السلام عليكم جميعاا
يارب تكونوا بخير كدا
ورجعت بعد غيااااب طويييل عريييض تانى
ومعانا حلقهـ جديدهـ من يلا بينا نفتكر ايام مدرستنا
ومعانا انهاردهـ
بنوته جميله الكل بيشهد بأدبها واخلاقها
دمها خفيف ومحبوبه وهاديه جدا
يلا نشوف قالت اى عن ايام دراستها
ومعانا
1\ايهـ بئا اجمل ذكريات الابتدائى؟؟ الذكريات كتير يا نونا 
بصي انا فاكره كل المدرسين وخصوصا مدرس القرآن كنت بحبه جدا بس كان بيزعق وكل ما يزعق اعيط يجي جنبي ويقولي يا سمسمه انتي بتحوشي دموعك لحصتي خلاص متزعليش انا اسف مش هزعق تاني كنت فاولى وتانيه ابتدائي لسه :079:
معظم ذكرياتي كانت مع مدرسيني لاني مكنتش بصاحب حد تقريبا
بردو مدرسه العربي كنت بموت فيها ومازلت بحبها جدا
كان اسمها مس امينه وكانت طيبه اوي
2\ياترى عمركـ غشيتى قبل كدا ف الامتحانات وبصرآآحهـ؟؟
على فكره طول عمري مش بعرف اغش
وكمان انا كنت فمدرسه اسلاميه وكانو معلمينا من صغرنا
انه من غشنا فليس منا
بجد مكنتش بغش ابدا ولا بغشش حتى بس سعات كان في بنات يصعبو عليا وابقى عايزه اغششهم
بس مكنتش بعرف وكنت بتقفش :079:
حد يعلمني الغش عشان افلح فالكليه دي :sml7:
3\عايزين كدا وصف لكل مرحلهـ ف حياتك الابتدائي والاعدادي عندي واحد كنت هاديه زياده عن اللزوم ومليش اصحاب ابدا مكنش ليا علاقه بأي حد بروح وبرجع كده وبحس بفرحه رهيبه اني راجعه البيت مكنتش اكره اد المدرسه مع انها كانت حلوة وخاصه ومدلعيني وكنت معروفه فيها لان بابا كان معروف جدا فالمدرسه هو وعمي معظم المدرسين من اصحابهم (( هو بابا وعمو دكاتره بس دول كانو اصحابهم فحاجات تانيه يعني مش زمايل دراسه )) ومع ذلك مكنتش بحب المدرسه بشكل عام ولا اي مدرسه هي كانت حكايه اني مش حابه بنات كتير بقى وكلام ودوشه وانا كنت هاديه بزياده حبتين تلاته قولي عشره 
دلوقتي انا اختلفت الى حد ما بسبب التعامل الاوسع وهدوئي اختلف عن الاول طبعا وبدأ فثانوي شويه بس كنت اعرف 3 بنات منهم واحده كانت صحبتي جدا ومازالت وكانت معايا من ابتدائي بس وقتها مكناش اصحاب يعني والبنتين التانيين كانو كده زماله مش اكتر من سلام وصباح بس ف اولى ثانوي قربنا جدا من بعض وبعد كده بعدنا تاني بحك الدراسه الا انا وريم فضلنا سوا والكليه عادي بردو معرفش فيها حد تقريبا مع نور طول الوقت وغير الكليه فأنا اصحابي قليلين جدا جدا تقريبا هم نور ورفيف وسمسم بشوفها كل فين وفين
4\اجمل مرحلهـ مريتى بيها كانت ايهـ وليهـ؟؟
كانت اولى ثانوي
بجد كانت سنه ملهاش حل
لعب وتنطيط مع انه مكنش طبعي
بس كانت محاوله خروج من جو الهدوء التام ف شخصيتي
فكانت سنه فاصله مشاغبه بقى الى حد ما بعتبرها كانت كده بالنسبه ليا
بس بعدها رجعت للهدوء تاني بس مش زي الابتدائي والاعدادي
يعني بقيت معقوله وعاديه
السنه دي خرجتني من جو الانطواء التام الي كنت عايشه فيه
5\حبيتى قبل كدا ف المدرسهـ ؟
لا محبتش يا نونا
هحب ايه بس يا بنتي
مكنش تفكيري كده خالص
بقولك مكنتش مصاحبه بنات
تقوليلي حبيت :198:
6\حد قالكـ قبل كدا انا معجب بيكى وكان رد فعلكـ ايهـ؟؟
اه
كان واحد فالشارع بتاع بيت جدو الله يرحمه
كنت بشوفه كتير واقف بس مكنش بيجي ف دماغي يعني
كنت عيله والله
مره رايحه لجدو وكنت لوحدي لاقيت الي بيوقفني بيقولي لوسمحتي هقولك حاجه بس والنبي ما تمشي
كان اكبر مني بحوالي 5 سنين كده
انا قولت ماله ده فبقوله طيب حاضر خير
انا قولت تعبان مثلا وعايز يسأل على بابا ههههههههههه
بجد مجاش فدماغي اطلاقا اي حاجه
المهم
قالي انا بقف كتير هنا
