منتديات بنات مصر - تظبطنى ....... أظبطك

تظبطنى ....... أظبطك

تظبطنى ....... أظبطك
· صباح الخير يا عم سيد
· صباح الخير يا أستاذ
· واحد شاى يا عم سيد
· جاهز يا أستاذ
· خلى الباقى علشانك يا عم سيد
· دول خمسين جنيه يا بيه ... كتير ...!!!
· موش كتير عليك يا عم سيد
· يعمر بيتك و يرزقك برزق الحلال يا باشا
· عايز أسألك على حاجة يا عم سيد
· تأمر يا باشا
· المهندس محسن المدير أسهل و لا النائب بتاعه المهندس عطية ف التعامل ؟
· علشان أيه لومآخذة يا باشا . ؟
· عايز ترخيص أستغلال أرض م الوزارة و لازم هو و الأدارة عندكم توصى بالموافقة علشان الموضوع يمشى
· أقولك نصيحة أبعد عن عطية بيه ده راجل حنبلى
· تعرف يا عم سيد أن الأمام أحمد بن حنبل الله يرحمه و يرضى عنه مظلوم دايما معانا ده الله يرحمه أتحمل العذاب و الجلد و الهوان و ماكانش أبدا بيعقد الناس و لا عمره كان متشدد فى الحياه ... فقط فى أمور العقيدة و التوحيد لأن دى مفيهاش هزار .
· و الله ماعرف يا باشا ربنا يكفينا شر الظلم و الظلمة و كفاية اللى بنلاقيه ليل و نهار ف الشغل مظلوم و بننطحن بملاليم و ف البيت ظلم م العيال و أمهم اللى موش بيرحموا و لا داريين باللى انا فيه ... ما علينا أنا لقيت الناس بتقول كده و خلاص .
· ماشى يا عم سيد بلاش عطيه بيه طب و المدير ...
· لا محسن بيه ده راجل مفتح و سلكاوى و جدع ...
· بس ده مربى دقنه يا عم سيد ...!!!
· سبحان الله يا أستاذنا ... مال دى و مال دى يا باشا الراجل يؤم الناس فى صلاة الضهر ف الشغل و بيصوم تطوع كتير و كل سنة بيروح عمرة رمضان ميفوتهاش أبدا مهما حصل ...
· ما علينا يا عم سيد ح اروح دلوقتى له أسلم عليه و أشرحله الطلب و لما المكتب يفضى أبقى أراضيه
· يا خبر أسود ..... أوعى تعمل كده ..
· طب ليه يا عم سيد موش أنت اللى شورت عليا ...
· لوما آخذه يا بيه هو أنت جديد ف الشغل يعنى متآخذنيش موش عايز أقول غشيم كار لتزعل منى .
· ليه بس أنا لو غشيم كنت رحت عليه دوغرى و فعلا جت فترة كنت بعمل كده لقيت كل واحد فى أى منصب موش محتاج أسأل عنه أدخله على طول و أخلص نفسى ... كله كده يا عم سيد ... لغاية مرة ما واحد أحرجنى ... بجد الخير فيا و فى أمتى حتى الساعة رجعت أسأل تانى ...
· أصلك متعرفش المصيبة اللى حصلت هنا قبل كده
· أيه ؟؟؟؟؟
· عصام بيه المدير اللى فات الله يسمحله بقى كان راجل دكر و كانت أيامه أحسن أيام زقوا عليه واحد ابن حرام و صورته الرقابة جوه المكتب و من ساعتها و الناس بتكش ...
· يا خبر و حصل أيه ..؟
· الراجل يا ولداه من ساعتها ف الحبس و بقت فضيحة له و لولاده البنات المخطوبين ... بالذمة موش حرام ..
· حرام ليه بقى يا عم سيد هو موش مذنب و غلطان و أخد جزاؤه ..؟
· لا لا .. اسمحلى يا باشا ... ده كل الى مسكوه بيه 2000 جنيه .. الراجل يادوب دخله على قد مدير عام على وش وكيل وزارة بالفلوس دى و عمره ما كان بينسى حد من رجالته و كان على أيامه الأدارة منغنغة ..
· ده ما يبررش يا عم سيد أنه غلطان و أخد جزاؤه .. الحلال بين و الحرام بين ... و كمان الحق بين و الباطل بين ... و الصح قانونى بين و الغلط و الجرم بين ..
· ماشى يا بيه أنا معاك ... بس عصام ده أيه يكون وسط الناس اللى فوق البلد سمعت انهم بيبيعوها حتة حته .. أرض أرض.. و شركة شركة .. بيقزأزوا فيها يا بيه ذى اللب و السودانى ... لازم يقفلوا المحبس الكبير اللى بيخر صرارة الأول و بعدين يدورا ع النقط بتاعة عصام و اللى ذيه
· بقول ايه يا عم سيد .. عايز موضوعى ......
· تعرف يا بيه سمعت أن اللجنة بتاعة الرقابة أخدت مكافأة أكتر م المضبوطات باين عليهم لازم يعملوا قضية ذى ضباط المباحث لما يخلوا المخبر يحط ف جيب السواق الغلبان حتة حشيش علشان يضبطه و تبقى قضية ف ملفه .. و يسيب التاجر الكبير ...
· عايز اخلص طلبى يا عم سيد الله يرضى عليك .. موش عايز مشاكل
· تحت أمرك يا باشا
· توصفلى بيت المهندس محسن و أروحله .؟
· فكرتنى يا باشا بالمثل اللى بيقول " جه يكحلها عماها " .
· و الله انتى اللى حيرتنى بجد .
· شوف يا باشا ... اتفضل القهوة الأول بالهنا و الشفا ... انت عليك و على الحاج صلاح .
· مين الحاج صلاح ده .
· ده رئيس المخازن ممكن تقابله ف الجامع فى صلاة الضهر أو فى المخزن و تحكيله الموضوع و هو ح يظبطلك كل حاجة من بعيد لبعيد و لا تدخل للمدير أصلا ... أنت تدفع ف الطرقة ... تسيبهمله فى المخزن ... ورا البضاعة ف المخزن ... المهم موش يدا بيد و كله ح يبقى تمام ان شاء الله .. محسن بيه عمره ما يمسك فلوس ف أيده من حد .. اللى يتلسع م الشوربة يا باشا ..
· كتر خيرك يا عم سيد ..
· خلى بقى القهوة على حسابى يا باشا لتفكرنى طماع لا سمح الله .. لما الشاى بخمسين جنيه شوف بقى قهوة محوجة و ف كباية تبقى بكام .