[ابتسامة الزهر]

دول بيقولو ا المغنى حرام حتى كمان التليفزيون أقفل بابك على شباكك عيش مع نفسك عيش مسجون قلت طب أقدر أسمع راديو قالوا مش فارق كله مجون قلت اسمح لى أقرأ جريدة قالوا كلام فارغ أو دون قلت أنا نفسى أشرب أزوزة قالى حيكون عليها دهون حتى كمان البنك حرام ان كنت مسلف او مديون قلت وفين راح أحط فلوسى قال البيت ده مكان مضمون قلت أخاف والنبي ليضيعوا قالوا مُقدر منذ قرون قلت مراتى كسلانة تصلى قوم طلقها كله يهون قلت عندى طفل وطفله قال اضربها بأيد الهون قلت مشاعرى ما تتحملشى قالى مشاعر ايه يامجنون دى الستات عورات فى البيت تخرج بس فى يوم العيد قلت الشغل يجوز لحريمنا قال الشغل مصيبة اكيد اوعى تخش استديو مصور هما اشد الناس فى النار قلت تقصد الاصنام قالى واش دراك ياجبان انت ها تفهم اكتر منا ؟ واحنا البرره ولاد ابرار قلت بطاقتى عليها الصورة قالى اخلعها بلاش تحتار والبرواز فى البيت متعلق قال لى نضمك للأشرار قلت اسمح لى اصلى فى بيتى عندى مشاغل ليل ونهار قالى صلاتك مش مقبولة ربك ما بيعرف اعذار احسن سيبها وبطل تركع يابنى طريقنا ما فيهش هزار قلت الدين بيقول اتعلم قال اتعلم فى القرأن قلت الدولة حتبقى مشايخ قالى ومالو وحتى الجان قلت ومين راح يبنى بلدنا قالى وايه لزمة بنيان قلت ومين حيطبب ابنى قالى الطب النبوى ضمان قلت الطب كمان اتطور قالى ده بدعة ما كنش زمان قلت عدوى بيتربصلى عنده سلاح نووى وطيران قال التقوى حاتقضى عليهم اهجم والبس له قفطان قلت ملاحظ انك نايم شوفلك شغلة فى اى مكان قاللى الرزق حا ييجى لوحده هو حا يوصل وانا نعسان ثم الوقت معايا قصير طول الليل فى صلاة وقرآن قلت الشغل كمان ده عباده قالى حديث واهى وضعفان قلت ظلمتوا الدين وياكم فُوق بقا واصحى وكون انسان قال سنقيم الحد عليك كونك تدعوا للعصيان