قولتله طيب انا اعمل ايه
قالي انتي مش واخده بالك
قولتله واخده بالي ازاي يعني وانا مالي ما تقف
قالي انا معجب ومش عارف ايه الكلمتين المعروفين دول
المهم لاقيت نفسي ببصله كده على اساس انه عبيط
ومشيت وطلعت لجدو
وسبتو على كده اعد ورايا محاولات 4 شهور
وفالاخر اتخنقت وقولت لبابا
راح قال لباباه بقى وكانت هتبقى مشكله
بس ربنا ستر الحمد لله والواد يعيني معتش بيظهر
وانا اصلا كان مرواحي هناك قل جدا
وبعدين بقى جدو توفى ومروحتش هناك تاني :D
7\ياترى شايفهـ ان حب المدرسهـ دا ممكن يستمر وينجح
ويبقى ف ارتباط ف الاخر؟؟
مش عارفه يا حنين والله
بس ده اكيد بيختلف من انسان لآخر
بس طبعا مش هنيجي لإبتدائي ونقول هينجح
لكن مش عارفه
8\صحاب المدرسهـ ذكرياتك معاهم ايهـ؟؟
انا حكيت فوق بقى مش فاكره ذكريات لأصحاب
لان مكنش في تقريبا
علاقات سطحيه جدا جد يعني تقريبا مش موجوده
لكن اولى ثانوي كان لينا ذكريات حلوة
فالسنه الغريبه الي قولت عليها دي
كنا تقريبا كل الحصص اعداها فحوش المدرسه
وكانت هنا فمصر لسه
مش بنحضر حصص وبنروح نظبط الغياب عند مدرسه الغياب :079:
مكنوش بيكلمونا بصراحه لناهم عارفين كانت درجاتنا نهائيه الحمد لله
بس بردو كنا مدوخينهم
يلا اهي كانت سنه غريبه الاطوار كده
بس كانت حلوة ودايما لما اشوفهم بالصدفه نفتركها مع بعض
بس افترقنا بقى
واحده اجوزت وهتخلف كمان يومين كده وهتجيب مازن
والتانيه فرحها الاجازه الجايه
وكده بقى يلا اهي دنيا ههههههههه
9\بما ان الزمن والدراسهـ بتفرق
بتيجى ع بالك ايام زمان؟؟
الى حد ما ممكن
بفتكر حجات كانت حلوة طبعا بس اكتر حاجه بفتكرها اول الابتدائي لاني كنت بحب المدرسين
والثانوي لانها كانت مرحله مهمه وقريبه
ففكراها الحمد لله
10\معظمنا بنقول ياريت ايام زمان ترجع
الواحد مش كان حاسس بمسئوليهـ
ياترى نفسكـ ترجعى لايام زمان ولالا؟؟
زمان لإعدادي وثانوي وكده لا اصل كل مرحله وليها جمالها وعيوبها ولازم هنعيشها يعني ارجع للأول وابدأ المشوار تاني خليني اخلص احسن بس لو حبيت ارجع احب ارجع طفله خالص بقى 
احلى من الابتدائي والاعدادي والثانوي والكليه
11\كان عندكوا ضرب ف المدرسهـ وياترى رأيك ايهـ ف ناس فعلا بتبقى محتاجه للضرب علشان تذاكر وناس بيجى معاها بالسلب كنتى من اى نوع؟؟ لا مكنش عندنا تقريبا مش فاكره ان كان في ضرب ابدا طبعا في ناس مش بتيجي الا بالضرب لكن فالدروس كان في ضرب والحمد لله منضربتش ولا مره الا مره واحده كنت غايبه والمدرس كان بيحاسب على الضرب تعبت وماما اتصلت بيه كتير كان موبايله مغلق وضربني فالحلصه 
كانت اول مره وبجد كانت بالنسبه ليا مأساه وكنت فأولى ثانوي وبهدلت الدنيا بعدها وكانت مشكله وزعلنا انا وهو فتره كبيره مكنتش بكلمه لو اتنطط قدامي وجه صالحني بردو مراته جت قالتلي متزعليش كانو بيحبوني يا حننينو والله مع اني مكنتش بتكلم اساسا الا نادر :003:
12\احكيلنا عن ايام الثانويهـ العامهـ بئا شايفهـ ان الضغط ال بيبقى ف البيوت دا بيبقى كويس ولالا؟؟ الى حد كبير بيكون كويس لانهم سنين مصيريه بس انا مع ان مهما الواحد ذاكر بيحتاج ترفيه عشان عقله ميفوتش 
فلازم يكون في شده وحزم وفي بردو شويه دلع وخروج يعني عشان الواحد ميكرهش نفسه
13\مناهج الثانوى كبييرهـ طبعا وكلنا بنذاكر بهدف الامتحان بس
مش لهدف الاستفادهـ بدليل لو سألت حد بعد الامتحان عن اى حاجهـ
هيقولك مش فاكر
ايهـ رأيك ف الحكايه دى؟؟
الى حد كبير كلنا كنا كده
انا كنت بحب المذاكره جدا (( متعرفيش دلوقتي مالي مش طايقاها ليه هههههههههه))
