رباعيات ( 1)

[دسوقى الخطارى]

رباعيات
--------
طبيب الطــــبابة يمتعال(1)
صبح الــــدوا مر قاسى
أفـــــعال حبايبى يمتعال(2)
والعقل لافف مــــراسى
------
طبيب الطبابة يمتـــعال(3)
أنا جرحى سببه القرايب
أمى تنادى يمـــــــــتعال(4)
وكــــــفاية بعد وغرايب
------
طبيب الطــبابة يمتعال(5)
وهات الدوا واللامــونى
حبيبى قاســـــى ومتعال(6)
خلى العـــواذل لامـونى
-------
طبيب الطبابة يمـــتعال(7)
وهات لى دوايا مــــراير
أتارى الصـحة لما تتعال(8)
يتهانوا ولد الحـــــــراير
-------
طبيب الطـــــبابة يمتعال(9)
أنا جرحى قاسى ومخفشى
والقلب مرضــان ومتعال(10)
وحبيبي باصص مشافشى
-------
يا عينى عمـــرك مشفتيه(11)
والبعد علة ومــــراضى
مرت سنيـــــــنك مشفتيه(12)
وهـــو بالبعــــــد راضى
------
في البعد قلــبى مناســـيك(13)
ع القلب غــــالى وعزايز
دا الحب فرض ومناســيك(14)
واسألنى لو كــــــنت عايز
----------------
1-، 5- ، 7- يمى تعال : تعالى ناحيتى 2- ياما تعل : تسبب عللا كثيرة 3- ، 6- ، 9- يا متعالى : يا مترفع 4- يا أمى تعال : يا ولدى تعالى - 8 – لما تتعل : عندما تمرض 10- متعال : مريض 11- مشفاتيه : لم تشفينه 12- لم ترينه 13- لم ينسك 14 – مناسك وشعائر