحشتنى اوى ... انا هروح اخد شاور واغير لبسي اوكى
ماجى : اوكى يا مامتى

　
　
　
خرجت الام من اوضة ماجى متجهه ناحية اوضة مازن ابنها الاكبر
خبطت على الباب .....
مازن من داخل الغرفه اذن لها بالدخول
: اتفضل
دخلت الام وعلى وشها ابتسامه صافيه حنونه لابنها مازن
مازن وهو متفاجىء بوجود امه وعودتها من سفرها
مازن وهو يقبلها
: حمد لله على سلامتك يا ماما
الام : حبيبي اخباره ايه ... وحشتنى اوى يا مازن
مازن : انتى وحشانى اكتر يا ماما البيت من غيرك مش حلو ... ياريت بقا تفضلى معانا ومتسافريش تانى
الام بنظره حزينه
: ممممم غصب عنى يا حبيبي الشغل مش سايبنى فى حالى
مازن باستياء
: يا ماما احنا محتاجينلك اوى ... كمان ماجى ومارى حالهم مش عاجبنى وكل واحده فيهم ماشيه ورا دماغها وبابا دايما مشغول فى شغله وثفقاته الى مبتخلصشي
الام : البركه فيك ياحبيبي انتى تغطي غيابنا وتاخد بالك منهم
مازن : انا مش مستعد ادخل فى معركه معاهم وبعدين انا مش بيعجبنى حالهم خالص ولو اتكلمت هتحصل مشكله وهتزعلى منى انتى وبابا ... عشان كده انا ماليش دعوه بيهم
الام : اخواتكم متربين كويس وانا واثقه فيهم زى ما واثقه فيك تماما .. متشغلشي بالك انت وخد بالك من نفسك ومن شغلك
مازن : انا مش شاغل دماغى بحاجه لان مافيش حاجه تستاهل اصلا فى الدنيا دى الواحد يشغل دماغه بيها
الام باستياء
: لا لا يا حبيبى مش عاوزاك تزعل ... انا هغير لبسي ونقعد سوا كلنا نتعشي ... اتصل بـ بابا واستعجله
مازن : خلى ماجى تتصل بيه ... انا ماليش نفس ... معلشي يا ماما انا مش بتعشي
زفرت الام انفاسها باستياء وهى متفهمه تماما دماغ ابنها مازن الناشفه ومتعوده على انطوائيته المعتاده وخرجت من اوضته متجهه ناحية اوضتها

　
　
　
　
كانت فيروز قاعده قدام كتابها وملازمها تذاكر بعد ما اجلت اختها صافى نزولة اليوم لبكره
قعدت تذاكر بملل شديد وهى مش مركزه ابدا فى الى بتقراه وتعيد وتزيد وهى سرحانه ومشغوله
هى نظرات عنيه مازالت شاغله دماغها وتفكيرها وموقفها عن التركيز فى مذاكرتها
فيروز : اوووف بقا ... مش عارفه مالى ... انا مالى مشغوله اوى بالمشهد ده ... فيها ايه يعنى اما يبصلى ... كأنى فرحانه انه بصلى وادنى اهتمام عن اى مره شافنى فيها ... وبعدين ايه الغريب يعنى هو شخصيه جاده ومعاملته مع كل اصاحب نسرين كده .. مش انا بس ... ماهو عشان كده اما بصلى حسيت انه غريب مش زى ماتعودت منه انه يفتحلى الباب واتفضلى وبس كده ... لا ده كان فى ما بينا حوار .... غير كل مره ... هو في ايه .. ماهو عادى انا مش شايفاها معجزه يعنى ... العيب فيا ولا ايه ... انا مالى مشغوله بيه اوى كده .... متنكريش انك معجبه بيه ... يالهوى ايه الى انا بقوله ده وال انا الى عماله اقولهم ده كلام فارغ واحنا لسه صغيرن واهم حاجه الدراسه وبس ... هو انا يعنى قولت بحبه انا بس معجبه بشخصيته مش اكتر ... مجرد اعجاب لا اكثر ... كبري دماغك بقا وقومى اعملى فنجان قهوه وركزى فى مذاكرتك بلا دلع بنات ..