ومع ذلك مفكرتش استفيد بشكل كبير من المعلومات
يعني كنت بذاكر وبمتحن
ولا حد يسألني تاني فحاجه
وده غلط كبير طبعا
وكلنا محتاجين تأهيل من جديد ف الموضوع ده
ان التعليم مش امتحانات
ده علم والعلم المفرض نطبقه فحياتنا ونستفيد منه
13\رأيك ف نظام التعليم دلوقت ايهـ؟؟
فاااااااااااشل واحنا كمان طلبه فاشلين
احنا لسه كمجتمع مفهمناش معنى التعليم الصح ولا يعني ايه اكون انسان واعي
من اول دكتور الجامعه لحد عم محمد البواب
14) ايه المادة الى كانت مفضله ليك و ليه ؟؟ و العكس
كنت بحب الفيزياء والرياضه اوي
كنت عايزه ادخل هندسه جدا
بس طب كان حلم ماما
فقولت خير الامور الوسط خليني اسنان بقى :yuck:
كنت بكره بقى الاحياء
كنت بنساها ومش بعرف احفظها
وكل امتحان احياء اعد خزينه واقول مش هنجح فيها
بس الحمد لله لاني كنت بخاف منها كنت بذاكرها كتير
وجبت فيها الـ50 :762:
15) مين المدرس الى كنت بتكرهيه جداااا و ليه ؟؟
لا مكرهتش حد
بس مدرسه الاحياء مكنتش برتاح فيها
وكمان انا مصريه وكنت فالسعوديه
وهي مكنتش بتحب المصريين اوي
فكان دايما بنا حساسيه كده فالتعامل
وكانت دايما تحاول تنزلني فأعمال السنه
بس فالاخر لما لقت مفيش فايده ومش عارفه تمسك عليا غلطه
وحظها ان اختها كانت مدرسه معايا وكانت بتموت ف حاجه اسمها سما
لدرجه انها بتكلمني لحد دلوقتي من هناك
فإستسلمت للأمر الواقع بقى وريحت دماغها مني
اكيد فطوم حبيبي كان ليها دور
فاطمه دي مدرستي واختها بس بجد ليها معزه كبيره عندي
16) زورتى مكتب المدير قبل كدة و كنتى عامل مصيبة ايه ؟؟
مره كنت مخالفه فاللبس
كنت لابسه بنطلون وبلوزه كده
وكان اليونيفورم بتاعنا معاه دريل قصيل
مكنتش لابسه الدريل
وكانت مدرسه بقولك اسلاميه وبيدايقهم اوي الموضوع ده
فبعتو كل المخالفين للمدير
بس عادي معملش حاجه
قالنا انتو بنات واللبس ده مينفعش
(( والنبي يا نونا كنت ف4 ابتدائي يعني عادي))
17)اخدتى فصل قبل كدة من المدرسه و كان كام يوم و ايه السبب ؟؟
لا خالص ^_^
18) اكبر علقه اخدتيها فى المدرسه و مين ادهالك و كان ايه السبب ؟؟
لا مخدتش علقه من حد ال علقه ال
19) اوصفى نفسك فى كلمه واحدة كنت تلميذه ...........
كنت تلميذه ممممم
مش عارفه بس كنت كويسه
هاديه بس شاطره الحمد لله
20) كان الزى الرسمى بتاع مدرستك لونه ايه و عبارة عن ايه ؟؟
الابتدائي كان كحلي ف روز
بنطلون ودريل قصير كده حكلي
والبلوزه روز
الاعدادي كان رصاصي فاتح ف رصاصي غامق
اولى ثانوي كانت بني والبلوزه بيضه
وتانيه ثانوي كان اخضر بلوزه بيضه بردو
واتالته ثانوي كان سماوي بردو زيهم البلوزه بيضه
21) شلتى مادة قبل كدة
لا الحمد لله
انا كنت من الاوائل يا بنتي
ميغركيش الكليه والي ع
ملاه فينا
كنا زمان ما شاء الله علينا حلوين واوائل المدرسه على طول :445:
22) اوصفى ايام مدرستك فى كلمة واحدة كانت ...........
متنوعه
23) لو قالوك ترجعى لأيام المدرسه تقولى ايه ؟؟ لا مش عايزه ارجع
24 ) ايه رأيك فى التوبيك و تقول ايه لصاحبة التوبيك ( العبده لله ) ؟؟
حلو والله فكرني بحاجات كتير كده والي فات
خلاني عماله احكي كأني بحكي مع نفسي
سعيده بيه وبيكي يا حنين
انا صحيح متعاملتش معاكي
بس اسمع عنك كل خير
ربنا يوفقك ويوفقني ويوفق الجميع ان شاء الله
:sml2:
وبكدا الحلقهـ تكون خلصت
نورتينى ياسمسم وعجبتنى اجاباتكـ جدا
وفعلا ايام الكليهـ خبنا عن زمان معرفش ليهـ
يارب تعجبكوا بئا
والى اللقاء فى حلقهـ قادمهـ
كانت معكم
حنيين