الو هانى معايا
لو عايزانى هانى مفيش مانع
يعنى مش انتا هانى اصل دا رقمه متسجل عندى
مانا بقولك لو عايزانى هانى مقدرش اقولك لا
طيب انا اسفه الرقم شكله غلط
لا والا يهمك عموما دا رقمى
طيب انتا الرقم دا جبته جديد
لا دا معايا من زمان انتى مين
انا زميله هانى
ماتسيبك بقى من هانى والكلام دا
شكلك فاهم
اكيد فاهم انتى مين وعايزه ايه
انتا فى منتدى ( بنات مصر )
تمام
واسمك فى المنتدى ( عاشق متيم )
بيقولو
والنبى معرفتك شكلها حلوه وفتحه خير
ههههههههه انتى احلا بس خير
والنبى يا خويا ( مورشو ) قالى لازم نعمل حلقه جديده قولتله لازم نجيب ( عاشق متيم )
اهاااا طيب والحلقه عن ايه يعنى
( البنات الشمال يا خويا )
اعوز بالله ومالقتوش غيرى انا ههههه
انا قولت اعرف منك يا خويا واسمع منك
تعرفى منى ايه وتسمعى منى ايه انتى كدا هتدى للاعضاء فكره
شمال عنى
والنبى ماحد هيقول حاجا احكيلى احكيلى وقولى قابلت بنت كدا قبل كدا
بصى انا مره عاكست بنت ومكنتش عايزه ترد عليه
اه وعملت ايه اوعا تكون سبتها
لا طبعا مشيت جنبها وشبكت صوابعى فى صوابعها
وطبعا سكتت ومقلتلكش حاجا
اه انتى عرفتى منين
كمل ياخويا كمل
المهم بعد كدا قولت لما احط ايدى على كتفها
اه ولقتها ساكتا برضو
اه قولت لا بقى هعمل الى انا عايزه معاها
اه حقك والنبى وبعدين كمل
بعد كدا بصتلها ضحكت ومسكت شعرها ولعبت فيه
اه والنبى وكان لعب جميل فكرنى بـ ( ابو تريكه )
ياستى فكرك ايه بس انا بكلم عنى انا
اه نسيت معلش كمل كمل
بعد كدا قولتلها ماتيجى ونجيب مليجى
ساعتها قالتلك ( مش هروووح عشان مانجبش فتوح )
ايه دا ايوه فعلا دا الى حصل معايا
والكلام دا كان فى مدينه نصر عند ( سيتى ستارز )
ايوه بالظبط انتى عرفتى منين
كمل وبعدين
بعد كدا روحنا قعدنا فى جنينة
ايوه وحاولت برضو تمسك ايديها
لا محصلش
لا حصل ههههه وكمان قولتلى احنا جايين نقضى ساعتين
بلاش ايه كمان وبعدين انتى عرفتى كل دا ازاى
اصل انا الى كنت معاك دى ههههههه
ينهار ابيض انتى ازاى
بس والنبى ماكنت اعرف انك عاشق
طيب خلاص بلاش تقولى الكلام دا فى المنتدى
لالالا ماتقلقش انا هقول لمورشو بس
لا دا بينزل على طول اى حاجا ومبيقطعش
بينزل ايه ومابيقطعش ايه قصدك ايه يعنى
الكلام قصدى الكلام بينزل الكلام زى ماهو من غير ما يقطع حاجا
عموما انا هقوله نزل الكلام دا ونعرضه على الاعضاء
اه وبعدين
ونشوف ايه رئيهم فى البنات دى الى ممكن من مقابله صدفه تتعرف وتخرج وتسمح للولد انه يحط ايده عليها واكنها تعرفه من زمان .
وممكن بعد الخروجه دى والا يكلمو بعض بعد كدا وهى تانى يوم تشوف شاب غيرة .
دى بنات بنشوفها فى جميع الاماكن والكلام دا بيحصل فعلا وسواء الولد او البنت دى بيقضو مع بعض ساعتين وشكرا انتو ايه رئيكم فى البنات دى والعيب فى مين بالظبط الولد والا البنت .