　
　نكمل الحلقه الجايهـ
　
　

[Genius]

تسلم ايدك على الطرح الجميل
توبيك فى قمه الروعه والجمال

تسلم ايدك على التوبيك الرائع

[PrinCesS Gege]

تسلم ايديكى يا سما وفى انتظار الباقى

تقبلى مرورى

[.. בٓـيــًـًـًآءْ . .]

اقتباس:
المشاركة الأصلية كتبت بواسطة مهند محمود
تسلم ايدك على الطرح الجميل
توبيك فى قمه الروعه والجمال

تسلم ايدك على التوبيك الرائع



مرسى الك مهند على المرور
دمت بود..

[.. בٓـيــًـًـًآءْ . .]

اقتباس:
المشاركة الأصلية كتبت بواسطة g d
تسلم ايديكى يا سما وفى انتظار الباقى

تقبلى مرورى



مرسى ليكى
g d
على مرورك الكريم
دمتى بكل حب..

[.. בٓـيــًـًـًآءْ . .]

الحلقه " 3 "
غصب عنى .... مش بخطرى

فى تمام الساعه سابعه صباحا ..... كان واقف على منتظر انه يشوف سندس قبل ماتدخل المدرسه
وقفت سندس متسمره مكانها اول ما لمحته واتنفض جسمها وقلبها دون دين دونج
لاحظت فيروز وجوده ولا حظت ملامح سندس الى اتغيرت فجأه
فيروز وهى بصالها بصه غريب

ه : اييييه مالك فرملتى فجاه كده ليه ...

سندس وهى باصه ناحيته

: ابدا ...

فيروز وهى باصه ناحيته بصت غضب وغيظ

: مش هندخل المدرسه ولا ايه
سندس : يلا بينا .....

ودخلوا المدرسه ..... وقفوا فى حوش المدرسه شويه لحد ما الحصه الاولى تبدأ
وقفت فيروز تبصلها بتمعن ونظرات مش مريحه

سندس : اييه مالك يا روز بتبصيلى من الصبح ليه كده كأنى عملت عمله
فيروز : وانا لسه هستنى اما تعملى عمله

سندس بغضب هادى

: قصدك ايه يافيروز بكلامك
فيروز : انا عرافكى اكتر من نفسي واحنا عشرة سنين ياسندس ... عيب تخبى عليا بعد السنين دى كلها وانتى عارفه كويس انتى بالنسبه ليا ايه وقد ايه انتى اغلى صديقه عندى

سكتت سندس وبصت للارض بحزن وكسوف

فيروز : يعنى انا تخمينى صح انك مخبيه عنى حاجات

رفعت سندس عنيها فى عيون فيروز وهى بتقولها

: غصب عنى
فيروز : ازاى يعنى غصب عنك .... انتى هتكلميه فعلا زى ما هو طلب منك

سندس باستياء ردت وقالت

: منا .... منا كلمته خلاص

اتفزعت فيروز لما سمعت كده وردت عليها بنرفزه

: انتى بتقولى ايه ... يعنى ايه كلمتيه خلاص ... ازاى وليه ماقولتليش وامتى حصل كل ده ...

ضرب جرس اول حصه وكان مشرف الحوش بيزعق للبنات تطلع فصولها ...
بصت لها سندس وخلاص كانت قربت تبكى لما شافت فيروز بتزعقلها وحست انها فعلا ارتكبت جريمه زى ما فيروز معتقده انها عملت جريمه يوم ماسمحت لنفسها تكلم شاب ...
زفرت فيروز بانفاسها المخنوقه وقالتلها

: اوكى اطلعى على فصلك دلوقتى واشوفك فى الفسحه او بين الحصص اما نشوف اخرتها مع الى طلعلنا فى البخت ده ....

　
　

دخلت سندس فصلها وهى فى قمة الحزن وخلاص لو حد كلمها نص كلمه هتنفجر فى البكاء
قعدت على ديسكها بكل هدوء جمب نسرين من غير ماتقول ولا كلمه
اندهشت نسرين من حالها وسألتها

: مالك يا دودو ... شكلك معيط ولا ايه

كانت كاتمه دموعها بالعافيه وهى بتقول لنسرين

: فيروز عرفت انى كلمت على

ردت عليها نسرين باستنكار

: وايه يعنى اما تعرف هى هتتحكم فيكى ولا ايه فى الحاجه دى كمان

بصتلها سندس ودمعتها على خدها

: متقوليش كده فيروز عمرها ما تحكمت فيا بس هى بتخاف عليا اوى

　
　
　
　

كانت قاعده جمب ماجى مكتومه على الاخر وعفاريت الدنيا بتطنطت ..........

ماجى : مالك يا روزا متنرفزه ليه كده على الكشكول

هديت فيروز وهى بتتنهد تنهيده عميقه ورحمت الكشكول الى فى ايدها واتصفحته بهدوء اكتر

ماجى : فيروزززز .... مالك يا بنتى شكلك مضايقه من حاجه

فيروز بصوت خافت ومخنوق

: مافيش يا ماجى سبينى الله يخليكى

بصتلها ماجى بتمعن وهى بتلبيلها رغبتها

: حاضر يا قمر .... لو تحبي اسيب الديسك واقعد فى مكان تانى اوكى

زفرت فيروز بانفاسها مره تانيه وهى بتقولها بشوية عصبيه

: ياستى مش مستاهله انا بس ماليش مزاج اتكلم ... خليكى قاعده عادى

ماجى وهى متفهمه حالتها المزاجيه

: خلاص خلاص زى ماتحبي

　
　
　
　

فى تمام الساعه تمانيه صابحا ......

مع فنجان الشاي كان ماسك الجرنال بكل اهتمام يشوف الاخبار وقدامه المشروعات الى بيدرسها .....
رفع يوسف جاجبه باستعجاب من الخبر الى موجود فى الجرنال
يوسف ببنبرة اندهاش

: ايييييه حرام السعر غالى اوى كده ....سعر الحديد ده هيأثر اوى فى الشغل ... ربنا يستر ... الواحد يتوقع اى حاجه فى الايام الحلوه دى

دخلت عليه السكرتيره وفى ايدها ملف ........
وهى بتقدمه ليه

: المدير طالب من حضرتك دراسته
يوسف : اوكى حطيه هنا
السكرتيره : تؤمرنى بحاجه تانى

يوسف وهو بيبص لفنجان الشاى الى خلص فى ايده من غير مايشعر

يوسف : اذا سمحتى اطلبيلى فنجان شاى تانى
السكرتيره : حاضر .... بعد اذنك

　

خرجت السكرتيره من المكتب .....
قام زميله من المكتب الى قصاده وهو بيبص عليها ويهرش فى دماغه ....

حسين : مزه اوى السكرتيره الجديده الى جبهالنا

يوسف وهو مهتم بالجرنال الى فى ايده

: يا خبر ابيض ... الاسمنت كمان سعره طلع
حسين : اسمنت ايه الى انت بتتكلم عليه ... بقولك السكرتيره الجديده جامده اوى ... المدير زوقه اتحسن اوى عن الاول

بصله يوسف نظره خافته فيها شىء من الاستحقار

: خليك فى المشروع الى فى ايدك احسنلك
حسين : بس انا اموت فى المشروعات الى من النوع ده
يوسف : يا بنى اعقل واتجوز احسنلك طالما انت ميت اوى على صنف الستات بالشكل ده
حسين : لاء ياعم اتجوز ايه انا اروح للهم والنكد بنفسي ليه هو انا اتجننت
يوسف : هم ونكد ليه .... الجواز نص الدين وواجب على كل مسلم عاقل وقادر ... وانت مشاء الله عقل ومال وجاه
حسين : بتتريق يا جوو
يوسف : مممم وبعدين يا حسين انا مش قولتلك ميت مره بلاش جوو دى ... اسمى يوسف ... يوسف وبس


　
　

فى تمام الساعه التاسعه رن جرس الفسحه وانطلق الكل من الفصول وكانهم كانوا فى قمقم
كانت البنات اخر زيطه منهم الى بيرش على التانيه مايه واخر هبل والى بتشد فى شعر التانيه وتجرى والى ماشين يغنوا فى كريدون الفصول والى ماشيه تتمرقع وهى بتضحك زى الرقصات والى واقفين قدام الكنتين وعاملين اجدع طابور اطول من بتاع العيش المدعم .... ولا بيقضوا فترة الفسحه كلها فى حمام المدرسه وفاتحينه كوافير وفى قسم للمحجبات

خبطت بنت وهى بتجرى فى كتف فيروز .......
فيروز بنرفزه

: غبيه ما تهمدى وتبطلى تنطيت البراغيت ده

رجعت البنت وبصتلها بشر وشكلها بتدور على اى خناقه تسلى بيها نفسها
لحقت ماجى الموقف وشدت فيروز ومشيوا ناحية فصل سندس
دخلت ماجى وفيروز فصلها يدوروا عليها لاقهوها قاعده فى ديسكها وحاطه راسها على الديسك
قعدت ماجى جمبها بكل هدوء وحطت ايدها على ضهرها

ماجى : دودو ... مالك

قامت سندس وعنيها كانت محمره خالص .....

ماجى : ايه انتى كنتى بتعيطى ولا ايه

بصت سندس لفيروز الى كانت واقفه مربعه دراعتها وباصه فى ناحيه تانيه ... وبصت لماجى وهى مش قادره تمسك دموعها واترمت فى حضنها وفضلت ماجى تهديها
نطقت فيروز اخيرا وقالت

: اكيد بتعيطى علشان عرفتى غلطتك وندمانه عليها
ماجى : هو فى ايه ماتقلولي
فيروز : .............

سندس وهى مازالت بتعيط ردت بنبرة البكاء

: انا معملتش حاجه غلط يا فيروز عشان تعاملينى كده

بصتلها فيروز بحده وقالتلها

: انتى حره .... عن اذنكم انا رايحه فصلى

سابتهم وخرجت وماجى فضلت تنده عليا ولا ردت ولا حتى بصت وراها
خرجت فيروز من باب الفصل من هنا وكانت نسرين داخله بزجاجتين بيبسي من هنا

نسرين : فيروز رايحه فين

مردتشي عليها فيروز وكانت ماشيه بخطوات سريعه جدا وبعصبيه
راحت نسرين ناحية ماجى وسندس الى لقيتها بتعيط
سالتهم باندهاش

: هو في ايه .... فيروز مالها ... اتخانقت معاكى يا سندس ولا ايه

　
　
　

فى تمام الساعه اتناشر الضهر اتفتح باب المدرسه على مصرعيه وانطلقت البنات بعد جرس المرواح
كانو اخر ناس خارجين من الطلبه هما ماجى ونسرين وسندس .... اتاخروا فى الخروج لانهم كانوا بيدورا على فيروز

ماجى : احنا دورنا عليها فى كل مكان .... انا بقول هى اكيد سابقتنا وروحت لواحدها انتم مش عارفينها ولا ايه لما بتبقى مزاجها زفت
نسرين : ايوه فعلا انا معاكى يا ماجى ... خلاص يبقا نروح لحسن مش ناقصه كلام كتير من البنى ادمين اخواتى
سندس : اوكى انا هاخد تاكسي واروح البيت
ماجى : لاء استنى انا هروحك .... بنت عمى جايه تاخدنى عشان مروحه عندها البيت من بره بره .. اكيد هى مستنيانى على الناصيه ... هوصلك فى الطريق انتى ونسرين
نسرين : يبقا عملتى فيا معروف
ماجى : يلا اى خدمه ... عربيه جيب شروقى موديل 2006 كمان
نسرين : ياى تجنن هى دى الى هناك
ماجى : ايوه هى دى يا قروبه عرفتى ازاى
نسرين : عشان بنت عمك واقفه قصادها ... وانا شوفتها قبل كده فى عيد ميلادك
ماجى : ماشي يا زكيه يلا نروحلها

　
　

دخلت فيروز من باب البيت وهى على اخرها .......
دخلت على اوضتها فورا خصوصا ان مافيش حد فى البيت فى الوقت ده الى اختها صافى وكانت مشغوله فى المطبخ ....
غيرت هدومها ودخلت الحمام ... وبعد ما خلصت دخلت اوضتها وقفلت عليها الباب
فيروز وهى متعصبه

: ايه الى انا هببته معاها ده .... هوووف

خبطت صافي على الباب

: فيروز
فيروز : ادخلي ياصافى
صافى : ايه ياحبيبتى مقولتليش انك جيتى يعنى
فيروز : اصل مزاجى مش حلو خالص وانتى عارفه اختك بتبقى عامله ايه فى المود ده
صافى : وايه الى مش مخلى مزاجك مش حلو
فيروز : هه مش عارفه اقولك ايه بجد .... انا وسندس زعلانين من بعض
صافى : سندس الرقيقه ... طيب ليه كده
فيروز : كل ده عشان خايفه عليها من الواد الماسخ الى بيلف عليها
صافى : واد مين ولف ايه مش فاهمه
فيروز : طيب ياستى هفهمك وانتى احكمى

　
　
　
　

فى اوضة سندس .... كانت قاعده على سريرها بتعيط من الى حصل معاها انهارده من فيروز
تليفونها كان بيرن وكان رقم على ........ رن كذا مره ومردتشي
وفى النهايه مسحت دموعها واستجابة ليه وردت .........
سندس بنبرة بكاء

: ايوه ... على
على : ايه مالك .... انتى بتعيطى ولا ايه

سندس وهى بتحاول تظبط صوتها

: لا ابدا ... انا بس مضايقه شويه
على : من ايه بس ؟؟
سندس : اصل انا وصاحبتى زعلانين شويه من بعض
على : مين زعلان من التانى ؟؟
سندس : مش عارفه ... مش عارفه بجد
على : خلاص خليكى انتى الكويسه وابدأى بالصلح لو هى غاليه عليكى اوى
سندس : ايوه غاليه اوى
على : خلاص يلا قومى اغسلى وشك واتصلى بيها صالحيها
سندس : بجد ياعلى انت طيب وزوق اوى
" يارب تقدرك زى منا مقدراك وتعرف انت قد ايه انسان زوق ورقيق "
على : سندس ؟
سندس : نعم !!
على : انتى الى طيبه وحنينه اوى انا يابختى بمعرفتى بيكى .... انا بجد مش عارف اوصفلك مدى سعادتى قد ايه
سندس : .............................. " مكسوفه جدا "
على : وحشتينى اوى اوى
سندس : ............................. " هتموت خلاص مش عارفه تقول ايه ولا تعمل ايه "

　
　
　
　

بين فيروز واختها ............

صافى : بصي يافيروز ... انتى عندك حق تخافى عليها بس مش تزعقيلها وتبعديها عن الغلط بالطريقه دى ... لاء انتى تحاولى تقنعيها انها تبعد عنه بطريقه لطيفه منك وفيها خوف بحنيه مش بقسوه وامر
فيروز : والله حاولت اقنعها كتير لكن مافيش ... بس هى شكلها اتعلقت بيه وصعب اقنعها تبعد عنه
صافى : يمكن بتحبه ويمكن الولد كويس ويستاهل تتعلق بيه
فيروز : لاء يا صافى تتعلق بيه ازاى هى تعرفه اصلا ... ده يا دوب تعرفه من اول امبارح لما طلب منها تكلمه على رقمه وبعدين هى لسه صغيره على الكلام ده ومش عارفه اقنعها بكده
صافى : الحب يا فيروز لما بيجي مبيعرفشي صغير ولا كبير ولا يعرف شكل حلو ولا وحش ولا مكان ولا زمان ... بينزل على قلب الواحد ويخترقه من غير انذار ... الحب مشاعره رقيقه وحساسه اوى بتخرج من القلب للقلب متعرفشي المستحيل ولا حد يقدر يمنع وصلها لقلب العاشق
فيروز : ....................
صافى : يلا قومى صالحى صاحبتك مش مستاهله يعدى يوم وتنامى وانتم زعلانين من بعض اكسبي صاحبتك وابعديها عن الخطر بكل حب وحنيه وعقل
فيروز : هه ......... حاضر ياصافى انا هقوم اكلمها

　
　

رفعت فيروز سماعة التليفون وضربت رقمها ..........
كانت وقتها نهت سندس المكالمه مع على وهى فى منتهى السعاده من رقته ولطفه معاها وكل كلمه قالها مازلت بتتردد فى ودنها وعايشه معاها فى خيالها واخدها لسابع سما وراحت ناحية التليفون الارضى تتصل بفيروز ........ رن الجرس وكان رقمها على شاشة التليفون
اتفجائت سندس وهى بترفع سماعة التليفون

سندس : فيروز ...... انا .... انا ...
فيروز : ازيك ياسندس

سندس والدموع اتجمعت بسرعه فى عيونها

: انا لسه كنت هتصل بيكى اصالحك ......

فيروز قاطعتها

: دودو حبيبتى انا الى بتصل اصالحك
سندس : فيروز بس انا الى .....

قاطعتها تانى

: بس اسمعينى .... انا الى كنت غلطانه المفروض مكنتش اتعامل معاكى بالقسوه دى .... بس والله اعذرينى ... انا بحبك

سندس : وانا

بحبك اكتر والله
فيروز : غصب عنى خوفى عليكى طلع بصوره ضايقتك ومكنتش واخده بالى من تصرفاتى
سندس : انا بس عاوزه اقلك انى مش زعلانه والله منك وعارفه انك عملتى كده عشان خايفه عليا
فيروز : ربنا الى يعلم انا بخاف عليكى اد ايه لانك مش مجرد صديقه عاديه ... انتى حته منى وعشرة سنين واصدقاء طفوله بينا ذكريات وايام متتعوضشي ابدا ومش ممكن ازعلك ولا اخسرك مهما كان
سندس : ان شاء الله مافيش حاجه وحشه هتحصل وهنفضل دايما اصحاب وحبايب ... بس والله على الى انتى خايفه منه ده انسان فى منتهى الزوق والاحترام
فيروز : ياريت يا سندس يكون كده فعلا انا ياحبيبتى اتمنالك كل خير .... بس خدى بالك من نفسك كويس
سندس : ربنا يخليكى ليا يا احلى فيروز فى الدنيا كلها
فيروز : ويخليكى ليا يارب
سندس : .................
فيروز : مممممم دودو .... انا مضطره اقوم دلوقتى ... اشوفك بكره فى المدرسه
سندس : اوكى ... خدى بالك منك نفسك
فيروز : حاضر وانتى كمان ... يلا ياقلبي مع السلامه
سندس : سلام يا روز

　
　
　

بعد ما نهت فيروز المكالمه دخلت اوضتها طمنت اختها انها صالحت سندس وقامو حضروا الغدا وقعدت كلت هى وصافى

　
　
　
　
　

فى بيت بنت عم ماجى كانوا قاعدين قدام الاب توب والكام مفتوحه وبيراسلوا شاب ايطالى .......

ماجى : واو .... ده امور خالص .... اوعى تقفلى معاه
نادين : بس انا مش بعرف اتكلم ايطالى اوى الا بسيط ومش هعرف اتكلم معاه اكتر من كده ... وبعدين فكك فى احسن منه
ماجى : بس خساره ده امور خالص .... طيب شوفيه لو بيتكلم انجلش
نادين : لا لا لا فكك منه خالص هوريكى صورة واد احلى بكتير ... هتتهبلى عليه وايه كمان ميدن ايجيبت
ماجى بضحكه عاليه : هاهاهاهاهاى ميدن ايجبت صنع يدوي ولا ايه هههههههههه
نادين : هههههههههههه اها فى منه على فوشيا
ماجى : طيب ورينى خلى الواحد يفك الكبت الى عنده ... ده انا بشوف اشكال عندنا بيقفوا قدام المدرسه ..... يكرهوا الواحد فى عيشته
نادين : دى بواقى شباب ياماما ... هوريكى انا التقيل اصبري

فجأه

ماجى : استنى .. استنى كده دى نسرين فتحت ... هدخلها معايا انفايت لما نكلم الى انتى بتقولى عليه
نادين : اوكى ...

دبل كليك على اسم نسرين الى فى ميل ماجى وكلمتها

ماجى : هاى يا نوسه
نسرين : هاى يا موجا ... انتى عند بنت عمك لسه
ماجى : اها .. نادين ... هى جمبي وبتسلم عليكى
نسرين : الله يسلمها ... بوسهالى

امممووواه

ماجى : وهى كمان بتبوسك

امموواه
نسرين : استنى كده
ماجى : اوكى

　

فى بيت نسرين فى الوقت ده ........
جهاز الكمبيوتر فى اوضة يوسف وحسام اخوتها الصبيان ....

ماجى : انا لسه مسكاه دلوقتى يا حسام ارحمونى بقا مش عارفه اجى ناحيته

ادخل يوسف

: سيبها ياحسام تقعد شويه
حسام : ايه يعم انا ماليش فيه عاوز اعمل حاجه مهمه دلوقتى
نسرين : اوووف بقا ... وانا كمان ماليش فيه بعمل حاجه مهمه
حسام : وهو فين المهم ده غير انك بترغى مع صحابك
نسرين : مالكشي فيه وخليك فى حالك
حسام : بت انتى بطلى وخلصى فى دورك كده وقومى عشان عاوز اخلص الى فى ايدى

يوسف ادخل مره تانى وساب الى كان فى ايده

: يعنى انتم عاوزين ايه بالظبط انت وهى ... اطردكم من الاوضه كلها ولا اقوم اطربق الجهاز على بعضه ... حد فيكم يسيب الجهاز للتانى بالزوق بدل ماقوم اشد الفيشه وماشوفشي خلقة حد فيكم ... عاوز اركز فى الى بعمله

اتعصبت نسرين وكتمت غيظها وهى بتقفل ايميلها بعصبيا ورزعت الماس على المكتب وخرجت ...

　
　

نعود لماجى ونادين ...........

ماجى : ايه ده دى قفلت فجأه
نادين : يمكن النت فصل او حاجه
ماجى : يمكن .... تعالى ندخل احنا معبلى تيجى
نادين : اوكى .... هوريكى صورته الاول معايا ع الموبايل

خرجت الموبايل من شنطتها .... وطلعت صورت الشاب الى قالت عليه لماجى

نادين : اهى صورته ايه رئيك

تنحت ماجى شويه قدام الصوره مسبهله ............

نكمل الحلقهـ الجايهـ